1, 2. Aima kum kum ra, dia muni makabi walaia pain sa?

TUKTAN nani diara makabi walaia laik sa, rait apia? Aisi lan takuya pyua wina makabi walaia ta krikisa. Witin nani diara kum tanka nu takan dauki taim, ai nakra kwaki upla ra kaiki, nan walisa: “Dia muni heven kalatka ba blu sa?”, “Slilma nani ba nahki paskan?”, “Ya mita tnawira nani ra aiwanaia lan daukan ki?”. Bara ansa munisma kaka sin, sam taim isi lika apia sa, kan tuktan nani ra ansa munisi, pana kli kli witin nani mamkabi walisa: “Dia muni?”.

² Tuktan nani baman lika diara makabi walras. Yawan pawi auya taim, plis kum ra waia, pât ra dimaia apia, apia kaka diara kum tanka briaia dukyara sin makabi walisa. Sakuna makabi walanka tanka kau tara nani ba dukyara, upla ailal ba dan makabi walras. Bara ansika plikaia pan sin lukras.

3. Dia muni upla ailal ba, makabi walanka nani tanka tara bri ansika ba dan plikras sa ki?

³ Bukka na taya ra, bara ta  krikan sturka ulban ba wahya ra sin, makabi walanka kum kum dauki ba dukyara luki kais. Makabi walaia sip ba tilara, naha nani na tanka kau tara brisa. Sakuna upla ailal baha ansika nani ba dan plikras. Dia muni ki? Bara Baibil ba ansika nani ba wankisa ki? Upla ailal bila, Baibil ansika nani tanka briaia ba uba karna sa wisa. Wala nani makabi walaia ai swira brisa. Bara wala nani sin, ai pasinka, apia kaka ai sertska ta bri uplika ba baman baha tanka briaia sip sa lukisa. Ban sakuna, man dia lukisma ki?

4, 5. Ani makabi walanka nani tanka tara bri ba makabi walaia sa, bara dia muni ansika ba plikaia sa ki?

⁴ Makabi walanka tanka tara bri ba, ansika sakaia misar want sma. Sam taim ban kra selp naku lukisma: “Dia dukyara yawan tasba ra bangwisa ki? Aisubi almuk takisi pruaia dukyara baman balan ki? Gâd ba dia sat sa ki?”. Naha ra lukaia ba aitani pali sa, bara ansika kasak kum plikaia yarka wan swapbiara. Kan smasmalkra kau tara, Jisas ba, naku win: “Man nani makas, bara Gâd mita maikbia; pliks, bara sakma; dur ra kingks, bara man nani ra kwakan kabia” (Matyu 7:7).

⁵ Naha makabi walanka nani ansika ‘ban plikisma’ kaka, bahki ra plikram lika lukma apia (Sins laka 2:1-5). Upla mita dia mai wibia kra sin, baha ansika nani ba Baibil ra bara sa, bara tanka sakaia ba mihtam ra sa. Ansika nani ba tanka briaia uba karna sin apia sa. Kau pain ba sika, lilia bila kaikanka laka wankisa, bara nawas sin amyapah kat kaia sip mai munisa. Kaisa makabi walanka kum upla uba luki ba laki kaikaia.

6. Dia muni upla ailal bila Gâd ba wan trabilka nani ra lukras?

⁶ Upla ailal au lukisa. Kan Gâd upla ra lukisa kaka, tasba na sat wala kaia kan wisa. Baku sin tasba na ra war nani, misbara laka, bara panis man bangkisa. Yawan sut siknis  takisa, pât wauhwisa, bara wan uplika prui ba sin kaikisa. Baha taka mita kum kum bila: “Gâd wan lukisa kaka, dia muni trabilka sut na wina pri wan sakras sa ki?”.

7. a) Dia muni wiaia sip sa, smasmalkra ailal mita upla ra isa Gâd ba kupia karna sa lukbia? b)Yawan pât wauhwi ba dukyara Baibil ba dia smalkisa ki?

⁷ Sakuna kau saura kum ba sika naha: Smasmalkra ailal mita upla ra isa Gâd ba kupia karna sa lukbia. Naha tanka ra, upla pât wauhwuya taim, smasmalkra ailal bila Gâd kupia laka sa wisa. Wibia sa kaka, diara saura taki ba Gâd pâtka sa wisa. Sakuna baku sa ki? Rait pali Baibil ba dia smalkisa ki? Jems 1:13 ansika bila: “Gâd lika diara saura daukaia traika kaikanka briras, upla ra sin witin mita traika kaikras”. Baku bamna, tasba na ra diara saura taki ba kumi sin Gâd mita daukras (Job 34:10-12). Au, diara saura takbia swisa, sakuna takbia swiaia ba wihki takbia daukaia ba wal sim dukya apia sa.

