1. ¿Dîa dukia nani ba daukisa pamali ba dakwi takbia?

 LILIA sa ani uplika ai pamalika aikuki latwan lâka, kupia kumi lâka bara tânka briaia lâka ra iwi ba. Ban kra man baku iwisma. Sari sa wiaia, sakuna pamali manis baku iwras bara natka ailal ra dakwi takisa. ¿Pamali nani ra dîa ba dakbi sakisa? Naha saptika ra diara yumhpa laki kaikbia. Pas ba, pamali tilara upla sut sim rilidianka âpu sa. Pamali wala ba ai tapukrika nani (hijastros) pakisa. Bara yumhpika ba, pamali kum kum ra ai rayaka ra diara briaia dukiara uba wark takisa, apia kaka yuyaka nani mita dakbi sakisa. Pamali nani ba trabil ailal brisa bara witin nani ra natka ailal ra dakbi sakaia sip sa. ¿Dîa muni?

2. ¿Pamali kum kum ba kupia kumi lâka briaia ba ani wina hilpka sakisa, sakuna hilpka kau tara ba ani sa?

² Pamali kum kum trabil nani ba uba tara kaikisa. Upla wala nani dîa luki ba rispik munisa kaka, hilp wan munbia wan pamalika ba asla lâka ra iwaia. Natka wala ba ani wina hilpka brisa. Upla manis wark pânika nani, lamara iwi uplika, radiu ra dîa wali ba bara upla wala dîa aisi ba nina blikisa. Sakuna, pamali manis ba Baibil dîa wi ba laki kaiki alki daukisa. ¿Naha daukaia ba nahki pamali ra hilp munisa kupia kumi lâka ra iwaia? (2 Timoti 3:16, 17.)

3. a) ¿Baibil ra dîa wisa rilidian wala uplika kum wal marit takaia dukiara? b) ¿Ani Baibil smalkanka nani marit lalukra ba ra hilp munisa?

³ Baibil ra klir wan wisa kristian nani ba rilidian wala uplika wal marit takaia apia (Kli Smalkanka 7:3, 4; 1 Korint 7:39). Sakuna, ban kra maya mairin  ba marit takan ningkara tânka kasak ba lan takan bara ai maritka lika apia. ¿Witin dîa daukaia sip sa? Baku kabia sin, marit lâka ra dîa pramis munan ba daukaia sa (1 Korint 7:10). Baibil ra wisa marit lâka ba piu wihka dukiara sa bara marit nani ba ai trabilka brisa taim wapnika mangkaia sa, sakuna ai trabilka nani wina plapaia apia (Epesus 5:28-31; Taitus 2:4, 5). Baha mita, maya waitna kasak lalukra apia ba ai maritka mapara buisa kaka, ¿witin dîa daukaia sa? Ban kra maya waitna ba want apia sa maya mairin ba asla aidrubanka ra wabia, apia kaka smalkaia warkka ba daukbia. Baha mita, ¿maya mairin ba dîa daukaia sip sa?

4. ¿Nahki natka ra maya mairin lalukra ba ai maritka ra luki ba marikaia sip sa?

⁴ Maya mairin ba makabi walaia sip sa: ‘¿Maritki ba dîa muni baku lukisa?’ (Sins Lâka 16:20, 23). Maya waitna ba ai maritka mairin dîa dauki ba nu âpu sa kaka, ban kra wari takbia. Baku sin, maya waitna pamalika ba mita witin ra taibi munbia, kan maya mairin ba natka nani pamali baku dauki ba kulkras, sakuna witin nani mapara baku apia sa. Marit waitna kum win: “Waitla ra yakan daira wali kapri”. Naha waitnika ba luki kan ai maritka rilidian wala bri kan ba tâwan witin ra lukras kan. Sakuna, uba praut lâka bri kan ba mita yakan ai dara wali kan ba ai maritka mairin ra wiras kan. Ban kra maya waitna ba walaia nit sa ai maritka ba Jehova  ra latwan kaikisa kaka, tânka apia sa witin ra latwan kaikras. Baku sin, maya mairin ba ai taimka sakaia sa ai maritka dukiara.

5. ¿Nahki natka ra maya mairin ba ai pitka kat ai maritka waitna ra bawaia sa?

