Lisin 3

Jisas Kraist ba ya sa ki?

Dia muni Jisas ra Gâd Luhpia “tawahkia” makisa ki? (1)

Dia muni “Bila ba” makisa ki? (1)

Dia muni waitna baku Jisas tasba ra balan ki? (2-4)

Dia muni sain nani daukan ki? (5)

Tisku kaina pyua ra Jisas dia daukbia ki? (6)

1. Jisas kau tasba ra balras kainara, spirit uplika baku heven ra iwi kan. Jisas ra Gâd mita pas paskan; baha mita Gâd Luhpia “tawahkia” makisa (Kolosi 1:15; Param marikan 3:14). Jisas ra baman Gâd mita yakan silp paskan. Jisas kau tasba ra balras kainara, Jehova ra help munan heven bara tasba ra diara sut bara ba paskaia (Sins laka 8:22-31; Kolosi 1:16, 17). Baku sin Gâd mita ai bila twatwilkra baku yus munan. Baha wina Jisas ra “Bila ba” makisa (Jan 1:1-3; Param marikan 19:13).

2. Gâd ai Luhpia ba tasba ra bliki, rayaka ba Meri plauya ra laki mangkan. Baku bara, Jisas aisika ba tasba wina apia kan; baha mita saurka laka ba witin wîna ra apu kan. Gâd ba Jisas ra tasba ra blikan diara yuhmpa dukyara: 1) Gâd tanka kasak ba wan smalkaia dukyara (Jan 18:37), 2) Gâd ra kasak kaia bara baku dauki yawan sin daukbia (1 Pita 2:21), bara 3) ai rayaka yabi saurka laka bara prura wina sin pri wan sakaia. Dia muni ai rayaka ba yabaia kan ki? (Matyu 20:28.)

3. Pas waitna Adam ba, Gâd bila lulkan bara, Baibil bila “saurka laka” daukan wisa. Baku bamna Gâd mita prubia win (Blasi sturka 3:17-19). Witin Gâd lâka kat dan iwras kan ba mita, kasakkira apia ra tauan. Adam tawa tawa almuk taki pruan, bara saurka laka ba ai luhpia nani sut ra laki yaban. Baha mita yawan sut sin almuk bara siknis taki pruisa. Nahki upla ra swaki sakaia sip kan ki? (Rom 3:23; 5:12.)

 4. Adam baku, Jisas ba kasakkira kan. Sakuna tanka kum ra lika sat wala kan, Jisas ba traika kaikanka munuhtara kabia sin, ban Gâd bila wali kan. Baku bamna, tasba ra Jisas rayaka kasakkira bri kan ba yabi, Adam saurka ba mana aibapaia sip kan. Naha daukanka na Baibil ra “pri sakaia mana aibapan ba” makisa. Baku tnatka ra, Adam luhpia nani ra prura pâtka ra dingkan ba wina pri sakaia sip kan. Jisas ra kasak luki nani ba lika, ai saurka ba swih tiki raya ban kaiara iwaia sip sa (1 Timoti 2:5, 6; Jan 3:16; Rom 5:18, 19).

5. Jisas tasba ra kan pyua ra, siknis nani ra rakan, plun dauki kan nani ra dakakan bara pasa tara nani lamni daukan. Pruan kum kum nani ra kat sin raki bukan. Dia muni sain nani daukan ki? 1) Pât wauhwi kan nani ra umpira kaiki help munaia want kan. 2) Sain nani daukan bara, witin Gâd Luhpia kan ba marikan. 3) Jisas tasba purara King aimakbia pyua ra, bila wali uplika ba dukyara dia daukbia ba sin marikan (Matyu 14:14; Mark 2:10-12; Jan 5:28, 29).

6. Jisas pruan ningkara Gâd mita spirit uplika baku prura wina bukan, bara kli heven ra taui wan (1 Pita 3:18). Baha wina Gâd bui King mangkan. Tisku kaina pyua ra Jisas mita saurka laka bara pât wauhwanka sut ba tasba wina diki sakan kabia (Lawana 37:9-11; Sins laka 2:21, 22).

[Wahya 7 lilkika nani ba]

Ai warkka taka kum baku Jisas ba smalkan, sain nani daukan bara yawan dukyara ai rayaka kat sin yaban