1, 2. a) Upla kum kulkanka tara bri ba nina nu kaia, wihki uplika ra pain kakaira takaia ba wal, dia muni sim sat apia sa ki? b)Jisas dahra upla ba dia sat sat lukisa?

NINA kulkanka tara bri uplika nani ailal bara sa. Kum kum ba ai taunka bilara, ai kuntrika ra, apia kaka tasba aiska ba kat sin ai nina ba kakaira sa. Ban kra upla kum kulkanka tara bri ba, nina dia sapa nu sma, sakuna ai rayaka ra, bara ai kupia ra dia sat uplika sa sapa lika nu apu sma.

² Jisas Kraist tasba ra balan wina, mani 2.000 baku pat luan sa, sakuna tasba aiskara ai nina ba kakaira pali sa. Ban sakuna, Jisas ba ya kan sapa dahra, lukanka wahra sat sat smalkisa. Upla kum kum bila Jisas ba upla pain kum baman kan wisa. Tila wala nani ba, prapit kum baman kan lukisa. Bara wala nani sin Jisas ba Gâd sa wisa, bara witin ra mayunaia sa lukisa. Baha ba rait sa ki?

3. Dia muni Jisas dahra tanka kasak ba briaia nit sma?

³ Jisas dahra tanka kasak ba nu takaia nit sma. Dia muni? Kan Baibil bila: “Raya ban kaia laka ba lika, mai kakaira takaia, Gâd kumi baman kasakkira sma ba, bara Jisas Kraist ra sin kakaira takaia, witinka man mita blikram ba” (Jan 17:3). Au sika! Jehova Gâd, bara Jisas Kraist ra kakaira takaia ba, paradais tasbaia kum ra ban kaiara iwaia sip wan munisa (Jan 14:6). Baku sin, wan rayaka ra  nahki iwaia ba, bara wan walkara nahki kaikaia ba dukyara sin, Jisas ba tanka kau pain ba marikisa (Jan 13:34, 35). Saptika 1 ra, Gâd dahra tanka kasak ba lan takan. Kaisa nanara Baibil ba Jisas Kraist dahra tanka kasak smalki ba kaikaia.

4. Bila Misaia bara Kraist ba, dia tanka sa ki?

⁴ Jisas kau aisubi takras kainara, Gâd yaura blikai kan ba —wibia sa kaka, Misaia Kraist ba dukyara—, Baibil ra kaina manas aisan kan. Bila Misaia ba Hibru bila wina sa, bara bila Kraist ba Grîk bila wina sa. Wal sut ba, “Bak Sakan” tanka sa. Baku bara, Gâd yaura blikai kan ba, bak sakan kaia kan. Wibia sa kaka, wark kum daukaia dukyara saki brin kaia kan. Saptika aula nani ra, Gâd pramiska nani aimakan kabia dukyara, Misaia wark tara daukaia bri ba tanka laki kaikbia. Bara nahki naiwa pyua ra kat sin, Jisas yamni wan munaia sip ba sin kaikbia. Jisas aisubras kainara, upla ailal nan makabi wali kan kaia sa: “Misaia ba ya kabia ki? ”

5. Jisas disaipelka nani ba, dia dukyara kasak luki kan?

⁵ Patitara Jisas disaipelka nani ba, Jisas Nasaret wina ba Misaia kan ba rait lukan (Jan 1:41). Tila wina Saiman Pita ba Jisas ra param naku win: “Man ba Misaia” (Matyu 16:16). Sakuna, dia muni disaipelka nani mita Jisas ba Misaia kan ba rait lukan ki? Bara dia muni yawan sin kasak lukaia sip sa?

6. Ai uplika ba Misaia ra kaikbia dukyara, Jehova dia daukan ba, tanka kum wal praks.

⁶ Jisas kanra prapitka nani mita, Misaia tanka dahra sitnika kat kaina manas aisan. Dia muni ki? Tanka na naku wal prakaia sip sa: Upla ailal bara kaka pliska ra, man kaikras uplika kum ra plikaia mai blikbia sa kaka, rait apia uplika ba sakaia dukyara, ai satka tanka kum kum nu takaia nit kama? Wel sim baku, Jehova ai prapitka nani bak, Misaia ba dia daukaia kan ba, bara witin ra dia takbia ba sin, sitnika kat tanka marikan. Bara tanka nani na aimaki kabia taim, ya ba Misaia sapa upla ba param kaikaia kan.

