1, 2. a) Diara nani ba kaina manis iwi laki kaikaia ba dukiara, ¿Jisas dîa tânka marikan? b) ¿Ani piua ra aitani kabia diara nani ba kaina manis laki kaikaia?

 UTLA pain kum paskaia ba kaina manis wina ridi takaia sa. Utla playa bapras kainara tasba atki briaia sa bara nahki kabia ba sin ulbi paskaia. Sakuna diara kum ba yawan sip wan auya tikras. Jisas win: “Man nani tilam wina upla kum tawer kum paskaia lukbia kaka, witin iwi dîa lalah tikaia ba pas kulki kaikuya, ai mihta ra dîa bri ba wal aitani takbia sapa” (Luk 14:28).

² Utla pain paskaia dukiara laki kaiki ba baku, sim  natka ra marit lâka yamni kum brih iwaia ba. Upla kum kum wisa: “Yang marit takaia want sna”. Sakuna, ¿upla an dîa daukaia luki ba pas laki kaikisa? Baibil ba marit lâka dukiara pain aisi kabia sin, trabil ailal bribia wisa (Sins Lâka 18:22; 1 Korint 7:28). Baha mita ya marit takaia luki ba pain nu kaia sa marit lâka kum ra lilia bara trabil nani sin bâra kabia.

3. Marit takaia want nani mapara, ¿dîa muni Baibil ba hilp tara kum sa, bara ani makabi walanka yumhpa ansika yabia?

³ Baibil ba hilp wan munaia sip sa, kan Jehova Gâd marit lâka tâ krikan bara Witin wina hilpka balisa (Epesus 3:14, 15; 2 Timoti 3:16). Naha lâka nani laki kaiki ba patitara wina ulban sa, sakuna naiwa piua ra yus tara brisa. Bara hilp wan munbia pain laki kaikaia 1) ¿nahki nu takaia sip sa marit takaia ridi sa sapa?, 2) ¿wan maritka kabia uplika wina dîa bîla kaikaia sa? bara 3) kut takisa piua ra, ¿nahki rispik lâka marikbia?

4. ¿Ani natka marit lâka kum pain brih iwaia hilp wan munbia, bara dîa muni?

⁴ Utla kum paskaia sipar apia sa, bara main kaiki kaia ba karna sa. Marit lâka sim baku takisa. Marit takaia ba karna kaia sip sa; sakuna mani ailal lui ba ra pain iwaia ba isi apia sa. Marit lâka pain kum briaia dukiara, ¿dîa nit sa ki? Diara kum hilp wan munbia ba uplika wal pramis lâka daukan ba wan auya tikaia apia sa. Baibil ba marit lâka dukiara wisa: “Waitna ba ai aisika bara ai yaptika sin swibia, bara ai mairka ra asla prawbia, bara witin nani wal ai tânka brih, wal ai wîna kumi takbia” (Blasi Sturka 2:24). Jisas Baibil ra natka kumi baman marikan nahki upla kum dibors takaia sip sa bara kli marit takaia: “Rug lâka” ba, wibia kaka, marit lâka sauhki upla  wala wal rug lâka dauki ba (Matiu 19:9). Marit takaia lukanka brisma kaka, baha smalkanka nani Baibil wina sakan ba ra luki bas. Sakuna naha pramiska tara ba daukaia want apia sma kaka, tânka sa marit takaia ridi apia sma (Kli Smalkanka 23:21; Smasmalkra 5:4, 5).

5. Upla kum kum marit lâka pramiska tara ba sîa brisa, ¿sakuna dîa muni marit takaia luki ba naha tara kulkaia sa?

⁵ Marit takaia dahra aisisa taim upla manis ba sirang iwisa. Wahma kum win: “Maritki wal rayaki aiska ra dakwi takaia sip apia lâka ba, aihka bara ai priskan baku daira wali kapri”. Marit takma uplika ra rait aihwa latwan kaikisma kaka, baha pramiska ba twilkanka baku kaikma apia. Baha kaikaia watlika ra, diara kum wan kaina kahbi baku kaikbia. Naha pramiska tara dauki ba marit nani ra hilp munbia piu pain bara piu saura tilara aikuki ban kaia, bara dîa trabilka takbia kra sin wâlsut ban ai tâ baiki kabia. Apastil Pal win, latwan lâka kasak ba “diara sut ba twilkisa”, “diara sut ba kasak lukisa” (1 Korint 13:4, 7). Mairin kum win: “Marit lâka pramiska ba kaini kahbisa, upla sut mawanra maritki wal ban asla iwaia pramis takri ba tara kulkisna” (Smasmalkra 4:9-12).

