PÎSKA 17
Jisas ba Gâd Kingka lâka smalkan
Jisas ai disaipilka nani ra diara tânka ailal smalkan, sakuna Gâd Kingka lâka ba tâura mangkan
¿JISAS dîa dukiara naha tasba ra balan? Witin win: “Yang tawan wala nani ra sin Gâd King aimaki ba lâka sturka ba wiaia, kan baha dukiara ai blikan sa” (Luk 4:43). Kaisa tânka walhwal Jisas Gâd Kingka lâka dukiara smalkan ba kaikaia. Naha ba ai smalkanka lalka kan.
1. Jisas ba King kabia. Jisas win witin ba Misaya kan (Jan 4:25, 26). Baku sin win Daniel dahra aisanka ra taki Kingka ba witin kan. Witin ai apastilka nani ra win yu kum “king iwaika pranakira ra” iwbia. Witin nani ba dakni sirpi tilara kabia bara witin wal king aimakbia (Matiu 19:28). Naha uplika nani ra ‘dakni sirpi’ ba mâkan. Baku sin, Jisas win “sîp wala” nani bribia bara witin nani ba pas daknika tilara kabia apia (Luk 12:32; Jan 10:16).
2. Gâd Kingka lâka ba kasakka lâka daukbia. Jisas win King lâka ba Gâd nina ba holi daukbia, kan Sitan ba tâski daukan. Eden giadinka piua wina Gâd nina ba tâski daukan sa (Matiu 6:9, 10). Jisas tânka marikan Gâd Kingka lâka ba aimakbia piua ra, upla nisan wala wala wina pana pana latwan kaikbia, kan witin ba waitna bara mairin lalahkira nani, baku sin upla umpira nani ra smalkan. Bara Israel uplika nani ra smalkaia dukiara Jisas balan, sakuna Sameria bara nisan wala uplika nani ra sin smalkan. Jisas sât wala kan rilidian tâ bri uplika nani ba wal. Witin nani upla ra misbara kaiki kan bara upla lalahkira nani ra baman pain kaiki kan.
3. Gâd Kingka lâka ba naha tasba Sitan mihta ra ba wina sait ra kabia. Ju uplika nani pulitik dukiara unsabi banhwi kan piua ra Jisas iwi kan. Sakuna witin pulitik tilara dimras kan (Jan 6:14, 15). Jisas ba tâ bri uplika kum wal aisi kan piua ra win: “Yang kingki lâka ba naha tasba wina apia sa”(Jan 18:36). Bara ai disaipilka nani ra win: “Man nani lika naha tasba wina uplika apia sma”(Jan 15:19). Ai disaipilka nani ra win war aiklabaia dukia nani ba yus munbiara, witin ra hilp munaia want kabia sin (Matiu 26:51, 52).
“Jisas tawan tara nani bara tawan sirpi nani ra sin impaki, Gâd Kingka Lâka sturka ba smalki kan.” (Luk 8:1)
4. Jisas latwan lâka wal king aimakbia. Jisas pramis munan ai nina blablikra nani wirhika ba ingni daukaia (Matiu 11:28-30). Bara baku daukan. Witin nani ra smalkan wari takaia apia dukiara, lalah ra latwan kaikaia apia, upla wala nani wal pain iwaia bara nahki lilia lâka pliki sakaia (Matiu, sapta 5 wina 7 ba kat). Jisas ba waitna kum latwankira kan bara upla sut witin wal aisaia sip kan. Upla sut, umpira nani ba kat sin, Jisas ra wih kaiki kan, kan witin ba latwan lâka bara rispik lâka wal kaiki kan. ¿Rait apia naha Kingka ba painkira sa?
Jisas Kingka lâka ra dîa daukbia marikaia dukiara, sain nani daukan. ¿Dîa muni naha nani daukan? Kaisa kaikaia.
