1. Ani pura sunra upla ailal kaiki ba tanka laki kaikbia?

TASBA aiskara upla ailal ba “Yawan Aisa” pura sunra ba kaikisa. Jisas baha pura sunra lan wan daukan ba mita yawan tanka manis briaia sip sa. Kaisa taura pura sunra na ra makabanka yuhmpa dauki ba laki kaikaia, kan baku lika rait pali Baibil ba dia smalkisa sapa kaikbia.

2. Jisas ai disaipelka nani ra ani diara yuhmpa pura suni makabaia lan daukan ba wis.

² Baha pura sunra taura, witin ra wali kan nani ra Jisas mita win: “Man nani naku puram suns: ‘Yawan Aisa kasbrika purara sma ba, ninam ba hulikira kulkan kabia. Man king aimakaia ba yarka balbia. Man kupiam laka tasba ra daukan kabia, kasbrika purara dauki ba baku’” (Matyu 6:9-13). Diara yuhmpa makaban ba dia tanka sa ki?

3. Gâd Kingka laka dahra, dia wan tanka briaia sa ki?

³ Gâd nina Jehova ba dahra yawan diara ailal lan takan sa. Bara Gâd ai kupia laka kat, dia daukan bara dia daukbia ba sin yawan pat kaikan. Ban sakuna, “King aimakaia ba yarka balbia” Jisas win taim, dia wiaia want kan ki? Gâd Kingka laka ba dia sa ki? Baha balbia ba, nahki ‘Gâd nina ba hulikira kulkan kabia’ daukbia ki? Bara  nahki baha Kingka laka ba mita yarka Gâd kupia laka ba daukbia?

4. Gâd Kingka laka ba dia sa ki, bara ya ba ai Kingka sa?

⁴ Gâd Kingka laka ba sika, Jehova mita gabamint kum bapi mangkan ba tanka sa. Bara witin bui gabamintka Kingka ba sin bak sakan. Kingka ba ya luki? Jisas Kraist sika! Jisas ba, kanra yamni sa tasba wihtka nani sut ba wal, “kan witin ba dawan nani Dawanka [bara] king nani Kingka [sa]” (Param marikan [Reveleshan] 17:14). Tasba ra ani wihtka kau yamni kabia ba purkara sin, Jisas ba kau yamni wan munaia sip sa.

5. Gâd Kingka laka ba anira sa, bara diaura karnika alki bribia ki?

⁵ Gâd Kingka laka ba anira aimakan kabia? Wel, Jisas ba anira sa ki? Yawan kaikan baku, Jisas ra dus kum ra sabi ikan ningkara, witin heven ra wan (Wark nani 2:33). Bahamna, Gâd Kingka laka ba heven ra sa. Baha mita Baibil ba “heven [...] Kingka laka” makisa (2 Timoti 4:18, Lâ Raya Wauhkataya, 1974). Heven ra sa, sakuna tasba ra sin ai karnika alki bri kabia (Param marikan 11:15).

6, 7. Dia muni Jisas ba King aihka painkira kum sa ki?

⁶ Jisas ba King aihka painkira kum sa. Dia muni? Pas ba sika, witin prubia apia. Baibil bila tasba wihtka nani wal praki, Jisas baman “sip sauhki tikras rayaka” brisa wisa (Hibru nani 7:16). Baku bamna, yamni sut daukbia ba, ban kaiara bara kabia. Bara yawan nu sa witin yamni ailal daukaisa.

⁷ Jisas dahra Baibil ra kaina manas naku ulban ba kais: “Dawan spiritka ba [...] witin purara kabia, bara sins laka yabia, sins tara tanka, ai dara walaia laka, karnika, diara tanka kaikanka an Dawan ra sibrin brinka sin. Upla mawan [...] kaiki ni baman witin bui lâ daukbia apia, bara upla nani aisanka ba ra wali baman wal sin lâka  daukbia apia. Lâ wapni ni upla swapnikira nani ra lâka daukbia an kuntrika ra upla umpira nani raitka [...] tawan aisabia” (Aiseya 11:2-4, Miskitu Testament Almuk, 1990). Tikska na marikisa, Jisas ba tasba uplika ra lâ wapni kat kupia pihni ni King aimakaisa. Baha sat wihta kum briaia brinkam sa ki?

