1. Gâd yamni kaiki ba kat yawan mayunbia sa kaka, dia yamnika bribia ki?

JEHOVA GÂD mita kasak latwan wan kaikisa. Bara yawan ra luki ba tawan, wan ta baikisa. Witin yamni kaiki ba kat mayunbia sa kaka, yawan lilia takbia, bara pât ailal wina tnayara kabia. Baku sin, Gâd helpka, bara yamnika tara bribia (Aiseya 48:17). Rilidian ailal Gâd dahra kasak smalkisa wisi pura luan bara sa. Sakuna Gâd ba ya sa sapa, bara yawan dia daukbia want ba dukyara sin diara sat sat smalkisa.

2. Mayunaia tnatka Jehova yamni kaiki ba, man nahki nu takaisma ki?

² Mayunaia tnatka Jehova yamni kaiki ba, man nahki nu takaisma ki? Rilidian nani sut smalkanka ba stadi laki kaikma nit apia sa. Kasak kat mayunaia ba dukyara, Baibil ba rait pali dia smalki ba lika lan takaia sma. Rilidian rait aihwa satka ba pain lan takma taim, ani rilidianka nani kuninkira sa sapa, param sin kaikma.

3. Jisas smalkan ba kat, Gâd yamni wan kaikbia dukyara, dia daukaia sa ki?

³ Jehova yamni kaiki ba kat mayunaia ba, diara kum bahki lika apia sa. Upla manas ba, rilidian nani sut Gâd bui yamni kaikisa lukisa, sakuna Baibil ba baku smalkras. Bara, “yang kristian sna” wiaia man aitani apia sa, kan Jisas win: “Yang ra ‘Dawan Dawan’, ai wi nani ba baman  lika Kasbrika purara Kingka tasbaia ra dimbia apia, sakuna ya ya Aisiki kasbrika purara ba kupia laka dauki ba, baha nani lika”. Baku bamna, Gâd dia wi ba lan taki alki brih daukbia sa kaka, witin yamni wan kaikbia. Sakuna ya Gâd kupia laka kat daukras nani ra, Jisas mita “diara saura [...] dadaukra nani” makan (Matyu 7:21-23). Rilidian kuninkira ba yus apu pali sa. Bara baha purkara sin, saura wan munisa.

4. Jisas yabal wal aisan ba, dia tanka sa ki, bara kumi bani anira wan brihwisa?

⁴ Upla sut raya ban kaia laka briaia ba, Gâd mita sanska yabisa. Ban sakuna, Paradais ra raya ban kaia laka briaia sa kaka, Gâd dia want ba kat mayuni wapi bangwi kaia sa. Sari laka sakuna ailal ba baku daukras. Baha mita Jisas naku win: “Dims man nani [dur bila sirpi] bak; bamna tara sika [durka] ba, bila tara sin yabal ba tanis tiwaia ra auya ba, upla uya sin bak dimisa. [Dur bila sirpi] bamna, yabal sin sirpi sa, rayaka ra auya ba, bara [upla wiria] man baha sakuya” (Matyu 7:13, 14, Lâ Raya Wauhkataya [LRW], 1986). Kaiki ba baku, rilidian rait aihwa ba raya ban kaiara wan brihwisa, sakuna kuninkira nani ba sauhki tikanka ra. Gâd mita upla sauhki tikan kabia want apia sa, baha mita witin wal kakaira takaia sanska yabisa (2 Pita 3:9). Au sika, yawan Gâd ra nahki mayuni tnatka ba wina raya ban kaiara, apia kaka prura ra wan brihwisa.

5. Nahki rilidian rait aihwa uplika ba pliki sakaia sip sa ki?

⁵ “Rayaka ra auya [yabalka] ba” nahki pliki sakma ki? Jisas bila rilidian rait aihwa uplika ba sakaia dukyara, ai wapanka ba kaikbia wisa. Witin nan win: “Ai daukanka nani ba mita man nani bui tanka ba kaikma”, kan “dus yamni bani ma yamni sakisa” (Matyu 7:16, 17). Wibia sa kaka, rilidian rait aihwa uplika ba ai smalkanka, bara  ai daukanka ba mita param takisa. Mistik taki bangwisa, sakuna sut asla Gâd kupia laka kat iwaia plikisa. Kaisa witin nani ra pliki sakaia dukyara daukanka 6 bara ba kaikaia.

6, 7. Gâd uplika ba Baibil ra nahki kaikisa ki, bara tanka na dahra Jisas ba dia marikan?