7. Prapit aisanka wal Jisas ra aimakan ba tanka mariks.

⁷ Kaisa tanka wal laki kaikaia. Pas ba sika naha: Jisas kau  aisubi takras mani 700 kainara, prapit Maika bila, uplika balaia kan ba Juda taunka sirpi kum Betlehem maki ba ra aisubi takan kabia win (Maika 5:2). Bara Jisas ba anira aisubi takan luki? Betlehem pali ra! (Matyu 2:1, 3-9). Walka ba sika naha: Kaina manas Danyal 9:25 ra wi ba wina kulki kaiki, 29 yawan pyua manka ba saki marikan, bara baha manka ra Misaia ba takaia kan win. * Naha bara wala nani aisan ba aimakan ba mita, Jisas sika Misaia sa marikan.

8, 9. Jisas ra tahbi daukan taim, witin Misaia kan ba dukyara nahki kau param takan ki?

⁸ Jisas ba Misaia sa dukyara, 29 manka ba tnata ra kau param takan. Manka na ra Jisas ba Jan Tatahbra ra makaban Jordan awalka ra tahbi daukbia. Jehova bui Jan ra pramis munan Misaia ba sakaia dukyara sain kum yabaia, bara Jisas aihtabi takan taim sainka ba yaban. Baibil sturka ba naku wisa: “Jisas ra tahbi daukan bara, Jisas li wina mahka takan. Tisku kan, kasbrika purara ba kwawan, bara Jisas kaikan Gâd spiritka ba butku baku ai purara aula kan. Bara kasbrika purara ba wina bila baikra kum walan, naku aisisata: ‘Naha sika Luhpi laitwankira; witin sika bak saki briri ba’” (Matyu 3:16, 17). Jan ba naha kaikan bara walan pyua ra, Jisas Misaia kan ba kau kasak lukan (Jan 1:32-34). Gâd spiritka ba, wibia sa kaka, ai karnika ba Jisas purara bal iwan minitka ra, Jisas ba Misaia Kraist takan, wibia sa kaka, Gâd bui King Ta Uplika baku bak sakan tanka sa (Aiseya 55:4).

⁹ Prapit aisan aimakan ba, bara Jehova pali witnis aisan ba mita, Jisas Misaia takan ba marikisa. Sakuna, Jisas ba ani wina bal takan ki? Bara, dia sat uplika kan? Naha wal na sin Baibil ra tanka marikisa.

10. Jisas tasba ra balras kainara anira kan ba dukyara, Baibil ba dia smalkisa ki?

¹⁰ Baibil bila Jisas kau tasba ra balras kainara heven ra iwi kan wisa. Prapit Maika bila, Misaia Betlehem ra aisubi takbia win, bara “blasi pali yua wina aula” tanka sin aisan (Maika 5:2). Jisas pali kat sin aima kum kum ra win, witin waitna baku kau aisubi takras kainara heven ra iwi kan (Jan 3:13; 6:38, 62; 8: 58). Witin heven ra spirit uplika baku Jehova wal asla iwi kan.

11. Baibil ba nahki marikisa Jisas ba Gâd Luhpia kau latwankira sa?

¹¹ Diara ailal tawan, Jisas ba Gâd Luhpia kau latwankira sa. Baibil bila witin “paskanka nani sut ba tawahkia sa” wisa, kan Gâd Jisas ra pas paskan (Kolosi 1:15). * Baku sin Jisas ba Gâd “Luhpia kumi baman” sa (Jan 3:16). Tanka ba sika witin ra baman Gâd bui yakan selp paskan. Bara Jehova diara wala nani paski kan pyua ra Jisas baman Gâd ra help muni kan (Kolosi 1:16). Baha purkara sin, witin ra “Bila ba” makisa (Jan 1:14). Naha na marikisa witin ai Aisa bila twatwilkra kan. Bara Gâd luhpia wala nani ra, insal apia kaka tasba uplika ra kabia sin maisapahki kan kaia sa.

