1. Dia muni Itiupia kuntrika wina wihta tara kum tahbi daukbia makaban?

“KAIS, LI nara sa, dia ai takaskisa ai tahbi ai daukaia [...]?” Itiupia kuntrika wina wihta tara kum mita, patitara kristianka kum nina Pilip maki kan ba ra baku walan. Pilip mita Ulbanka wi ba kat Jisas ba Misaia kan ba  dukyara tanka param ra sakan. Bara wihta tara dia lan takan ba kupia kat diman, bara tahbi daukbia makaban (Wark nani 8:26-36, Lâ Raya Wauhkataya [LRW], 1986).

2. Dia muni man aihtabi takaia lukaia sma ki?

² Jehova Witniska kum wal, naha bukka saptika luan nani pain pali stadi takram kaka, ban kra man sin kupiam ra lukisma: “Dia ai takaskisa ai tahbi ai daukaia?”. Baibil ba, tasba uplika Paradais kum ra ban kaiara iwbia pramis muni ba pat lan takram sa (Luk 23:43; Param marikan [Reveleshan] 21:3, 4). Upla pruan nahki bangwi ba, bara prura wina kli buaia bila kaikanka tanka ba sin kakaira sma (Smasmalkra 9:5; Jan 5:28, 29). Ban kra, bisi wina Jehova Witniska nani kangrigisanka kum wal asla aidrubisma, bara witin nani rilidian rait aihwa daukanka nani alki brih bangwi ba, man selp param kaikram sa (Jan 13:35). Bara ban kra, diara kum kau tara daukaia ta krikram ba sika, Jehova Gâd wal pamnika baku lamara kaia.

3. a) Jisas ai disaipelka nani ra dia adarka yaban? b)Kristian nani ra nahki tahbi daukisa ki?

³ Gâd dukya daukaia lukisma ba nahki marikuma ki? Ai nina blablikra nani ra, Jisas mita nan win: “Man nani nisan sut uplika nani ra was, bara yang disaipelki nani dauki bangws; tahbi dauki bangws” (Matyu 28:19). Jisas ba tanka painkira kum mangkan, kan witin pali kat sin aihtabi takan. Sakuna Jisas lal ba purara li laiki buskras kan (Matyu 3:16). “Tahbi daukaia” wi ba sika, Grîk bila kum “rungkaia” tanka bri ba dukyara aisisa. Baha mita, upla kum ra tahbi daukisa taim, ai wîna aiska li bilara rungki dingkisa.

4. Upla kum aihtabi taki taim dia marikisa ki?

⁴ Ya ya Jehova panika takaia want ba, aihtabi takaia sa. Upla kum aihtabi taki taim, ai kupia lilia ni Jehova dukya dauki ba param marikisa (Lawana 40:7, 8). Sakuna, aihtabi takras kainara, diara kum kum aitani pitka kat daukaia sa.

5. a) Aihtabi takras kainara dia ba pas daukaia sma ki? b)Dia muni asla aidrubanka nani ra waia nit sma ki?

⁵ Man diara pas daukaia kapram ba pat daukisma. Dia dukya ki? Man Baibil stadi takisi, Jehova Gâd bara Jisas Kraist tanka dukyara lan takisma (Jan 17:3). Sakuna kau lan takaia sip sma. Kristian nani ba, Gâd “kupia laka” tanka ba briaia want sa (Kolosi 1:9). Brima dukyara, Jehova Witniska asla aidrubanka nani ba, kasak tam baikaisa. Baha mita asla aidrubanka nani dakpara (Hibru nani 10:24, 25). Asla aidrubanka nani ra pat pat wisma kaka, Gâd tanka kasak ba kau brima.

6. Aihtabi takma dukyara, dia pitka kat Baibil tanka ba bri kaia sma ki?

⁶ Aihtabi takaia dukyara, Baibil ul amya ra dingkaia lika nit apia sma. Sakuna, Itiupia wihtka tara ba diara kum kum dukyara ai tanka bri kan, ban sakuna amya tikpara witin Baibil tanka wala nani briaia dukyara helpka nit kan (Wark nani 8:30, 31). Man sin diara ailal kau lan takaia sma. Kan Gâd dukyara lan takaia ba tnata apu pali sa (Smasmalkra 3:11). Sakuna aihtabi takaia sma kaka, Baibil tanka ta nani ba pan lan taki alki bri kaia sma (Hibru nani 5:12). Naha tanka ra, pruan nani ba nahki bangwisa sapa, bara Gâd ai nina bara ai Kingka laka tanka ba dukyara sin lan kaia sma.

