1, 2. Dia muni Baibil ba Gâd prisantka painkira kum sa ki?

YU KUM pamnika kum mita prisant painkira kum maikan ki? Rait apia kupiam ra lilia takram? Misar! Kan prisantka maikan ba mita pamnika kaia laik ba marikan, bara pana man tingki wiram kaia sa.

² Sim baku, Baibil ba Gâd prisantka painkira kum sa, bara pana yawan sin tingki wiaia sa. Baibil ra diara smalki ba, tnatka walakku sip lan takras. Naha tanka ra, heven ba, slilma nani ba, tasba ba, bara pas waitna bara mairin paskan ba dukyara sin Baibil ra wan aisisa. Bara wan rayaka ra, ani trabilka turban wan muni ba nahki mapara buaia sin wan smalkisa. Bara Gâd mita tasba trabilka nani nahki wapnika mankbia ba sin, Baibil ba marikisa. Prisantka na nahki painkira sa!

3. Baibil wankan ba mita Jehova dia marikisa, bara dia muni prisantka na wan kupia bukisa ki?

³ Baibil ba sika wan kupia buki prisantka kum sa. Kan ya prisant wankan ba dukyara, wibia sa kaka, Jehova ba dahra sin wan aisisa. Bukka na Gâd wankan ba mita, witin ra kakaira takbia want ba marikan. Kasak sika, Baibil bakku Gâd panika takaia sip sa.

4. Baibil ulbi saki praiska kulki taim nahki lukisma ki?

 ⁴ Man Baibil kum brisma kaka, man baman kum brisma lika lukpara. Kan Baibil aiska ba, apia kaka Baibil taka kum kabia sin, bila 2.300 ra ulbi sakan sa. Tanka ba sika, tasba aiskara upla iwi ba wina 90 pursentka ba ai mihta ra Baibil kum brisa. Wik bani Baibil milian kum pura praiska yakabi lakisa! Baibil ulbanka ba wina, sut bara milian milian ulbi sakan sa. Kasak pali Baibil ba baku buk wala kumi sin apu sa.

5. Baibil ba “Gâd lukanka mita sika” wi taim, dia tanka sa ki?

⁵ Baha sut purkara, Baibil ba “Gâd lukanka mita sika” (2 Timoti 3:16, Lâ Raya Wauhkataya [LRW], 1974). Baha ba dia tanka sa ki? Baibil bila: “Upla nani spirit hulikira mita munan kan, ban Gâd wina aisin” (2 Pita 1:21, [LRW], 1986). Baha tanka ba naku sa: Aisa kum ai luhpia ra wauhtaya kum ulbia yabisa. Sakuna lukanka, bara sturi nani ulbi ba aisika sinska wina sa. Baha mita, wauhkataya ba witin dukya sa, ai luhpia dukya lika apia. Sim baku, Baibil ba Gâd lukanka brisa, sakuna Baibil ulban waitnika nani lukanka lika apia. Baha taka mita, Baibil aiska ba “Gâd Bila” sika (1 Tesalonaika 2:13).

6, 7. Baibil aiska sim lukanka atia bri ba, dia muni aihka painkira sa ki?

⁶ Baibil ba mani 1.600 bilara ulban. Ulban waitnika nani ba, pyu sat sat ra iwan, bara kum kum umpira, kum kum lalahkira nani kan. Bara wark sat sat sin dauki kan: Insla mamankra, inska mamiskra, bara syîp main kakaira nani kan. Tila wina prapit nani, wihta nani, bara king nani sin bara kan. Gaspil aîulbra kum nina Luk maki ba, daktar kan. Baibil aîulbra nani ba sat sat bangwi kan, sakuna Baibil ta wina tnata kat, selp ai mapara aisaras, sim lukanka atia brisa.

⁷ Baibil taura, tasba trabilka nani nahki ta krikan ba aisisa. Bara tnata ra, tasba na paradais, gadin painkira kum ra lakbia ba marikisa. Baibil ba tasba sturka mani tausin tausin luan ba dukyara sin aisisa, bara dia aisi ba sut Gâd kupia laka nahki aimaki ba dukyara tanka marikisa. Baibil aiska lukanka nani sut ba kumi takisa, kan Baibil ba sika Gâd mita wankan sa.

8. Tasba sinska ba dukyara Baibil ba kasak kat aisi ba tanka mariks.

⁸ Tasba sinska laka dukyara aisi bara sin, Baibil ba kasak sa. Patitara pyua ra tasba sinska bri kan ba wal praki, Baibil ba kau kasak kan. Naha tanka ra Israel uplika ba nahki klin kaia kan ba, bara upla siknis yakan saitra bri kaia kan ba dukyara, Libait ulbanka ra lâka yaban. Bahamuna tanka nisan wala uplika ba nu apu bangwi kan. Baku sin, pyu luan uplika ba, tasba na daukra satka dukyara mistik luki kan, sakuna Baibil ba param win “tasba ba [...], diara apu ba purara” sa (Job 26:7). Patitara pyua ra tasba ra laya plapi ba lâka ba dukyara upla ba nu apu kan. Sakuna Smasmalkra 1:7 ra, baha lâka tanka ba latan marikisa. Au, Baibil ba tasba sinska bukka kum lika apia sa, sakuna tasba sinska laka ba dukyara aisi taim kasak sa. Rait apia, Gâd mita Baibil wankan ba tawan baku kaia sa?

