1, 2. Ani yukuwaika bara sa ki?

NAHA RA luki kais: Man kirhbi tauki kasbrika nani madiski siksa tihmu dingkisa. Bara isti ban wina imyula lipi, alwani kauhwi, bara mahka pasa tara ni li karna sin auhwi ta krikisa. Man isti plapi, anira yukuwaia sapa plikisma. Bara mika yabal un ra, yukuwaia pliska kum dutki, bara buswras kaikisma. Yukuwaia pliska kum sakram ba mita nahki lilia takisma!

² Naiwa pyua ra yawan taim saura pali ra iwisa, kan tasba saura na yu bani kau aisawi auya sa. Sakuna anira yukuwaia lika bara sa, bara yukuwaika ra ani dukya saura tara wan munaia sip ba wina wan kaina kahbisa. Ani yukuwaika sa luki? Baibil bila: “Naku wisa Dawan ra: ‘Man ba yang yukuwaiki sma, yukuwaiki watla tara, yang Gâdki, yaura kupi aiska kahbamni!’” (Lawana 91:2).

3. Nahki Jehova wan yukuwaika kaia sip sa ki?

³ Papaskra Karnika Sut Bri ba, —Jehova sika—, wan yukuwaika kaia sip sa. Nahki yamni painkira sa! Witin wan kaina pain  kahbaia sip sa, kan dia mapara kabia sin witin kau karnakira sa. Bara upla saura wan munbia kra sin, witin las kat wapni ra kli mangkaia sip sa. Nahki Jehova wan yukuwaika kaia sip sa ki? Witin ra kasak luki, kan Baibil ra naku wan paiwisa: “Gâd latwanka laka ra ban bas” (Judas 21). Au sika, wan Aisa painkira asla, ai latwanka laka ra bangwi kaia sa. Baku daukbia kaka lika, witin rait wan yukuwaika takbia. Sakuna nahki muni baha sat asla laka sakaia sip sa ki?

4, 5. Ani tnatka nanikku Gâd latwan wan kaiki ba marikisa ki?

⁴ Jehova latwanka laka ra kaia dukyara, witin nahki latwan wan kaiki ba aman luki kaia sa. Baibil tanka kum kum bukka na ra lan takram ba ra luki kais. Naha tanka ra, yawan iwbia dukyara Jehova tasba painkira na wankan. Bara tasbaia na plun satka auhni, li, tasba dukya nani, daiwan nani, bara iwaia pliska pranakira nani sin bangkisa. Baibil paskan ba bak, Gâd mita ai nina bara ai daukanka nani sin param wan marikisa. Baha sut purkara, ai Luhpia pali tasba ra blikan, bara yawan tnata mana prubia dukyara sin yaban (Jan 3:16). Bara baha prisantka painkira mita, wan kaina pyua pranakira kum bila kaikisa.

⁵ Gâd diara wala kum daukan ba mita sin, baha kaina pyua pranakira ba bila kaikisa. Jehova ba heven gabamintka kum, wibia sa kaka, Misaia Kingka laka ba pat bapi mangkan sa. Kingka laka na mita pât wauhwanka nani sut apu dauki tasba na paradais kum ra lakbia. Nahki painkira! Las kat upla sut ba lilia, bara kupia kumi laka ra iwi yakawbia! (Lawana 37:29.) Nawas pali sin, yawan baha yua bila kaiki bara, Gâd mita wan rayaka nahki brih wapaia ba lan wan daukisa. Prisantka wala sin wanki ba sika, wan pura sunaia. Pura sunra bakku yawan witin wal pri aisaia sip sa. Tnatka ailal nanikku Gâd mita man ra, bara upla sut ra latwan kaiki ba marikisa.

6. Gâd latwan mai kaiki ba tawan, pana dia daukaia sip sma ki?

 ⁶ Bara nanara diara kum pain luki kaia sma ba naha: “Gâd latwan ai kaiki ba tawan, yang pana dia daukamna ki?”. Ban kra, upla aihkika ba naku wibia: “Yang sin pana Jehova ra latwan kaiki kaia sna”. Man baku lukisma ki? Lâ kau tara ba dahra aisi, Jisas naku win: “Dawan Gâdkam ra latwan kaikma, kupiam aiskakira, solkam aiskakira [bara] sinskam aiskakira ni sin” (Matyu 22:37). Au sika, kupiam, solkam bara sinskam aiskakira ni Jehova ra latwan kaiki kaia ba aitani pali sa. Sakuna, latwan kaikisma wiaia baman aitani sa ki?

