JISAS Olivet ilka ra kan piua ra, Jerusalem bara ai tempelka ba pain kaikaia sip kan. Baha mita, ai apastilka walhwal balan bara makabi walan tânka kum kum dukiara. Jisas win tempel ba sauhki tikan kabia, bara ‘tnata yua ba’ dukiara ai disaipilka nani ra aisan (Matiu 13:40, 49). Witin wani win: “Naha na ahkia kabia sapa yang nani ra ai wis. ¿Man balaia sma ba bara tasba tnata sainka ba sin ani kabia ki?” (Matiu 24:3).

Ansika yabaia dukiara, Jisas ai disaipilka nani ra win Jerusalem bara tempel ba sauhki tikras kabia kainara dîa takbia ba. Sakuna Jisas dîa aisan ba naiwa piua kat tasba aiska ra aimakisa. Jisas ahkia naha tasba ra kli bâra kabia upla nani nu kabia dukiara sainka kum ai tânka bri kaia kan: tasba aiska ra diara nani takbia ba baha sainka kabia. Baku sin, naha ba marikbia Jehova Jisas mihta ra pat Gâd Kingka lâka ba mangkan. Bara naha Kingka lâka ba saurka lâka ba âpu daukbia, sakuna kupia kumi lâka ba naha tasba ra brih balbia. Jisas dîa aisan dukia nani ba tasba saurakira na —gabamint nani, upla saura nani, bara rilidian nani sin— tnata yua nani sainka kabia, baha wina tasba raya kum bâra kabia.

Jisas win witin heven ra king aimakaia tâ krikbia piua ra, tasba aiska ra war aiklabanka nani, plun wahwanka, tasba nikbanka bara siknis nani ba sin bâra kabia. Upla ba lâ nani ba rispik munbia apia. Baku sin, ai disaipilka nani ba nisan sut ra Gâd Kingka lâka sturka nani ba smalki kabia. Jisas aisan sainka ba ‘pât wahwanka tara’ ba wal danh takbia, naha piua ba tasba paskan piua wina piua kau saura kabia (Matiu 24:21).

¿Kristian nani ba nahki nu kabia baha piua ba pat aula sa? Jisas ai disaipilka nani ra win: “Kwah damni dusa maprika lilka na lan taki banhs” (Matiu 24:32). Kwah damni dusa kum ai wahia nani sakuya taim, mani piua aula ba tânka sa. Sim baku, naha diara nani Jisas aisan ba takbia piua ra, yawan sut nu kabia tnata yua ba aula sa. Jisas sin win Aisa ba baman nu sa ahkia pât wahwanka tara bara awarka ba tâ krikbia. Witin win: “Baha mita, man nani aihwaki, bîla kaiki bas, kan man nani kaikras sma ahkia piua ba aimakbia sapa” (Mark 13:33).

(Matiu 24 bara 25, Mark sapta 13 bara Luk sapta 21 wina sakan sa.)