1, 2. a) ¿Ani maprika bîla ra Jisas serts tâ bri uplika nani ra kasak apia kan ba dukiara aisan? b) ¿Naha maprika bîla ba wahma tiara nani dukiara dîa wan smalkisa?

 JISAS pruaia baila kan piua ra, witin Ju uplika nani serts tâ bri daknika kum ra makabi walanka kum daukan witin nani luki kaikbia dukiara. Jisas makabi walan: “¿Naha na man nani nahki lukisma ki? Waitna kum luhpa waitna wâl bri kan, bara kumi ra naku win: ‘Luhpi, man naiwa wainki nasla ra wark takaia was.’ Luhpia ba bîla: ‘¡Yang wamna apia!’ Sakuna naika mapara ai lukanka sins munan, bara  wark takaia wan. Baha ningkara, aisa ba ai luhpia wala ba ra bal, sim bîla wisata. Naha bila lika: ‘Âu, aisa, yang wamna.’ Sakuna witin waras. ¿Wâl ba wina ani ba ai aisa want kan ba kat daukan? Witin nani pana win: ‘Pas ba’” (Matiu 21:28-31).

² Jisas naha makabi walanka dauki tânka marikan serts tâ bri uplika nani ba kasak apia kan. Sim luhpia wala kata baku, Gâd kupia lâka daukaia dukiara pramis takan sakuna daukras kan. Aisa yapti ailal ba nu takisa Jisas maprika bîla aisan ba witin pain ai tânka bri kan pamali dukiara. Jisas marikan baku, wahma tiara ba dîa luki ba nu takaia karna sa bara witin nani dîa daukbia ba sin. Ban kra wahma lupia kum trabil ailal daukbia, sakuna man takbia piua ra ai rayaka wapni takaia sip sa. Nahara luki kaiki utla bilara wahma tiara lupia nani ra, ¿nahki wapnika mangkaia sip sa?

3. ¿Dîa muni aisa yapti ba isti lukaia apia sa ai luhpia nani ba mapa babura sa?

³ Piua kum kum ra yawan walisa wahma tiara nani ba sibriras ai aisika yaptika mapara buisa. Ban kra yawan pamali kum ra kakaira sa wahma tiara ba uba kiama karna, sakuna isi apia sa nu takaia luhpa kum ba rait pali mapa babura sapa. Baku sin karna sa tânka briaia dîa muni luhpa kum kum mapa babura takisa bara wala nani lika apia. Baha mita aisa yapti nani ba ai luhpia kum uba ai mapara buisa kaka, ¿dîa daukaia sip sa? Naha makabi walanka ansika yabaia dukiara pas ba pain tânka briaia sa mapa babura kum ba dîa tânka sa.

4-6. a) ¿Mapa babura kum ba dîa tânka sa? b) ¿Aisa yapti nani ba ai luhpia piu kum ra ai bîla walras sa taim dîa ba ai auya tikaia apia sa?

⁴ Yawan wiaia sip sa upla kum mapa babura ba witin  diara tânka pain bri kabia sin ban bîla walras. Piu bani ra tâ bri uplika nani mapara sa. Baibil ra wisa: “Tanis lâka ba lika kau tuktan nani ba kupia lukanka tâka sa” (Sins Lâka 22:15). Luhpa nani ba piu kum kum ra ai aisa yapti bara upla wala nani mapara sin buisa. Naha kau takisa witin nani ai wîna tara bara ai lukanka pâwi auya ba ra. Wan rayaka ba sât wala taki ba mita wari takisa, sakuna wahma tiara piua ra kau ai rayaka ra diara manis takisa. Luhpiam wahma tiara lupia ba nanara man takisa. Baha piua ra aisa yapti bara ai luhpia aikuki mapara karna sa ai tânka briaia. Aisa yapti ba want apia sa ai luhpia nani ba isti pâwbia, sakuna luhpa nani ba baku lukras.

⁵ Wahma tiara lupia kum ai aisika yaptika lâka mapara sa; sakuna piu kum kum ra luhpa ba bîla walras kaka, tânka apia sa mapa babura kum sa. Bara spirit lâka ra ban kra luhpa kum kum uba ai brinka apia sa tânka kasak ba lan takaia. Naha ba mapa babura tânka apia sa. Aisa yapti nani ba isti lukaia apia sa ai luhpia nani ba mapa babura sa.