6. ¿Dîa muni uba wahma tiara marit takaia ba pain apia sa?

⁶ Marit lâka pramiska tara ba daukaia dukiara pain wan tânka briaia sa. Baha mita, Pal kristian nani ra kupia bukisa ‘wahma tiara piua’ lui wabia ba kat marit takbia, kan uba wahma tiara sa taim wan wîna brinka nani alki takaskaia ba karna sa, bara wan sinska blakaia sip sa (1 Korint 7:36). Wahma tiara nani pâwi auya ba ra isti sât wala takisa. Baha mita upla aihkika uba wahma tiara marit takan ba, mani kum kum bilara nu takisa dîa witin bara ai maritka brinka kan ba sut chens takisa. Marit lâka tânka laki kakaira nani ba wisa uba wahma tiara marit takan  ba lilia kaia kau karna sa bara kau isti dibors takisa, sakuna wahma tiara man takan marit taki ba kau lilia iwisa. Baha mita isti marit takaia lukaia apia sa. Wahma tiara nani man takan mayas tauki ba sanska brisa ai rayaka ra diara pain nani kau lan takaia, baku ridi takisa kau marit takras kainara maya waitna apia kaka maya mairin pain kum kaia bara marit takaia dukiara ridi kaia. Uba isti marit takras kaia ba hilp wan munbia silp wan tânka pain briaia, bara naha ba marit lâka pain kum brih iwaia dukiara hilp wan munbia.

7. ¿Dîa muni marit takaia luki nani ba kaina manis dîa sât uplika ba laki kaikaia sa?

⁷ ¿Man wal marit takbia uplika ba dîa sât daukanka bri kabia want sma? Upla aihkika mapara baha wiaia isi sa. Ban sakuna, ¿wan daukanka nani ba nahki sa? ¿Dîa daukanka pain nani brisna yang maritki lâka lilia kum brih iwaia? ¿Dîa sât maritka waitna bara maritka mairin kamna ki? Sampla kum, ¿mistikki nani ba klir wisna bara dîa ai smalki ba alki daukisna, apia kaka mapara unsabi aisisna lawi ai daukisa taim? ¿Yang lilia sna bara diara sut ai pitka kat kaikisna, apia kaka saura man kaikisna bara brukwi man aisi taukisna ki? (Sins Lâka 8:33; 15:15.) Wan kupia kraukaia sa marit takaia ba wan daukanka sât wala daukras. Kau marit takras piua ra yawan uba tara pulan lâka brisa bara isti lawisa apia kaka diara sut ba saura man takbia lukisa kaka, marit takbia taim sim baku kabia. Yawan silp wan daukanka nani upla wala kaiki ba baku sip kaikras ba mita, ¿dîa muni wan aisa yapti ra apia kaka wan pânika pain kum ra makabi walras yawan dîa sât uplika sa? Witin nani dîa luki ba param wan wibia. Bara diara kum  ra wark takaia nit sa kaka, kau marit takras ba ra wapni mangkaia.

8-10. Marit takaia kaina manis ridi takaia ba dukiara, ¿Baibil ba nahki hilp wan munisa?

