JISAS BA ani yua pali ra aisubi takan sapa Baibil ba wiras sa. Sakuna tanka kum kum Baibil ra mariki ba mita, Jisas ba Trisu [diciembre] katka ra sip aisubi takras kan ba kaikisa.

Jisas ba sika, Betlehem taunka ra aisubi takan. Trisu [diciembre] katka ra, Betlehem pyua ba nahki sa ki? Ju uplika kalindarka ra kati kum Kisleb maki ba bara sa, baha katka ba Yahbra [noviembre] wihki Trisu [diciembre] katka bakriki bilkara kauhwisa. Bara pyua kum li karna auhwi kauhla pali sa. Ningka pali, Tibit katka ba aula, baha katka ba Trisu [diciembre] wihki Siakwa [enero] katka bakriki bilkara kauhwisa. Mani aiskara kau kauhla katka sa, sam taim kyuhsi nani ra ais ma sin kauhwisa. Tasbaia na dukyara Baibil ba dia wisa sapa kaisa kaikaia.

Baibil aîulbra kum Isra maki ba bila Kisleb katka ba, kati kum uba li karna auhwi kauhla pali kan wisa. Isra bila “yua 20, kati 9 [Kisleb ba] alkan bilkara” Jerusalem ra upla kwara kum asla aidrubi bangwan, bara “li sin auhwi kan ba taka mita, witin nani tatatwi bangwi kan”. Isra bila upla aidrubi bangwan ba, baha katka pyua saura ba dahra naku win: “Uba li auhwisa, bara baku sip apia yang nani nara yabal ra bui kaia”  (Isra 10:9, 13; Jirimaia 36:22). Baha mita, Trisu [diciembre] katka ba pat aula kan taim, baha tasbaia sepadka nani ba tihmia kauhla tilara twiura kaia apia wisi ai syîpka nani ba asla dauki kan.

Sakuna, Jisas aisubi takan tihmika ra, Baibil bila sepad nani ai syîpka nani twiura main kaiki kan wisa. Kau ni, Luk aîulbra sturka bila “Betlehem taunka lamara, twiura sepad nani takaski kan; witin nani tihmia ra ai syîpka nani main kaiki kata” (Luk 2:8-12). Bika! Sepadka nani ba, kakna ra baman tauki kan wiras, kuna tihmia ra sin ai syîpka nani wal twiura takaski kan wisa. Trisu [diciembre] katka Betlehem ra uba li karna auhwi kauhla pali ba mita, sepadka nani ba latara takaski kan lukisma? Apia sika! Jisas aisuban taim diara nani takan ba mita, Jisas ba Trisu [diciembre] katka ra aisubi takras kan ba marikisa.

Dawan Bila ba mita, Jisas ani yua pali pruan ba sitnika kat marikisa, sakuna ahkia aisubi takan sapa tanka uya wiras. Baha ra luki, Salaman win ba kat wan kupia tangh krauisa: “Kau yamni sa, wan nina pain mayunanka ba, wihki isint kia painka ba wal. Kau yamni sa prura yua ba, wihki aisubi taki yua ba wal” (Smasmalkra 7:1). Baibil ba Jisas smalki tauki kan ba, bara pruan ba dukyara ailal aisisa, kuna dia muni ai aisubanka yua ba dukyara lika uya aisaras ba, nanara lika latan sa.