⁶ ¿Wahma tiara nani sut ai aisa yapti mapara buisa ki? Apia. Yawan kaiki aula sa wahma tiara wiria baman rait pali mapa babura sa. Nanara, ¿dîa wiaia sip sa luhpa kum ban ai aisika yaptika mapara sibrin âpu buisa kaka? ¿Dîa muni luhpa kum kum mapa babura takisa?

7. Naha tasba Sitan karnika mununhtara ba luhpa nani ra, ¿nahki yaban mapara buisa?

⁷ Upla nani ba naiwa piua ra kau mapa babura sa, kan “tasba aiska na lika Sitan karnika mununhtara sa” (1 Jan 5:19). Tasba na Sitan ai karnika ra bri ba mita iwanka natka saura nani kaikisa bara kristian nani baha mapara aiklabaia sa (Jan 17:15). Naiwa piua  ra upla iwanka natka ba ai swira lâka âpu sa, kau trabil ra wan dingkisa bara diara saura daukaia kau wan kupia bukisa (2 Timoti 3:1-5, 13). Aisa yapti ba ai luhpia nani ra smalkras, maisa pakras bara main kaikras kaka, isi kabia wahma tiara ba baha spiritka “Gâd bîla wali daukras nani tâ bri ba” nina blîkbia (Epesus 2:2). Bara pâna saura nani ai walka ra diara saura daukbia taibi muni ba sin naha tilara sa. Baibil ra wisa: “Taniskira nani wal tauki bas bara mai sauhki mai tikbia” (Sins Lâka 13:20). Sim natka ra ya naha tasba spiritka lâka nina bliki ba pânika plikisa kaka, witin nani baku takbia. Wahma tiara nani ra hilp munaia sa Baibil tânka briaia. Baku witin nani nu kabia naha lâka ra iwaia ba kau pain sa (Aiseya 48:17, 18).

8. ¿Dîa trabilka nani ba luhpa nani ra mapa babura daukisa?

⁸ ¿Ani natka wala mita upla nani ba kau mapa babura sa? Sampla kum, pamali bilara nahki iwi ba. Aisa yapti kum rum dadira, apia kaka druga yus munisa bara ai maritka ra prukisa kaka, luhpa ba lukbia upla sut iwanka natka ba baku sa. Sakuna pamali kum uba trabil âpu tilara sin, luhpa nani ba mapa babura takaia sip sa, ai aisa yapti nani ba witin ra lukras kaka. Wahma tiara lupia kum mapa babura takras sa pâna saura nani wina baman. Aisa yapti kristian ba ai luhpia nani ra Baibil lâka kat smalkisa bara naha tasba saura wina kan kahbisa. Sakuna luhpa kum kum ban bîla walras sa. ¿Dîa muni? Kan yawan sut kasakkira apia sa. Apastil Pal win: ‘Saurka ba upla kumi [Adam] tâka ba mita upla sut ra luan, bamna saurka ba mita prura balan bara prura ba upla sut ra alkan sa, kan upla sut saura daukan bamna’ (Roman 5:12). Adam ba mapa babura kum takan bara ai wîna ra baman luki kan. Witin saurka ba prapati kum baku ai kiamka nani ra swin. Adam daukan baku, wahma tiara kum kum ba mapa babura takisa.

9. ¿Ani natka wâl ba luhpa nani ra mapa babura daukaia sip sa?

⁹ Aisa yapti kum kum ai luhpia nani ra ai pitka kat lâ mangkras sa. Baha mita, wahma tiara lupia ba mapara buisa (Kolosi 3:21). Aisa yapti wala ba ai luhpia ra uba taibi munisa apia kaka lâ karna mangkisa. Bara aisa yapti wala nani ba ai luhpia ra uba pri lâka yabisa. Wahma tiara lupia ba kan kahbaia dukiara lâ kumi sin mangkras sa. Isi apia sa aisa yapti ba ai pitka kat ai luhpia nani ra smalki pakaia. Bara luhpa sut ba sim nitka nani âpu sa. Ban kra luhpa kum kum ba nit sa kau pura kaiki kabia wala nani ba wal. Baibil samplika wâl ba hilp wan munbia kaikaia dîa trabilka takisa luhpa nani ra ai pitka kat smalki pakras kaka: luhpa nani ra uba pri lâka yabaia apia kaka uba lâ karna mangkaia.