⁸ Baibil ba wan kupia bukisa spirit holikira ba wan rayaka ra bribia bara baku daukanka pain nani ba pakbia, sampla baku latwan lâka, lilia kaia, kupia kumi lâka, wihka bîla kaikanka lâka, kupia yamni lâka, kupia pihni lâka, kasak lukan lâka, laman lâka, bara wan wîna alki takaskaia lâka. Baku sin wisa, “man nani lika spiritkam bara sinskam wal ba aiska pali raya nani kaia sma”, bara “Gâd kupia lâka kat prâka ba ni dimi banhwaia sma, bara sin marikma nahki rayaka kumi kasak pali wapni bara holikira ba” (Galesha 5:22, 23; Epesus 4:23, 24). Naha kupia kraukanka ba upla mayas nani wal praki kaikisa sim bank kum ra lalah suni briaia ba baku: marit takma taim kainamra lalahkam suni brisma ba kau pâwisa.

⁹ Sampla kum, mairin nani ba ai wîna painka dukiara baman lukaia watlika ra ‘ai kupia bilara dîa sât uplika ba’ nu takaia sa (1 Pita 3:3, 4). Sinska yamni bri bara tânkira kaia ba mairin nani ra hilp munbia sins lâka briaia, naha ba “kraun painkira” kum sa (Sins Lâka 4:9; 31:10, 30; 1 Timoti 2:9, 10). Bara waitna ba, mairin nani ra nahki latwan lâka tara bara rispik lâka marikaia lan takaia sip sa (1 Timoti 5:1, 2). Bara diara ba nahki daukaia, trabil nani wapnika mangkaia lan takaia sa, baku sin bawikira bara kupia pihni kaia. Taibi munan lâka mita marit bilara trabil ailal balisa (Sins Lâka 29:23; Miqueas 6:8; Epesus 5:28, 29).

¹⁰ Naha sât daukanka nani laki kaikan ba wan rayaka ra chens munaia ba isi apia, sakuna yawan kristian baku daukaia sa, daukbia kaka, sip kabia marit waitna apia kaka marit mairin pain kum kaia.

11, 12. ¿Upla wâl ba nahki nu takaia sip sa aikuki pain iwbia sapa?

¹¹ ¿Tawankam ra upla nani ba silp ai maritka pliki sakisa? Baku kaka, ¿upla kum ra laik kaikisma kaka, dîa daukaia sip sma? Pas ba silp makabi wals: ‘¿Rait pali baha uplika wal marit takaia want sna ki?’. Upla kum wal triswi puli baman swiaia ba saura pali sa (Sins Lâka 13:12). Bara mamkabi wals: ‘¿Marit takaia ridi sna ki?’. Makabi walanka wâlsut ansika ba âu sa kaka, ¿nanara dîa daukaia sma? Tawankam ra nahki dauki ba baku daukbia. Kuntri kum kum ra, uplika daukanka laki kaikan ningkara witin ra kau pain kakaira takaia want ba wisa. Bara uplika ba apia wibia kaka, trai kaikaia sa kli kli nais munaia apia, kan sip sa saura mai kaikaia. Pain nu kaia sa upla wala ba sin ai raitka brisa dîa luki ba wiaia. Sakuna, uplika ba âu win kaka, aikuki diara pain nani daukaia ba dukiara taim sakaia sip sa. Baku nu takaia sip sa uplika ba marit pain kum kabia sapa. * ¿Naha piua ra yawan dîa plikaia sa?

¹² Naha makabi walanka ansika yabaia dukiara, lawana kangbaia masinka wâl dukiara aisabia, agin bara gitar ba. Baha masinka nani ai pitka kat sa kaka, kumi bani ba miusik pain kangbaia sip sa. Sakuna, ¿dîa takbia wâlsut sim minitka ra kangbisa kaka? Baku daukbia kaka masinka wâlsut tiunka ba ai pitka kat kaia sa. Marit takbia nani sim baku takisa. Ban kra kumi bani ba trai kaikan sa ai daukanka nani ba “ai pitka kat” bri kaia. Sakuna makabi walanka kau tara ba sika: ¿Kumi bani ba ai daukanka ba ai pitka kat brisa ki? Wibia kaka, ¿uplika wala ba wal pain iwaia sip kabia?

13. ¿Dîa muni sinskira apia sa upla kum wan kasakka lukan lâka Gâd dukiara sât wala bri ba wal marit takaia?