⁵ Sakuna, diara wala maya mairin ba daukaia sa naha trabilka sins lâka wal wapnika mangkaia. Baibil ra Gâd mita maya mairin ra wisa: “Marit mairin nani, man mayam waitna nani ra bawi bas, kan naha lika man nani daukaia sma, Dawan ra kasak lalukra nani baku” (Kolosi 3:18). Naha tikska ba maya mairin ra hilp munisa diara nani silp daukaia apia dukiara. Baku sin wisa, “Dawan ra kasak lalukra nani baku”. Naha wiaia want sa maya mairin ba ai maritka waitna bara Jisas ra sin bawaia sa. Wâlsut ba ai pitka kat daukbia.

6. ¿Maya mairin ra dîa smalkanka nani hilp munaia sip sa?

⁶ Kristian nani sut asla aidrubanka nani ra waia  sa bara ai kasakka lukan lâka dukiara aisaia (Roman 10:9, 10, 14; Hibru Nani 10:24, 25). Baha mita, kristian kum, ¿dîa daukaia sa upla wala Jehova lâka nani krikbia wibia kaka? Jisas apastilka nani win: “Yang nani Gâd bîla ba kau walaia sna, upla nani ra lika apia” (Apastil Nani Sturka 5:29). Witin nani samplika ba wan rayaka ra alki daukaia sip sa. Jehova ra latwan kaikisa kaka, Witin ra baman mayunbia. Baku sin, latwan lâka bara rispik lâka ai maritka waitna dukiara bri ba hilp wan munbia  Jehova ra baman mayunaia (Matiu 4:10; 1 Jan 5:3).

7. ¿Kristian mairin ba dîa lukanka bri kaia sa?

⁷ Jisas win naha daukaia isi apia kabia. Kan maya mairin apia kaka maya waitna pamalika ba witin nani mapara bubia, bara sait ra baku ai dara walbia (Matiu 10:34-36). Japan kuntrika wina mairin kum naha trabilka bri kan. Witin maritka waitna ba mani 11 bilara mapara buan. Witin ra uba saura muni kan bara sam taim ai watla ra dimaia adar yabras kan. Sakuna, maya mairin ba ban bapi bûi kan bara kangrigisan wina sin hilpka brin. Witin ai pura sunan bara 1 Pita 2:20 wina hilpka kum sakan. Naha kristianka mairin ba kasak luki kan ban bapi bubia kaka, yu kum ai maritka waitna ba Jehova ra plikbia. Bara baku takan.

8, 9. ¿Maya mairin ba dîa daukaia sa ai maya waitna ba spirit lâka ra ai mina prukbia apia dukiara?

⁸ Natka ailal bâra sa spirit lâka ra wan maritka ra hilp munaia sip ba. Sampla baku, maya waitna ba ai maritka mairin rilidianka mapara sa kaka, maya mairin ba trabil kumi sin witin ra munbia apia. Baha mita, marit mairin ba ai watla ba klin briaia, ai wîna tara ba sin main kaikaia, latwan lâka marikaia sa bara ai tingkika lâka ai maritka waitna ra  yabaia sa. Baku sin, ai maya waitna mapara saura aisaia apia, kau ni tâ baikaia sa bara ai lalka baku kaikaia sa. Maya waitna ba witin mapara saura daukan kaka, maya mairin ba pana saura munaia apia (1 Pita 2:21, 23). Maya mairin ba ai tânka briaia sa upla sut ba mistikkira sa bara unsabanka kum takan kaka, witin ba padin makabaia sa (Epesus 4:26).

⁹ Maya mairin ba aidrubanka ra wisa kaka, tânka apia sa ai awarka kat kuk takras kabia. Witin ba smalkaia warkka daukaia sip sa ai maya waitna ba utla ra âpu sa taim. Bara maya mairin sinskira ba ai maya waitna ra smalkaia apia sa, witin walaia want apia sa kaka. Kau ni, apastil Pita dîa win ba nina blikisa: “Man nani maya mairin nani, mayam waitna nani ra bawi bas, bara baku mika witin nani tila wina kum kum kra, Gâd bîla ba ra kasak lukras kaka, ai maya mairin nani tânka pain ba mita, witin nani kupia alkan kabia. Man nani ba bîla kum pan aisaia sin apia sma, kan witin nani kaikbia man nani wataukankam ba sunu kulkanka lâka bri ba” (1 Pita 3:1, 2). Maya mairin ba ai rayaka ra spirit holikira mâ daukanka nani marikaia sa (Galesha 5:22, 23).