10. Ban kra Elí prîs warkka pain dauki kan, sakuna, ¿dîa muni aisa kum pain apia kan?

¹⁰ Elí ba prîs tara kum kan Israel piua ra bara ai luhpia nani bri kan. Witin 40 mani prîs warkka daukan bara Gâd lâka ba pain ai tânka bri kan. Ban kra ai warkka ba kasak dauki kan bara ai luhpia Hofní bara Finees ra Gâd lâka smalki pakan. Sakuna, ai luhpia nani ra uba pri lâka yaban. Hofní bara Finees ba prîs warkka dauki kan, sakuna “watawikira nani” kan. Ai wîna brinka ra bara rug lâka ra baman luki kan. Bara tempel ra diara saura bara tâski daukan taim, Elí ai luhpia nani ra prîs warkka dauki kan ba wina kangbi sakras kan. Rait pali lawi daukras kan. Ai luhpia nani ra kau kulkanka yaban Gâd ra yabaia ba wal. Sim tâka, Elí luhpia nani Jehova mayunanka klin ba mapara buan bara ai watla bîla uplika sut prui tiwan (1 Samuil 2:12-17, 22-25, 29; 3:13, 14; 4:11-22).

11. Elí samplika saura ba wina aisa yapti nani ba, ¿dîa lan takisa?

¹¹ Naha trabilka takan taim, Elí luhpia nani ba man  takan atia kan. Sakuna naha sturka ba tânka marikisa luhpa nani ra wapnika mangkras kaka, trabil ailal takisa (Sins Lâka 29:21 laki kaiks). Aisa yapti kum kum lukisa latwan lâka ai luhpia nani ra marikaia ba tânka sa tuktan ra uba pri lâka yabaia. Baha mita utla bilara ai lâka mangkisa, sakuna ai luhpia nani ba yaban daukras. Ai luhpia nani ra latwan lâka ni lawi daukras, bara kristian daukanka nani krikisa taim ai luhpia ra diara wiras. Aisa yapti ai luhpia ra uba pri lâka yabi ba, naha ai mapara buisa bara natka kumi ra sin rispik munras (Smasmalkra 8:11 laki kaiks).

12. ¿Roboam ba dîa sât mistikka daukan ai karnika wal?

¹² Roboam uba lâ karna nani mangkan. Bara naha samplika wan marikisa uba karna kaia ba dukiara. Witin ba Israel aiska kingka las mangkan ba witin kan, sakuna king kasak kum apia kan. Roboam aisika pruan taim witin king iwan. Sakuna upla nani ba uba sari kan Salaman lâka kan ba uba karna pali kan ba mita. ¿Roboam ba nahara lukan? Apia. Upla nani mita ai aisika lâka ba wira swapni daukbia makaban taim, witin almuk nani kupia kraukanka ba tnaya ra lakan bara adar yaban ai aisika lâka karna kan ba wina kau karna daukbia. Witin uba tara pulan ba mita, kiamka 10 yahbra tani ra iwi kan nani ba witin mapara aiklabaia buan bara ai kingka lâka ba pîs wâl ra baiki sakan (1 King Nani 12:1-21; 2 Kronikas 10:19).

13. ¿Dîa muni aisa yapti nani ba Roboam mistikka ra kahwaia apia sa?

¹³ Aisa yapti ba Roboam samplika wina sip sa lisin kum kum lan takaia. Witin nani ai pura sunra bâk ‘Jehova ra plikaia sa’ bara Baibil wi ba kat pain laki kaikaia nahki ai luhpia nani ra smalki pakaia (Lawana 105:4). Smasmalkra 7:7 ra wisa: ‘Taiban lâka ba daukisa upla sinskira ba grisi baku pulbia’. Utla bilara  diara nani ba pain luki lâ kum mangkaia ba wahma tiara lupia nani ra hilp munbia pâwaia bara sim piua ra naha lâka nani ba witin nani mapara kan kahbisa. Wahma tiara nani ba ai watla bilara uba taibi munaia apia sa bara uba pri lâka sin yabia apia sa. Baku witin nani silp ai rayaka ra dîa daukaia ba tânka bribia. Aisa yapti ba ai luhpia nani ra tânka kat smalkbia kaka, wahma tiara lupia nani ba ai mapara bubia apia.

14, 15. Aisa yapti nani ba, ¿nahki kaikaia sa ai luhpia nani pâwi auya ba?

¹⁴ Aisa yapti ba ai brinka sa ai luhpia nani ba pâwi almuk takbia. Sakuna witin nani uba wari takisa nanara ai luhpia ba witin nani ra uba nitka apia sa, wibia  kaka wahma tiara lupia ba mahka ai rayaka silp plikisa. Baha piua ra aisa yapti ba kaikbia ai luhpia wahma tiara lupia ba piu kum kum ra diara sut mapara sa bara wira kiama karna sa. Wan kupia kraukaia sa aisa yapti lalukra nani warkka sa luhpa nani daukanka pain bri ba bara spirit lâka ra aitani pâwan uplika kum pakaia (1 Korint 13:11; Epesus 4:13, 14 laki kaiks).

