1. Dia muni yawan insal nani tanka kaikaia sa ki?

UPLA KUM ra kakaira takisma taim, ai pamalika dahra diara kum kum sin nu takisma. Sim baku, Jehova ra kakaira takisma taim, heven ra ai pamalika dahra diara kum kum nu takaia sma. Pamalika na insal atia sa, bara Baibil ba insal nani ra, “Gâd luhpia nani” makisa (Blasi sturka 6:2). Sakuna, Gâd mita insal nani ra dia warkka daukbia yabisa? Tasba ra diara taki ba ra, witin nani diman sa ki? Insal nani ba wan rayaka ra diara munisa ki? Diara munisa kaka, nahki muni daukisa ki?

2. Insal nani ba nahki bal takan, bara an bangwisa ki?

² Insal nani ba dahra Baibil ba diara manas aisisa. Insal nani tanka kau pain lan takaia dukyara, kaisa Baibil ra diara kum kum aisi ba laki kaikaia. Insal nani ba nahki bal takan ki? Kolosi 1:16 bila: “Kraist bak, Gâd mita diara nani kasbrika purara bara tasba ra ba sut paskan”. Bahamna, insal maki sut nani ra, Jehova Gâd mita, kumi banira ai Luhpia tawahkia bak paskan. Insal nani an bara sa ki? Baibil bila insal milian milian bara sa, bara sut ba karnakira sa wisa (Lawana 103:20; Param marikan [Reveleshan] 5:11).

3. Job 38:4-7 kat, insal nani dahra dia wan marikisa ki?

³ Baibil bila Jehova tasba na paskan pyua ra, Gâd  “insalka nani [ba] lilia bri kan” wisa (Job 38:4-7). Tikska na ra wan marikisa, kau upla paskras kan kainara, insal nani ba bara kan. Kan tasba na paskras kainara kat sin, insal nani bara kan wisa. Bara wan marikisa, insal nani ba ai kupia ra dara walaia sip sa, kan “lilia bri kan” wisa. Baku bamna, baha pyua ra insal nani sut ba pamali kum baku asla, Jehova dukya dauki kan.

4. Insal wapni nani upla dia dauki ba dukyara luki ba, Baibil ra nahki wan marikisa ki?

⁴ Insal wapni nani ba tasba uplika paskan kaikan wina, upla sahwi auya ba, bara Gâd kupia laka nahki tnata aimaki auya ba sin aman luki kaikisa (Sins laka 8:30, 31; 1 Pita 1:11, 12). Sakuna, pyu lui aula ba ra, upla aihkika ba ai Papaskra painkira dukya daukaia lukras ba sin, insal nani ba mita kaikisa. Baha taka, insal wapni nani ba sari lukisa kaia sa. Bara upla kumi pan ai kupia lakisa taim, “Gâd insalka nani ba lilia sa” (Luk 15:10). Kaiki ba baku, insal nani ba Gâd uplika yamnika dukyara uba lukisa. Baku mika, yawan aihka lukras Jehova bui tasba ra ai uplika ta baiki kaina kahbaia wisi, pat pat insal nani yus muni ba (Hibru nani 1:7, 14). Kaisa naha tanka kum kum kaikaia.

5. Ya nani insal helpka brin ba sturka Baibil ra kaikisa ki?

⁵ Gâd mita Sadam Gomora taunka saura wal ba sauhki tikan taim, insal wal mita kasak lalukra Lat wihki ai luhpia mairin nani ra taunka wina sakan ba tingki, swakwi takan (Blasi sturka 19:15, 16). Baku sin, prapit Danyal ra layan nani watla ra lulkan, sakuna saura munras kan ba mita, naku win: “Yang Gâdki ai insalka blikan, bara layan nani bila ba prakan” (Danyal 6:22). Apastil nani pyua ra, insal kum mita apastil Pita ra silak watla wina pri sakan (Wark nani 12:6-11). Jisas sin tasba ra ai warkka dauki ta krikan pyua ra insal nani helpka bri kan (Mark 1:13). Bara pruaia baila kan taim “witin ra ta baikaia” wisi insal kum  balan (Luk 22:43). Pât nani tilara, baha ta baikanka bri si Jisas kupia bukan kaia sa!

6. a) Naiwa pyua ra, Gâd insalka nani ba dia tnatka ra Gâd uplika kaina kahbisa? b)Ani makabi walanka nani ansika yabaisa ki?