 ¹³ Wâlsut ba sim lâka bara lukanka ra asla kaia sa. Pal win: “Man nani kasak lukras uplika nani wal asla kapara” (2 Korint 6:14; 1 Korint 7:39). Upla kum wan kasakka lukan lâka Gâd ra bri ba ra kulkras ba wal marit takbia kaka, aikuki ai tânka briaia ba kau karna kabia. Sakuna wâlsut sim lukanka wal Jehova warkka daukisa kaka, kau asla lâka ra iwbia. Jehova brinka sa yawan lilia kabia bara wan maritka wal kau asla kaia. Jehova want sa yawan Witin wal asla kabia bara sin trit awa yumhpa wilkan baku latwan lâka ra wan maritka wal iwbia (Smasmalkra 4:12).

14, 15. Tânka mariks, ¿dîa muni marit lâka asla iwaia dukiara sim kasakka lukan lâka briaia baman ba aitani apia sa?

¹⁴ Kupia kumi lâka ra Gâd ra mayunaia ba kau pain sa, sakuna natka wala sin bâra sa. Marit lâka kau asla wilkan kabia dukiara, diara kum kum daukaia sa. ¿Ani ba man brinkam sa? Sampla kum, ¿dîa lukisma luhpa baikaia dukiara? ¿Dîa ba rayakam ra kau tara sa? * (Matiu 6:33.) Marit lilia kum brih iwaia kaka wâlsut pâna pain kaia sa, bara aikuki lilia ai dara walaia (Sins Lâka 17:17). Baha daukaia dukiara sim lukanka bri kaia sa. Baku apia sa kaka, pâna lâka kum sip briras sa, bara marit lâka ra iwaia kau karna munbia. Nanara luki kaiks, marit takaia pramis takram uplika ba pulanka sâtka kum laiksa, ban kra impaki taukaia laiksa, bara man baha brinkam apia sa, ¿baha wiaia want sa uplika ba wal marit takaia sip apia sma ki? Apia. Ban kra diara wala nani ra sim lukanka brisma. Marit takaia pramis takram uplika ra sip sma lilia daukaia bara dîa sât dukia  nani witin laik ba daukaia (Apastil Nani Sturka 20:35).

¹⁵ Marit lâka ra asla iwaia ba tânka apia sa marit nani diara sut ra sim baku kabia, wiaia want sa witin nani pana pana ai tânka briaia sa. Naha makabi walaia sirka ra: ‘¿Diara sut mapara sim lukanka bri banhwisna? ’, kau pain sa makabi walaia, ‘¿Dîa takisa sim lukanka âpu sa taim? ¿Diara nani ba wan kupia baikras aisisa bara wan maritka ra rispik munisa? ¿Apia kaka sim lukanka âpu sa taim unsabanka tara daukisa?’ (Epesus 4:29, 31.) Marit takaia lukisa kaka, upla tara papulra bara silp ai lukanka baman kasak sa luki ba wina sait ra kaia sa, bara upla nani silp ai brinka baman, yukuwan natka ra apia kaka upla sut mawanra dauki ba wina aman kaikaia sa.

16, 17. Waitna mairin wal, ¿ai maritka kabia uplika wina dîa bîla kaikaia sa?

¹⁶ Kangrigisan bilara pura kaikaia warkka daukaia yabi uplika nani ra “pas trai munan kaia sa” (1 Timoti 3:10). Naha smalkanka ba yus munaia sip kabia. Sampla baku, mairin nani ba luki kaikaia sip sa: ‘¿Naha waitnika dîa sât uplika sa? ¿Dîa sât pânika nani brisa? ¿Kupia alki takaskaia lâka brisa? ¿Upla almuk nani ra nahki kaikisa? ¿Dîa sât pamalika wina balisa? ¿Ai pamalika wal nahki iwisa? ¿Lalah dukiara dîa lukisa? ¿Laya tahpla uba diaia swapnika brisa ki? ¿Uba prautkira sa apia kaka upla ra saura mamunra sa? ¿Kangrigisan bilara dîa sât warkka daukisa bara nahki daukisa? ¿Witin ra rispik lâka tara marikamna ki?’ (Libait Lâka 19:32; Sins Lâka 22:29; 31:23; Epesus 5:3-5, 33; 1 Timoti 5:8; 6:10; Taitus 2:6, 7.)