⁶ Gâd uplika ba Baibil wi ba kat smalkisa. Baibil pali ba bila: “Ulbanka aiska ba Gâd wînka puhbra mita sika, bara baha ba yamni sa upla ra smalkaia bara laui daukaia, swakwanka nani ba wapni daukaia, bara kasakka laka mapara upla ra smalkanka yabaia dukyara, Gâd uplika ba pain lan kabia bara ridi sin pain daukan kabia, wark yamni satka nani sut daukaia dukyara” (2 Timoti 3:16, 17). Apastil Pâl ba ai muihni ai lakri nani ra win: “Gâd sturka yamni ba sal maikri ba ra, man nani walram bara alki briram; upla bila baku lika briras katma, sakuna Gâd bila baku mika” (1 Tesalonaika 2:13). Baku bamna, rilidian rait aihwa smalkanka, bara daukanka nani ba, waitna nani lukanka wina sakras. Baha watlika ra, witin nani Gâd Bila —Baibil ba— wina sakisa.

⁷ Jisas ba tanka pain kum mangkan, kan ai smalkanka nani ba Baibil wina saki marikan. Ai Aisa ra ai pura suni win: “Smalkankam bila ba sika diara kasak pali ba” (Jan 17:17). Jisas ba Baibil ra kasak lukan, bara Ulbanka ra dia wi ba kat smalkan. Jisas tiks kum dahra aisaras kainara, sam taim “Ulbanka ra wisa” wi kan (Matyu 4:4, 7, 10). Sim baku, naiwa pyua Gâd uplika ba selp ai lukanka smalkras. Ulbanka ra dia wi ba kat smalkisa, bara Baibil ba Gâd Bila ba baku kulkisa.

8. Ani ba Gâd mayunanka taka kum sa?

⁸ Rilidian rait aihwa uplika ba Jehova ra baman mayunisa, bara ai nina tanka smalkisa. Jisas win: “Man Dawan Gâdkam ra lulam kriki puram suni mayunma, bara witin dukya baman sin daukma” (Matyu 4:10). Baha mita, Gâd  uplika ba Jehova ra baman mayunisa, upla wala kumira sin apia. Bara naha mayunanka taka kum baku, Gâd nina ba, bara ai daukanka nani ba dukyara sin upla nani ra smalkisa. Lawana 83:18 ra naku wisa: “Man yakan, man ninam Jehova makisma ba, Lai Purara Pali sma wan tasba aiska purkara” (Miskitu Salmo Lawana nani, 1960). Upla wala Gâd wal kakaira takbia help munaia dukyara, Jisas tanka mangkan ba nina blikaia sa. Jisas pali ai Aisa ra naku win: “Upla nani ra man ninam marikri” (Jan 17:6, [LRW], 1986). Naiwa pyua ra sin, Gâd uplika rait aihwa ba mita Gâd ba ya sa sapa, —wibia sa kaka, ai nina, ai lukanka bara ai daukanka ba sin— upla ra smalkisa.

9, 10. Kristian rait aihwa nani ba, nahki muni pana pana latwan laka marikisa ki?

⁹ Gâd uplika tilara pana pana latwan kaikisa. Jisas win: “Man nani pana pana walkam ra latwan kaikisma kaka, upla sut kaikbia man nani ba yang disaipelki nani sma” (Jan 13:35). Pas kristianka nani tilara baha sat latwanka marikan. Gâd uplika latwanka laka ba mita upla taya kalatka, umpira lalahkira sma sapa, bara ani kyamka wina sma sapa sin kaikras, bara pamali kum baku asla wan sakisa (Kolosi 3:14). Rilidian kuninkira uplika nani ba baha sat latwanka laka apu. Bri kaka, dia muni pana pana ai walka taya kalatka, apia kaka ai kyamka wala ba tawan upla ikisa? Kristian rait aihwa nani ba ai muihka ai lakrika, bara upla kumi sin mapara war aiklabi ikras. Baibil ba wisa: “Baha mita yawan param kaikisa, Gâd luhpia nani ba ya sa, bara Debil luhpia nani ba sin, kan ani uplika diara yamni daukras ba ai muihni ra sin latwan kaikras ba, witin lika Gâd luhpia apia sa [...,] yawan pana pana wan walkara latwan kaikaia sa. Yawan lika Kên baku kaia apia sa; witin lika Debil dukya kan ba mita ai muihni ra ikan. Bara dia muni ikan ki? Kan Kên dia dauki kan ba saura baman kan, kuna Ebel dia dauki kan ba lika pain kan” (1 Jan 3:10-12; 4:20, 21).

 ¹⁰ Latan sa, baha latwanka laka ba mita wan walkara ikras, sakuna tanka kau tara kum sin brisa. Kristian rait aihwa nani ba, pana pana help munaia dukyara ai taimka, ai karnika bara ai dukya nani sin yus munisa (Hibru nani 10:24, 25). Trabil pyua ra pana pana ai ta baiki bangwisa, bara upla ra kunin munras. “Upla sut ra diara pain nani dauki” kaia lâka ba wali daukisa (Galesha 6:10).