⁶ Naiwa pyua ra, insal nani ba Gâd uplika ra param takras. Upla mita insal nani ra sip kaikras, sakuna naha insalka karnakira nani bui Gâd uplika ra ban ta baikisa. Bara spirit laka ra saura wan munaia sip dukya nani wina, kau pali wan kaina kahbisa. Baibil bila: “Dawan ra yamni kulki uplika nani ba, Dawan insalka ba mita kan kahbi, swaki sakisa” (Lawana 34:7). Dia muni sturka na wali wan kupia bukisa? Kan insal saura nani wan sauhkaia want ba sin bara sa. Baha nani ba ya sa ki? Ani wina bal takan ki? Bara nahki muni wan sauhkaia plikisa? Naha nani tanka pliki kaikaia sa kaka, kaisa blasi pyua ra dia takan sapa laki kaikaia.

7. Setan mita upla an Gâd bila lulkbia yaban?

⁷ Saptika 3 ra lan takan baku, insal kum bara kan upla wihtka aimakaia brinka brin. Ai kupia brinka ba alki takaskras pali, Gâd mapara buisi las kat Setan Debil takan (Param marikan 12:9). Iv ra kunin munisi, mani 1.600 luan bilkara upla aihkika ba Gâd bila lulkbia sin yaban. Upla kulki man —Ebel, Inok bara Noa baku— wapni kan (Hibru nani 11:4, 5, 7).

8. a) Insal kum kum ba nahki lasa taki bangwan? b)Lasa nani ba Lisamra Tara ra pruaia apia wisi dia daukan ki?

⁸ Noa pyua ra, insal wala nani sin Jehova mapara buan, bara heven ra Gâd pamalika tilara ai pliska bri kan ba swisisi, upla baku tasba ra bal iwan. Dia mata? Tanka ba Blasi sturka 6:2 ra naku wisa: “Gâd luhpia nani ba kaikan, upla luhpia mairin nani ba mawan pranakira pali kan, witin nani ai laikka ba kat ai maîa nani brin, ailal nani tila wina pliki sak[an]”. Sakuna baha insalka nani upla ra ban  sauhki kaia Jehova mita swika daukbia apia. Baha mita Lisamra Tara kum ni, tasba ra upla saura nani bara kan ba sut ra ikan, sakuna ai uplika wapni nani ra lika swaki sakan (Blasi sturka 7:17, 23). Pruaia apia wisi, insal kyamapara, —lasa maki nani ba—, upla wîna daukra brin ba swisisi, spirit wîna daukra baku taki kli heven ra taui wan. Baku dauki muni Debil tanira selp tauan, bara Debil ba “lasa nani wihtka” takan (Matyu 9:34, Lâ Raya Wauhkataya, 1986).

9. a) Heven ra kli taui wan taim lasa nani ra dia takan ki? b)Lasa nani ba dahra dia laki kaikbia?

 ⁹ Bila walras insalka nani ba heven ra kli taui wan taim, Setan ra takan baku witin nani ra sin takan. Kan Gâd mita ai pamalika tilara kaia dan swiras kan (Judas 6). Naiwa pyua ra lasa nani ba upla wîna daukra baku dan sip takras, kuna upla ra sauhkaia karnika ban brisa. Au sika! Lasa nani helpka wal Setan bui “tasba aiskara kunin [munisa]” (Param marikan 12:9; 1 Jan 5:19). Nahki muni upla ra kunin munisa ki? Witin tnatka sat sat yus munisa (2 Korint 2:11). Kaisa kum kum laki kaikaia.

10. Sukia laka ba dia tanka sa ki?

¹⁰ Upla ra kunin munaia wisi lasa nani ba sukia laka ba yus munisa. Sukia laka ba sika, ani daukanka nani upla kum selp, apia kaka, sukia kum bak lasa wal aisaia pliki ba tanka sa. Baibil ba sukia laka ba saura pali kulkisa, bara baha wina laiura kabia sin wan maisapahkisa (Galesha 5:19-21). Sukia laka ba sika, inska mamiskra nani, kyulh pata sat sat yus muni ba wal prakaia sip sa. Inska mamiskra ba inska sat sat alkaia wisi, kyulh pata sat sat yus munisa. Sim baku, lasa nani ba upla sat sat miskaia wisi, sukia laka sat sat yus munisa.