7. Baibil stadi taki auma taim, dia bri kaia sma ki?

⁷ Sakuna Baibil tanka bri kaia purkara diara wala kum bri kaia sma. Kan “upla kum kasak lukan laka apu kaka, witin ra Gâd mita sip pain kulkbia apia” (Hibru nani 11:6). Baibil sturka kum bila, patitara “Korint uplika nani ailal pali sin Dawan sturka walan, bara kasak lukan ba sut tahbi daukan” wisa (Wark nani 18:8). Man sin baku daukma bila kaikisa. Stadi taki auma taim, Dawan Bila ba Baibil ra sa kasak luki kama. Baku sin, Gâd pramiska nani  aimakai ba dukyara, bara Jisas sakripaiskakku swaki mai sakaia sip ba dukyara sin kasak lukma (Jasua 23:14; Wark nani 4:12; 2 Timoti 3:16, 17).

8. Dia mita lan takram ba upla ra wiaia mai tukbaisa ki?

⁸ Kasakkam lukan laka ba kau tara taki auya bara, kau pali bilam sip prakras mai munbia (Jirimaia 20:9). Gâd dukyara, bara ai lukanka ba dukyara sin aisaia ba, nahki kupiam mai tukbai ba kaikma sika (2 Korint 4:13).

9, 10. a) Taura, Baibil tanka dukyara yaura aisaia sip sma? b)Jehova Witniska nani aikuki smalkaia want sma kaka, dia daukaia sma ki?

⁹ Taura, man tamya nani, pamnika nani, lamam uplika nani, bara wark pamnika nani ra sin, Baibil tanka dukyara aman kaiki aisaia sip sma. Pyu lui bara, ban kra Jehova Witniska nani smalki warkka pain asla dauki ba ra aikuki wark takaia want kama. Baku kabia taim, Jehova Witniska Baibil stadika maiki ba wal latan aisas. Smalkaia dukyara aitani ridi sma lukisa kaka, diara sut ridi daukbia man nani wal ba, wihki kangrigisan almukka wal ba aikuki asla takma.

¹⁰ Baku bamna, Gâd syîpka sepadka kum kum nani wal, wibia sa kaka, kristian kangrigisan almukka kum kum nani wal kau pain kakaira takma (Wark nani 20:28; 1 Pita 5:2, 3). Baibil tanka sirpi nani pan kaikisma sapa, bara kasak lukisma sapa sin laki kaiki kabia. Baku sin, man Baibil lâka kat wapisma sapa, bara Jehova Witniska kum takaia want sma sapa sin aman laki kaiki kabia. Naha sut mapara aitani ridi sma kaka, kau tahbi daukras smalki tataukra kum takram ba maisampahkaisa.

11. Kangrigisan aikuki smalkras kainara, upla kum kum ba dia kra daukaia sa ki?

¹¹ Sakuna sip sa almuk nani ba rayakam kau wapni mangkma mai wibia. Ban kra man yukuwan ra diara kum pain apia ba daukisma kaka swiaia sma. Baha mita,  kau tahbi daukras smalki tataukra kum takaia makabras kainara, man rayakam ra rug laka ba, bla takaia ba, bara druga yus munaia saurka tara nani satka na wina luha kaia sma (1 Korint 6:9, 10; Galesha 5:19-21).

12. Dia muni wan kupia lakaia ba nit pali sa ki?

¹² Aihtabi takras kainara, dia wala daukaia sma ki? Apastil Pita win: “Kupiam laki mahka taus, bara mika [...] saurkam nani dikan kabia” (Wark nani 3:19, [LRW], 1986). Upla kum ai kupia laki taim, saurka daukan ba mita ai kupia kriwan ai dara walisa. Rayaka saura pali kum bri kan uplika ba ai kupia lakaia nit pali sa, sakuna rayaka klin kum bri kan uplika mapara sin ai kupia lakaia nit sa. Dia muni ki? Kan upla sut ba saura daukisa, bara yawan sut sin Gâd wan saurka swih tikbia nit sa (Rom 3:23; 5:12). Baibil stadi takras kainara, ani ba Gâd kupia laka kan sapa man nu apu kapram. Baha taka mita, ai kupia laka kat iwaia sip apia kapram, rait apia? Nanara lika kaikisma dia muni wan kupia lakaia ba nit pali sa?

