JEHOVA nu kan ai Luhpia latwankira ba ai rayaka yabia. Blasi Sturka 3:15 ra baha dukiara aisi kan. Jehova dîa pitka kat panis wauhbia ba upla nani ai tânka bribia dukiara, Gâd daukan Ebraham ra dîa makaban ba Baibil ra ulbia. Jehova Ebraham ra makaban ai luhpia Aisak ba sakripais baku yabia.

Ebraham kasak lukan lâka tara bri kan. Gâd witin ra pramis munan Swaki sasakra ba Aisak kiamka wina takbia. Ebraham kasak luki kan Jehova mita Aisak ra prura wina bukaia sip kan. Baha mita, ai luhpia sakripais baku yabaia wilin kan. Sakuna Jehova insal kum blikan bara Ebraham ba takaskan. Baha wina, Gâd Ebraham kasakka lukan lâka dukiara pain aisan bara dîa pramis munan ba daukbia win.

Piu luan ba ra, Aisak luhpa wâl baikan: Isau bara Jekob. Sakuna Jekob baman Jehova dukia holikira nani kulki kan, baha mita Gâd witin ra blisin munan. Jehova Jekob ra nina wala yaban, Israel, bara ai luhpia 12 ba Israel kiamka nani takan. Sakuna, ¿naha pamalika ba nahki natka ra nisan tara kum takan?

Josep muihnika kau almuk nani ba witin ra tumi kan. Baha mita alba baku upla wala ra atkan. Baha uplika nani ba Idsip ra brih wan. Bahara Josep trabil ailal bri kan. Sakuna Jehova witin ra hilp munan, kan Josep ba sibrin âpu kira Gâd ra kasak luki kan. Yu kum, Fero Josep ra kulkanka tara yaban. Naha ba Josep ra sanska yaban ai pamalika ra hilp munaia. Tasba aiska ra plun wahwan tara kum takan taim, Jekob ai luhpia nani ba Idsip ra blikan plun atkbia dukiara. ¿Ya Idsip ra plun nani ba yabi kan? ¡Josep baha dauki kan! Ai muihnika nani kaikan taim Josep lilia takan. Nanara ai muihnika nani ba ai kupia lakan kan. Baha mita, Josep witin nani ra padin munan bara win pamali sut Idsip ra brih balbia. Fero, Josep pamalika ra tasba kau pain ba yaban, bara witin nani bahara kau ailal takan. Josep ai tânka brin Jehova witin ra hilp munan ai pramiska nani tnata aimakbia dukiara.

Jekob Idsip kuntrika ra ai pamalika sut wal iwi kan. Witin bâra pruan. Pruaia lamara kan taim, Jekob win Swaki sasakra ba king karnakira kum kabia bara ai luhpia Juda kiamka wina takbia. Piu luan ba ra, Josep win Gâd mita Jekob pamalika ba Idsip wina pri sâkbia.

(Blasi Sturka sapta 20 wina 50 bara Hibru Nani 11:17-22 wina sakan sa.)