¹⁵ Luhpa nani ra pri lâka yabaia karna kabia sin, aisa yapti nani lan takaia sa ani piua ra nit sa kaka yabaia. Luhpa nani ba nit sa silp ai rayaka wal dîa daukbia ba laki kaikaia. Yawan kaikaia sip sa wahma tiara lupia kum kum tuktan wina almuk lukanka brisa. Baibil ra king Josías wahma lupia kan ba dukiara aisisa: ‘Witin ba kau wahma kan ba ra [15 mani baku  bri kan], ai almukka Debit Gâdka ba plikan’ (2 Kronikas 34:1-3).

16. Luhpa nani ba kau pri lâka brisa taim, ¿dîa ba ai tânka pain briaia sa?

¹⁶ Sakuna pri lâka briaia isi apia sa. Baha mita tuktan nani pâwi aula ba ra swika witin nani diara kum kum daukaia luki ba silp ai trabilka wauhbia. “Upla mita dîa mangki ba baha sika krikbia”. Naha smalkanka ba wahma tiara lupia bara man takan uplika nani dukiara sa (Galesha 6:7). Piu bani ra luhpa nani ra kan kahbaia sip apia kabia. Sakuna luhpa ba, ¿diara saura daukaia want sa kaka? Aisa yapti wapni kum ba “apia” wibia. Ban kra sip kabia wiaia dîa muni “apia” wisa, sakuna dîa aisan ba kat daukaia sa (Matiu 5:37 laki kaiks). Ban sakuna, trai munaia sa praut lâka âpu bara tânkira lâka wal “apia” wiaia, kan “swapni ni upla tawa aisaia ba ai kupia baikanka ba daskisa” (Sins Lâka 15:1).

17. ¿Aisa yapti ai luhpia nani ra nahki ai nitka nani ba yabia ki?

¹⁷ Wahma tiara nani ba want apia kabia sin wapnika mangkaia nit sa. Witin nani saura ai dara walisa ai aisa yapti nani brinka sât wala takisa bara lâ nani mangkan ba chens munbia. Baku sin, wahma tiara lupia nani ra kupia buki bîla aisisa, tâ baikisa uba ai swira bri kabia apia dukiara, silp ai wîna tara ba ra kasak lukaia. Baku daukbia kaka witin nani man takbia taim ai rayaka kau pain iwbia. Wahma tiara ba nit sa witin nani ra kasak lukbia ai raitka brisa taim (Aiseya 35:3, 4; Luk 16:10; 19:17 laki kaiks).

18. ¿Dîa sât daukanka pain ba wahma tiara lupia nani dukiara kaikisa?

¹⁸ Aisa yapti ba lilia ai dara walaia sip sa tânka briaia ai luhpia nani ba pain pâwisa kupia kumi lâka ra, latwan lâka bara ai watla ra trabil âpu kira iwisa taim (Epesus 4:31, 32; Jems 3:17, 18). Wahma tiara  ailal ba pamali kum rum dadira ba tilara, rau munan lâka bara daukanka saura wala tilara iwisa. Sakuna witin nani baha trabilka sut pura luan sa bara pain ai rayaka yus munisa. Baha mita, wahma tiara lupia ra utla ra pain kan kahbisa, latwan lâka bara witin nani dukiara kau lukisa ai dara walbia kaka —naha tâ baikanka lâka ba ai pitka kat kaia sa bara Baibil dîa wi ba kat wapnika mangkaia sa—, man takbia taim witin nani dukiara lilia wan dara walbia (Sins Lâka 27:11 laki kaiks).

19. Aisa yapti ba ai luhpia nani ra smalki pakaia ai mihta ra sa, sakuna, ¿luhpa nani ba dîa ai warkka sa?

¹⁹ Smalkanka pain kum luhpa nani ra yamnika yabisa. Sins Lâka 22:6 wisa: “Tuktan ba ai rayaka yabalka lâka ba, pain smalki paki bas naiwa piua ra, baku mika witin almuk takbia ba ra, baha wina tnaya ra tawbia apia”. Sakuna, ¿dîa wiaia sip sa luhpa kum kum ai aisika yaptika pain kan, sakuna ban saura takisa? ¿Baha ba takaia sip sa? Âu. Sins Lâka bîla nani ba tânka briaia sa. Baibil tikska wala smalkanka wi ba kat luhpa nani ba ai aisika nani ra bîla walaia sa (Sins Lâka 1:8). Aisa yapti bara luhpa ba Baibil smalkanka nani ba alki daukaia sa pamali ba asla iwbia dukiara. Naha nani ba baku daukras kaka, trabil tara nani ai watla bilara bribia.