7. Gâd ra latwan kaikisma wiaia baman aitani sa ki? Ansikam tanka sin mariks.

⁷ Baibil bila, yawan Gâd ra latwan kaiki ba wiaia baman aitani apia sa wisa. Yawan Gâd ra latwan kaikisa lukaia ba pain sa, sakuna kau daukaia sa. Wan tanka kau pain briaia dukyara, kaisa diara wala kum wal praki kaikaia: Man dus ma kum makabisma, sakuna dusa ma ba saumukka lupia kum baman maikbia kaka, aitani lukma ki? Apia pali! Wel au, saumukka ba wina dus kum pawisa, bara dusa ba wina ma takisa. Sakuna man dusa ma ba lika want sma. Wel, Jehova ra latwan kaikisma wiaia ba sim baku takisa: Ma ba sakaia sa. Baibil bila: “Gâd ra latwan kaikaia ba lika ai lâka bila nani sin wali daukaia sa; bara ai lâka bila nani ba mita wihra wan taibras sa” (1 Jan 5:3). Gâd ra rait aihwa latwanka laka ba, ma yamni saki marikaia sa, wibia sa kaka, wan daukanka nani ni marikaia sa (Matyu 7:16-20).

8, 9. Gâd diara wanki ba mita yawan tingki luki ba nahki marikisa ki?

⁸ Yawan Gâd bila wali alki brih dauki taim witin ra rait latwan kaiki ba marikisa. Baha daukaia ba uba karna apia sa, kan ai lâka nani ba wan taibaia dukyara wankras, yawan lilia wan auyapah kat iwaia dukyara lika wankisa  (Aiseya 48:17, 18). Yawan ai lâka kat iwi taim, witin diara wanki ba mita tingkika yabisa. Uba sari pali sa, sakuna upla aihkika ba tingkikas bangwisa. Yu kum, Jisas bui waitna 10 lepar sikniska bri kan ba ra rakan, sakuna kumi baman Jisas ra taui bal tingkika yaban. Jisas pyua ra upla tingkikas bara kan ba baku, yawan tingkikas kaia want apia sa (Luk 17:12-17). Kumika tingki win ba baku kaia misar want sa, tingkikas 9 ba baku lika apia.

⁹ Baku bamna, ani Jehova lâka nani bila wali daukaia sa ki? Bukka na ra lâka kum kum pat laki kaikan sa. Sakuna kaisa kum kum kli laki kaikaia. Kan Gâd lâka bila wali daukaia ba, ai latwanka laka ra ban kaia help wan munisa.

10. Dia muni Jehova ra kakaira kaia tanka ba briaia nit pali sa?

¹⁰ Jehova tanka lan takaia ba, kau witin lamara wan brihwisa. Diara kumi sin yarka wan takasbiara. Naha ra luki kais: Tihmia sa, bara unta ra sma. Bara uba kauhla mai pruki ba mita pauta  muki lapta takisma. Pâta ba dasbia swima ki? Apia pali! Rait apia pâta ba karna aswi kabia wisi, kau pauta mangki kama? Kan baku baman man yamnikam brima. Pâta ba ban lapta ami kabia dukyara pauta mangkisma ba baku, Jehova ra ban latwan kaiki kaia dukyara, “Gâd ra kakaira kaia” tanka ba briaia nit pali sa (Sins laka 2:1-5).

11. Jisas ai disaipelka nani ra Ulbanka tanka saki win ba tawan dia takan ki?

¹¹ Jisas want kan ai nina blablikra nani ba, Jehova ra bara Baibil ra sin latwan laka tara bri kabia. Jisas pruan wina kli buan ningkara, Hibru Ulbanka tanka kum kum witin ra aimakan ba dukyara ai disaipelka wal ra win. Bara baha win ba tawan, dia takan luki? Tisku kan, disaipelka nani win: “[Rait] apia, wan kupia ba lapta taki kan, sin pauta baku, witin yabal ra wan aisi aula kan bara, Ulbanka nani tanka saki wan wi kan bara?” (Luk 24:32).

12, 13. a) Upla aihkika mapara, Gâd ra bara Baibil ra latwan laka bri ba wal dia takisa ki? b)Wan latwanka laka dasbia apia dukyara, dia daukaia sa ki?

¹² Baibil dia kasak smalki ba lan taki waram taim, rait apia lilia bara Gâd ra latwan laka tara ni kupiam sin lapta takan? Au sika! Upla ailal ra sin baku takan. Nanara warkkam ba sika naha: Latwanka laka na yarka ban lapta kau karna takbia. Naiwa pyua uplika satka kaia want apia bangwisna. Jisas kaina manas win: “Upla aihkika latwan kaikan laka ba kauhla takbia” (Matyu 24:12, Lâ Raya Wauhkataya [LRW], 1986). Jehova ra, bara Baibil tanka ra latwan kaikisma ba kauhla takbia apia dukyara, man dia daukaisma ki?

