RADIU ba wali, tilivisan ba kaiki, apia kaka piriudiku aisi kaikisma taim, dia sat sturka walisma ki? Rait apia upla ikan, rau sauhkan, bara war aiklabi sturka nani man sakisma? Bara man sin trabil luisma ba aman luki kais. Ban kra siknis saura kum mita, apia kaka uplikam kum pruan ba mita panis wauhwisma. Sip sa Job baku, trabilkam ba uya mai “taibi bri[sa]” damra walisma (Job 10:15).

Ban kra selp naku lukisma:

• Maipara bara upla wala mapara sin naha na Gâd kupia laka sa ki?

• Trabilki nani pura luaia helpka ba ani wina sakamna ki?

• Yu kum tasba ba kupia kumi laka ra kabia ki?

Baibil ra lika ansika param wankisa.

“Nakra laya ba sut dikbia, bara prura kau apu kabia, inanka, pura mata inaia laka, latwanka sin.” (Param marikan [Reveleshan] 21:4)

“Skahwa nani ba sula srutwi pâli baku srutwi kabia.” (Aiseya 35:6)

“Nakra prakan nani [...] diara kaikbia.” (Aiseya 35:5)

 “Pruan nani sut [...] raiti wina buan kabia.” (Jan 5:28, 29)

“Iwi nani ba [...] ‘yang siknis sna’ [wibia apia].” (Aiseya 33:24)

“Plauar ma ailal bara kabia, [tasba] sut plun pali man kabia!” (Lawana 72:16)

Wahya luan nani ra kaikram ba, sip takras dukya kum sa lukpara. Kan Gâd mita pramis munan sa, bara nahki takbia ba sin Baibil ra smalkan sa.

Sakuna Baibil yamnika wala nani sin bara sa. Wan wisa naiwa pyua ra nahki wan auyapah lilia kat iwaia. Trabilkam wari mai muni nani ra wira luki kais. Ban kra lalah trabilka ba, pamalikam ba, siknis saura kum ba, apia kaka uplikam kum pruan ba mita wari takisma. Baibil ba trabilka nani na mapara bapi buma helpka maikisa, bara maisam sin nihkisa, kan makabi walanka kum kum ansika maikisa. Naha nani kum kum ba naku sa:

• Dia muni yawan pât wauhwisa ki?

• Wan kupia turbanka nani nahki pura luaia?

• Nahki wan pamali iwanka lilia kum briaia sa?

• Pruisi upla ra dia takisa ki?

• Wan uplika pruan ba asla kli wal prawbia ki?

• Gâd pramis munan ba rait takbia sapa nahki nu takaia sip sa ki?

 Na minit ulbanka aisi kaikisma na, Baibil dia smalki ba lan takan mai dauki ba latan marikisma. Bara bukka na tam baikaisa. Wahya mina ra, baiki sakanka kumi bani dukyara makabi walanka taki ba kaikaia sip sma. Jehova Witniska nani ba Baibil tanka laki kaikaia dukyara, makabi wali ansika plikaia tnatka ba yus munisa. Upla ailal ba baku stadi takaia laik sa wisa, bara man sin laik kaikma kaia sa. Rait pali Baibil ba dia smalki ba lan taki trai kaiki auma taim, Gâd yamni mai munbia!