GÂD KUMIRA yuhmpa sa luki nani ba bila, Gâd wîna ra upla yuhmpa bara sa wisa: Aisa ba, Luhpia ba, bara Spirit Hulikira ba sin. Bara yuhmpa sut kumi sa, karnika sut brisa, bara yuhmpa sut rayaka ba sin ta krikanka apu sa wisa. Baku bamna, Gâd Kumira Yuhmpa smalkanka ba wi ba kat: Aisa ba Gâd  sa, Luhpia ba Gâd sa, bara Spirit Hulikira ba sin Gâd sa wisa. Ban sakuna, Gâd kumi baman bara sa wisa.

Baha ra kasak luki ailal ba bila, smalkanka tanka marikaia ba sip apia sa wisa. Sakuna ban, Baibil ra baku smalkisa ban kra lukisa. Nahki kabia kra sin, diara kum param wiaia sa: Gâd Kumira Yuhmpa bila aisanka ba, Baibil ra aima kumi sin takras. Bara baha lukanka pan Baibil ra sa ki? Naha tanka sakaia dukyara, tiks kum lukanka na ta baikaia wisi yus muni bangwi ba kaisa kaikaia.

Jan 1:1 ra, Lâ Raya Wauhkataya, 1986 ra ulban ba naku wisa: “Blasi pali kat, baha Bila bara kan, baha Bila sin Gâd wal kan, baha Bila sin Gâd kan”. Bara sim saptika burs wala kau mayara, apastil Jan mita “Bila ba” Jisas sa wisa (Jan 1:14). Wel, burska na ra, Bila ba Gâd kan wi ba mita, upla kum kum lukisa Luhpia ba, bara Aisa ba, sim Gâdka sa.

Sakuna nu bas ulbanka na, patitara Grîk bila ra ulban, bara ningkara bila wala nani ra ulbi laki sakan. Ulbi lalakra kum kum ba, ai lakanka ra “Bila [ba] Gâd kan” ulbisa, sakuna Baibil lalakra wala nani sat wala lakisa. Dia muni ki? Kan Baibil ulbaia dukyara Grîk bila yus munan ba aman laki kaiki taim, ulbi lalakra kum kum ba ai tanka brisa, tikska na kasak kat lakaia sa kaka, lakanka sat wala yus munaia sa. Kum kum nahki sat wala ra lakan ba kais: “Bila ba gâd kum kan” (Juan. Texto y Comentario, de J. Mateos y J. Barreto, lectura alternativa), bara “Bila ba gâd kan” (Cuarto Evangelio. Cartas de Juan, de J. J. Bartolomé). Ulbanka nani na ra, letrika sirpi wal “gâd” maki ba sika, Bila ba “karnakira” sa tanka dukyara aisisa. Sam taim, upla karnika tara bri dukyara Baibil ra aisi taim, “gâd” makisa. Naha tanka ra, tasba wihtka nani ra sin “gâd nani” makisa (Lawana 82:1-6; Jan 10:34, 35). Bara 2 Korint 4:4 ra, Setan ra kat sin, “naha tasba gâdka” makisa. Sakuna, insal nani, waitna nani, bara Setan purkara sin, Jisas ba kau tara sa. Naha nani ra “gâd nani”, bara karnakira nani makisa kaka, Jisas ba kau pali “gâd kum” kaia sip sa. Bara witin “gâd kum” sa. Sakuna ai Aisa wal, sim Gâdka lika apia sa.

Upla aihkika ba Grîk bila ba aisaras. Baku bamna, apastil Jan dia wiaia want kan sapa nahki nu takbia ki? Naha ra luki kais: Maestru kum bui, kul tuktika nani ra diara kum tanka smalkisa. Smalki dan takan ningkara, tuktika nani ba ai tanka sat sat brisa. Tuktika nani ba, tanka rait ba nahki nu takbia ki? Maestruka ra kau tanka misar makabi walaia sa. Baku lika tanka kau pain bribia. Sim baku, yawan Jan 1:1 tanka ba kau pain briaia sa kaka, Jan Gaspilka ba laki kaikaia sa. Baha ra sika, Jisas dahra kau tanka pliki saki param takbia.