11. Sukia laka bak diara kaikaia ba dia tanka sa ki, bara dia muni baha ba daukras pali kaia sa?

¹¹ Lasa nani ba miskaia pata kum yus muni ba sika, sukia laka bak diara kaikaia. Diara kaikaia ba dia sa ki? Tanka ba sika kaina pyua ba, apia kaka, diara yukuwan ba kaikaia wisi dauki nani ba. Baha daukanka nani tilara: Yumu yabaki kaiki ba, wan mihta bila aisi kaiki ba, bara yaprisauhkanku diara kaiki wi ba sin dimisa. Upla ailal ba naha ba saura kaikras, sakuna Baibil ba latan marikisa, sukia nani ba lasa nani helpka wal ai warkka daukisa. Naha tanka ra, Wark nani 16:16-18 bila tuktan mairin kum  “diara kaikaia spiritka bri kata” ba mita, “diara kaikaia warkka dauki” kan wisa. Bara tuktika mairin wina lasika ba takan minitka ra, dan diara kaikaia warkka sip daukras kata.

12. Dia muni pruan nani wal aisaia trai kaikaia ba, pât ra wan dingkisa?

¹² Lasa nani mita kunin munaia wisi tnatka wala yus muni ba sika, upla tukbaia pruan nani wal aisabia. Ban kra ai uplika kum pruan tawan sari bri nani ra, pruan nani dahra diara kunin yaban kasak lukisa. Sukia ba mita, upla prahki rayaka ba dahra, yukuwan tanka kum kum mai wibia kra, apia kaka, prahkika bila baikra talika wal sin mai aisabia. Naku dauki ba mita, upla ailal mapara pruan nani ba rait pali kau raya sa, bara prahkika ba wal aisi muni, ai sarka pura luaia helpka briaia sip sa lukisa. Sakuna, ani “helpka” bribia wi ba kunin sa, bara pât ra wan dingkaia sip sa. Dia muni? Kan lasa nani ba, pruan bila baikra talika baku aisaia, bara pruan rayaka ba dahra sukia ra wiaia  sin sip sa (1 Samyuil 28:3-19). Saptika 6 ra lan takan baku, upla kum pruya taim, dan apu takisa (Lawana 115:17). Baku bamna, ya ya pruan nani wal aisi wi ba, lasa nani bui kunin munisa, bara Gâd kupia laka mapara sa (Kli smalkan 18:10, 11; Aiseya 8:19). Baha mita, lasa nani miskaia pata ba wina laiura kaia dukyara aman kaiki bas.

13. Lasa sia brin uplika ailal ba, dia daukan ki?

¹³ Lasa nani ba upla ra kunin munisa, sakuna sirang sin ikisa. Setan bara ai lasika nani pain nu sa “kau pyua wiria baman” bilara sauhki tikan kabia. Baha tawan kau kupia siksa ni wark takisa (Param marikan 12:12, 17). Ban sakuna, upla ailal naha sirang aîkra mihta wina pri takan sa. Nahki muni pri takan ki? Bara upla kum sukia laka bisniska ra taukisa kaka, nahki muni lasa nani wina pri takaia sip sa?

14. Patitara Epesus taunka ra kristianka nani daukan ba kaiki, yawan nahki muni lasa nani wina pri takaia sip sa?

¹⁴ Lasa nani mapara nahki bapi bui pri takaia ba, Baibil ra smalkisa. Naha laka ra, patitara Epesus taunka ra, kristian nani daukan ba laki kais. Kum kum ba kau kristian takras kainara, sukia laka bisniska ra tauki kan. Sukia laka mahka swiaia lukan taim, dia daukan luki? Baibil bila: “Sukia warkka lan takan uplika nani ailal sin ai wauhkataya nani bri sal, upla nani sut mawanra angkan” (Wark nani 19:19). Kristian takan raya nani na, sukia wauhkataya nani bri kan ba angki muni, naiwa pyua ra ya ya lasa nani mapara bapi buaia luki ba dukyara, tanka pain kum mangkan. Ya Jehova dukya daukaia luki ba, ani dukya nani sukia laka wina bri ba sut sauhki tikaia sa. Baha dukya nani tilara: Buk nani, wauhtaya nani, lilka nani, so nani bara lawana aiwani sukia warkka daukaia wan tukbi nani ba sin dimisa. Baku sin tub, apia kaka,  puisin saîka nani ai kaina kahbaia wisi upla yus muni ba sin tilara dimisa (1 Korint 10:21).