20. Luhpa nani ba diara pain tânka briras trabil ra dimuya taim, ¿aisa yapti ba dîa daukaia sa?

²⁰ ¿Aisa yapti ba dîa daukaia sa wahma tiara lupia ba trabil ra dimisa taim? Baha piua ra wahma tiara ba hilp munaia nit sa. Aisa yapti ba ai tânka briaia sa wahma tiara ba diara tânka ba uya nu âpu sa. Baku lukbia kaka, uba isti lawbia apia. Apastil Pal kangrigisan bilara spirit lâka ra karna kan nani  ra win:  “Muihki nani, upla kum saurka ra kauhan sa kaka, man nani spiritkira nani sma ba mita saura ba wapni dauks. Sakuna latwan lâka ra daukaia sa” (Galesha 6:1). Aisa yapti ba sin naha lâka ba yus munaia sa wahma tiara ba diara pain lukras trabil ra dimisa piua ra. Tânka pain marikaia sa dîa muni ai daukanka ba saura sa bara kli sim trabilka ra kahwaia apia dukiara dîa daukaia sip ba tânka marikaia sa. Baku sin, wiaia sa ai daukanka ba saura sa, sakuna witin lika apia (Judas 22, 23 laki kaiks).

21. Kangrigisan samplika nina bliki, ¿aisa yapti ba dîa daukaia sa ai luhpia kum diara saura daukuya taim?

²¹ ¿Sakuna wahma tiara ba diara kum uba saura daukan kaka? Witin hilpka tara nit sa. Kangrigisan bilara upla kum diara saura daukuya taim, kupia bukisa ai kupia lakaia bara kangrigisan almukka nani ra plikaia (Jems 5:14-16). Naha ba ai kupia lakisa taim kangrigisan almukka nani ba spirit lâka ra kli karna takaia hilp munisa. Pamali bilara wahma tiara lupia kum saurka lâka ra kauhan ba ai aisika yaptika mihta ra sa hilp munaia. Ban kra kangrigisan almukka nani wal naha trabilka ba laki kaikaia sa. Aisa yapti ba ai luhpia saurka ba kangrigisan almukka nani ra yukukaia apia sa.

22. Aisa yapti ba Jehova daukan baku, ¿nahki ai luhpia nani wal daukaia sip sa trabil saura kum ra dimisa taim?

²² Aisa yapti nani mapara karna munisa ai luhpia nani ba trabil ra dimisa taim wapnika mangkaia. Ban kra, sari lâka tara bri ba mita ai kupia baikbia bara ai luhpia nani ra lawi sturi karna aisabia. Sakuna baku daukbia kaka, ai luhpia ba kau ai kupia sauhkbia. Wan auya tikaia apia sa wahma tiara trabil brisa piua ra dîa daukbia ba hilp munaia sip sa. Jehova uplika nani ba ai saurka swin taim Witin padin munan. Sakuna witin nani pas ai kupia lakaia kan. Bara  latwan lâka ni Jehova win: “‘Man nani bal, naha lâka na aisi kaikaia. Man nani saurkam ba tala pauni kabia sin, kwala pihni wahmuk baku daukamni; siksa mâka prâmka ra alkan ba baku kabia sin, bîp tialka laya baku pihni daukamna’” (Aiseya 1:18). Naha ba aisa yapti mapara sampla kum tara sa.

23. ¿Aisa yapti ba dîa daukaia sa bara daukbia apia ai luhpia kum diara saura daukisa taim?

²³ Wahma tiara nani saurka ra kauhan ba yawan hilp munaia sa witin ai daukanka ba chens munaia. Yawan sip sa aisa yapti nani tânka pain bri bara kangrigisan almukka nani ra sin hilpka makabaia (Sins Lâka 11:14). Yawan diara nani ba pain lukras aisaia apia sa, apia kaka diara saura kum daukaia apia, baku wan luhpia ba isti yawan ra balbia. Trai munaia sa kupia baiwan lâka, wan kupia tahplika lâka briaia apia (Kolosi 3:8). Ban trai muni bas (1 Korint 13:4, 7). Saurka lâka ba misbara kaikaia, sakuna wan luhpia wal uba karna kaia bara wan kupia baikaia apia sa. Bara diara kau tara ba sika aisa yapti baku trai munaia sa sampla pain kum kaia bara Gâd ra wan kasakka lukan lâka karna bri kaia.