10. Maya waitna ba ai maritka ba lalukra apia sa kaka, ¿dîa daukaia sip sa?

¹⁰ ¿Dîa daukaia sip sa maya waitna ba lalukra sa, sakuna ai maya mairin lika apia? Baibil ra naha smalkanka takisa: “Wan muihni kum ai maya mairin kum brisa, bara mairka ba lalukra apia sa, sakuna ai kupia kumi luki waitna ba wal ban brih iwi kaia lukisa kaka, wan muihnika ba mairka ba ra swiaia apia sa” (1 Korint 7:12). Baku sin, maya waitna ra  wisa: “Marit waitna nani, mayam mairin nani ra latwan kaiki bas” (Kolosi 3:19).

11. ¿Maya waitna ba nahki natka ra sins lâka marikaia sip sa ai maya mairin ba lalukra apia sa kaka?

¹¹ Maya mairin ba rilidian wala brisa kaka, trai munaia sa witin ra rispikka lâka yabaia bara dîa luki ba kulkaia sa. Bara maya mairin ba upla almuk ba mita sip sa ani rilidianka want ba bribia, bara ban kra yawan mapara pain apia sa. Yawan lukaia apia sa pas trip witin ra smalkbia kaka, ai rilidianka ba mahka swibia. Baku sin, maya waitna ba ai maya mairin rilidianka dukiara aisisa taim, wiaia apia sa maya mairin bara ai pamalika dîa lan takan ba kunin baman sa. Kau pain sa wihka bîla kaikan lâka wal Baibil dukiara smalkaia. Sam taim maya mairin ba yakan ai dara walaia sip sa witin maritka kangrigisan ra baman lukisa kaka. Ban kra witin ai maya waitna mapara sa, kan witin naku lukisa: “Yang want sna man wal kau piu ailal luaia”. Maya waitna ba wihka bîla kaikan lâka briaia sa. Latwan lâka maya mairin ra marikisa kaka, yu kum mayunra lâka kasak ba alki bribia (Kolosi 3:12-14; 1 Pita 3:8, 9).

12. Aisa yapti ba sim rilidianka âpu kabia sin, ¿Baibil smalkanka nani nahki hilp munaia sip sa?

¹² Pamali tilara upla sut sim rilidianka âpu sa kaka, trabil kum sa luhpa nani ra spirit lâka ra smalkaia want sa taim. ¿Nahki Baibil smalkanka nani hilp wan munaia sip sa? Baibil ra wisa aisa warkka sa ai luhpia nani ra smalkaia, sakuna yapti ba sin baku daukaia sip sa (Sins Lâka 1:8; baku sin Blasi Sturka 18:19; Kli Smalkanka 11:18, 19 laki kaiks). Aisa ba Jisas ra ai lalka baku kaikras kabia sin, ban pamali lalka sa.

13, 14. ¿Maya mairin ba dîa daukaia sip sa ai maritka ba ai luhpia nani ra spirit lâka ra smalkbia bara aidrubanka ra brih wabia swiras kaka?

 ¹³ Maya waitna lalukra apia kum kum ba saura kaikras sa ai maya mairin ba ai luhpia nani ra spirit lâka ra smalkisa kaka, sakuna maya waitna sut ba baku lukras. ¿Dîa daukaia sip sa maya waitna ba ai maritka ba luhpa nani ra smalkbia, apia kaka aidrubanka ra brih wabia mapara buisa kaka? Maya mairin ba ai warkka nani sut ai pitka kat daukaia sa: Jehova warkka ba, ai maya waitna bara ai luhpia nani ra. ¿Nahki daukaia sip sa?

¹⁴ Pas ba, maya mairin ba ai pura sunaia sa (Pilipai 4:6, 7; 1 Jan 5:14). Sakuna maya mairin ba laki kaikaia sa dîa daukbia ba. Sins lâka wal ai maritka waitna ra wiaia sip sa witin mapara apia sa, bara maya waitna ba tawa tawa ai tânka bribia. Bara maya waitna ba maya mairin ai luhpia nani ra spirit lâka ra smalkaia adar yabras, apia kaka aidrubanka ra brih wabia swiras kaka, maya mairin ba natka wala nani ra ai luhpia ra smalkaia sip sa. Sampla baku, witin nani wal aisisa piua ra, bara ai samplika pain bâk ai luhpia nani ra smalkaia sip sa Jehova ra latwan kaikaia, Baibil ra kasak lukaia, bara ai aisika ra rispik munaia, upla wala nani ra lukaia bara wark karna takaia ba sin. Ban kra piu lubia ba ra, aisa ba kaikbia maya mairin ba wark pain kum daukisa bara tingkika lâka ba yabia (Sins Lâka 23:24).