8, 9. a) Pât nani takbia swiaia ba wihki takbia daukaia ba wal sim dukya sa ki? Tanka mariks. b)Upla pât wauhwi ba mita, dia muni Gâd ra pâtkira kulkaia aitani apia sa ki?

⁸ Naha ra luki kais: Pat waitna takan luhpa kum, ai aisa kupia pain bri ba watla ra iwisa. Sakuna luhpia na kyamapara taki watla wina mahka waia lukisa. Baku taim aisika mita ai luhpia ra alki takaskras. Baha wina luhpia ba yabal saurakku wih pât ra dimisa. Baku bara, aisika mita ai luhpia pâtka nani takbia daukisa wiaia sip sa ki? Apia pali! (Luk 15:11-13.) Sim baku, Gâd mita tasba uplika ba yabal saurakku wabia alki takaskras, sakuna upla ba selp pât ra dimi ba, Gâd mita takbia daukisa tanka lika apia sa. Upla pât wauhwi ba mita Gâd ra pâtkira kulkaia ba aitani apia sa.

⁹ Gâd lika pain nu sa dia muni upla nani ba yabal saurakku ban impaki wabia ba swiaia. Gâd ba Papaskra kum sinskira bara karnakira sa, baha mita yawan ra ai tanka  saki aisaia nit apia sa. Sakuna latwan wan kaiki ba mita ai tanka param saki marikisa. Saptika 11 ra, Gâd naha tanka param saki ba dukyara sitnika kat lan takma. Raitka pali ba sika, wan trabilka nani dukyara Gâd pâtka apu sa. Wan pâtka nani wapni mangkaia bila kaikanka ba lika wankisa (Aiseya 33:2).

10. Saurka laka panis wan muni ba Gâd bui dikaia sip ba dukyara, dia muni kasak lukaia sa ki?

¹⁰ Baha purkara sin Gâd ba hulikira sa (Aiseya 6:3). Tanka ba sika witin ba sunu, klin, bara saurka laka kumi sin apu sa. Baha mita, wan kupia aiska ni witin ra kasak lukaia sip sa. Sakuna tasba uplika ra lika baha sat sip kasak lukras, kan saura tauaia sip sa. Tasba ra wihtka kau yamni kabia pali ba kat sin, upla mita diara saura wan muni ba wapni mangkaia karnika apu sa. Sakuna Gâd sika karnika sut brisa. Saurka laka panis wan muni ba, Gâd bui dikaia sip sa, bara dikaisa. Baku daukbia taim, saurka ba ban kaiara diki dan apu kabia! (Lawana 37:9-11.)

11. a) Kasak apia laka ba Gâd nahki kaikisa ki? b)Yawan pât wauhwi taim Gâd nahki ai dara walisa ki?

¹¹ Tasba ra, bara rayakam ra wauhwi ba dukyara, Gâd nahki ai dara walisa ki? Baibil bila “Dawan [ba] kasakka laka ba latwan kaikisa” wisa (Lawana 37:28). Dia ba pain sapa, dia ba saura sapa witin uba aman lukisa, bara kasak apia satka sut ba misbara kaikisa. Baibil bila blasi pyua ra wataui laka ni tasba bangki takan taim, Gâd “ai kupia ra praut laka brin” wisa (Blasi sturka 6:5, 6). Bara Gâd ba sat wala takras sa (Malakai 3:6). Saurka ba ban misbara kaikisa, bara pât wauhwi nani ra sin ban umpira kaikisa. Baibil ra naku wisa: “[Gâd] bui man nani dukyamra luki pali sa” (1 Pita 5:7, Lâ Raya Wauhkataya [LRW], 1986).

12, 13. a) Ani wina yawan latwan laka ba brisa ki, bara naha bri ba mita upla pât wauhwi nani ra nahki kaikisa? b)Gâd tasba trabilka nani dikai ba dukyara yawan kasak lukaia sip sa ki?

 ¹² Upla pât wauhwi ba tawan Gâd sari luki ba nahki nu sa ki? Kaisa tanka wala kum kaikaia. Baibil bila, Gâd ba ai lilka kat wan paskan wisa (Blasi sturka 1:26). Baku bamna, yawan kupia pain brisa kaka, Gâd kupia pain bri ba mita sika. Naha tanka ra, rait apia upla pâtkas pât wauhwi taim kupiam ra sari lukisma? Kupiam ra sari lukisma kaka, Gâd ai kupia ra misar kau sari lukisa.

