Lisin 7

Pura sunra bakku Gâd lamara wap

Dia muni pat pat wan pura sunaia ba aitani sa ki? (1)

Yaura wan pura sunaia sa, bara nahki daukaia sa ki? (2, 3)

Dia dukyara wan pura sunaia sa ki? (4)

Ani pyua ra lika puram sunaia sma ki? (5, 6)

Pura sunra nani sut ba Gâd walisa ki? (7)

1. Pura sunaia ba sika bauan laka ra Gâd wal aisaia tanka sa. Pat pat wan pura sunaia sa. Baku daukbia sa kaka, panika latwankira kum baku witin lamara wan dara walbia. Jehova ba tara bara karnakira pali sa, ban sakuna, wan pura sunra walisa. Man pat pat Gâd ra puram sunisma ki? (Lawana 65:2; 1 Tesalonaika 5:17.)

2. Pura sunra ba Gâd ra mayunanka taka kum sa. Baha mita, Jehova ra baman wan pura sunaia sa. Jisas tasba ra kan pyua ra, ai Aisa ra baman  ai pura suni kan, upla wala ra lika apia. Yawan sim baku daukaia sa (Matyu 4:10; 6:9). Sakuna, Jisas nina ra ban wan pura sunaia sa. Baku Jisas ra kulki, atki wan sakaia sakripaiska daukan ba ra yawan kasak luki ba marikisa (Jan 14:6; 1 Jan 2:1, 2).

3. Wan kupia munuhta wina, wan pura sunaia sa. Pura sunra bukka kum wina aisi kaikaia, apia kaka wan auya wina kli kli sim dukya aisaia sin apia sa (Matyu 6:7, 8). Pura suni bara, wan wîna tara nahki sat ra bri kabia sin, ani pyua ra bara ani pliska ra daukbia sin rispik wal daukaia sa. Sap wan kupia munuhtara pura sunra dauki ba kat sin Gâd walisa (1 Samyuil 1:12, 13). Un wan pura sunra nani ba, yakan bara bin apu kabia pliska kum ra daukaia aitani sa (Mark 1:35).

4. Dia dukyara puram sunaia sip sma ki? Kau witin lamara mai brihwaia sip dukya nani ba (Pilipai 4:6, 7). “Yawan Aisa” pura sunra ra mariki ba baku, Jehova nina tawan bara ai kupia laka daukan kabia ba dukyara wan pura sunaia sa. Baku sin, wan nitka, wan saurka nani padin munbia, bara traika kaikanka pura luaia help wan munbia dukyara sin makabaia sip sa (Matyu 6:9-13). Pura sunra nani wan wîna ra baman luki daukaia apia sa. Gâd kupia laka kat makabaia sa (1 Jan 5:14).

5. Gâd ra mayunaia apia kaka tingkika yabaia want kama pyua ra puram suns (1 Kronikas 29:10-13). Pât wauhwi traika kaikan ra kama sin, puram suni bas (Lawana 55:22; 120:1). Plun piras kainara sin wan pura sunaia aitani sa (Matyu 14:19). Jehova mita paiwisa “pyu bani” wan pura witin ra sunbia (Epesus 6:18).

6. Saurka tara kum daukbia sa kaka swirka luaia apia sa. Jehova umpira wan kaikbia bara padin wan munbia dukyara bik taki makabaia sa. Yawan saurka ba param aisi kli daukaia apia trai kaikbia sa kaka lika, Gâd ‘wan pâtka swih tikaia’ wilin sa (Lawana 86:5; Sins laka 28:13).

7. Jehova, kasakkira nani pura sunra ba baman walisa. Gâd puram sunra walbia dukyara, Witin lâka nani dia wi ba kat wapaia sma (Sins laka 15:29; 28:9). Bauan laka ni puram sunaia sma (Luk 18:9-14). Dia makabisma ba dia daukisma ba wal kumi kaia sa. Baku lika kasak lukan laka bara kupiam kwakikira ni puram sunisma ba marikma. Baku baman, Jehova puram sunra ba walbia (Hibru nani 11:6).