¹³ Jehova Gâd bara Jisas Kraist tanka ba dahra kau lan taki bas (Jan 17:3). Baibil aisi kaikuma taim naku luki selp mamkabi wals: “Jehova tanka dahra, tikska na ra dia lan takisna ki? Kupi, sinski bara solki aiskakira ni witin ra mayunaia dukyara kupi kau bukisa ki?” (1 Timoti 4:15). Baku aman luki kaiki kama kaka, Jehova ra latwan kaikisma ba dasbia apia.

14. Jehova ra wan latwanka laka dasbia apia dukyara, dia muni wan pura suni kaia nit sa ki?

 ¹⁴ Wan latwanka laka lapta bri kaia tnatka wala ba sika, pat pat wan pura suni kaia (1 Tesalonaika 5:17). Saptika 17 ra, pura sunra ba Gâd prisantka painkira kum sa lan takan. Kupia latan wan walkara pat pat aisi taim, kau witin lamara wan dara walisa. Sim baku, yawan Jehova ra pat pat wan pura sunbia kaka, witin lamara pali wan dara walbia. Sakuna sim dukya kli kli aisaia, apia kaka tayat baku wan pura sunaia lika want apia sa. Tuktan kum ai aisa latwankira ra aisi ba baku yawan sin Jehova ra aisaia sa. Yawan witin ra rispik tara marikaia sa, sakuna wan kupia aiska kwaki latan aisi (Lawana 62:8). Au sika! Gâd ra mayunaia dukyara, yawan selp Baibil ba laki kaiki wan pura sunaia nit pali sa. Baku baman Gâd latwanka laka ra kaia ba kau isi kaikbia.

15, 16. Dia muni smalki warkka ba diara kum kulkanka tara bri ba lukaia sa ki?

¹⁵ Selp Baibil laki kaikaia, bara pura sunaia ba, yawan Gâd ra yakan mayuni daukanka kum sa. Sakuna yawan dia luki ba dukyara aisaia ba lika, upla wala bakahnu mayuni daukanka sa. Baibil tanka ba dukyara upla ra pat wiram ki? Baku daukram sa kaka, diara tara kum daukram (Luk 1:74). Jehova tanka lan takan ba dukyara upla ra aisi taim, kristian rait aihwa nani ra wark tara kum yaban ba daukisa, wibia sa kaka, Gâd Kingka laka sturka yamni ba smalkaia (Matyu 24:14; 28:19, 20).

¹⁶ Apastil Pâl mita smalki warkka ba, diara kum kulkanka tara bri ba lukan (2 Korint 4:7). Au, warkka kau tara ba sika, Jehova tanka dukyara aisaia. Dia muni kau tara sa ki? Diara wal mita: 1) Kupia kau pain bri Dawanka warkka ba daukisa, bara 2) Warkka ba wina yamnika kau pain sakisa. Smalki tauki taim, upla kupia pain bri nani ba, wan Aisa lamara wabia, bara raya ban kaiara brihwi yabalka ra  wapbia dukyara ta baikisma. Wark kum kau pain daukaia bara sa ki? Baha purkara, Jehova bara Baibil dahra smalki taim, kasakkam lukan laka bara Gâd ra lamtwanka laka sin pakisma. Bara wark daukisma sut ba Jehova ai auya tikras sa (Hibru nani 6:10). Smalki warkka karna ban dauki kaia  ba, Gâd latwanka laka ra kaia help wan munisa (1 Korint 15:58).

17. Dia muni smalki warkka ba takaskras isti daukaia sa ki?

¹⁷ Naiwa pyua ra, Gâd Kingka laka sturka smalki warkka ba, takaskras isti daukaia sa. Baibil bila: “Sturi yamni ba [...] uya smalki bas” (2 Timoti 4:2). Dia muni wark kum takaskras isti uya dauki kaia sa ki? Kan Baibil ba nan wisa: “Dawan yua tara aula ba pat baila sa! Pat klutka sa, muni sin isti pali aula!” (Sepanaia 1:14). Baku sika! Jehova mita tasba ra iwanka saura sut dikaisa yua ba isti pali aula sa. Upla ra maisapahkaia sa! Nawas sika upla ba Jehova ra ai Kingka baku kulki bila walaia sa. Kan tnata pyua ba “kau takaski kabia” apia (Abakuk 2:3).