¹³ Upla daukanka kau pain kum ba sika latwan kaikaia sip kaia ba. Naha ra sin Gâd wal wan talia sa, kan Baibil bila “Gâd ba latwan laka sa” wisa (1 Jan 4:8, 16). Gâd latwan kaiki ba mita, yawan sin latwan kaikisa. Upla pâtkas panis wauhwi ba, tnata mangkaia karnika brisma kaka, paniska dikma ki? Latwan kaikisma ba mita mai munka daukma? Misar daukma! Gâd bui tasba trabilka nani tnata mangkai ba kasak luki bas. Naha bukka ta krikanka ra aisi kaikram pramiska nani ba bahki dukya apia sa. Gâd bui pramis munan, bara tnata aimakbia! Sakuna, baha pramiska nani ra kasak lukaia sa kaka, pramiska munan Gâdka ra kakaira takaia aitani sa.

14. Gâd nina dia, bara dia muni ai nina ba yus munaia sa ki?

¹⁴ Upla kum mai kakaira takbia want sma kaka, dia pas daukisma?  Rait apia ninam wisma? Baku bara, Gâd ba ai nina brisa ki? Rilidian ailal bila ai nina ba “Gâd”, apia kaka “Dawan” wisa, sakuna naha nani na nina kum pali apia sa. Baha nani ba “king”, apia kaka “prisidint” wi ba baku kulkanka nina kum sa. Gâd kulkanka nina manas bri ba Baibil ba param marikisa, tila wina “Gâd”, apia kaka “Dawan” makisa. Sakuna, ai nina pali ba sin marikisa: Jehova. Lawana 83:18 ra naku wisa: “Man ninam Jehova makisma ba, Lai Purara Pali sma wan tasba aiska purkara” (Miskitu Salmo Lawana nani [SLN], 1960). Baibilkam ra Gâd nina ba takras sa kaka, bukka na wahya 195-197 kat, kau tanka aisi kaikma dukyara mai paiwi bangwisna. Raitka pali  ba sika, blasi pyua ra Baibil ulban wauhkataya nani ba ra, Gâd nina ba aima tausin tausin prais takisa. Naha laka ra, Gâd bui witin ba ya sapa tanka mamrikisa. Jehova brinka sa Baibil bakku ai nina ba lan taki yus munma.

15. Nina Jehova ba dia tanka sa ki?

¹⁵ Gâd selp ai nina Jehova makan ba, tanka tara brisa. Tanka ba sika witin dia pramis muni ba, bara dia daukaia luki ba sut aimakbia daukaia sip sa. * Gâd nina ba kumikira pali sa, kan witin dukyara baman sa. Tnatka wala nani ra sin Jehova ba kumikira pali sa. Kaisa tnatka kum kum laki kaikaia.

16, 17. Jehova ra: a) “Karnika Sut Bri [ba]”, b)“ban kaia Kingka”, bara c)“Papaskra” maki taim, dia tanka wan marikisa ki?

 ¹⁶ Lawana 83:18 ra Jehova dukyara naku wisa: “Man baman Lai Purara Pali sma”. Baku sin, Jehova ra baman “Karnika Sut Bri [ba]” makisa. Param marikan [Reveleshan] 15:3 ra, nan wisa: “Dawan Gâd, Karnika Sut Brisma ba, diara aihkakira daukram ba sut tara bara painkira pali sa. Nisan nani Kingka, yabalkam nani ba wapni bara kasakkira pali man sa”. “Karnika Sut Bri [ba]” maki ba, rayakira nani sut purkara Jehova kau karnika bri ba tanka sa. Ai karnika baku wala kumi sin apu sa. Bara 1 Timoti 1:17 ra “ban kaia Kingka” Jehova ra maki ba mita, witin baman ban bara ba tanka wan marikisa. Baku sin Lawana 90:2 ba naku wisa: “Pyua nani sut wan kanra aula bara, man ban wan Gâdka sma”. Rait apia, yawan naha kaiki ba aihka pranakira lukisa?

¹⁷ Tanka wala ra Jehova kumikira taki ba sika naha: Witin baman Papaskra sa. Param marikan 4:11 ba wisa: “Wan Dawan bara wan Gâdka, man lika mayunra ba, prana ba bara karnika ba briaia aitani sma; kan man sika diara sut paskram ba, bara man kupiam laka ba mita sika baha nani ba ban sa bara paskan kata”. Diara sut bara ba, insal nani, bara slilma nani heven ra bangwi ba, dus ma nani pawi ba, inska nani kabu ra bara awala nani ra ba, bara pura luan diara wala bara ba sin, Jehova mita paskan.

