JEMS bara Judas ba Jisas wal ai muihnika nani kan. Pita bara Jan ba Jisas apastilka nani kan. Naha waitnika nani ba kangrigisan nani dukiara Grik Ulbanka wauhtaya 7 ba ulbi blikan. Wauhkataya kumi bani ba ya ulban uplika nina brisa. Âiulbra nani ba naha wauhkataya nani bâk kristian wala nani ra hilp munan kasak lukan lâka ra dutki kaia bara Gâd Kingka lâka ra lukaia.

Kasak lukan lâka marikaia. Yawan kasak lukan lâka brisa wiaia baman apia sa, wan daukanka nani wal marikaia sa. Jems bîla: “Kasak lukan lâka daukanka yamni ba maikras kaka, baha sin pruan sa”(Jems 2:26). Ya kasak lukan lâka wal traika kaikanka nani mapara bûi ba spirit lâka ra kau karna takisa. Baku sin, Gâd ra sins lâka makabaia sa, bara Witin mita yabia. Ya kasak sa kaka, Jehova mita pain kaikbia (Jems 1:2-6, 12). Ya Gâd ra kasak ba Witin mita hilp munisa. Baha mita, Jems win: ‘Gâd lamara was, bara Witin lamamra wabia’(Jems 4:8).

Kristian nani ba ai kasakka lukan lâka ba karna daukaia sa. Baku traika kaikanka nani bara diara saura nani ba pura lubia. Judas piua ra rug lâka ailal bâra kan. Baha mita witin kristian nani ra win “kasak lukankam ba dukiara aiklabi kama”(Judas 3).

Wan daukanka pain briaia. Jehova makabisa ai napakanka nani ba diara sut ra holikira ba klin kabia. Pita ulban: “Man nani dîa daukisma ba sut holikira lâka ra dauki bas, [...] kan Ulbanka ra wisa: ‘Man nani holikira bas, yang [Jehova] holikira sna bamna’” (1 Pita 1:15, 16). Naha daukaia dukiara, kristian nani ba Kraist samplika nina blikaia sa. Kan Pita aisan baku, Jisas ‘ai mina wapanka nani nina blîkbia dukiara’ ai samplika wankan (1 Pita 2:21). Gâd lâka nani alki daukaia karna kabia sin, diara kau pain ba sika wan kupia dara walra pain kum bri kaia (1 Pita 3:16, 17). Pita win aitani sa wan daukanka yamni bri kaia bara wan warkka pain kum ba wal marikaia sa tasba raya aula ba bîla kaikisa. Bahara kupia kumi lâka bâra kabia (2 Pita 3:11-13).

Latwan lâka marikaia. Jan win: “Gâd ba latwan lâka sa”. Jehova ai latwanka lâka tara wan marikan ai Luhpia wan “saurka nani sut” dukiara naha tasba ra blikan piua ra. Baha mita, ¿yawan dîa daukaia sa? Jan ba tânka marikan: “Gâd mita baku latwan wan kaikan kaka, yawan sin pana pana wan walka ra latwan kaikaia sa” (1 Jan 4:8-11). Natka kum muihni lakri nani ra wan latwanka lâka marikaia sip ba sika yawan dîa bri ba wina witin nani ra yabaia (3 Jan 5-8).

¿Kristian nani ba nahki marikisa Jehova ra latwan kaiki ba? Jan ba ansika wankisa: “Gâd ra latwan kaikaia ba lika ai lâka bîla nani sin wali daukaia sa; bara ai lâka bîla nani ba mita wirha wan taibras sa” (1 Jan 5:3; 2 Jan 6). Ya Gâd bîla wali dauki ba Witin latwanka lâka bara “raya ban kaia lâka ba” sin bribia (Judas 21).

(Jems, 1 bara 2 Pita, 1, 2 bara 3 Jan bara Judas wina sakan sa.)