24. ¿Dîa sât trabilka kristian pamalika ra takisa, bara aisa yapti ba dîa daukaia sip sa?

²⁴ Ban kra wahma tiara ba ai aisika yaptika mapara buisa bara kristian daukanka pain wina sait ra takisa. Baku sa kaka, aisa yapti ba trai munaia sa ai luhpia wala nani painka dukiara lukaia. Aman kaikaia sa ai luhpia mapa babura ba ra baman ai taimka sut yabaia apia sa, sakuna wala nani ra sin lukaia sa. Bara nit sa kaka luhpia mapa babura trabilka ba ai pamalika wal laki kaikaia sa, bara natka pain kum ra daukaia (Sins Lâka 20:18 laki kaiks).

25. a) Kangrigisan samplika nina bliki, ¿aisa yapti ba dîa daukaia sa ai luhpia kum mapa babura sa bara chens takaia want apia sa kaka? b) ¿Aisa yapti ba dîa ai auya tikaia apia sa ai luhpia kum mapa babura takbia kaka?

 ²⁵ Apastil Jan win kangrigisan ra ya uplika mapa babura bara chens takaia want apia ba nahki kaikaia: “Wamtla ra dingki bripara, bara lakula sin wipara” (2 Jan 10). Ban kra aisa yapti ba lukbia witin ai luhpia kum baku takbia kaka, sim lâka daukbia naha ba man takan sa kaka. Naha daukaia ba aisa yapti mapara karna sa bara uba sari kaia sip sa. Sakuna pamali ra luhpa wala nani ra main kaikaia dukiara nit sa baku daukaia. Pamali ba nit sa piu bani ra pura kaiki kabia bara kan kahbaia. Baha mita utla ra lâ wapni nani ba pain mangki swiaia sa. Luhpa wala nani dukiara lukaia sa bara makabi walaia skul watla bara kangrigisan ra nahki auya ba. Baku sin wiaia sa luhpa mapa babura daukanka saura nani ba misbara kaikisa sakuna witin ra lika apia. Luhpiam ra misbara kaikaia apia sma, sakuna witin dîa dauki ba lika. Jekob luhpia waitna wâl ai pamalika ra trabil tara bri balan taim, ai luhpia daukanka saura ba misbara kaikan, sakuna ai luhpia nani ra lika apia (Blasi Sturka 34:1-31; 49:5-7).

26. Aisa yapti pain nani ra, ¿dîa ba hilp munbia ai luhpia kum mapa babura takbia kaka?

²⁶ Ban kra pamali ra trabil takan dukiara wan pâtka sa wan dara walbia. Sakuna yawan Jehova ra wan pura suni, wan luhpia ra hilp munaia dîa sip ba kat daukan, bara Gâd lâka kat wan luhpia ra smalki pakan kaka, pâtkira baku wan dara walaia apia sa. Wan kupia kraukaia sa aisa yapti kumi sin kasakkira apia sa, sakuna yawan dîa daukaia sip ba kat daukisa (Apastil Nani Sturka 20:26 laki kaiks). Pamali tilara mapa babura kum pain takaia want apia ba wal iwaia ba uba sari sa. Sakuna baha takbia kaka yawan  nu kaia sa Gâd pain tânka brisa wan trabilka nani ba. Baku sin, Witin ra rait pali mayuni nani ra lulki swibia apia (Lawana 27:10). Baha mita trai munaia sa wan watla bila ba yukuwaika kum pain kabia bara spirit lâka ra wan luhpia wala nani ra kan kahbaia.

27. Luhpia waitna tiwan maprika lilka ra takan baku, ¿aisa yapti ba dîa bîla kaikanka ban briaia sa?

²⁷ Bîla kaikanka lâka tikaia apia sa. Ban kra wan luhpia tuktan kan taim dîa smalkan ba hilp munaia sip sa ai kupia lakbia dukiara (Smasmalkra 11:6). Pamali ailal ba naha sât trabilka brisa, bara kaikan ai luhpia saura daukan ba wina ai kupia laki kli tawi balan. Sim baha aisika luhpia waitna tiwan maprika lilka Jisas aisan ba baku (Luk 15:11-32). Yawan ra sim baku wan takaia sip sa.