8. Jisas wal ya bahki king aimakbia ki?

⁸ Kaisa Gâd Kingka laka dahra tanka wala sin kaikaia. Jisas ba yakan king aimakbia apia, kan king wala nani sin ai yula kahbia. Naha laka ra, apastil Pâl mita Timoti ra win: “Yawan pât wauhwisa kaka, witin wal sin [...] king aimakbia” (2 Timoti 2:12). Au sika! Pâl, Timoti wihki lalukra wala nani sin, Jisas bakahnu heven Kingka laka aimakaia Gâd mita bak saki brin. Sakuna, upla an bahki king aimakbia ki?

9. Jisas wal upla an king aimakbia ki, bara ahkia wina Gâd bui wahbi aula sa?

⁹ Saptika 7 ra lan takan baku, apastil Jan ba yaprisauhkanka kum ra “Syîp Lupia [Jisas Kraist] ba Saion ilka [heven ra King baku ai pliska ba] ra bui kan” kaikan. “Witinka wal upla 144.000 bara kan, bara baha nani ai lal purara Syîp Lupia nina ba bara ai Aisika nina ba sin ulbi bri kata”. Naha 144.000 ba ya nani sa ki? Jan bui latan aisi win: “Naha nani sika [...] Syîp Lupia ba nina blikisa ani anira wabia ba; witin nani na upla nani tila wina swaki sakan sa, bara naha nani sika pas upla nani Gâd dukya bara Syîp Lupia ba dukya sin [sakan sa]” (Param marikan 14:1, 4). Kasak sika! 144.000 ba, Jisas Kraist nina blablikra nani, witin wal heven ra king aimakaia dukyara bak sakan sa. Pruisi heven ra buan kabia taim, Jisas bakahnu “tasba ra karnika alki bri [kabia]” (Param marikan 5:10). Naha 144.000 sut ba sakaia dukyara, Apastil nani pyua wina lalukra tila wina kum kum Gâd bui wahbi aula sa.

10. Jisas 144.000 ba wal, tasba uplika ra king aimakbia Jehova lukan ba, dia muni uba pain pali sa ki?

 ¹⁰ Jisas wihki 144.000 ba, tasba uplika ra king aimakbia Gâd lukan ba, uba pain pali sa. Kan Jisas ba upla baku iwan ba taka, upla dia wauhwi ba sut nu sa. Pâl win Jisas ba “umpira wan kaikaia sip sa, kan witin pali sin yawan baku traika kaikanka sat sat brin, sakuna saurka lika daukras kan” (Hibru nani 4:15; 5:8). Bara Jisas wal king aimakai nani ba sin, upla panis wauhwi ba ai wîna kat wauhwan sa. Baha purkara sin, ai swapnika mapara aiklabi, siknis taki, tasba ra upla trabil nani lui ba pain ai tanka bribia.

11. Gâd kupia laka heven ra daukan kabia dukyara, dia muni Gâd Kingka laka aimakbia nit kan ki?

¹¹ Jisas ai uplika ra win, Gâd Kingka laka ba aimakbia makabaia, bara Jehova kupia laka ba ‘kasbrika purara dauki ba baku, tasba ra daukan kabia’ makabia sin win. Gâd heven ra sa, bara heven ra insal wapni nani ba, ban Gâd kupia laka kat daukisa. Sakuna yawan saptika 3 ra lan takan, insal watauikira kum Gâd lâka ba swisisi, Adam Iv wal Gâd bila lulkbia yaban. Saptika 10 ra lika, baha insalka Setan maki ba dahra, rait pali Baibil ba dia smalkisa sapa kaikbia. Gâd mita swin, Setan ai lasika nani aikuki heven ra pyu kunhku kum takasbia. Baha mita, Jisas balan pyua ra, heven ra kum kum nani ba Gâd kupia laka daukras kan. Sakuna, Jisas Kraist Gâd Kingka laka ra aimaki, Setan mapara war aiklabisi, dan baku kaia apia kan (Param marikan 12:7-9).

12. Ani dukya wal takan ba dukyara, Param marikan 12:10 ra wan aisisa ki?

¹² Prapit bui dia takan ba naku win: “Kasbrika purara bila baikra tara kum walri, naku aisin: ‘Swaki sakan laka ba pat balan. Yawan wan Gâd karnika ba kingka laka ba.  Nanara Kraist karnika ba marikan sa. Kan wan muihni nani dahra kwakwahkra [Setan] ba saki lulkan sa, witinka kakna bara tihmia wan Gâdka mawanra baha nani dahra kwahki kata ba’” (Param marikan 12:10). Naha burska ra, diara wal takan ba dukyara wan aisi ba pat kaikram ki? Pas ba sika, Jisas mihta ra Gâd Kingka laka aimakaia ta krikisa. Bara walka ba, Setan ra heven wina kangbi saki tasba ra lulkan.