12. Luhpia tawahkia ba Gâd wal kumi apia ba, nahki nu sa ki?

¹² Upla kum kum luki ba baku, Luhpia tawahkia ba wihki Gâd wal kumi sa ki? Baibil ba baku smalkras. Luan baiki sakanka ra kaikan ba baku, Gâd bui Luhpia ba paskan. Luhpia rayaka ba ta krikanka kum bri ba latan sa. Sakuna Jehova ba, ta bara tnata sin apu sa (Lawana 90:2). Luhpia ba ai Aisa wal kumi kaia pan sin lukras kan. Baibil bila Aisa ba kau tara sa Luhpia ba wal (Jan 14:28; 1 Korint 11:3).  Jehova baman “Dawan karnika sut bri [ba]” sika (Blasi sturka 17:1). Bahamna, Jehova baku wala kumi sin apu sa. *

13. Luhpia ra “Gâd talia pali ba” maki taim, Baibil ba dia wiaia want sa?

¹³ Slilma nani bara tasba na paskras kan kainara, Jehova ba ai Luhpia tawahkia wal mani milian milian asla lilia iwi bangwi kan. Pana pana latwan tara kaiki kan kaia sa! (Jan 3:35; 14:31). Naha Luhpia latwankira ba, ai Aisika wal talia kan. Baha mita, Baibil ba witin ra “Gâd talia pali ba” makisa (2 Korint 4:4). Au sika! Luhpa nani ai aisa wal tanka ailal ra ai talia ba baku, heven ra Gâd Luhpia na ai Aisa satka baku dauki marikan.

14. Nahki muni Jehova Luhpia kumi baman ba upla baku aisubi takan ki?

¹⁴ Jehova Luhpia kumi baman ba, ai kupia wilinkira ni heven wina tasba ra upla baku balan. Sakuna ban kra nan luki kama: “Nahki muni spirit kum upla baku aisubi takan ki?”. Wel, Jehova mita sain tara kum daukan. Ai Luhpia tawahkia heven ra kan rayaka ba brih, Ju tyara mairin kum nina Meri maki kan ba plauya ra laki mangkan. Bibika aisika ba naha tasba wina apia kan. Baha mita tyara ba, luhpa saurka luha kum baikan, bara nina Jisas makan (Luk 1:30-35).

15. Jisas bak nahki muni Jehova ra kau pain kakaira takisa ki?

¹⁵ Tasba ra Jisas dia daukan bara aisan ba, witin ra kau pain kakaira takaia help wan munisa. Baha purkara, Jisas bak yawan Jehova ra kau pain kakaira takisa. Nahki muni? Amya tikpara Luhpia na ai Aisa talia pali sa. Baha mita ai disaipelka kum ra naku win: “Ani uplika [...] ai  kaiki ba, Aisiki ra sin kaikisa” (Jan 14:9). Gaspil ulbanka nani ra, wibia sa kaka, Matyu, Mark, Luk bara Jan ulbanka nani ra, Jisas ai rayaka, ai warkka bara witin ai satka ba tanka marikisa.

16. Ani ba Jisas smalkanka lalka kan ki, bara ani wina smalkanka na sakan?

¹⁶ Jisas ra “Smasmalkra” maki kan (Jan 1:38; 13:13). Sakuna dia smalki kan ki? “Gâd King aimaki sturka yamni ba” ai smalkanka lalka kan. Gabamintka na mita, heven wina tasba aiska purara ai karnika aimaki, bila wali nani ra yamni munbia (Matyu 4:23). Ani wina smalkanka na sakan ki? Jisas selp naku win: “Smalkanki nani ba yang duki apia sa, sakuna witinka ai blikan ba dukya”, wibia sa kaka Jehova dukya sa (Jan 7:16). Luhpia ba nu kan ai Aisa brinka kan Gâd Kingka laka sturka yamni ba upla walbia. Saptika 8 ra, Gâd gabamintka tanka ba, bara dia daukbia ba sin kau laki kaikbia.

17. Jisas anira smalki tauki kan, bara dia muni smalkaia uba trai munan ki?

¹⁷ Jisas anira smalki tauki kan ki? Ani upla bara kan pliska ra: Twiura, taun sirpi taun tara nani ra, markit bilara bara utla nani ra sin. Jisas ba iwi, witin ra upla wabia bila kaikras kan, Jisas bui upla ra pliki tauki kan (Mark 6:56; Luk 19:5, 6). Sakuna dia muni ai taimka saki upla ra smalki lan daukaia uba trai munan ki? Kan baha ba ai Aisa kupia laka kan, bara Jisas baha kupia laka kasak dauki kan (Jan 8:28, 29). Sakuna diara wala kum tawan sin smalkan: Jisas ba upla kwara witin ra wi kan ba ra umpira kaiki kan (Matyu 9:35, 36). Kan prias ta uplika nani mita, Gâd tanka kasak ba upla ra smalkaia kan, sakuna kau ni upla ra lulki swin. Jisas lika pain nu kan uplika nani ba Gâd Kingka laka sturka walaia brin pali dauki kan.