¹⁷ Waitna ba naha lukaia sip sa: ‘¿Naha mairka ba  Gâd ra latwan kaikisa bara rispik munisa ki? ¿Utla kum main kaikaia sip sa? ¿Witin wal marit takamna kaka, ai pamalika ba yawan wina dîa bîla kaikbia ki? ¿Tânkira apia kaka wark tatakra bara lalah apahkaia lan sa? ¿Sturi aisisa taim dîa dukiara kau aisisa? ¿Upla wala nani yamnika dukiara lukisa, apia kaka silp ai dukiara baman lukisa bara upla trabilka tilara dimaia laiksa? ¿Witin ra kasak lukaia sip sa? ¿Pamali lalka ba ra rispik munbia, apia kaka upla bîla walras bara mapa babura sa?’ (Sins Lâka 31:10-31; Luk 6:45; Epesus 5:22, 23; 1 Timoti 5:13; 1 Pita 4:15.)

18. Kut takisa piua ra swapnika sirpi kum kum kaikisa kaka, ¿dîa daukaia sa?

¹⁸ Wan auya tikaia apia sa wal kut taki uplika ba Adam kiamka wina sa bara upla kasakkira kum apia sa. Upla sut ai swapnika brisa. Baha mita wan swapnika nani bara uplika wala swapnika ba sin swih tikaia lan kaia sa (Roman 3:23; Jems 3:2). Bara, swapnika kum ba hilp wan munaia sip sa spirit lâka ra kau pâwaia. Luki kaiks, kut takisma piua ra unsabisma, baku takaia sip sa kan upla ba ai walka ra latwan bara rispik muni kabia sin sakuna sim lukanka âpu sa (Blasi Sturka 30:2; Apastil Nani Sturka 15:39 ba laki kaiks). Ban kra wâlsut ‘ai spiritka alki takaskaia sip sa’ baku trabil nani ba latwan lâka wal wapnika mangkaia (Sins Lâka 25:28). ¿Kut takisma uplika ba upla kum kau pain kaia brinka brisa ki? ¿Bara yawan dîa sât uplika sa? ¿Uba prautkira kaia apia lan takaia sip sa? (Smasmalkra 7:9.) Trabilkam nani ba wapnika mangkaia lan takma ba, marit takma taim hilp mai munbia diara nani ba natka pain kum ra param aisaia (Kolosi 3:13).

19. ¿Kut munisa piua ra trabil tara nani takbia kaka, dîa daukaia sa?

¹⁹ Upla wala ra swapnika kum kum kaikisa bara  uba bahara lukisa kaka, ¿dîa daukaia sa? Baha swapnika nani ba pain laki kaikaia sa. Uplika ra uba latwan kaiki kaka bara marit takaia brinka tara bri kabia sin, aima kumi sin wan nakra praki trabil nani ba kaikras baku kaia apia sa (Sins Lâka 22:3; Smasmalkra 2:14). Marit takaia pramis takan uplika wal kainara trabil ailal bribia lukisa kaka kau bitar kabia dakwi takaia.

20. Rispik lâka wal kut takaia dukiara, ¿dîa daukaia sa?

²⁰ ¿Kut takaia lâka ba nahki rispik lâka kat daukbia ki? Pas ba daukankam nani ba pain sapa laki kaikaia sa. ¿Iwisma pliska ra waitna kum bara mairin kum marit takras kainara ai mihta alki, kiawali bara klubi alkaia lâka ba upla nani mawanra pain kaikisa? Baha daukanka upla nani ba pain kaiki kabia sin, marit takaia baila sa kaka baman daukaia sip sa. Sakuna yawan kumi bani aman kaikaia sa wan brinka nani alki takaskaia rug lâka ra kahwaia apia dukiara (Epesus 4:18, 19; bara Yamni Kulki Lawana 1:2; 2:6; 8:5, 9, 10 ba sin laki kaiks). Upla kupia lukra ba kuninkira sa. Bara sinskira kabia sin utla kum bilara yakan kaia apia, baku sin truk kum bilara plis kum ra takaskaia, bara ani pliska rug lâka ra kahwaia sanska yabisa kaka, bahara kaia apia sa (Jirimaya 17:9). Kut takisa piua ra wan daukanka nani rispik lâka kat daukbia kaka, marikbia yawan kupia alki takaskaia lâka brisa bara wan brinka nani kat daukaia watlika ra ai maritka kabia ra lukisa. Bara diara kau tara ba rispik lâka wal kut takbia kaka Jehova Gâd yamni wan kaikbia. Gâd ai napakanka nani ra makabisa rug lâka bara tâski lâka wina laihura kaia (Galesha 5:19-21).

