Lisin 14

Nahki Jehova Witniska nani ba asla takan sa

Ahkia Jehova Witniska nani sturka raya ba ta krikan ki? (1)

Jehova Witnis asla aidrubanka nani ba nahki sa ki? (2)

Lalah tiki ba nahki aibapisa ki? (3)

Kangrigisan banira ya ta brisa ki? (4)

Dia asla aidrubanka kau tara mani bani daukisa ki? (5)

Ai apiska kau tara nani ra dia warkka daukisa ki? (6)

1. Jehova Witniska nani sturka raya ba 1870 manka ra ta krikan. Taura Baibil Stadi tatakra nina maki kan, sakuna 1931 manka ra Jehova Witniska nani makan. Nina na Baibil ba wina sakan (Aiseya 43:10). Asla takanka ba pawi auya sa. Wiria lupia ta krikan wina Witnis milian nani 230 pura kuntri nani kat smalki tauki yakawisa.

2. Jehova Witnis kangrigisanka nani aihkika ba wik bilara aima yuhmpa asla aidrubisa. Baha asla aidrubanka nani ra waia mai paiwisa (Hibru nani 10:24, 25). Baha ra smalkanka yabi ba Baibil wina sakisa. Asla aidrubanka aihkika nani ra “spirit lawana nani” aiwanisa, baku sin pura suni ta krikisa bara pura suni prakisa (Epesus 5:18, 19). Dimaia ba pri bara kalik sin munras (Matyu 10:8).

3. Kangrigisan aihkika nani ba Asla Aidrubanka Watla kum brisa. Asla Aidrubanka Watla nani ba manakira dukya apia sa, Witnis nani silp ai kupia wilinkira ni makan sa. Baha nani bilara dus prihni satka, aidul satka bara diara wala naha muna satka sin kaikma apia. Lalah tiki ba upla kupia wilinkira ni prisantka yabi ba wal aibapisa.  Ya ai prisantka yabaia want sa kaka, baks kum ra bara ba mangkaia sip sa (2 Korint 9:7).

4. Kangrigisan banira smalkanka ba, almuk apia kaka pura kakaira mita ta brisa (1 Timoti 3 :1-7; 5:17). Help mamunra napakanka nani mita almuk nani ra ta baikisa (1 Timoti 3:8-10, 12, 13). Sakuna kumi sin kangrigisan uplika wala ba wal kau tara apia sa (2 Korint 1:24). Nina kulkanka kau tara kum yabras (Matyu 23:8-10). Kwala sat wala sin dimras bara warkka dauki ba dukyara mana sin aibapras. Almuk nani mita kupia wilinkira ni kangrigisan spirit nitka nani pura kaikisa. Bara trabil pyua ra tapahki maisanihkisa (Jems 5:14-16; 1 Pita 5:2, 3).

5. Jehova Witniska nani mani bani asla aidrubanka kau tara nani sin daukisa. Baha ra, kangrigisan ailal aidrubi, Baibil smalkanka pranakira walisa. Disaipel raya nani ba, naha asla aidrubanka tara nani ra aihtabi takisa (Matyu 3:13-17; 28:19, 20).

6. Jehova Witnis apiska kau tara ba Nueva York taunka ra sa. Ta bri Daknika ba bara sa. Witin nani ba tanka aihwa bri almuk nani daknika kum sa, bara tasba aiskara kangrigisan nani bara ba pura kaikisa. Baha purkara, tasba aiskara 100 pura apis wala nani sin bara sa. Baha pliska nani ra ai kupia wilinkira ni wark taki nani ba, Baibil wina wauhkataya ulbi paski sakisa. Bara smalkaia warkka ba sin baha wina ta brisa. Wamtla lamara naha apiska kum bara sa kaka, dia muni wih kaikras sma ki?