PLISKAM PALI Lawana 83:18 ba Baibilkam ra pliks. Burska ba dia wisa ki? Miskitu Salmo Lawana nani, 1960 ra ulban ba ra naku wisa: “Bara mika ai dara walbia, man yakan, man ninam Jehova makisma ba, Lai Purara Pali sma wan tasba aiska purkara”. Baibil wala nani sin, baku lakan sa. Sakuna Baibil ailal ba, nina Jehova ba diki “Dawan”, apia kaka “Gâd” mangkisa. Bahamna, naha burska ra dia mangkaia sa ki? Nina Jehova ba, apia kaka bila wala kum?

Burska ra upla nina pali kum mangkan sa. Bara blasi Hibru bila wina Baibil aihkika ulbi sakan ba ra, upla nina pali kum takisa. Nina ba Hibru letrika walhwal ni ulban sa יהוה [YHWH]. (Impakan sturka 6:2 [wahya mina ba], bara 3 ba aisi kais.) Nina ba miskitu bila ra Jehova ulbisa. Sakuna nina na, Baibil ra aima kumi man takisa ki? Apia pali! Kan blasi Hibru Ulbanka ba ra, aima 7.000 prais baku takisa.

Nahki kat Gâd nina ba kulkaia sa ki? Luki kais: “Yawan Aisa” pura sunra Jisas Kraist marikan ba nan ta krikisa: “Yawan Aisa kasbrika purara sma ba, ninam ba hulikira kulkan kabia” (Matyu 6:9). Pyu luan ningkara, Jisas ba Gâd ra ai pura suni win: “Aisa, ninam ba prana dauks”. Bara Gâd pana heven wina witin ra win: “Yang baha ba pat prana daukri, bara kli sin prana daukamni” (Jan 12:28). Latan sa! Gâd nina ba kulkanka tara pali brisa. Baku kaka, diakan Baibil ulbi lalakra kum kum ba, Gâd nina ba diki ai Baibilka nani ra bila wala mangkan sa ki?

Kaikbia sa kaka, tanka wal ba mita nina ba dikan. Pas ba sika naha: Upla ailal bila, patitara pyua ra Gâd nina ba nahki maki kan sapa yawan nu apu ba mita, yus munaia apia sa wisa. Kan patitara Hibru bila ulbanka ba: a, e, i, o bara u letrika apu ulbi kan ba mita, naiwa pyua ra YHWH letrika nani tilara ani a, e, i, o, u ka mangkaia sapa upla kumi sin nu apu sa. Baha taka,  yawan Gâd nina ba yus munaia apia sa ki? Wel luki kais: Patitara pyua ra, Jisas nina ba ban kra Yeshúa, ban kra Yehoshúa maki kan; nahki pali maki kan sapa upla kumi sin nu apu sa. Sakuna tasba aiskara, upla ba nahki ai bila ra tanka bri ba kat, Jisas nina ba sat sat ra maki yus munisa. Patitara pyua ra, Jisas nina ba nahki maki kan sapa nu apu kabia sin, nina ba yus muni bangwisa. Sim baku, man kuntri wala kum ra wama kaka, ninam makan sat wala aihka sin walma. Baha sut mita, blasi pyua ra Gâd nina nahki maki kan ba yawan nu apu kabia sin, yus munaia sa.

Gâd nina ba dia muni Baibil wina dikan ba tanka wala ba sika, Ju nani lukanka kum bri kan ba mita sa. Ju ailal bila Gâd nina ba makaia apia sa wisa. Baha lukanka ba lâka na wina sakan sa: “Dawan Gâdkam nina ba, diara bahki laka daukaia dukyara brih makpara. Kan witin ai nina diara bahki daukaia dukyara brih maki nani ba, klala yabras ban pâtka swih tikbia apia sa bamna” (Impakan sturka 20:7). Sakuna kaikbia sa kaka, witin nani ba lâka na pain ai tanka briras.

Wel au, lâka na ra Gâd nina ba bahki ra yus munaia apia wisa. Sakuna, rispik laka kat Gâd nina ba sip yus munras wisa ki? Baku wiras! Hibru Ulbanka [“Testament Almuk”] aîulbra nani ba, waitna kasak bangwi kan. Bara Gâd bui Israel uplika ra lâ yaban ba sin alki bri kan. Aîulbrika kasak nani na, Gâd nina ba wal dia daukan ki? Witin nani Gâd nina ba pat pat yus muni bangwi kan. Naha tanka ra, mayunra lawana ailal ra aiwani kan ba ra kat sin Gâd nina ba mangkan. Jehova bui sin, ai albika nani ra win ai nina maki wini kabia, bara lalukra nani ba ai bila walan (Rom 10:13; Wark nani 2:21). Naiwa pyua ra sin, yawan kristian nani ba Gâd nina ba rispik laka kat yus munaia wan auya tikras. Bara nu sa Jisas sin yus munan (Jan 17:6, 11).

Ulbi lalakra nani ba Gâd nina diki, pliska ra nina wala mangki ba, mistik tara kum dauki bangwisa. Gâd ba yawan wina uba laiura, kakaira takaia sip apia baku pitka ra mangkisa. Sakuna, Baibil ba lika, yawan sut Jehova panika takaia wan tukbisa (Lawana 25:14). Panikam kau pain brisma ba ra luki kais. Witin ba nina dia sapa nu apu kama kaka, witin ba panikam painkira sa wima ki? Wel, yawan Gâd wal sim baku takisa. Yawan  Gâd nina Jehova maki ba nu apu sa kaka, nahki muni witin wal pana takbia ki? Baha purkara sin, Gâd nina ba yus munras uplika ba, nina ba dia tanka bri sapa sip nu taki bangwras. Gâd nina ba dia tanka brisa ki?

Gâd bui ai nina ba dia tanka bri ba Moses ra param win. Moses mita, Gâd nina dia ba makabi walan taim, Jehova pana win: “Yang ba, yang sna bara ban sna ba” (Impakan sturka 3:14). Bara Rotherham Baibilka ra naku ulbi lakan: “Yang Dia Kaia want sna ba Kamna”. Baku bamna, ai lukanka aimakbia dukyara Jehova dia takaia nit ba kat takisa.

Man diaura takaia want sma ba kat, tauaia sip kama kaka, panikam nani tnata mana dia daukma ki? Panikam kum siknis takan kaka, man daktar lankira kum baku taui witin ra rakma. Wala kum lalah trabilka ra diman kaka, man lalahkira taui, ta baikma. Wel au, yawan sut ba, rait pali ba sika, dia want ba kat tauaia sip apia sa. Sakuna Baibil stadi taki auma bara, aihka painkira lukma, kan ai lukanka aimakbia dukyara Jehova dia takaia nit ba kat takisa kaikma. Bara ai uplika ra ta baikaia mata witin ai karnika yus munaia lihkisa (2 Kronikas 16:9). Gâd nina ba lan takras nani ba, Jehova ai daukanka pranakira nani bri na sin kaikras.

Param sa! Gâd nina ba, Baibil ra ulbi mangkaia sa. Nina Jehova maki ba tanka brih yus munisa taim, wan Aisa painkira ra mayuni, ai lamara kaia kau isi sa.