11. Dia muni Jisas bak Gâd swaki wan saki ba kasak lukaia aitani sa ki?

¹¹ Kristian rait aihwa nani ba, Jisas bak Gâd swaki wan saki ba kasak lukisa. Baibil bila: “Upla wala bak swaki wan sakan laka briaia ba apu sa, kan Gâd mita naha tasba ra nina wala kum maki wankras sa, swaki wan sakaia ba dukyara” (Wark nani 4:12). Saptika 5 ra kaikata baku, bila wawalra nani ra swaki sakaia dukyara, Jisas ai rayaka ba yaban (Matyu 20:28). Baha purkara sin, Jehova mita Jisas ba heven Kingka laka tasba purara aimakbia dukyara Kingka mangkan. Bara Gâd bila kaikisa, yawan Jisas ra bila wali ai wapanka nina blikbia. Baku lika raya ban kaiara iwbia. Naha laka ra Baibil bila: “Ya Gâd Luhpia ra kasak luki ba, raya ban kaia laka ba brisa; sakuna ya Gâd Luhpia ra kasak lukaia apia wi ba, sip baha rayaka ba bribia apia” (Jan 3:36).

12. Naha tasba daukanka saura tilara dimras kaia ba, dia tanka sa ki?

¹² Gâd uplika rait aihwa nani ba naha tasba daukanka saura tilara dimras sa. Rom kingka Pailet ba mawanra kan taim, Jisas mita win: “Yang Kingki laka ba naha tasba wina apia sa” (Jan 18:36). Ani kuntrika ra iwi kabia sin, Jisas nina blablikra nani ba ban heven Kingka laka mina munuhtara sa. Baha mita, pulitik bara tasba warbanka nani tilara dimraskira sa. Sakuna upla wala kum pulitik ra bara iliksan ra dimaia, apia kaka but munaia want sa kaka, witin nani tilara dimras. Pulitik tilara dimraskira sa, sakuna gabamint lâka ba lika bila walisa. Dia muni? Kan Gâd Bila ba mita kristian uplika ra wisa ‘ta bri nani, bara wihta  nani ra sin baui kabia’ (Taitus 3:1). Sakuna pulitik asla takanka kum Gâd lâka ba mapara diara kum makabisa kaka, kristian rait aihwa nani ba apastil nani win ba kat sin daukisa: “Yang nani Gâd bila ba kau walaia sna, upla nani ra lika apia” (Wark nani 5:29; Mark 12:17).

13. Jisas nina blablikra rait aihwa nani ba, Gâd Kingka laka ba dukyara dia lukisa ki, bara baha taka mita dia sin daukisa?

¹³ Jisas Kraist nina blablikra nani ba, Gâd Kingka laka  ba baman trabil wapnika mangkaia sip ba smalkisa. Jisas kaina manas win: “Naha King laka sturka yamni na tasba aiskara smalkan kabia, kuntri nani sut baha ba pain kaikbia dukyara; bara lika tnata ba aimakbia” (Matyu 24:14). Jisas nina blablikra nani ba, upla ra wiras tasba gabamintka nani ba wan trabilka wapnika mangkbia. Heven ra Gâd Kingka laka ba lika wapnika mangkaia sip ba smalkisa (Lawana 146:3). Jisas pali ba, yawan pura sunra ra baha gabamintka painkira makabaia dukyara lan wan daukan, kan witin win: “Man King aimakaia ba yarka balbia. Man kupiam laka tasba ra daukan kabia, kasbrika purara dauki ba baku” (Matyu 6:10). Baibil bila naha heven gabamintka mita naiwa pyua “king laka wala nani sut ra pura lubia, bara ban kabia ban kaiara” (Danyal 2:44).

14. Ani daknika mita rilidian rait aihwa daukanka nani ba marikisa lukisma ki?

¹⁴ Bisiura laki kaikram bara luki, mamkabi wals: “Ani rilidianka daknika mita, Baibil wi ba kat smalki Gâd nina Jehova maki ba dukyara lan daukisa ki? Au; ani daknika mita pana pana latwan kaiki, Jisas ra kasak luki, naha tasba daukanka saura ba wina tnayara taki, Gâd Kingka laka ba trabil wapnika mangkaia sip ba smalkisa ki? Tasba rilidian daknika nani sut tila wina, ani ba baman naha daukanka nani dauki marikisa ki?”. Latan pali sa, Jehova Witniska nani ba baman baku dauki marikisa.