15. Lasa nani mapara bapi bui kaia sa kaka, yawan dia daukaia sa ki?

¹⁵ Epesus taunka ra kristian uplika nani sukia wauhkataya nani angkan. Sakuna mani kum kum luan ningkara, apastil Pâl ba witin nani ra win: “Yawan aiklabi ba lika [...] spirit saura nani ai karnika bri ba mapara [sa]” (Epesus 6:12). Lasa nani ba mita witin nani ra pri swiaia lukras kan. Ban kristian nani ra alki bri kaia trai muni kan. Baku bamna, kristianka nani ba dia wala sin daukaia kan? Pâl mita win: “Baha sut purkara, kasak lukan laka ba kainam kahbaika baku buki bris, Setan trisbaika nani sin pauta klauhwi baku ba sut daskaia dukyara” (Epesus 6:16). Wan kasakka lukan laka kaina kahbaika ba karna sa kaka, lasa nani mapara yawan kau karna bapi buan kabia (Matyu 17:20).

16. Nahki wan kasakka lukan laka ba kau karna daukisa?

¹⁶ Bara nahki wan kasakka lukan laka ba kau karna daukisa? Baibil stadi taki ni! Utla kutbanka kum karna kaia sa kaka, playa ba karna kaia nit sa. Sim baku, wan kasakka lukan laka karna kaia sa kaka, ai playka ba, wibia sa kaka, Baibil tanka kasak ba karna kaia nit sa. Yawan yu bani Baibil aisi kaiki stadi takbia kaka, wan kasakka lukan laka ba kau karna takbia. Bara utla kutbanka karna kum baku, baha kasakka lukan laka ba mita, lasa nani wina wan kaina kahbaisa (1 Jan 5:5).

17. Lasa nani wina wan kaina kahbaia dukyara dia daukaia sa ki?

¹⁷ Epesus kristianka nani ba dia wala sin daukaia kan? Lasa nani karnika munuhtara taunka kum ra iwi kan ba mita, ai kaina kau kahbia nit kan. Bara Pâl mita win: “Man nani puram sunisma ba swipara, pyu bani Gâd ra bik taki makabi bas, spirit man nani tam briaia” (Epesus 6:18). Yawan sin lasa nani karnika munuhtara tasba kum ra iwi ba mita, lasa nani wina wan kaina kahbia Jehova ra bik taki makabaia sa. Bara ai nina Jehova ba, wan pura sunra  ra misar makaia sa (Sins laka 18:10). Bara ‘Debil ba wina dakbi wan sakbia’ pat pat makabaia sa (Matyu 6:13). Yawan baha sat makabisa kaka, Gâd sika ansika wankbia (Lawana 145:19).

18, 19. a) Dia muni yawan lasa nani mapara aiklabi ba pura lubia lukisa ki? b)Saptika aula ba, dia laki kaikbia?

¹⁸ Wel au! Lasa nani ba pât ra wan dingkaia sip sa. Sakuna Debil mapara bui, Gâd lamara ai kupia laka daukisa kaka, yawan sirang iwbia apia (Jems 4:7, 8). Lasa nani ba karnika sut lika apu sa. Noa pyua ra lasa nani ba klala brin, bara naika pyua ra Gâd bui ai lâka las daukan kabia (Judas 6). Bara amya tikpara, Jehova insalka karnakira nani ba mita wan ta baikisa (2 King nani 6:15-17). Yawan lasa nani mapara aiklabi ba Jehova insalka nani ba aihwaki kaikisa. Bara want sa yawan pura lubia. Wibia sa kaka, yawan pura lubia wan tukbisa. Baku bamna, Jehova wihki heven ra ai pamalika aikuki ban asla bangwi kap. Baku sin, sukia laka satka sut ba wina laiura taki, Dawan Bila wi ba kat dauki wap (1 Pita 5:6, 7; 2 Pita 2:9). Baku lika, yawan lasa nani mapara aiklabi ba pura lubia.

¹⁹ Sakuna, dia muni ki Gâd mita swin saurka laka ba, bara lasa nani pât ailal dauki ba ban bara kabia? Saptika aula ba baha laki kaikbia.