Lisin 2

Gâd ba ya sa ki?

Gâd kasakkira ba ya, bara nina dia sa ki? (1, 2)

Dia sat wîna daukra brisa ki? (3)

Ani nani ba ai daukanka kau painkira sa ki? (4)

Gâd ra mayuni bara, aidul sat ailal ba yus munaia sa ki? (5)

Dia tnatka wal ra Gâd dukyara lan takaia sip sa ki? (6)

1. Upla nani ba diara ailal ra mayunisa. Sakuna Baibil bila Gâd KASAKKIRA kumi baman bara sa wisa. Heven bara tasba ra diara nani bara ba sut paskan, bara rayaka wankan ba mita witin ra baman mayunaia sa (1 Korint 8:5, 6; Param marikan [Reveleshan] 4:11).

2. Gâd ra nina sat sat makisa, ban sakuna ai nina pali ba kumi baman sa: JEHOVA. Baibil ailal ra Gâd nina ba diki “Dawan” apia kaka “Gâd” mangkisa. Ban sakuna, Baibil ba ulban pyua ra, Jehova nina ba aima 7.000 baku taki kan (Impakan sturka 6:2 [wahya mina ba], 3; Lawana 83:18, Salmo Lawana nani 1960).

3. Jehova wîna daukra kum brisa, sakuna yawan wîna daukra baku lika apia. Baibil bila: “Gâd ba spirit sika” (Jan 4:24). Spirit rayaka satka ba yawan rayaka satka ba wal kau purara sa. Gâd ra tasba uplika kumi sin kaikras. Jehova heven ra iwisa, sakuna diara sut kaikaia sip sa (Lawana 11:4, 5; Jan 1:18). Bara spirit hulikira ba dia sa ki? Gâd baku upla kum apia sa, Gâd karnika sa bara ai kupia laka daukaia dukyara yus munisa (Wark nani 1:8).

4. Baibil ra, Jehova dia sat uplika ba param wan marikisa. Bara latwan laka, kasakka laka, sins laka bara karnika laka ba, Gâd daukanka kau painkira nani sa wisa (Kli smalkan 32:4; Job 12:13; Aiseya 40:26; 1 Jan 4:8). Baku sin umpira kakaira, kupia painkira, padin mamunra, kupia pihnikira bara wihka bila kakaira sa wisa. Luhpa bila wawalra nani baku, witin dauki ba kat yawan sin daukaia sa (Epesus 5:1, 2).

5. Yawan baui aidul sat sat ra wan pura suni mayunaia sa ki? Apia pali! (Impakan sturka 20:4, 5.) Jehova bila witin ra baman mayunaia sa wisa. Upla bara diara wala nani ra ai prana yabras. Baha purkara, aidul nani ba help wan munaia karnika kumi sin apu sa (Lawana 115:4-8; Aiseya 42:8).

6. Dia tnatka nani bak Gâd ra kau pain kakaira takaia sip sa ki? Tnatka kum ba sika, diara nani paskan ba kaiki witin dukyara dia wan wi ba ra pain luki kaikaia. Gâd paskanka nani ba wan marikisa witin ba karnakira bara sinskira sa. Ai latwanka laka ba diara nani sut paskan bara kaikisa (Lawana 19:1-6; Rom 1:20). Tnatka wala ba sika, Baibil stadi takaia. Baku lika Gâd tanka ba kau lan takaia sip sa. Witin dia sat Gâdka sa sapa Baibil ra ulban sa. Baku sin ai kupia laka ba bara yawan dia daukbia want ba sin wan wisa (Emus 3:7; 2 Timoti 3:16, 17).

 [Wahya 5 lilka nani ba]

Diara nani paskan ba bara Baibil bakku sin Gâd dukyara lan takisa