13. Tauaia ba dia tanka sa ki?

¹³ Wan kupia lakisi mahka tauaia sa. Tauaia tanka ba sika, wapram yabalka ba wina tauaia. Wibia sa kaka, kupiam kriwan damra walisma, sakuna rayakam satka bri kapram ba sin swiaia sma. Naha pyua wina yamni man taukaia lukanka bri kaia sma. Aihtabi takras kainara, kupiam laki rayakam tauram kaia sma.

14. Aihtabi takras kainara dia wala kum daukaia sma ki?

¹⁴ Aihtabi takras kainara diara wala kum daukaia sma: Jehova Gâd ra rayakam ba yabaia.

15, 16. Jehova ra wan rayaka yabaia ba dia tanka sa ki, bara dia muni kupia wilinkira ni yabisa?

¹⁵ Rayakam yabaia tanka ba sika, man saitra selp puram  sunra kum bak, Jehova ra pramis munisma rayakam aiska ba witin kupia laka daukaia dukyara yabisma (Kli smalkan 6:15). Sakuna, dia muni upla kum baha sat pramiska daukaia want kabia ki? Luki kais: Waitna kum ra mairin kum laik sa, bara mairka ra wisa witin wal kau kakaira takaia want sa. Mairka satka pain bri ba kakaira taki taim, kau laik takisa. Rait latwan kaikisa kaka, witin wal marit takbia wibia. Wel au; witin marit takbia taim wihra twilkanka kau tara kum bribia. Sakuna mairka ra latwan tara bri ba mita, wilinkira daukbia.

¹⁶ Jehova ra kakaira taki latwan kaiki taim, wan kupia aiska ni ai dukya daukaia wilin bangwisa. Ya ya Gâd Luhpia, Jisas Kraist ba nina blikaia want ba, ‘ai wîna ba kulkras kaia sa’ (Mark 8:34). Wan wîna kulkras kaia tanka ba sika, wan brinka bara lukanka nani ba yarka Gâd bila walaia wan takasbiara. Baku bamna, aihtabi takras kainara, Gâd kupia laka daukaia ba sinskam ra pas pliska bri kaia sa (1 Pita 4:2).

17. Dia muni upla kum kum ba ai rayaka Gâd ra yabras?

¹⁷ Upla ailal ba Gâd kupia laka daukaia dukyara ai rayaka yabras, kan ai mina pruki kauhwaia sibrinka brisa. Wala nani sin, Gâd mawanra ai tanka saki aisabia dukyara ta iwisa. Apia kaka, mistik tara kum dauki Jehova kupia insauhkbia sia mita ai rayaka yabras kaia ba bitar sa lukisa.

18. Dia mita Jehova ra rayakam yabaia ba tam baikaisa ki?

¹⁸ Jehova ra lamtwanka ba kau tara taki ba mita, witin ra rayakam yabaia ba, bara ai kupia laka kat iwaia trai munaia sin tam baiki kabia (Smasmalkra 5:4). Bara rayakam yabuma ningkara, “Dawan uplika [kum] baku tankam pain bri [...], pyua bani witin pain kaiki dukya nani baman sin dauki kama” (Kolosi 1:10). Gâd ra latwan kaikisma ba tawan, ai kupia laka daukaia ba karna kaikras kama.  Apastil Jan ulban ba wal man au takma kaia sa, witin naku win: “Gâd ra latwan kaikaia ba lika ai lâka bila nani sin wali daukaia sa; bara ai lâka bila nani ba mita wihra wan taibras sa” (1 Jan 5:3).

19. Dia muni Gâd ra rayakam yabaia ba dukyara sibrin apu kaia sma ki?

¹⁹ Gâd mita makabras ai rayaka yabi uplika ba mistik luha kabia. Jehova ba wan swapnika kaikisa, bara yawan sip daukras dukya kumi sin witin wan makabras (Lawana 103:14). Witin tam baiki kabia, kan rayakam ra yamni man brima want sa (Aiseya 41:10). Kupiam aiskakira ni witin ra kasak lukma kaka, ‘yabal wapni bak mai brih wabia’ (Sins laka 3:5, 6).