21. ¿Rispik lâka ni kut takaia dukiara dîa ba param aisaia sa?

 ²¹ Rispik lâka ni kut takaia ba sin tânka sa yawan uplika kut muni ba wal diara nani ba kunin luha aisabia. Kut taki nani ba mahka marit takaia baila sa taim, diara tânka kum kum ba param aisaia sa. ¿Anira iwbia? ¿Wâlsut wark takbia ki? ¿Luhpa nani baikaia want sa? Aitani kabia waitna mairin ba piu luan ra dîa trabilka brin kaka param aisabia, kan baku daukras kaka sip sa marit lâka ba sauhkaia. ¿Dîa sât trabilka nani ba wiaia sa? Tras nani brisa kaka, wan wîna tara yamnika, sampla baku, siknis saura kum brisa kaka, baha sut param aisaia sa. Upla manis VIH sikniska yula bri nani ba —naha sikniska yula wina sida wan alkisa— piu wihka luan ra nu takisa, baha mita upla kum piu luan ra rug lâka upla wala wala wal iwi kan kaka, baku sin druga ai wakia bâk dingki kan kaka marit takaia luki uplika ba apia kaka ai aisika nani sip sa pramiska takan uplika ba ra makabaia sida sikniska bri sapa ai talia ba angki kaikbia. Tâliam angki kaikram ba ra sida sikniska brisma kaka, bara man wal kut taki uplika ba marit takaia want apia sa kaka, taibi munpara. Baku sin, ya uplika piu luan ra ai rayaka taniskira lâka ra iwi kan kaka, kau pain kabia witin silp kut takras kainara sida sikniska brisa sapa ai talia wih angki kaikbia.

22, 23. a) Marit takaia dukiara ridi taki sma taim, ¿nahki aman kaikaia sma diara sut ba ai pitka kat kabia? b) Marit liliaka yua bara asla iwaia dukiara, ¿dîa ba ai pitka kat lukaia sa?

²² Kau marit takras kati kum kum kainara ban kra wâlsut marit takaia dukiara uba wark bri kapram. Sakuna uba wari takaia apia dukiara diara nani ba ai pitka kat daukaia sa. Marit lâka tara kum ba tamya nani bara tawan uplika nani ra lilia daukbia,  sakuna marit takan nani bara ai pamalika mapara lalah uba tikan kabia, baku sin uba wark daukan kabia. Tawankam ra dîa sât iwanka natka bri ba nina blikaia sip sa, sakuna diara uba tara daukaia apia sa bara upla wala nani nahki dauki ba sim sât daukaia lukanka ba briaia apia sa, kan marit lâka liliaka ba yua kum sari daukbia bara rispikka lâka ba tikbia. Upla wala nani dîa luki ba rispik munaia ba pain kabia, sakuna waitna ba ai mihta ra sa laki kaikaia ai maritka liliaka ra dîa daukbia ba (Jan 2:9).

²³ Amya tiwbiara marit takaia ba yu kumi baman sa, sakuna marit lâka ra iwaia ba piua aiska dukiara sa. Baha mita marit takaia yua dukiara baman lukpara. Baha daukaia watlika ra Jehova Gâd tâm bribia natka ba pliki bas, maritkam wal nahki iwma ba kaina manis pain laki kaiks. Baku dauki baman marit lâka pain kum brima.