ISRAEL bara Juda kiamka kingka nani iwi kan piua ra, waitna kum kum bâra kan: prapit nani ba. Naha waitnika nani sibrin âpu bara kasak lukan lâka karna bri kan ba mita, Gâd maisa pakanka nani yaban. Witin nani dîa aisan ba dukiara laki kaikbia.

1. Jerusalem sauhki tikanka ba. Gâd prapitka nani sut ba —kau pali ba Aiseya bara Jirimaya— witin nani kaina manis win Jerusalem ba sauhki tikan kabia bara upla iwras takaskbia. Baku sin, dîa muni Gâd Israel uplika nani mapara ai kupia baikan bara witin nani ra sauhki tikaisa win. Israel uplika nani ai bîla wal baman Gâd ra kulki kan, sakuna gâd bahki nani ra mayuni kan, saurka lâka tara dauki kan bara upla nani ra rau muni kan (2 King Nani 21:10-15; Aiseya 3:1-8, 16-26; Jirimaya 2:1–3:13).

2. Mayunanka klin ba kli bâra kabia. Israel uplika nani Babilon tasbaya ra 70 mani iwi kan. Baha wina kli ai tasbaya ra waia kan, Jerusalem ra tempel ba paskaia bara mayunanka lâka klin ba bapaia (Jirimaya 46:27; Emus 9:13-15). Mani 200 naha ba kau takras kainara, Aiseya ba win waitna kum ai nina Ciro mâki ba Babilon sauhki tikbia bara Israel uplika nani ba pri sâkbia. Baku sin win nahki daukbia ba (Aiseya 44:24–45:3).

3. Misaya balbia bara dîa daukbia. Misaya ba Betlehem ra aisubi takbia (Miqueas 5:2). Witin ba bawikira kabia. Baha mita, Jerusalem ra muyul lupia kum purara uli dimbia (Sakaraya 9:9). Upla sut ra latwan kaikbia, sakuna upla nani mita witin ra misbara kaikbia (Aiseya 42:1-3; 53:1, 3). Misaya ba natka saura kum ra pruaia kan. Sakuna Misaya ba kli raya takaia kan. Witin ba bukan kabia ai rayaka ba sakripais daukaia. Baku natka ra upla sut saurka nani ba ban swih tikan kabia (Aiseya 53:4, 5, 9-12).

4. Misaya kingka lâka ba. Upla nani ba ai karnika âpu king aimakaia dukiara. Misaya baman King kaia sip sa. Baha mita, witin ra “kupia kumi lâka Kingka” nina mâkisa (Aiseya 9:6, 7; Jirimaya 10:23). Misaya ba naha tasba ra king aimakbia piua ra, kupia kumi lâka bâra kabia, bara upla nani ba daiwan nani wal asla lâka ra iwbia (Aiseya 11:3-7). Siknis nani ba âpu kabia (Aiseya 33:24). Bara prura ba sin âpu kabia (Aiseya 25:8). Upla pruan milian milian kli raya takbia (Daniel 12:13).

(Aiseya, Jirimaya, Daniel, Emus, Miqueas bara Sakaraya wina sakan sa.)