PÎSKA 12
Gâd wan smalkisa sinskira kaia
Sins Lâka bukka ra —saptika aihkika ba Salaman ulban— Gâd wina smalkanka pain ba ailal bâra sa
¿JEHOVA bîla walaia ba hilp wan munisa? Naha tânka briaia dukiara, Baibil ra taki smalkanka nani laki kaikaia sa. Sakuna, ¿naha smalkanka nani rait pali sins lâka brisa? ¿Wan rayaka ra hilp wan munisa? Sins Lâka bukka ra king Salaman ba kupia kraukanka ailal wankisa, baku sin wan rayaka ra hilp wan munisa. Kaisa laki kaikaia.
Gâd wal pânika lâka ba. Jehova wal pânika lâka kum briaia dukiara, Witin ra kasak lukaia sa. Salaman win: ‘Jehova ra kupiam aiska ni kasak luki bas, bara man sinskam lâka ba kat tniwi kapara. Diara daukisma nani sut ra, Gâd ba tâmra bri bas, bara Witin mai brih wabia yabal wapni bâk’ (Sins Lâka 3:5, 6). ¿Yawan nahki marikisa Jehova ra kasak luki ba? Witin bîla walaia sa bara Ai lâka nani alki daukaia sa. Baku daukbia kaka, wan rayaka ba pain kabia. Jehova kupia lilia daukbia bara marikbia Dibil ba kuninkira kum sa (Sins Lâka 27:11).
Pamali bara wan pânika nani ba. Pamali nani ba naiwa piua ra Jehova hilpka nit sa. Maya waitna ba ai maya mairin wal baman iwaia sa. Baha mita, Gâd win: “Wahma kapram mairka kan ba wal, liliam bris” (Sins Lâka 5:18-20). Maya mairin dukiara Sins Lâka sapta 31 ba smalkanka painkira kum yabisa: nahki rispik lâka ba ai maya waitna bara ai luhpia nani wina briaia sip sa. Luhpa nani ra sin kupia bukisa ai aisa yapti bîla walbia (Sins Lâka 6:20). Naha bukka ba tânka wan marikisa pâna lâka ba diara kum tara sa. Baku sin, wan wisa upla wala nani wal pâna takaia want apia sa kaka, yawan dukiara baman lukbia (Sins Lâka 18:1). Pâna pain nani briaia sa, sakuna dîa sât pânika nani bri ba laki kaikaia sa, kan baku daukras kaka, wan daukanka painkira nani ba sauhkaia sip sa (Sins Lâka 13:20; 17:17).
Wan rayaka ba. Sins Lâka bukka ra kupia kraukanka manis bâra sa. Sampla baku, lukanka saura nani ba tnaya ra laki swiaia sa, uba laya tahpla diaia apia, lukanka pain nani briaia bara wark tatakra kaia sa (Sins Lâka 6:6; 14:30; 20:1). Baku sin, naha bukka ba wan kupia kraukisa Gâd lâka nani mapara dukia nani ba nina blîkbia kaka, saura wan takaia sip sa (Sins Lâka 14:12). Bara wan kupia ba main kaikaia sa —naha tânka sa wan lukanka nani—, “kan witin sika rayaka kârma” (Sins Lâka 4:23).
Naha smalkanka nani upla ailal ai rayaka ra hilp munan. Witin nani kasak lukisa Jehova bîla walaia ba diara kau tara sa.
