YU 10 Jisas heven ra uli wan ningkara, 33 manka, Ju nani liliaka Pentikus mâki ba kulki kan piua ra, disaipil nani 120 baku Jerusalem tawanka ra utla kum ra asla takan. Ban wina, bin tara kum walan, pâsa krawi baku binka takan, bara disaipil nani ba bîla raya nani aisan. ¿Dîa muni? Gâd ai spiritka holikira witin nani ra yabi kan.

Jerusalem ra plis sât sât wina upla nani bâra kan, naha liliaka kulkaia dukiara. Upla sut tâ iwan disaipil nani ba tringsar bîla nani ra aisi kan ba mita. Tânka marikaia dukiara, Pita witin nani ra win Gâd ai prapitka Joel bâk kaina manis wina aisan kan Witin spirit holikira Ai napakanka nani purara laikbia bara karnika yabia (Joel 2:28, 29). Naha sainka nani ba wal marikan kangrigisan ba nanara Gâd blisinka bri kan, sakuna Israel uplika aihwa nani ba lika apia. Baha piua wina ya Gâd kupia lâka daukaia want kan ba kristian takaia kan.

Kraist wailhka nani disaipil sut ra nina bliki rau sauhki kan. Yu kum disaipil kum kum ba silak watla ra mangkan, sakuna insal kum balan bara pri sakan. Baku sin, witin nani ra win kau smalki kabia. Titan ra ingni takan taim, disaipil nani ba tempel ra dimi Jisas dukiara smalkan. Rilidian tâ bri uplika nani ba ai kupia baikan bara adar yaban kau smalkaia apia dukiara. Sakuna apastil nani ba sibrin âpu lâka wal win: “Yang nani Gâd bîla ba kau walaia sna, upla nani ra lika apia” (Apastil Nani Sturka 5:28, 29).

Waihla nani ba disaipil nani ra kau nina bliki rau sauhkan. Ju uplika kum kum ba Stiben dukiara win witin kunin tara kum aisan kan. Baha mita, walpa ni sabi ikan. Baha uplika nani tilara Saulo Tarso tawanka wina kan ba bâra kan. Witin kristian nani ra misbara kaiki kan. Baha sut luan ningkara, Saulo ba Damaskus tawanka ra wan kristian nani sut silak watla ra dingkaia dukiara. Sakuna yabal ra auya kan taim, ingni kum heven wina takan bara Saulo ba blain takan. Baha wina bîla baikra kum walan: “Saulo, Saulo, ¿dîa kan man rau ai sauhkisma ki?” Saulo ba pana makabi walan: “¿Man ba ya sma ki, Dawan?” Bara bîla baikra ba win: “Yang sika Jisas” (Apastil Nani Sturka 9:3-5).

Yu yumhpa ningkara, Jisas ai disaipilka kum blikan, naha waitnika nina Ananías, bara Saulo ra rakan kli kaikbia dukiara. Baha wina, naha waitnika ba apastil kum takan, bara ai nina ba Pal mâkan. Witin ba misan uplika kum baku takaskraskira smalkan.

Pas ba, disaipil nani Ju uplika nani bara Sameria uplika nani ra baman smalki kan. Sakuna yu kum, insal kum Cornelio ra param takan. Naha waitnika ba Roman suldawika nani wihtika kum kan bara Gâd ra kasak luki kan. Naha waitnika ba Pita ra balbia win. Pita ba disaipil wala aikuki wan bara Cornelio bara ai pamalika ra smalkan. Pita ba aisi kan taim, bâra kan uplika nani spirit holikira brin, bara Pita adar yaban Jisas ninara tahbi daukan kabia. Baha piua wina, ani uplika, dîa nisanka wina kabia sin, raya ban kaia lâka briaia sip kan. Rait pali sturi yamni nani ba tasba aiska ra smalkan kabia.

(Apastil Nani Sturka 1:1–11:21 wina sakan sa.)