Lisin 11

Lukanka bara daukanka nani Gâd yamni kaikras ba

Dia sat lukanka bara daukanka nani saura sa ki? (1)

Gâd ba Kumira Yuhmpa sa ki? (2)

Dia muni kristian rait aihwa nani ba Krismis, Istar Sandi bara aisubanka yua liliaka dauki bangwras sa ki? (3, 4)

Upla pruan mita raya nani ra saura munaia sip sa ki? (5)

Jisas ba dus prihni kum ra pruan ki? (6)

Dia kulkanka brisa Gâd yamni wan kaikbia ba? (7)

1. Lukanka bara daukanka nani sut ba lika saura apia sa. Ban sakuna, rilidian kuninkira wina bali ba apia kaka Baibil smalkanka ba mapara sa kaka, Gâd mita yamni kaikras (Matyu 15:6).

2. Gâd Kumira Yuhmpa: Jehova ba Kumira Yuhmpa sa ki, wibia sa kaka, Gâd kumira upla yuhmpa sa? Apia pali! Jehova, Aisa ba, “Gâd kumi baman kasakkira” sa (Jan 17:3; Mark 12:29). Jisas ba Ai Luhpia tawahkia sa, bara Gâd mina munuhtara sa (1 Korint 11:3). Aisa ba kau tara sa Luhpia ba wal (Jan 14:28). Spirit hulikira ba upla kum apia sa, Gâd karnika sa bara ai kupia laka daukaia dukyara yus munisa (Blasi sturka 1:2; Wark nani 2:18).

3. Krismis bara Istar Sandi: Jisas trisu (diciembre) katka 25 ba aisubi takras kan, waupasa (octubre) katka yua pas ba lamara aisuban, baha pyua ra syîp main kakaira nani ba tihmia twi bilara ai syîpka nani ra main kaiki kan (Luk 2:8-12). Jisas mita kristian nani ra wiras kan ai aisubanka yua ba kulkbia. Ai pruanka yua ba lika kupia krauki kulki bangwbia win (Luk 22:19, 20). Krismis daukanka nani ba, patitara rilidian kuninkira nani wina balisa. Istar Sandi daukanka nani ba dukyara sim baku sa. Blasi pyua kristianka nani ba Krismis bara Istar Sandi ba kulkras kan. Naiwa kristianka nani ba sin daukras.

4. Aisubanka yua: Aisubanka yua liliaka dukyara Baibil ra aima wal baman taki ba, Jehova ra mayunras uplika nani daukan aisisa (Blasi sturka 40:20-22;  Mark 6:21, 22, 24-27). Pas kristianka nani ba aisubanka yua kulkras kan. Baha daukanka nani ba patitara rilidian kuninkira nani wina balisa. Kristian rait aihwa nani ba pyua wala ra pana pana prisant yabi lilia lui bangwisa.

5. Pruan nani ra sibriaia: Pruan nani ba diara sip daukras bara ai dara sin walras. Yawan witin nani ra sip help munras, bara witin nani mita saura wan munaia sin sip apia sa (Lawana 146:4; Smasmalkra 9:5, 10). Solka ba pruisa; pruya ningkara ban raya kapras (Jems 5:20). Ban sakuna insal watauikira, lasa maki nani ba lika, pruan isingnika nani baku takisa. Pruan nani ra sibriaia apia kaka mayunaia dukyara dia dauki ba saura sa (Aiseya 8:19).

6. Dus prihni: Jisas ba dus kum ra pruan, dus prihni kum ra lika apia. Grîk bila wina Baibil ailal ra “dus prihni” laki ba, dus kumi baman tanka dukyara aisisa. Dus prihni lilkika ba patitara rilidianka kuninkira ba wina balisa. Pas kristianka nani ba dus prihni ra mayunras bara yus sin munras kan. Baku kaka, wan mayunra ra dus prihni yus munaia ba man aitani lukisma ki? (Kli smalkan 7:26; 1 Korint 10:14.)

7. Ban kra naha lukanka bara daukanka kum kum swiaia ba karna kabia. Baku sin, ban kra pamalikam apia kaka pamnika nani mita lukanka nani na swima apia mai wibia. Ban sakuna, Gâd yamni wan kaikbia ba kau tara sa wan walka yamni wan kaikbia ba wal (Sins laka 29:25; Matyu 10:36, 37).

[Wahya 22 lilkika ba]

Gâd ba Kumira yuhmpa apia sa

[Wahya 23 lilkika ba]

Krismis ba, patitara rilidian kuninkira wina balisa

[Wahya 23 lilkika ba]

Pruan nani ra sibriaia bara mayunaia ba saura sa