Naha tanka dahra, Jan mita kau wira taura, saptika 1 burska 18 ra naku ulban ba kais: “Upla kumi sin Gâd [Karnika Sut Bri] ba kaikras pali sa”. Sakuna, Gâd Luhpia ra Jisas ba lika upla mita kaikan, kan Jan naku wisa: “Baha Bila [Jisas] ba, upla takan bara yang nani tilira iwan. Bamna yang nani ai prana ba kaikri” (Jan 1:14). Baku sa kaka, nahki muni Luhpia ba, Gâd Karnika Sut Bri ba wal kumi kaia sip sa ki? Baha purkara sin, Jan mita param win, Bila ba “Gâd wal kan”. Baha mita, nahki muni upla kum ba, upla wala wal kabia ki, bara sim minitka ra uplika wala ba sin kabia? Baku sin, Jan 17:3 ra Jisas bui param wan marikisa, witin ba upla kum, bara ai Aisa ba upla wala sa, kan ai Aisa ba “Gâd kumi baman kasakkira” sa wisa. Bara Jan Gaspilka ulbanka tnata ra, prahni ra naku win: “Naha nani na lika ulban sa, man nani kasak lukma Jisas ba Misaia Gâd Luhpia sa” (Jan 20:31). Bika! Naha burska ra, Jisas ba Gâd sa wiras, sakuna Gâd Luhpia sa wisa. Naha sut Jan Gaspilka mita pura praki mariki ba sika, Jan 1:1 ba nahki wan tanka briaia ba marikisa. Bila ba, wibia sa kaka, Jisas ba, “gâd” kum sa, kan karnika tara brisa; sakuna Gâd Karnika Sut Bri ba wal lika kumi apia sa.

Kaisa Maestruka tanka ra kli luki kaikaia: Maestruka mita tuktika nani ra kli smalkan. Sakuna kum kum ba lika ai tanka kau pain briaia want sa kaka, dia daukaia sip sa ki? Mahka maestru wala ra kau tanka smalkbia makabaia sip sa. Bara pas maestruka smalkan ba baku, maestruka wala ba sin smalkbia  sa kaka, tuktika aihkika ba ai tanka pain bribia. Wel, Gâd Karnika Sut Bri ba wihki Jisas tanka dukyara, apastil Jan mita smalkan ba kau tankam briras sma kaka, tuktika nani ba baku daukaia sip sma. Au! Baibil aîulbra wala helpka ni tanka plikaia sip sma. Wel, mahka Matyu tanka ba pliki kaikpi. Matyu ba, Jisas bui aisan ba naku ulban: “Sakuna yua ba, bara awarka ba lika upla kumi sin kaikras, kasbrika purara insal nani ba, bara Gâd Luhpia pali sin kaikras. Gâd Aisa baman baha kaikisa” (Matyu 24:36). Jisas naha aisan ba wina, witin ba Gâd Karnika Sut Bri ba lika apia sa, nahki wan marikisa ki?

Jisas win Aisa ba kau diara nani tanka nu sa Luhpia ba wal. Sakuna, Jisas wihki Gâd Karnika Sut Bri ba wal kumi sa kaka, ai Aisa dia nu ba sut, witin sin nu kaia sa. Yawan param kaikisa, Luhpia ba Aisa ba wal kumi apia sa. Kuna upla kum nan wibia kra: “Jisas ba paskanka satka wal bri kan: Gâd baku, bara upla baku, bara tikska na ra upla baku aisi kan”. Rait lukbia kra sin; spirit hulikira ba dahra dia wibia ki? Aisa ba wal Gâd kumi sa kaka, diakan spirit hulikira ba sin, yua ba bara awarka ba nu sa Jisas wiras kan ki? Kau ni, Aisa ba baman baha nu sa win.

Baibil kau stadi takma taim, tanka na dukyara tiks wala ailal sin laki kaikma. Baha nani ba mita, Aisa ba, Luhpia ba, bara spirit hulikira ba dahra tanka kasak ba ta baikisa (Lawana 90:2; Wark nani 7:55; Kolosi 1:15).