13. Setan ra heven wina lulkan ba taka dia takan ki?

¹³ Naha wal na wina, dia bal takan ki? Heven ra dia takan ba kaisa kaikaia: “Kasbrika purara nani sma ba, liliam taki bas [...]!” (Param marikan 12:12). Au sika! Insal wapnikira nani ba lilia taki bangwan, kan Setan ai lasika nani wal heven wina kangbi sakan ba taka, heven ra takaskan nani sut ba kupia kumi laka ra Jehova dukya daukisa. Bahamna, heven ra Gâd kupia laka ba pat daukisa.

14. Setan tasba ra lulkan ba wina dia takan ki?

¹⁴ Sakuna tasba ra lika dia takan? Baibil bila: “Tasba ra kabu ra iwi nani ba mapara lika alai pali kabia, kan Debil ba man nani ra iwan sa, ai kupia sin baikan sa, kan witin kaikisa kau pyua wiria baman brisa bamna” (Param marikan 12:12). Heven wina kangbi saki lulkan, bara pyu kunhku bri ba mita, Setan ba laui pali sa. Uba laui ba mita, tasba ra pât nani man bukisa. Saptika aula ba ra baha pâtka nani dukyara kau lan takbia. Sakuna, na kat laki kaikan ba wina makabi walisa: Nahki Kingka laka na yarka tasba ra Gâd kupia laka ba daukbia?

15. Tasba na dukyara ani ba Gâd kupia laka sa ki?

¹⁵ Gâd naha tasba dukyara dia want ba amya ra bri bas. Saptika 3 ra lan takan baku, Gâd mita Eden gadinka ba paski, tasba na paradais kum takbia, bara ban kaiara upla wapni ni bangki kabia want ba marikan. Setan bui Adam Iv wal Gâd bila lulkbia daukan taim, tasba na dukyara Gâd kupia laka ba wira saura munan, sakuna Gâd kupia  laka ba ban sa. Jehova brinka ban sa “kasakkira nani ba lika tasbaia ba brih iwbia, ban kaiara sin baha tasbaia ra iwi kabia” (Lawana 37:29). Bara Gâd Kingka laka ba bui baku daukbia. Nahki muni ki?

16, 17 Gâd Kingka laka dukyara Danyal 2:44 ba dia wan wisa ki?

¹⁶ Danyal 2:44 ra prapit ba mita naku win: “Baha kingka [...] yua nani ra, kasbrika purara Gâdka ba king lâka kum bukbia, ban kaiara sauhki tikan kabia apia, nisan wala kumi mita sin pura lubia apia, ban sakuna king laka wala nani sut ra pura lubia, bara ban kabia ban kaiara”. Gâd Kingka laka ba dukyara, naha na dia wan wisa ki?

¹⁷ Pas pali bila, gabamintka na “baha kingka [...] yua nani ra” bukan kabia, wibia sa kaka, gabamint wala nani bara kabia yua nani ra takbia wisa. Walka pali bila, Gâd Kingka laka ba ban kaiara bara kabia. Bara gabamint wala kumi mita sin sauhki tikras kabia wisa. Yuhmpika mariki ba sika, Gâd Kingka laka ba mita tasba kingka nani mapara war aiklabi pura lubia. Bara las kat tasba aiskara gabamintka na baman kumikira taki, kau painkira kabia.

18. Gâd Kingka laka ba tasba gabamintka mapara war aiklabia ba, nina dia makisa ki?

¹⁸ Gâd Kingka laka ba tasba gabamintka mapara war aiklabia ba dukyara Baibil ba aihwa aisisa. Naha tanka ra, tnata yua balaia man kabia taim, spirit saurakira nani mita “tasba aiska kingka nani” ra kunin munbia wisa. Dia dukyara? Kingka nani ra “asla daukaia taki auya kan, Gâd [...] karnika sut bri ba yua tara warka ba dukyara” wisa. Bara “king nani sut plis kumira asla daukan, bara pliska ba Hibru bila ra Harmagedon makisa” (Param marikan 16:14, 16). Naha burska wal ra wi ba kat, Gâd Kingka laka ba tasba gabamintka mapara war aiklabia nina ba “Harmagedon” makisa.

