JEHOVA GÂD mita Misaia —Pri Sasakra ba— balbia pramis munan. Bara ai prapitka nani ra Misaia ba dahra kaina manas  maisapahkan. Misaia ba ya sapa nu takaia isi sa, kan nahki aisubaia, smalkaia bara pruaia kan ba prapit mita kaina manas win. Bara aihka painkira sa! Kan naha sut ba, sitnika kat Jisas Kraist ra tnata aimakan. Kasak aimakan ba kaikaia dukyara, Misaia ba anira aisubaia kan, bara tuktan taim witin ra dia takaia kan ba kaisa kaikaia.

Prapit Aiseya ba kaina manas win Misaia ba Debit kyamka wina takbia (Aiseya 9:7). Bara baku takan: Jisas ba Debit kyamka wina kan (Matyu 1:1, 6-17).

 Gâd prapitka wala Maika maki ba win, Misaia ba “Betlehem Iprata” ra aisubia, bara yu kum wihta sin aimakbia win (Maika 5:2). Bara Jisas aisubi takan taim, Israel kuntrika ra Betlehem maki kan taunka wal bara kan. Kum ba yahbra tanira, Nasaret lamara kan. Wala ba Jerusalem lamara, Judia taunka ra kan. Jerusalem lamara kan ba, pyua kanra Iprata maki kan. Bara baha pliska pali ra Jisas aisubi takan! Prapit aisan ba kat tnata aimakan (Matyu 2:1).

Baibil prapit aisanka wala ra, Gâd ai Luhpia ra winka “Idsipt” wina takbia win. Bara baku takan. Jisas sirpi kan pyua ra Idsipt ra brihwan, sakuna king Herad pruan taim, Jisas ba kli ai kuntrika ra taui wan. Prapit aisan ba kat tnata aimakan (Husiya 11:1; Matyu 2:15).

 Wahya 200 ra, lalka kum “Aisanka” wi ba kaikma. Baha ra Baibil tikska nani Misaia dahra prapit aisan ba marikisa. Lalka wala “Aimakanka” wi ba ra, tiks wala nani sin marikisa. Wal sut praki laki kaikma tam baiki bangwisna. Baku lika, Baibil ba kasak kat aisi ba, kau param kaikma.

Tikska nani laki kaikma taim, amya tikpara prapit aisanka nani na, mani ailal ailal Jisas kau aisubi takras kainara ulban. Jisas bui naku win: “Baha ba sut aimakaia kan, yang dukyra dia Moses lâka ra ulban ba, [Prapit] nani Ulbanka ra ba, bara [...] Lawana nani ra sin” (Luk 24:44). Baibilkam ra praki laki kaikma taim, sitnika kat sut tnata aimakan ba kaikma.