15. ¿Aisa lalukra ba dîa warkka brisa?

¹⁵ Ban kra maya waitna ba lalukra sa, sakuna maya mairin ba apia. Baku kabia sin, maya waitna ai warkka sa ai luhpia nani ra ‘Jehova latwanka lâka ra smalki pakaia’ (Epesus 6:4). Bara witin nani ra smalkisa taim, tânka briaia sa, baku sin ai maritka mairin ra kupia pain lâka wal latwan kaikaia sa.

16, 17. Luhpa nani ai aisa yapti sim rilidianka âpu ba, ¿dîa laki kaikaia sa?

¹⁶ Naiwa piua ra luhpa kum kum ba ai aisa yapti rilidianka âpu sa. Man wahma tiara sma ba, ¿baha mai takisa? Baibil ra smalkanka pain nani man dukiamra bâra sa.

¹⁷ Baibil bila: ‘Tuktan nani, man nani aisikam bara yaptikam wal bîla wali daukaia sma, Jehova latwanka lâka ba mita. Naha sika lâ pas ba bara diara wankaia pramis win ba kasak sa: ‘Aisikam bara yaptikam ba kulki bas’’ (Epesus 6:1, 2). Naha bîla nani ba tânka sa aisa yapti ra rispik munaia. Bara luhpa ba pâwbia taim, sip kabia silp ai rayaka tâ briaia. Naha ba upla nani lâka kat baman apia sa, sakuna Gâd lâka ra sin baku aisisa. Baibil ra wisa: “Yawan kumi bani wan tânka ba saki Gâd ra param wibia” (Roman 14:12).

18, 19. Luhpa nani ba rilidian wala brisa kaka, ¿nahki muni ai aisa yapti ra hilp munaia sip sa?

¹⁸ Wahma tiara nani, Baibil wina lan takisma ba mita daukankam chens munaia nit sma bara aisikam yaptikam wal tânkam briaia. Ban kra witin nani pain kaikbia man dîa lan taki alki daukisma ba, bara kau rispik lâka brisma, bîla wawalra sma bara witin nani dîa mai wi ba daukisma. Sakuna, Baibil wina dîa lan takisma ba chens mai munaia sip sa. Baku sin, man daukankam nani nanara sât wala sa bara pamalikam ai natka nani ba witin nani tara kulkisa bara man lika apia. Baku sa kaka, witin nani lukaia sip sa man rispik munras. Ban kra man aisikam yaptikam lukbia dîa lan takisma ba, tawankam ra diara tringsar baku kaikisa, apia kaka man Baibil stadi takisma ba mita lalah mapara umpira kama. Tara pulan lâka briaia ba trabil kum sa. Ban kra witin  nani lukbia man uba tara pulisma. Baha mita, lukisma  man baman raitkam brisma, sakuna witin nani apia.

¹⁹ Baha mita, yarka uba piua wihka lubiara bara aisikam yaptikam ba kangrigisan almukka nani ra kakaira takbia, apia kaka spirit lâka ra pâwan kristianka nani ra. Aisikam yaptikam ra paiwaia sip sma Aidrubanka Watla ra wabia. Baku natka ra witin nani silp walbia man dîa lan takisma bara kaikbia Jehova Witniska nani dîa sât uplika sa. Piu lubia ningkara, ban kra aisikam yaptikam sât wala lukbia. Aisa yapti kum kum ai luhpia nani mapara karna buisa. Baku sin, ulbi sakanka nani kalkisa, bara aidrubanka ra waia sin adar yabras. Sakuna luhpa nani ba sip sa piu wala ra ulbi sakanka nani aisi kaikaia, ai pânika nani ra smalkaia bara ban wina smalkaia warkka ba daukaia. Bara Jehova ra puram sunaia sip sma. Wahma tiara kum kum ba man takbia ba ra yakan iwaia sip kabia. Sakuna man wamtla ra dîa trabilka bri kama sin, amya tikpara ‘aisikam bara yaptikam ba kulkaia’. Pamalikam tilara kupia kumi lâka ra iwaia trai muns (Roman 12:17, 18). Baku sin, Gâd kupia kumika lâka ba pliks.