20. Jehova ra rayakam yabram ningkara, dia muni baha daukram ba upla wala sin nu takaia sa ki?

²⁰ Laki kaikan ba ra luki, ban kra nanara lika saitra selp puram suni Jehova ra rayakam yabaia lukma. Ban sakuna, Gâd ra rait latwan kaiki uplika nani sut ba, kau diara kum daukaia sa: “[Wan] bila ni Jisas Kraist ba kakaira sa tanka ba param ais[aia sa]” (Rom 10:10). Naha ba nahki daukisa ki?

21, 22. Nahki kasakkam lukan laka brisma “tanka ba param aisi[sma]” ki?

²¹ Man aihtabi takaia want sma ba, kangrigisankam  almuk warkka ta bri ba ra wis. Witin mita almuk wala nani Baibil tanka dukyara makabi walanka kum kum ba man wal laki kaikbia daukaisa. Man aihtabi takma dukyara aitani ridi sma kaikbia kaka, asla aidrubanka tara kau baila ba ra, aihtabi takaia sip sma mai wibia. * Asla aidrubanka tara ra tahbi daukras kainara, aihtabi takaia tanka ba dahra aisanka kum yabisa. Aisanka na pat dan takuya taim, aisasara ba mita makabi walanka isi lupia wal daukisa, bara aihtabi takai uplika nani ba ai karma tara ni ansika yabisa. Naku dauki muni, kasak lukan laka bri “tanka ba param aisisa”.

²² Aihtabi takaia ba, upla sut mawanra man Gâd ra rayakam yabram ba, bara Jehova Witniska kum takram ba marikisa. Aihtabi takai uplika nani ra, ai wîna aiska li bilara rungki dingkisa, bara baku dauki ai rayaka Jehova ra yaban ba upla sut nu sa.

23. “Aisa ba nina ra, Luhpia ba nina ra, bara spirit hulikira ba nina ra sin” aihtabi takaia ba, dia tanka sa ki?

²³ Jisas bila ai nina blablikra nani ba naku tahbi daukbia win: “Tahbi dauki bangws, Aisa ba nina ra, Luhpia ba nina ra, bara spirit hulikira ba nina ra sin” (Matyu 28:19). Baha tanka ba sika, aihtabi takai uplika ba Jehova Gâd ra, bara Jisas Kraist ra sin karnika bri ba mita kulkanka tara yabisa (Lawana 83:18, Miskitu Salmo Lawana nani, 1960; Matyu 28:18). Baku sin Gâd ai spiritka hulikira, wibia sa kaka, ai kupia laka daukaia dukyara karnika yus muni ba ra sin kasak luki ba marikisa (Galesha 5:22, 23; 2 Pita 1:21).

24, 25. a) Aihtabi takaia ba dia tanka sa ki? b)Ani makabi walanka ansika ba pliki sakaia sa ki?

²⁴ Aihtabi takaia ba liura rungwi dimaia tanka baman  lika apia sa. Tukinka kum sa, wibia sa kaka, diara kum kulkanka tara bri ba tanka sa. Liura rungwi dimisma ba sika, man “pruram”, wibia sa kaka, rayakam satka bri kapram ba lulki swiram tanka sa. Bara li wina uli takisma minitka ra, Gâd kupia laka daukaia dukyara rayakam yabram ba tanka sa. Amya tikpara man rayakam ba Jehova ra yabram, upla kum ra, asla takanka kum ra, apia kaka wark kum ra lika yabras sma. Man rayakam yabi aihtabi takisi, Gâd wal pana painkira kum kaia ta krikisma (Lawana 25:14).

²⁵ Sakuna aihtabi takram ba swaki mai sakras. Apastil Pâl ba win: “Ban Dawan warkka taki bas, bauikira laka brih bara sibrinkira sin, swaki mai sakan laka briaia dukyara” (Pilipai 2:12). Aihtabi takaia ba, ta krikanka kum sa. Nanara lika makabi walanka kum takisa: Nahki muni Gâd wal asla ai latwanka laka ra ban bapi bui kaia sip sa ki? Saptika las ra ansika ba wankisa.