Lisin 13

Nahki rilidian rait aihwa ba pliki sakma

Gâd rilidian sut apia kaka kumi baman yamni kaikisa ki? (1)

Dia muni rilidian ailal ba kristian sa wisa? (2)

Nahki kristian rait aihwa nani ba pliki sakma ki? (3-7)

1. Jisas ba kristian rilidianka rait aihwa kumi baman mangkan. Baha mita naiwa yua ra Gâd ra mayuni daknika rait aihwa kumi baman bara kaia sa (Jan 4:23, 24; Epesus 4:4, 5). Baibil bila raya ban kaiara yabalka bila sirpikku, upla wiria baman taukisa wisa (Matyu 7:13, 14).

2. Baibil ra kaina manas win, apastil nani prubia ningkara, smalkanka kunin bara kristian apia daukanka nani tawa tawa kristian kangrigisan bilara dimbia. Kraist nina blikaia watlika ra, upla kum kum mita ai nina blikbia dukyara lalukra nani ra raskbia (Matyu 7:15, 21-23; Wark nani 20:29, 30). Baha mita rilidian ailal ba kristian sa wisa. Nahki kristian rait aihwa nani ra pliki sakma ki?

3. Kristian rait aihwa nani tilara ai daukanka kau param ba sika pana pana ai walkara latwan kaiki ba (Jan 13:34, 35). Witin nani upla kyamka bara taya kalatka sat wala ba tawan kau tara pulaia smalkras. Kuntri wala uplika ra misbara kaikaia sin lan daukras (Wark nani 10:34, 35). Baha mita war kumi tilara sin dimras. Pana pana muihni lakri baku ai walkara kaikisa (1 Jan 4:20, 21).

4. Rilidian rait aihwa uplika ba diara wala mariki ba sika Baibil ra kulkanka tara bri ba. Dawan Bila ba baku kulkisa, bara dia wi ba kasak sin lukisa (Jan 17:17; 2 Timoti 3:16, 17). Witin nani mapara Dawan Bila ba kau kulkanka tara brisa upla dia luki bara dauki ba wal (Matyu 15:1-3, 7-9). Baibil  dia wi ba kat yu bani alki brih daukaia trai muni bangwisa. Baku bara dia smalki ba kat daukisa (Taitus 1:15, 16).

5. Rilidian rait aihwa uplika ba Gâd nina ba sin kulkaia sa (Matyu 6:9). Jisas mita Gâd nina, Jehova maki ba; upla ra lan daukan, bara kristian rait aihwa nani sin baku daukaia sa (Jan 17:6, 26; Rom 10:13, 14). Man iwisma tanira ya nani Gâd nina ba smalki taukisa ki?

6. Kristian rait aihwa nani ba Gâd Kingka laka sturka ba smalki taukaia sa. Jisas ba baku daukan. Witin Gâd Kingka laka ba dahra ban aisi kan (Luk 8:1). Bara ai disaipelka nani sim maisapahkanka tasba aiskara smalkbia adar muni blikan (Matyu 24:14; 28:19, 20). Kristian rait aihwa nani ba lukisa Gâd Kingka laka ba baman tasba ra kupia kumi pât apu laka bri balaia sip sa (Lawana 146:3-5).

7. Jisas disaipelka nani ba naha tasba daukanka saura tilara apia sa (Jan 17:16). Pulitik bara tasba warbanka tilara sin dimras. Tasba daukanka bara lukanka saura wina laiura sa (Jems 1:27; 4:4). Wamtla lamara rilidian daknika kum naha kristian rait aihwa daukanka nani na baku dauki kaikisma ki?

[Wahya 26 bara 27 lilkika nani ba]

Kristian rait aihwa nani ba pana pana latwan kaikisa, Baibil ra kulkisa bara Gâd Kingka laka smalkisa