20. ¿Tapukra nani ba ai rapika apia kaka papika maya ra nahki kaikisa?

²⁰ Pamali tilara trabil tara kum takisa, sakuna rilidian tâka mita apia. Naha ba takisa aisa yapti bara  luhpa nani wina. Sampla baku, pamali kum kum ra luhpa nani ba aisa yapti wala wala wina baikan sa. Baha mita, witin nani ba ai aisa yapti tâwan lawisa. Baku sin, witin nani lukisa ai aisa yapti ra baman kasak kaia sa. Bara rapika apia kaka ai papika  maya diara wisa taim, witin nani bîla walaia want apia sa. ¿Tapukra bri pamalika nani ba nahki muni lilia iwaia sip sa?

21. Pamali nani ba sât wala kabia sin, ¿dîa muni rapika bara ai papika maya ba Baibil smalkanka ba alki daukaia sa?

²¹ Pamali nani ba sât wala kabia sin, Baibil smalkanka nani ba sut ra hilp munisa. Naha smalkanka nani nina blikras kaka, piu lubia ningkara trabil nani ba kau saura kabia (Lawana 127:1; Sins Lâka 29:15). Sins lâka bara tânkira kaia sa: sins lâka ba nit sa Baibil smalkanka nani nina blikaia dukiara. Bara tânkira lâka nit sa, kan baku laki kaia sip sa dîa muni pamali ra upla nani ba diara kum kum aisisa, apia kaka daukisa. Tânka briaia lâka sin nit sa (Sins Lâka 16:21; 24:3; 1 Pita 3:8).

22. ¿Dîa muni luhpa ba ai rapika apia kaka ai papika maya ba ra pain kaikras?

²² Yawan rapika apia kaka papika maya kum sa kaka, ban kra wan kupia kraukisa luhpa nani ba ai aisika apia kaka ai yaptika pânika baku wan kaiki kan. Sakuna, nanara diara nani ba sât wala takan ba mita, luhpa nani ba baku lukras. Luhpa ba ai aisa yapti ra lukisa bara ai brinka apia sa latwan wan kaikaia. Ban kra luhpa nani ba lukisa ai aisa yapti ra baman kasak kaia sa. Baku sin, sam taim klir pali wan wisa yawan ai aisika apia kaka ai yaptika apia sa. Naha wan wisuya taim saura wan dara walisa. Baibil ra wisa: “Kupiam sauhkanka mita yarka mai brih wabiara” (Smasmalkra 7:9). Luhpa nani dîa luki ba tânka briaia dukiara sins lâka bara tânkira kaia nit sa.

23. ¿Tapukra nani ra nahki wapnika mangkaia sip sa?

²³ Naha daukanka wâl ba nit sa luhpa nani ra wapnika mangkisa piua ra. Baha ba pitka kat daukaia sa (Sins Lâka 6:20; 13:1). Luhpa nani ba sut sim sât  apia sa. Baha mita, sim natka ra wapnika mangkras. Rapika apia kaka papika maya kum kum ba lukisa kau pain kabia aisika apia kaka yaptika pali ba ai luhpia ra wapnika mangkbia. Baku kabia sin, aisa yapti wâlsut ba laki kaikaia sa nahki muni ai luhpia nani wapnika mangkaia bara ai luhpia nani ra kau latwan kaikaia apia ai tapukrika nani ba wal (Sins Lâka 24:23). Luhpa nani ba bîla walaia sa, sakuna sam taim mistik nani daukisa. Baha mita, aisa yapti ba isti ai kupia baikaia apia sa. Wapnika mangkaia lâka ba latwan lâka wal daukaia sa (Kolosi 3:21).

24. ¿Dîa ba hilp munaia sip sa tapukra bri pamalika nani tilara rug lâka ra kauhaia apia dukiara?