15. Gâd ra kasak lukaia purkara, witin dia wala yawan daukbia want sa ki?

¹⁵ Gâd yamni wan kaikbia dukyara, witin ra kasak lukaia baman aitani apia sa. Kan Baibil bila, lasa nani ba kat sin Gâd ra kasak lukisa wisa (Jems 2:19). Sakuna lasa nani ba Gâd kupia laka daukras, bara Jehova mita sin, witin nani ra yamni kaikras ba latan sa. Gâd kupia lilia daukaia dukyara, witin ra kasak lukaia sakuna ai kupia laka sin  daukaia sa. Bara baha purkara, rilidian kuninkira ba wina tnayara taki rilidian rait aihwa daknika tilara kaia sa.

16. Rilidian kuninkira wina tnayara kaia dukyara dia daukaia sa ki?

¹⁶ Apastil Pâl mita rilidian kuninkira tilara kaia apia ba dukyara, param wan smalkan. Naku ulban: “Witin nani lilapaska ba wina dakwi taki bal taks, Dawan bila; diara taski ba kangbi bangwpara. Bara mika yang mita mai brimna” (2 Korint 6:17; Aiseya 52:11). Bahamna, kristian rait aihwa nani ba rilidian kuninkira ba wal prawraskira pali sa.

17, 18. “Babilun Tara ba” dia tanka sa ki, bara dia muni ‘baha wina isti bal takaia’ sa ki?

¹⁷ Baibil ra, rilidian kuninkira nani sut ra bakahnu “Babilun Tara ba” makisa (Param marikan [Reveleshan] 17:5). * Baha nina ba patitara Babilunka ra wan kupia kraukisa, kan Noa Lisamrika Tara ba ningkara baha taunka wina rilidian kuninkira nani ba bal takan. Naiwa pyua rilidian kuninkira nani smalkanka, bara daukanka kum kum ba, Babilun ra ta krikan. Patitara Babilun uplika nani ba gâd kumira yuhmpa sat sat mayuni bangwi kan, bara naiwa pyua ra sin, rilidian ailal ba, Gâd Kumira Yuhmpa mayuni bangwisa. Sakuna Baibil ba lika, Gâd kasakkira kumi baman —Jehova ba—, bara sa wisa, bara Jisas Kraist ba witin ai Luhpia sa wisa (Jan 17:3). Patitara Babilun uplika lukanka ra, yawan solka pruaikas kum brisa win, bara upla pruya ningkara ai solka ban raya takaski panis wauhwaia sip sa luki kan. Naiwa pyua rilidian aihkika nani ba sin, solka kum apia kaka spirit pruaikas kum hel pauta ra waia sip ba dukyara smalkisa.

¹⁸ Patitara Babilun rilidianka ba, tasba aiskara ilinghwi yakawan. Baha taka mita sinska ni wiaia sip sa, Babilun Tara ba sika, naiwa pyua tasba aiskara rilidian kuninkira nani ba tanka sa. Bara Gâd mita kaina manas win rilidian  kuninkira nani na bakahnu, ban wina isti sauhki tikan kabia (Param marikan 18:8). Babilun Tara na wina dia muni dakwi takaia sma ba, nanara lika tankam brisma ki? Tnata ba kau balras ba mita, Jehova want sa man takaskraskira ‘baha wina bal takma’ (Param marikan 18:4).

19. Jehova ra mayunma kaka, dia yamnika sakma?

¹⁹ Rilidian kuninkira ba wina tnayara takma taim, ban kra upla kum kum ba pamnika kaia want apia kabia. Ban sakuna, Ai uplika asla Gâd ra mayunma kaka, tikisma ba wina pura luan kau yamnika brima. Jisas disaipelka pas nani ra takan ba baku, man ra sin mai takbia. Spirit laka ra tasba aiskara muihni-lakri milian milian asla bangwi ba tilara kama. Baha kristian rait aihwa nani ba, kasak latwan mai kaikbia. Bara “naika balaia tasbaia ra, raya ban kaia” bila kaikanka painkira ba brima (Mark 10:28-30). Bara nanara sat wala lukanka brisma ba mita, upla tnamyara takbia kra sin, tisku witin nani sin Baibil tanka lan taki Jehova uplika takaia sip sa.

20. Tisku kaina pyua ra, rilidian rait aihwa uplika ba dia bribia ki?

²⁰ Baibil bila, tisku pali Gâd bui naha tasba watauikira sauhki tiki, tasba kasakkira kum ai Kingka laka karnika munuhtara mangkbia wisa (2 Pita 3:9, 13). Nahki painkira kabia! Baha ra, rilidian bara rait aihwa mayunanka kumi baman bara kabia. Rait apia, Gâd uplika rait aihwa ba wal asla kaia, mahka ta krikaia sma?