PARAM MARIKAN [Reveleshan] ulbanka ra diara kum kum wi ba, tanka kum saki wan mariki ba laka ra ulban sa (Param marikan 1:1). Naha tanka ra, rug mairin kum, ai lal kamhka kat “Babilun Tara ba” nina ulbi bri ba dukyara aisisa. Mairka na “kwara nani”, bara “nisan [...] nani” purara iwan sa sin wisa (Param marikan 17:1, 5, 15). Baha mita, mairin kum rait bara ba lika sip kapras. Sakuna, tanka kum saki wan mariki ba lika kaia sa. Nanara kuna, dia tanka wan marikisa ki?

Param marikan 17:18 bila, mairka ba sika “baha taunka tara [...] naha tasba kingka nani purara karnika alki taibi bri ba”  tanka sa wisa. “Taunka tara” aisanka ba wali taim, upla ailal bakahnu aipaswi ba, apia kaka asla taki ba dahra lukisa. Baku sin, “taunka tara” na “tasba kingka nani purara karnika alki taibi bri[sa]” wisa. Baku bamna, Babilun Tara ba, tasba aiskara karnika alki bri ba asla takanka kum sa kaia sa. Sakuna, dia sat asla takanka sa ki? Tasba aiskara rilidian laka ra asla takanka kum sa. Param marikan ulbanka ra aman laki kaiki taim, dia muni baku wiaia sip sa sapa kaisa kaikaia.

Asla takanka nani ba, pulitik laka ra, lalah bisniska laka ra, apia kaka, rilidian laka ra kaia sip sa. Babilun Tara ba lika, pulitik laka ra asla takanka kum sip kapras ba latan sa, kan Baibil bila “tasba kingka nani [ba], witin wal rug laka daukan” wisa. Tasba gabamintka nani wal rug laka dauki ba sika, witin nani wal warbanka dauki taukisa tanka sa. Baha taka, witin ra dia muni “mairin rugkira tara” maki ba param sa (Param marikan 17:1, 2; Jems 4:4).

Baibil bila mairka na sauhki tikan kabia taim, “tasba ra diara aiâtkra nani ba lika”, wibia sa kaka, bisnis dauki uplika nani ba, sari ini kabia wisa. Baku bamna, latan sa, Babilun Tara ba, bisnis laka ra asla takanka kum apia sa. Kau ni, Baibil tikska nani bila, king nani ba, bara bisnis uplika nani ba sin, “laiura” wina takaski witin ra kaiki kabia wisa (Param marikan 18:3, 9, 10, 15-17). Baku ba mita, sinska ni wiaia sip sa, Babilun Tara ba sika pulitik laka ra, bara lalah bisniska laka ra sin asla takanka kum apia sa.

Rilidian laka ra lika asla takanka kum sa. Baku wiaia dukyara bapanka wala kum bara ba naha: Baibil bila Babilun Tara ba, ai “sukika[...] laka ni” nisan nani ra kunin munisa wisa (Param marikan 18:23). Bara sukia laka sat sat bara ba, lasa nani wina bal takisa. Baha ba mita, Babilun Tara ba “[lasa] nani watla takan sa” wisa (Param marikan 18:2; Kli smalkan 18:10-12). Baha sut purkara sin, naha asla takanka ba mita rait aihwa rilidianka ba mapara karna buisa wisa, kan “Gâd dahra aisasara nani” ra, bara “Gâd uplika nani” ra rau munaia plikisa (Param marikan 18:24). Bara rait aihwa rilidianka ra misbara pali kaiki ba mita, “Jisas witniska” nani ra, nina bliki rau muni ikisa (Param marikan 17:6). Latan sa: Babilun Tara ba sika, tasba aiskara bakahnu ra rilidian kuninkira nani sut ba tanka sa. Bara ani rilidianka Jehova mapara bui ba, baha asla takanka tilara sa.