KRAIST pruan ba, kristian nani ba kulkbia adarka yaban. Baha kulkanka ra “Dawan Pata” sin makisa (1 Korint 11:20). Dia muni naha kulkaia ba tara sa ki? Ahkia, bara nahki muni daukaia sa ki?

Jisas bui naha kulkaia ba bapi mangkan. Baha ba, 33 yawan pyua manka ra, Ju nani Insal Luan yua ba kulkan tihmika ra mangkan. Insal Luan yua ba, mani bilara aima kumi man dauki kan. Ju uplika kalindarka ra lika, Nisan katka yua 14 ra kauhwisa. Nisan katka ba ahkia ta krikisa ki? Kakamuk [marzo] katka bilara, pas wikka luisi kati raya ba kaikaia sip sa taim ta krikisa. Baha yua wina, yu 14 kulki lapta diman ningkara, Insal Luan yua ba kulki kan.

Baha tihmika ra, Jisas ai disaipelka aikuki Insal Luan yua ba kulki, Judas Iskariat ra kangbi saki, Dawan Pata ba daukan. Ju nani Insal Luan yua kulki kan ba watlika ra, naha pata tara yua ba mangkan. Baha mita Dawan Pata ba, mani bilara aima kumi man daukaia sa.

 Matyu Gaspilka bila baha tihmika ra naku takan: “Jisas ai mihta ra brit ba brih, tingki wih, kriki muni, ai disaipelka nani ra yabi, win: ‘Pi bangws; naha sika yang wîni tara ba’. Baha ningkara, ai mihta ra kap ba brih, tingki wih, witin nani ra laki yabi, win: ‘Man nani sut naha na wina di bangws, kan naha sika yang tailya, naha mita sika lâ daukan ba karnika yabi ba, bara upla ailal saurka swih tikaia dukyara laiwan sa’” (Matyu 26:26-28).

Upla kum kum bila Jisas ba, ai wîna tara ba brit ra rait lakan, bara ai talya ba sin wain ra rait lakan wisa. Sakuna, brit ba laki yaban taim, Jisas wîna tara ba insauhkras kan. Baku kaka, rait pali apastil nani ba Jisas wîna tara ba pi, bara talya ba di bangwan ki? Apia pali! Kan upla wîna tara piaia ba, Gâd mapara lâ krikanka tara kum sa (Blasi sturka 9:3, 4; Libait laka 17:10). Bara Luk 22:20 ra Jisas naku win: “Naha kapka na sika lâ raya daukan ba, yang tailya mita, bara sut dukyamra laiwi ba”. Kapka ba “lâ raya” ra rait tauan ki? Baha ba sip apia pali sa, kan lâ kum ba, aisi daukisa; alkaia dukya kum lika apia sa.

Baku bamna, brit bara wain ba tanka kum brisa. Brit ba sika, Kraist wîna tara saurka luha ba tanka sa. Jisas ba Insal Luan tutnika pata wina brit lebinkas piska kum takaskan ba yus munan (Impakan sturka 12:8). Baibil ra aima ailal lebin ba, saurka bara aisawan laka tanka sa. Baku bamna, brit ba sika, Jisas wîna tara saurka luha sakripais daukan ba tanka sa (Matyu 16:11, 12; 1 Korint 5:6, 7; 1 Pita 2:22; 1 Jan 2:1, 2).

Wain pauni ba sika, Jisas talya ba tanka sa. Talya na mita “lâ raya daukan” ba ra karnika aihwa yabisa. Jisas bila ai talya ba “saurka swih tikaia dukyara” laikbia win. Jisas talya ba tingki, Jehova bui tasba uplika kum kum ra sunu kulkisa, bara Gâd wal asla, “lâ raya daukan ba” tilara dimisa (Hibru nani 9:14; 10:16, 17). Naha lâka daukan ba taka, kristian wapni 144.000 heven ra wabia sip daukisa. Bara upla sut yamnika dukyara heven ra prîst, bara king nani kabia (Blasi sturka 22:18; Jirimaia 31:31-33; 1 Pita 2:9; Param marikan [Reveleshan] 5:9, 10; 14:1-3).

Jisas Pruan Kupia Kraukanka yua ba ra, ya nani baman britka piaia bara wainka ba diaia sip sa ki? Kaikan baku, ya nani “lâ raya daukan ba” bilara bangwi ba baman —wibia sa kaka,  heven ra waia bila kaikanka bri nani ba baman— sip sa. Witin nani heven ra king aimakbia bak saki brin ba dukyara, Gâd spiritka hulikira ba mita kupia bukisa (Rom 8:16). Uplika nani na sin, Jisas King laka kum dukyara lâ daukan ba tilara sa (Luk 22:29).

Bara paradais tasbaia ra iwaia bila kaiki nani ba lika, Jisas Pruan Kupia Kraukanka yua ba ra dia daukisa ki? Jisas adar yaban ba kat, Dawan Pata ra wih muni rispik laka marikisa. Sakuna wain ba diras, brit ba sin piras. Jehova Witniska nani mita, Dawan Pata ba mani bilara aima kumi man daukisa. Baha ba Nisan kati 14, lapta dimuya taim ta krikisa. Tasba aiskara upla wiria baman heven ra waia bila kaikanka brisa wisa, sakuna naha yua kulkaia ba kristian nani sut ba mapara tara pali sa. Au sika! Jehova Gâd bara Jisas Kraist latwan tara wan bri ba ra luki kaikaia yua kum sa (Jan 3:16).