²⁴ Pamali nani ba pana pana aisaia sa. Baku natka ra ai trabilka nani kau isti wapnika mangkbia.  Baku sin, pamali ra hilp munisa ai rayaka ra trabil nani mapara buaia (Pilipai 1:9-11 laki kaiks). Pamali ba pana pana aisisa taim sim lukanka brisa, bara rug lâka ra kahwaia apia dukiara hilp munisa. Luhpa mairin nani ba laki kaikaia sa nahki natka ra ai kwalka dimisa ai rapika apia kaka witin luhpia waitna nani lamara sa taim. Baku sin, luhpa waitna nani ba sim sât daukaia sa ai papika maya bara witin luhpia marin nani lamara sa taim (1 Tesalonaika 4:3-8).

25. ¿Dîa daukanka nani ba ai tapukra bri pamalika nani ra hilp munisa?

²⁵ Wan tapukrika nani ra pakaia warkka ba isi apia sa. Piu ailal nit sa witin nani wal pâna takaia dukiara. Wan tapukrika nani yawan ra latwan wan kaikbia bara rispik wan munbia dukiara wark karna takaia sa. Sakuna daukaia sip sa. Pamali ba lilia lâka ra iwaia dukiara nit sa wan kupia pain kum briaia bara tânka briaia lâka. Baku sin, Jehova kupia lâka daukaia brinka briaia ba sin hilp wan  munisa (Sins Lâka 16:20). Naha daukanka nani brisa kaka, sip sa trabil wala nani mapara buaia.

26. ¿Lalah trabilka ba bara yuyaka nani nahki kaiki ba sin pamali ra nahki sauhkaia sip sa?

²⁶ Lalah trabilka bara yuyaka nani nahki kaiki ba sin pamali tilara trabil ailal takisa. Sari sa wiaia, sakuna lalah dukiara unsabaia bara lalahkira takaia brinka ba, apia kaka lalah kau ailal briaia ba sin pamali nani ra sauhkisa. Naha ba kau takisa aisa yapti ba wâlsut wark takisa bara silp ai lalahka apahkisa kaka. Naha sât trabilka nani âpu kabia sin, sim awarkka nani ra wark takras ba mita, ban kra aikuki uya taim âpu sa. Kuntri kum kum ra trabil wala takisa: aisa yapti ba plis wala ra wih wark takisa bara piu wihka bahara takaskisa. Baku natka ra kau lalah ailal daukbia lukisa. Naha daukisa kaka, pamali ra trabil ailal bri balisa.

27. ¿Lalah trabilka bri pamalika ra Baibil smalkanka nani nahki hilp munisa?

²⁷ Baha sât pamalika nani lâka yawan sip daukras, kan pamali nani sut ba ai trabilka bara ai nitka brisa. Sakuna Baibil smalkanka nani ba hilp munaia sip sa. Sampla baku, Sins Lâka 13:10 ba aisisa unsabanka ba daskisa ‘pana pana aisisa kaka’. Naha ba tânka apia sa yawan dîa luki ba wiaia baman, sakuna wiaia want sa upla wala hilpka plikaia bara wan maritka dîa luki ba sin laki kaikaia. Baku sin, lalah ba pain apahkisa kaka, pamali ra hilp munisa asla lâka ra iwaia. Sam taim nit sa aisa yapti ba wark wala bribia tras tara brisa kaka, aibapaia dukiara. Bara uba luhpa brisa apia kaka ai pamalika kum ra main kaikisa. Baku takisa kaka, maya waitna ba ai maya mairin wal taim luaia sa. Maya waitna ba ai  luhpia aikuki maya mairin ra hilp munaia sa utla warkka daukaia (Pilipai 2:1-4).

28. ¿Dîa kupia kraukanka nani ba pamali ra hilp munisa asla lâka ra iwaia?

²⁸ Naiwa piua ra yawan lalah nit sa, sakuna naha ba lilia lâka bara raya ban kaia lâka ba sip wankras (Smasmalkra 7:12). Yuyaka nani ra uba lukaia ba wan wîna târa mapara bara spirit lâka ra wan sauhkaia sip sa (1 Timoti 6:9-12). Kau pain sa Gâd Kingka lâka ba plikaia bara ai kasakka lâka ba sin. Baku sin, yawan kasak lukaia sa Jehova wan warkka nani ba blisin munbia (Matiu 6:25-33; Hibru Nani 13:5). Wan rayaka ra spirit dukia nani pas daukisa, bara Gâd kupia kumika lâka plikisa kaka, wan pamalika natka kum kum ra dakwi takaia sip sa. Sakuna baku kabia sin, diara kau tara nani ra asla lâka ra iwbia.