19, 20. Diakan Gâd kupia laka ba na minit aimakras

¹⁹ Harmagedon bak Gâd Kingka laka ba dia daukbia ki?  Tasba na dukyara Jehova dia want ba ban amya ra luki kais. Witin brinka sa tasba na paradais kum taki, ban kaiara upla wapni ai dukya dauki ni bangki kabia. Diakan na minit witin kupia laka kat aimakras? Trabil kum ba sika, yawan ba saura dadaukra sa, baha mita siknis taki pruisa. Sakuna, saptika 5 ra lan takan baku, yawan ban kaiara iwbia dukyara Jisas yawan tnata mana pruan. Bara Jan Gaspilka aisan ba misar kupiam kraukaia sma: “Gâd tasba ra uya latwan kaikan, bara witin mita ai Luhpia kumi baman bri kan ba yan; bara baku mika ani uplika witin ra kasak lukbia ba, sut pali tanis tiwbia apia, sakuna raya ban kaia laka ba bribia” (Jan 3:16).

²⁰ Trabil wala ba sika, upla ailal ba saura bangwisa. Kunin aisi muni, watauan laka ra iwisa. Bara Gâd kupia laka daukaia sin want apia sa. Sakuna saura dauki nani ba, Gâd warka Harmagedon ra sauhki tikan kabia (Lawana 37:10). Kau trabil wala kum ba sika naha: Tasba gabamintka nani bui upla ba Gâd kupia laka daukbia platukbras. Gabamint aihkika nani ba swapni, kraskira bara warbanka dadaukra takan sa. Baibil ba diara yukukras nan wisa: “Upla ba nahki karnika bri ba [mita], ai walkara saura mun[isa]” (Smasmalkra 8:9).

21. Kingka laka ba mita nahki yarka tasba ra Gâd kupia laka ba daukbia?

²¹ Sakuna, Harmagedon ningkara, tasba uplika sut ba gabamint kumi, Gâd Kingka laka karnika munuhtara iwi kabia. Baha Kingka laka mita Gâd kupia laka ba daukan kabia, bara blisin wala nani sin bri balbia. Naha tanka ra, Setan ai lasika nani wal diki sakan kabia (Param marikan 20:1-3). Jisas sakripaiska ba karnika bri ba tingki, upla wapni nani ba dan siknis taki prui bangwbia apia, kau ni ban kaiara iwi kabia (Param marikan 22:1-3). Tasba na sin paradais kum ra lakbia. Baku lika, Kingka laka ba mita yarka tasba ra Gâd kupia laka dauki, ai nina ba hulikira  kulkan kabia. Baha ba dia tanka sa ki? Tanka ba sika, Gâd Kingka laka ba tingki, upla sut Jehova nina kulki mayuni kabia.

22. Jisas tasba ra kan taim, apia kaka bukan kan minitka ra, Gâd Kingka laka kau aimakras kan ba, yawan nahki nu sa ki?

²² Jisas ai disaipelka nani ra win, “King aimakaia ba yarka balbia” Gâd ra makabia. Sakuna baha win pyua ra, Kingka laka ba kau aimakras kan ba latan sa. Jisas heven ra wan taim aimakan ki? Baha pyua ra sin apia, kan Pita bara Pâl bila, Jisas ra prura wina bukan taim, Lawana 110:1 ra nan wi ba baku takan wisa: “Dawan [Jehova] ba, yang dawanki [Jisas] ra win: ‘Man yang mihti aihkika ra iws, yang man waihlam nani ba, man minam nani kahbaika daukamna ba kat’” (Wark nani 2:32-35; Hibru nani 10:12, 13). Baku bamna, Jisas Kraist ba wira bila kaikaia kan.

23. a) Gâd Kingka laka ba ahkia aimaki ta krikan? b)Saptika aula ba ra dia kaikbia ki?

²³ Nahki wihka bila kaikaia kan? 1870 manka nani ra, Baibil stadi tatakra daknika kum bui, Jisas ba 1914 manka kat bila kaiki kaia kan tanka ba Baibil wina kulki kaiki sakan. (1914 manka dahra kau tanka plikan mai daukisa kaka, Ulbanka Taka wahya 215-218 kat laki kais.) Tasba  aiskara 1914 manka wina dia taki aula ba kaikisi, baha Baibil stadi tatakra nani aisan ba kasak sa marikisa. Baibil ra, prapit aisan ba marikisa 1914 manka ra, Jehova bui Kraist ra King mangki, heven ra Gâd Kingka laka ba aimaki ta krikan. Bahamna Setan “kau pyua wiria baman” bri ba yua nani ra yawan iwisa (Param marikan 12:12; Lawana 110:2). Bara kasak wiaia sip sa, Kingka laka na tingki, aihni pali tasba ra Gâd kupia laka ba daukan kabia. Baha ba nahki lukisma? Mampara sturi yamni sa ki? Rait takbia lukisma? Saptika aula ba naha tanka dukyara, rait pali Baibil ba dia smalkisa sapa kaikbia.