9. a) Luan sturka nani dahra aisi taim, dia mita Baibil ba kasak sa marikisa? b)Dia muni Baibil aîulbra nani ba diara yukukras latan aisan ki?

 ⁹ Luan sturka nani dahra sin aisi taim, Baibil ba kasak sa. Upla sturka pura taya aisaras, sakuna uplika nina ba, bara ai damika nani nina ba kat sin marikisa. * Sturi aîulbra kum kum ba, ai nisanka ra taun wala mita pura luan ba dukyara ulbi bangwras kan. Sakuna Baibil aîulbra nani ba lika diara yukukras, ai mistikka bara ai taunka mistikka nani ba kat sin Baibil ra sut ulban. Naha tanka ra, Moses mita Kulki kaikan bukka ulban taim, witin mistik tara kum dahra Gâd mita pâli laui daukan ba dukyara yukukras aisisa (Kulki kaikan 20:2-12). Ulban sturka wala nani ra, baku latan kat aisi kaikras, sakuna Baibil ra lika kaikisa. Kan Baibil ba sika Gâd mita wankan sa.

10. Baibil ba buk kum sins aihwa bri ba dukyara, dia muni yawan aihka lukaia apia sa ki?

¹⁰ Baibil ba Gâd lukanka bri ba mita, “yamni sa upla ra smalkaia bara laui daukaia, swakwanka nani ba wapni daukaia, bara kasakka laka mapara upla ra smalkanka yabaia dukyara” sin (2 Timoti 3:16). Sins aihwa bri bukka kum sa. Baibil Papaskra ba mita tasba uplika satka tanka ba latan kaikisa. Bara aihka sin lukaia apia sa, kan Baibil Papaskra ba Wan Papaskra sa. Au, Jehova Gâd sika! Yawan nahki wan dara wali ba, bara nahki luki ba sin ai tanka pain brisa. Baku sin yawan lilia kaia dukyara dia nit ba, bara yawan dia daukras kaia ba sin witin pain nu sa.

11, 12. a) Matyu saptika 5 wina 7 kat, Jisas ba dia smalkan? b)Baibil ra dia wala dukyara sin aisisa ki, bara dia muni ai smalkanka nani ba ban yamni sa?

¹¹ Jisas aisanka Matyu saptika 5 wina 7 kat ulban ba  ra luki kais. Smalkanka sut tila wina naha kau prana na ra, Jisas tanka sat sat dahra aisan: Liliaka nahki sakaia ba, blahwanka nani nahki wapnika mangkaia ba, nahki wan pura sunaia ba, bara tasba bisniska nani nahki kaikaia ba sin smalkan. Bara naiwa pyua kat sin ai smalkanka ba kulkanka tara yus aihwa brisa.

¹² Baibil lâka kum kum mita pamali ba, wark takaia ba, bara wan walkara nahki kaikaia ba tanka aisisa. Baha lâka  nani ba upla sut ai rayaka ra alki brih yamni bribia dukya kum sa. Gâd ai prapitka Aiseya bakku, Baibil ba sinska aihwa bri ba dukyara prahni ra naku aisan: “Yang Dawan, man Gâdkam; yamnika uya man ra takaia ba mai smalkisni, yabal bak wapaia tam brisna” (Aiseya 48:17).

13. Babilun dahra Jehova ai prapitka Aiseya ra dia yaban ulban?

¹³ Baibil ra prapit aisanka ailal bara sa, tila wina aihkika ba pat tnata aimakan sa. Kaisa naha tanka kum kaikaia. Mani 700 pura yawan pyua nina [y.p.n.] ra, Jehova mita prapit Aiseya bakku Babilun taunka ba sauhki tikan kabia ba kaina manas win (Aiseya 13:19; 14:22, 23). Bara nahki muni sauhki tikan kabia sin win. Mapara aiklaklabra nani ba mita, Babilun awalka ba lâki, taun bila kat aiklabras dimi bangwbia win. Sakuna kau pura praki sin win. Babilun pura lubia kingka nina pali ba kat sin kaina manas win. Ai nina ba Sairus kabia (Aiseya 44:27–45:2).

14, 15. Prapit Aiseya Babilun dahra aisan ba nahki sitnika kat aimakan?

¹⁴ Tihmia kum, mani 200 luan ningkara, 539 y.p.n. manka ra, Waupasa [octubre] katka yua 5 bara 6 bilkara, tihmia bakriki ra, war aiklabaia daknika kum Babilun lamara si, mapara aiklabaia ridi taki kan. Bara ya daknika wihtka kan luki? Pirsia kingka kum Sairus maki kan ba. Dupali aihwa! Prapit aisan ba kat diara sut ai pliska kat aimakaia ridi kan. Ban sakuna, prapit aisan ba baku, Sairus daknika ba aiklabras Babilun ra rait diman ki?