18. Jisas satka ba wina, ani ba kau laik sma ki?

¹⁸ Jisas ba waitna kum ai kupia latwankira, swapnikira,  bara painkira sin bri kan. Witin tara pulras, upla ra yamni kaiki kan. Tuktan nani ba kat sin Jisas lamara kaia pain ai dara wali kan (Mark 10:13-16). Witin upla mawan bak saki kulkras kan. Kasak apia laka, bara warbanka laka ba sin misbara kaiki kan (Matyu 21:12, 13). Jisas pyua ra mairin nani ra mayara kulki kan. Sakuna Jisas lika mairin nani ra aman luki kaiki kulki kan (Jan 4:9, 27). Jisas ba rait bauikira kan. Yu kum ai apastilka nani mina sikban, sakuna baha ba alba umpira nani warkka kan.

19. Jisas bui pât wauhwi nani ra umpira kaiki ba nahki nu sa ki?

¹⁹ Jisas upla pât wauhwi kan nani ra umpira kaikan ba tawan, Gâd spiritka karnika ni upla ra raki kan (Matyu 14:14). Naha tanka ra, yu kum lepar sikniska bri kan waitnika kum bal, Jisas ra pliki naku win: “Wilin sma kaka, sip sma sikniski na wina ai rakaia”. Waitnika paniska  ba Jisas kupia kat diman. Bara Jisas kupia swapni taki, ai mihta ni kangbi, naku win: “Yang wilin sna, bamna mai rakisna!”. Bara minitka ra waitnika ba rawan! (Mark 1:40-42.) Waitnika ba nahki ai dara walan lukisma?

20, 21. Dia muni Jisas ba Gâd bila wali kasak kaia tanka kau tara sa ki?

²⁰ Gâd bila wali kasak kaia tanka kau tara ba sika Jisas. Dia sat mapara buanka, bara pât wauhwanka luan kabia sin, Jisas ai Aisa heven ra ban kasak kan. Bara Setan traika kaikanka nani mapara Jisas ban bapi bui kan (Matyu 4:1-11). Sam taim ai taya nani witin ra kasak lukras kan. Yu kum witin ba “lal saura takan sa” sin win (Mark 3:21). Sakuna, witin Gâd warkka ban dauki ai kupia mayara alahwras kan. Bara waihla nani mita witin ra swira  dauki saura muni kan taim, Jisas ban ai kupia alki takaski pana saura munras kan (1 Pita 2:21-23).

²¹ Jisas ba panis wauhwi saura pruan, sakuna ban kasak kan (Galesha 3:13 aisi kaiks). Las yua tasba ra iwan ba ra luki kais. Witin ra alki silak uplika baku brihwan, witnis kuninkira nani mita ai dusa kuhban, wihta warbankira nani mita witin ra pâtkira kulkan, upla mita ai lawaska kikan, bara suldawa nani mita witin ra latwan yabi rau muni kan. Witin ra dus ra sabi ai wînka las puhbi naku win: “Diara sut ba daukan sa!” (Jan 19:30). Yu yuhmpa luan ningkara, ai Aisa heven ra ba, prura wina spirit uplika kum baku kli witin ra bukan (1 Pita 3:18). Bara yu 40 luan ningkara Jisas ba kli heven ra wan, bara King aimakbia bila kaiki “Gâd lama pali kat wih iwan” (Hibru nani 10:12, 13).

22. Jisas ba prura kat ban kasak kan ba tawan dia takan ki?

²² Jisas ba prura kat ban kasak kan ba tawan dia takan ki? Jisas pruan ba mita, Gâd brinka kat yawan paradais tasbaia ra, raya ban kaia ra iwaia sip wan munisa. Saptika aula ba ra, Jisas pruan ba mita baha sip munisa tanka ba, sitnika kat laki kaikbia.