PÎSKA 2
Paradais ba tiwan
Insal mapa babura kum yaban Adam Iv wal ba Gâd bîla lulkbia. Baha wina, saurka lâka bara prura ba tâ krikan
GÂD upla nani kau paskras kainara, insal nani ba paskan. Yawan sip witin nani ra kaikras. Baha nani tila wina kum, ai nina Sitan bara Dibil mâki ba, Gâd mapara buan bara Iv ra kunin munan. Bara mairin ba Gâd mita pibia apia win dusa mâ ba wina pin.
Sitan mita daukan piuta kum Iv ra aisabia. Piuta ba win Gâd mita Iv bara ai maritka waitna ba ra diara pain kum yabaia want apia kan. Baku sin win baha dusa wina pibia kaka, prubia apia; baku natka ra win Gâd ba witin nani ra kunin aisan kan. Sitan witin nani ra pramis munan Gâd lâka nani krikbia kaka, tânka kasak ba bribia bara silp ai kupia lâka daukbia. Sakuna baha sut kunin kan: naha sika kunin lâka pas ba. Sitan ba naha makabi walanka nani daukan: ¿Rait pali Gâd ai raitka brisa upla nani ra king aimakaia dukiara? ¿Ai lâka nani ba kasak pali sa? ¿Gâd lâka nani alki daukbia kaka, hilp wan munisa?
Iv ba Sitan kunin win ba kasak lukan. Dus mâ ba auhni kaikan bara pin. Baha wina ai maritka ra sin yaban. Bara witin sin pin. Naha daukan ba diara sirpi baku kaikaia sip sa, sakuna rait pali witin nani ba Gâd mapara buan. Naha sika saurka lâka ba. Adam Iv ba naha ba nu si daukan. Gâd lâka ba bahki kulkan, sakuna Jehova witin nani ra diara sut, ai rayaka kasak ba sin yaban kan.
“Witin bui man lamla ra insauhkbia, bara man pana witin ai mina plakura ra sami kama.” (Blasi Sturka 3:15)
Gâd ba mapa babura nani ra makabi walan dîa daukan ba. Pas ba Gâd win naika piua ra Witin upla kum blîkbia bara piuta ba ikbia, piuta ba sika Sitan. Baha wina, Gâd ba Adam Iv ra lahtubi win witin nani prubia. Sakuna Adam Iv wal luhpia nani Gâd mita umpira kaikan bara iki tikras kan. ¿Adam Iv luhpia nani ba dîa bîla kaikanka lâka bribia? Jehova pramis munan Witin blîkbia Uplika ba —pramis munan Kiamka ba— Eden ra takan trabilka nani sut wapnika mangkbia. Sakuna, Swaki sasakra ba, ¿ya kabia, bara nahki muni Gâd dîa aisan ba daukbia? Ansika ba kau klir takan Baibil ba ulbi auya kan piua ra.
Jehova Adam Iv wal ra paradais wina kangbi sakan. Bara witin nani ba wark karna takaia kan ai nitka nani dukiara. Piu luan ningkara, Iv kwihra takan bara luhpa waitna kum baikan, ai nina ba Ken. Baha wina, Adam Iv wal ba luhpa waitna bara mairin wala nani baikan. Baha nani tilara Abel bara Set. Noa ba Set kiamka wina balan.
(Blasi Sturka 3 wina 5 bara Param Marikanka 12:9 wina sakan sa.)
