Lisin 5

Tasba na dukyara Gâd dia lukisa ki?

Dia muni Jehova tasba na paskan ki? (1, 2)

Dia muni naiwa pyua kat tasba na paradais kum apia sa ki? (3)

Upla saura nani ra dia takbia ki? (4) Kaina pyua ra Jisas ba siknis, almuk bara pruan nani ba dukyara sin dia daukbia ki? (5, 6)

Kaina pyua yamnika nani briaia dukyara, dia daukaia sma ki? (7)

1. Jehova mita tasba na, ai auyapah kat upla ban kaiara iwbia dukyara paskan. Tasba na ra upla lilia bara kasakkira iwi kabia want kan (Lawana 115:16; Aiseya 45:18). Tasba na sauhki tikbia apia; ban kaiara ban kabia (Lawana 104:5; Smasmalkra 1:4).

2. Gâd kau waitna ra paskras kainara, tasba piska kum saki brih muni, paradais painkira kum dauki nina “Eden gadinka” makan. Pas waitna bara pas mairin, Adam Iv wal ba, baha ra mangkan. Gâd lukanka kan witin nani ba luhpa sahwi tasba aiska na bangkbia. Bara tawa tawa tasba na paradais kum ra laki bangwbia (Blasi sturka 1:28; 2:8, 15).

3. Adam Iv wal saurka daukan, kan nusi Gâd lâka ba krikan. Baha taka mita, Jehova bui Eden gadinka wina kangbi sakan, bara paradais ba tiwan (Blasi sturka 3:1-6, 23). Sakuna, Jehova tasba na dukyara lukanka ba ai auya tikras sa. Witin tasba na paradais kum ra laki, upla ban kaiara iwbia pramis munisa. Nahki baha ba daukbia ki? (Lawana 37:29.)

4. Kau tasba na paradais ra lakras bara, upla watauikira ba pas sauhki tikan kaia sa (Lawana 37:38). Gâd warka tara Harmagedon ra saurka laka ba diki sakbia. Baha ningkara, Setan ra 1.000 mani priski bri kabia. Baha tanka ba sika, watauikira kumi sin apu kabia tasba na sauhkaia. Gâd uplika ba baman raya kabia (Param marikan 16:14, 16; 20:1-3).

 5. Bara tasba purara Jisas Kraist 1.000 mani king aimakbia (Param marikan 20:6). Wan sinska bara wan wîna tara ba wina sin tawa tawa saurka laka ba diki sakbia. Adam Iv wal kau saura daukras kainara kan ba baku, yawan sin upla kasakkira kabia. Siknis, almuk takaia bara prura sin dan apu kabia. Siknis nani ra rakan kabia bara almuk nani ba kli wahma tyara takbia (Job 33:25; Aiseya 33:24; Param marikan 21:3, 4).

6. Jisas 1.000 mani King aimaki kabia bilara, upla kasak nani ba, tasba na paradais kum ra lakaia dukyara wark taki kabia (Lawana 37:29). Baha purkara, pruan milian nani kli raya bukbia bara kli tasba uplika baku iwbia (Wark nani 24:15). Gâd dia makabi ba daukbia sa kaka, witin nani tasba ra ban kaiara iwbia. Baku daukras sa kaka, sauhki tikan kabia (Jan 5:28, 29; Param marikan 20:11-15).

7. Baku lika tasba na dukyara Gâd blasi pyua ra luki kan ba tnata aimakbia. Naha yamnika nani ba briaia brinkam sa ki? Baku sa kaka, Jehova tanka ban lan taki kaia bara ai makabanka nani bila wali kaia sma. Naku daukaia help mai munbia ba sika, Jehova Witniska nani Asla Aidrubanka Watla ra wih muni witin nani aikuki asla takaia (Aiseya 11:9; Hibru nani 10:24, 25).

[Wahya 10 lilkika ba]

Paradais tiwan ba

[Wahya 11 lilkika nani ba]

Harmagedon ningkara, tasba na paradais kum ra lakan kabia