Lisin 8

Pamali iwanka kum Gâd yamni kaiki ba

Maîa waitna ba pamali ra dia pliska brisa ki? (1)

Maîa waitna ba ai maîa mairin ra nahki kaikaia sa ki? (2)

Aisa kum ba dia wihrika twilkanka brisa ki? (3)

Maîa mairin ba pamali ra dia warkka daukaia sa ki? (4)

Aisa yapti bara luhpa nani ra Gâd dia makabisa ki? (5)

Dakwi takaia bara diburs takaia ba dukyara Baibil ba dia wisa ki? (6, 7)

1. Baibil bila pamali lalka ba maîa waitna sa wisa (1 Korint 11:3). Waitna ba ai maîa mairin kumi baman bri kaia sa. Bara ai maritka laka ba lâ kat dauki bri kaia sa (1 Timoti 3:2; Taitus 3:1).

2. Maîa waitna ba ai wîna ra latwan kaiki ba baku ai maîa mairin ra latwan kaikaia sa. Jisas ai nina blablikra nani ra kaiki ba baku kaikaia sa (Epesus 5:25, 28, 29). Witin ra prukaia bara saura munaia apia sa. Baha watlika ra main kaiki kulki kaia sa (Kolosi 3:19; 1 Pita 3:7).

3. Aisa ba ai pamalika nitka nani yabaia dukyara karna wark takaia sa. Witin ai maîa mairin bara ai luhpia nani ra plun, kwala bara utla kum yabaia sa. Spirit laka ra sin ai pamalika nitka nani yabaia sa (1 Timoti 5:8). Gâd kupia laka tanka bri bangwbia ba dukyara sin ta briaia sa (Kli smalkan 6:4-9; Epesus 6:4).

4. Maîa mairin ba ai maîa waitna help mamunra pain kum kaia sa (Blasi sturka 2:18). Ai luhpia nani ra smalkaia dukyara ai maîa waitna ra ta baikaia sa (Sins laka 1:8). Jehova want sa maîa mairin ba ai pamalika dukya nani ba latwan laka wal daukbia (Sins laka 31:10, 15, 26, 27; Taitus 2:4, 5). Ai maîa waitna ra kulkanka tara yabaia sa (Epesus 5:22, 23, 33).

5. Gâd mita luhpa nani ra, ai aisa yapti nani bila walbia makabisa (Epesus 6:1-3). Witin bila kaikisa aisa yapti bui ai luhpia nani ra smalki wapnika mangkbia. Ai luhpia nani wal Baibil staditakaia dukyara taim sakaia sa. Spirit nitka nani bara ai luhpia nani kupia ra nahki ai dara wali ba sin luki kaia sa (Kli smalkan 11:18, 19; Sins laka 22:6, 15). Kupias bara praut laka ra lika smalki laui daukras (Kolosi 3:21).

6. Maîa waitna maîa mairin wal ai maritka laka ra trabil brisa kaka, Baibil smalkanka ba alki briaia aitani kabia. Baibil ba latwan kaikaia bara padin munaia dukyara wan kupia bukisa (Kolosi 3:12-14). Baibil ra wiras trabil sirpi nani wapni daukaia dukyara dakwi takaia. Sakuna maîa mairin ba dakwi takaia sip sa ai maîa waitna ba: 1) ai pamalika nitka nani dukyara yabaia want apia sa kaka, 2) witin uba praut ba mita ai maîa mairin wîna tara yamnika bara rayaka ba sin pât ra dingkaia sip sa kaka, bara 3) witin ai maîa mapara uba karna bui, swin Gâd ra mayunras kaka sin (1 Korint 7:12, 13).

7. Maîa nani ba pana pana kunin munaia apia sa. Marit laka sauhkaia ba Gâd mapara bara maîa ba mapara sin saurka kum sa (Hibru nani 13:4). Rug takaia laka ba baman, Baibil ra marikisa diburs taki kli marit takaia (Matyu 19:6-9; Rom 7:2, 3). Upla kum Baibil lâka tnayara diburs taki upla wala wal marit taki ba Gâd mita misbara kaikisa (Malakai 2:14-16).

 [Wahya 16 bara 17 lilkika nani ba]

Aisa latwankira kum ba lika ai pamalika wina tara bara spirit nitka nani yabisa

[Wahya 17 lilkika ba]

Gâd bila kaikisa aisa yapti bui ai luhpia ra smalki wapnika mangkbia