18. Dia muni upla kum kum Gâd panika sip takras lukisa, sakuna Baibil ba dia smalkisa ki?

¹⁸ Upla kum kum, Jehova daukanka tara nani ba kaiki sibri bangwisa. Gâd ba uba sunu ba mita upla ra lukras wisa, bara ai panika sin sip takras lukisa. Baku sa ki? Apia pali! Kan Baibil ba sat wala wan smalkisa. Jehova ba “yawan wina laiura apia sa” wisa (Wark nani 17:27). Nan sin paiwisa: “Man nani Gâd lamara was, bara witin man nani lamamra wabia” (Jems 4:8).

19. a) Nahki yawan Gâd panika takaia sip sa, bara takisi dia yamnika bribia? b)Gâd ai daukanka nani bri ba wina, ani ba kau laik sma ki?

 ¹⁹ Papaskra ba wal nahki muni pana takaia sip sma ki? Pas ba, na minit dia daukisma ba swipara, wibia sa kaka, Gâd dukyara ban lan taki bas. Jisas win: “Bamna raya ban kaia laka ba lika, mai kakaira takaia, Gâd kumi baman kasakkira sma ba, bara Jisas Kraist ra sin kakaira takaia, witinka man mita blikram ba” (Jan 17:3). Baibil smalki ba baku, Jehova ra, bara Jisas ra sin kakaira takaia ba “raya ban kaia laka” ra wan brihwisa. “Gâd ba latwan laka sa” tanka pat kaikan (1 Jan 4:8, 16). Sakuna, Jehova ba daukanka wala nani sin brisa, bara sut ba pranakira sa. Naha tanka ra Baibil bila: “Gâd [ba] kupia swapni umpira kaiki ba, ai kupia alki takaski, latwan kaikaia laka tara bara kasakka laka sin bri ba” (Impakan sturka 34:6). Witin ba sika “yamni [...] wan pâtka nani swih tiki [...] wihka bila kaiki” Gâdka kum sa (Lawana 86:5, 15). Bara ai daukanka sin kasak sa (Param marikan 15:4). Baibil aisi kaiki auma bara, Jehova mita naha, bara daukanka wala nani sin mariki ba kaikma.

20-22. a) Yawan Gâd ra sip kaikras ba mita, witin panika sip takras sa ki? Tanka mariks. b)Upla kum kum man ra luki ban kra dia mai wibia, sakuna man dia daukaia sma ki?

²⁰ Au, yawan Gâd ra sip kaikras, kan witin ba spirit kum sa (Jan 1:18; 4:24; 1 Timoti 1:17). Sakuna, witin dia sat ba Baibil ra smalkisa. Lawana aîulbra kum win ba baku, man Jehova “yamnika prana ba kaikaia” sip sma (Lawana 27:4; Rom 1:20). Witin dukyara kau lan taki wama taim, panikam kau latwan kaikisma ba ra ba baku damra walma.

²¹ Baibil bila Jehova ra wan Aisa baku kaikaia sa wisa. Baibil stadi taki auma taim, dia muni witin ra baku kaikaia wi ba, tawa tawa tankam brima (Matyu 6:9). Gâd wan rayaka wankan, sakuna aisa pain kum ai luhpia nani ai rayaka pain brih iwbia want ba baku, Jehova sin want sa  (Lawana 36:9). Baibil bila tasba uplika nani ba Jehova panika takaia sip sa wisa (Impakan sturka 33:11). Luki kais! Diara sut Paskan Gâdka panika kaia sip sma!

²² Man Baibil stadi takisma mita, ban kra upla kum kum man ra luki, Baibil stadi takma apia mai wibia. Ban kra lukankam ba lakma wisi wari takisa. Sakuna, pana kau pain briaia sip sma ba wina, wibia sa kaka, Gâd panika takaia sip sma ba wina, upla kumi sin yarka mai takasbiara.

23, 24. a) Dia muni lan takisma tanka ba sibrin apu makabi walaia sma? b)Saptika aula ba ra dia laki kaikbia ki?

²³ Wel au, taura, diara kum kum tanka brima apia. Sakuna help makabaia srinhka bripara. Jisas bila yawan tuktan kum baku bauikira kaia pain sa win (Matyu 18:2-4). Bara yawan pain nu sa tuktan nani ba makabi walaia laik ba. Gâd brinka sa man ansika nani plikisma ba sakma. Patitara pyua ra upla kum kum Gâd tanka pliki kan ba dahra Baibil ra pain aisisa. Baha uplika ba, Ulbanka ba aman pali laki kaiki dia lan taki kan ba kasak sapa tanka pliki bangwan (Wark nani 17:11).

²⁴ Gâd ra kakaira takaia tnatka kau pain ba sika, Baibil stadi takaia. Buk wala nani sut tila wina Baibil ba sat wala sa. Dia laka ra sat wala sa ki? Kaisa saptika aula ba ra baha laki kaikaia.