Lisin 12

Rayaka ba bara tala ba sin kulki kap

Rayaka ba nahki kulkaia sa ki? (1) bara luhpa iki sakaia ba? (1)

Kristian nani ba nahki tnatka ra aksidint kum takbia apia dukyara luki ba marikisa ki? (2)

Daiwan ikaia ba saura sa ki? (3)

Dia daukanka nani rayaka ra kulkras ba marikisa ki? (4)

Tala ba dukyara ani ba Gâd lâka sa ki? (5)

Wan wîna ra tala dingkaia ba baha lâka tilara sa ki? (6)

1. Rayaka ba Jehova wina balisa. Jehova tingki yawan rayaka brisa (Lawana 36:9). Gâd mapara rayaka ba hulikira sa. Yaptika plauya ra kau aisubi takras rayaka sirpi lupia pali ba kat sin, Jehova mapara kulkanka tara brisa. Dawan nakra ra, baha rayaka pawi ba, nusi kaiki ikaia ba saura pali sa (Impakan sturka 21:22, 23; Lawana 127:3).

2. Kristian rait aihwa nani ba aksidint kum takbia apia dukyara lukisa. Ai duarka, ai trukka apia kaka ai watla ra pât apu kabia dukyara trai munisa (Kli smalkan 22:8). Gâd napakanka nani ba bahki ra apia kaka lilia takaia dukyara ai rayaka ba pât ra dingkras. Baha mita pulanka saura nani upla wala ra latwan yabaia sip ba pulras. Lilia takaia dukya nani rau munan laka ra brihwi ba wina tnayara bangwisa (Lawana 11:5; Jan 13:35).

 3. Papaskra ba daiwan rayaka ba sin huli kulkisa. Piaia, kwala dimaia apia kaka siknis takaia apia dukyara bara wan kaina kahbaia dukyara lika daiwan ikaia sip sa (Blasi sturka 3:21; 9:3; Impakan sturka 21:28). Sakuna, pulaia apia kaka lilia takaia dukyara daiwan nani ra saura munaia bara ikaia ba pain apia sa (Sins laka 12:10).

4. Sigarit diaia, twaku samaia bara lilia kaia dukyara druga nani yus munaia ba kristian nani dukya apia sa. Naha daukanka nani ba saura sa kan (1) upla ra alba baku brisa, (2) ai wîna tara ba sauhkisa, bara (3) taski dukya sa (Rom 6:19; 12:1; 2 Korint 7:1). Naha daukanka swiaia ba karna pali sa, ban sakuna Jehova yamni wan kaikbia want sa kaka swiaia sa.

5. Tala ba sin Gâd mita huli kulkisa. Witin bila solka ba, wibia sa kaka, rayaka ba, talia ra sa wisa. Baha mita tala piaia ba saura sa. Baku sin daiwan kum ra iki talia ba pain sakras sa kaka piaia ba saura sa. Daiwan kum langki ikan apia kaka tramp kum ra pruan sa kaka, piaia apia sa. Langsa apia kaka raks kum wal ikan sa kaka, piaia dukyara minitka ra talia ba yarka laiwi takaia (Blasi sturka 9:3, 4; Libait laka 17:13, 14; Wark nani 15:28, 29).

6. Wan wîna ra tala dingkaia ba saura sa ki? Amya tikpara, Jehova mita yus munaia apia wan wi ba. Naha tanka ba sika, tnatka kumira sin wan wîna ra upla wala talia dingkaia apia, wan talia pali kat sin suni brisi kli dingkaia apia sa (Wark nani 21:25). Baku bara kristian rait aihwa nani ba ai wîna ra tala dingkras. Sakuna daktar diara wala tala apu dukya nani yabi ba lika, wan wîna ra mangkaia sip sa. Raya kaia want bangwisa, sakuna Gâd lâka krikras kaka lika (Matyu 16:25).

[Wahya 25 lilkika nani ba]

Wan wîna ra tala dingkaia, pât ra dingkaia bara daukanka taski nani ba sin Gâd yamni kaikras