DANIEL ba prapit pain kum kan. Jerusalem kau sauhki tikras kan piua ra, Daniel ba wahma lupia kum kan. Witin bara Israel uplika wala nani ba priski brih wan kan, sakuna Babilon ra pri lâka wira bri kan. Daniel, Babilon tasbaya ra iwi kan piua ra, Gâd mita main kaikan. Sampla baku, layan nani untika wina swaki sakan bara naika piua ra dîa takbia ba marikan. Daniel prapit aisanka kau tara nani ba Misaya bara King lâka ba dukiara aisisa.

Misaya ba balbia. ¿‘Misaya Kingka’ ba ahkia balaia kan? Daniel ra Gâd mita win Jerusalem kutbanka nani kli paskaia adarka yabia ba wina 69 wik lubia ba ra Misaya ba balbia. Naha ‘wikka nani’ wik aihwa kum yua 7 bri ba dukiara aisaras. Baha ba dahra aisanka kum sa. Baha mita, 7 mani dukiara aisisa. Jerusalem kutbanka kli paskaia adarka ba 455 manka, yawan piua ninara yaban. Daniel pruan ningkara pat mani ailal luan kan. Baha piua wina 69 “wik nani” —483 mani— kulkbia kaka, mani 29 yawan piua ra wabia. ¿Baha manka ra dîa takan? Kainara baha dukiara aisabia. Gâd Daniel ra win Misaya ba “ikan kabia” upla saurka nani aibapaia dukiara (Daniel 9:24-26).

Misaya ba heven ra King kum kabia. Daniel yaprisauhkan painkira kum kaikan “upla luhpia waitna” —naha ba Misaya kan— Gâd iwaika lamara wan. Bara Jehova naha ‘waitnika’ ra “yan karnika, prana ba bara king lâka ba sin” bara witin ban kaia ra king iwbia. Baha wina, Daniel ba Misaya Kingka lâka dukiara diara kum nu takan: naha Kingka ba upla wala aikuki king aimakbia. Witin nani ra “Gâd Laih Purara iwi ba uplika nani” mâkisa (Daniel 7:13, 14, 27).

King lâka ba gabamint wala nani ra sauhki tikbia. Gâd daukan Daniel ba Nabucodonosor yaprisauhkanka kum dîa tânka bri kan ba wibia. Naha waitnika ba Babilon kingka kan. Witin kaikan upla lilka tarka tara, lal ba gul ni paskan, lama dusa bara klahkla nani ba silbar ni paskan, biara bara kuhma nani lika bras ni, wayata nani ba ayan ni, bara mina wâl ba ayan bara slaubla ni sin paskan kan. Baha wina, il kum wina walpa kum takan bara lilka tara mina nani ra prukan bara yuya man daukan. Daniel ba king ra win lilkika lal ba tânka sa Babilon tawanka, bara lilka pîska wala nani ba gabamint wala nani tasba aiska ra king aimakbia ba tânka kan. Naha gabamintka nani Babilon sauhki tikan kabia ningkara takbia. Gâd Kingka lâka ba gabamint lâs nani —lilka mina ayan bara slaubla ni paskan ba— piua ra takbia bara gabamint nani sut ra sauhki tikbia. Baha wina ban kaia ra king aimakbia (Daniel, sapta 2).

Daniel ba Babilon sauhki tikanka ba kaikan. Kainara Gâd win kan baku, Ciro Babilon tawanka ba sauhki tikan. Baha wina, Israel uplika nani Babilon ra brih wan 70 mani aimakan piua ra, Ju uplika nani Babilon wina takan. King nani, wihta nani bara prapit nani hilpka wal tempel bara Jerusalem ba kli paskan. Sakuna 483 mani nani tnata aimakan piua ra, ¿dîa takan?

(Daniel bukka wina sakan sa.)