¹⁵ Baha tihmika Babilun uplika nani ba liliaka kum bri kan, bara taun tnaya kutbanka tara kan ba mita witin nani wari takras kan. Baku kan bara, Sairus mita sins laka ni tasba salhki Babilun awalka laya ba plis wala ra mawahkan, bara li aubra ba buhni taki ai aiklaklabrika nani ba awalka bilakku wapi lui taun tnaya  kutbanka lamara wan. Sakuna tnaya kutbanka tara nani ba nahki lui bangwan ki? Tnaya kutbanka lui bangwaia nit apia kan, kan Babilun ra dimaia durka nani ba prakaia auya tiwan!

16. a) Aiseya aisan ba kat, Babilun ra dia takaia kan? b)Aiseya Babilun ra kli upla iwbia apia aisan ba nahki aimakan ki?

¹⁶ Jehova bui Babilun mapara naku win: “Baha tasbaia ra upla kli iwaia pliska apu kabia, upla kyamka kum wina wala kat sin baha ra iwi takaskan kabia apia; Arab uplika nani sin, kli baha ra utla papakni makan kabia apia, Sepad nani sin ai syîpka nani bara wabia apia” (Aiseya 13:20). Babilun taunka ba sauhki tikan kabia win. Sakuna baha sut purkara sin, ban kaiara Babilun ra kli upla iwbia apia win. Aisanka na rait aimakan ki? Babilun sauhkan yuika nani ba, Irak kapitalka Bagdad maki ba wina, 80 kilamitra baku waupasa tanira wih kaikaia sip sa. Pliska ba ra upla iwras, kan Jehova ai prapitka Aiseya bakku kaina manas naku win: “Sauhki tatikra brumka wal [Babilun ra] pahbamni” (Aiseya 14:22, 23). Bara win ba kat aimakan!

17. Baibil aisan ba kat aimakan ba mita, dia muni wan kasakka lukan laka kau karna daukisa?

¹⁷ Baibil aisan ba kat aimakan ba luki kaikisi, rait apia wan kasakka lukan laka kau karna takisa? Kasak sika!  Jehova mita pyu luan pramiska nani aimakbia daukan ba baku, tasba na paradais kum ra lakaia pramiska ba aimakbia sin kasak lukaia sa (Kulki kaikan 23:19). Baku sa! “Raya ban kaia laka [...] wan kainara briaia bila kaiki ba sin tanka bribia. Gâd, witin kunin aisaras ba mita, naha rayaka na pramis wan munan, kau tasba na ta krikras kaina wina.” (Taitus 1:2.) *

18. “Gâd Bila ba” dahra, apastil Pâl mita dia painkira ulban?

¹⁸ Saptika na ra dia stadi takan ba wina kaikisa, Baibil baku buk wala kumi sin apu sa. Baibil ba sim lukanka atia brisa, luan sturka wihki tasba sinska kat kasak sa, sins aihwa bri bukka kum sa, bara prapit aisanka rait aimakan  ba sin brisa. Sakuna yamnika na sut purkara, Baibil ba wina yawan kau yamnika sakaia sip sa. Apastil Pâl ba naku ulban: “Gâd Bila ba rayaka brisa, bara karnika sin brisa. Baha ba sika sord mala napa wal bri ba sut purkara kau mala sa, bara wan solka bara wan spiritka byara pali ba kat dimi wisa, wan lukutbaika bara wan dusa bila kat sin. Baha Bila ba mita wan kupia lukanka nani ba bara dia daukaia luki ba sut sin klir pali sakisa” (Hibru nani 4:12).

19, 20. a) Baibil ba nahki mai tukbisa rayakam selp laki kaikaia? b)Gâd Baibil prisant wankan ba dukyara nahki tingkikam yama ki?

¹⁹ Baibil ra, Gâd “Bila” ba aisi kaiki, wan rayaka wapni mangkaia sip sa. Baibil ba wan tukbisa yawan selp dia sat rayaka bri ba luki kaikaia. Wan kupia munuhta kat dia ba ra ba marikaia dukyara, Gâd ra latwan kaikisa wiaia baman aitani apia sa, Baibil smalki ba wan iwanka ra alki brih dauki ni marikisa.

²⁰ Baibil ba rait pali Gâd mita wankan sa. Baibil ba aisi kaiki, stadi taki latwan kaikaia sa. Tingkikam marikaia dukyara, Gâd mita prisantka maikan na, ban laki kaiki bas. Baku dauki, Gâd mita tasba uplika dukyara dia luki ba sin tankam pain brima. Ani ba Gâd lukanka sa sapa, bara nahki ai lukanka daukbia sapa sin, saptika aula ba ra laki kaikbia.