18. Dia muni kristian rait aihwa nani aikuki Jehova ra mayunaia sa ki?

¹⁸ Jehova want sa yawan ba kristian rait aihwa nani aikuki ai mayunra yabia. Naha laka ra Baibil bila: “Yawan pana pana wan walka nani ra help munaia trai kaikaia sa, latwan laka bri kaia bara diara yamni nani sin dauki kaia. Yawan asla aidrubi laka dauki ba swiaia apia sa, upla tila nani dauki ba baku. Baku daukaia watlika ra, yawan pana pana wan walka nani aikuki wan ta baikaia sa, bara kau pali nanara Dawan yua ba pat baila kan kaiki ba” (Hibru nani 10:24, 25). Wan muihni-lakri nani aikuki asla aidrubi taim, wan Aisa latwankira ra mayunaia sip sa. Baku sin pana pana wan ta baikisa.

19. Kangrigisan bilara latwan laka ba kau dutki kabia dukyara, yawan dia daukaia sip sa ki?

¹⁹ Yawan Jehova uplika ba wal asla aidrubi taim, kangrigisan bilara latwan laka, bara pana laka ba kau dutki kabia daukisa. Jehova wan daukanka yamni kaiki ba baku, yawan sin upla wala yamni dauki ba kaikaia sa. Kangrigisan muihni-lakri nani ba mistik luha kabia lika lukpara. Amya tikpara, yawan mistik takisa, bara kumi bani dia sip ba kat spirit laka ra pawisa (Kolosi 3:13). Jehova ra ai karnika aiskakira ni latwan kaiki uplika wal panika taks, bara spirit  laka ra nahki pawisma ba kaikma. Au sika! Kangrigisan muihni-lakri nani asla Jehova ra mayunma kaka, Gâd latwanka laka ra kaia kau isi kabia. Upla kum wapni kat mayuni Gâd latwanka laka ra ban sa kaka, Jehova mita dia blisin munbia ki? Kaisa kaikaia.

20, 21. “Raya kaia kasak ba” dia tanka sa ki, bara dia muni bri kaia ba pranakira sa?

²⁰ Upla wapni ra blisin munbia ba sika rayaka ba. Sakuna dia sat rayaka? Yawan pat raya sa wima kra, kan wan wînka puhbisa, diara disa, bara wan pata sin pisa. Bara amyapah kat damra walisma taim ban kra man bila: “Rayaki na rait pain si!”. Sakuna Baibil bila, sat kum ra naiwa pyua ra upla kumi sin rait pali raya apia sa wisa.

²¹ Baibil ra wan tukbisa “raya [...] kasakkira ba win takaia”, wibia sa kaka, Lâ Raya Wauhkataya ulbanka ra wi ba kat, “raya kaia kasak ba prak alkbia” (1 Timoti 6:19, [LRW], 1986). “Raya kaia kasak ba” sika, rayaka satka kum wan kaina pyua ra briaia bila kaiki ba tanka sa. Yawan saurka luha kabia pyua ra, tanka aiskara raya kabia, kan Gâd blasi pyua ra want kan ba kat wan rayaka bribia. Yu kum paradais ra, wan kupia kumi, lilia laka bara wan wîna tara yamnika siknis luha kabia pyua ra lika, yawan las kat “raya kaia kasak ba”, wibia sa kaka, raya ban kaia laka ba prak alki bribia (1 Timoti 6:12). Rait apia bila kaikanka na pranakira sa?

22. Nahki muni man “raya kaia kasak ba” brima ki?

²² Nahki muni upla kum ba “raya kaia kasak ba” briaia sip sa ki? Naha rayaka briaia tanka aisaras kainara, apastil Pâl bila kristian nani ba “diara pain ba daukbia, bara wark yamni nani mapara yuyakira taki kabia” wisa (1 Timoti 6:18). Bara Baibil ra dia lan taki ba wan rayaka ra alki brih daukbia kaka lika baku takbia. Bara mika, yawan diara yamni dauki ba mana, Gâd mita “raya kaia kasak ba” taiban laka ra wankaia sa ki? Apia pali! Kan bila  kaikanka pranakira na “Gâd kupia yamni laka ba” mita sa (Rom 5:15, [LRW], 1986). Ban sakuna, Jehova brinka sa wapni kat witin dukya dauki nani ra blisin munaia. Witin man “raya kaia kasak ba” brima want sa. Baha rayaka ba kupia kumi, liliakira, bara ban kaia laka ra kabia. Ya ya Gâd latwanka laka ra bangwi ba, baha sat rayaka bribia.

23. Dia muni Gâd latwanka laka ra ban kaia ba aitani nit pali sa ki?

²³ Yawan kumi bani selp wan makabi walaia sa: “Baibil dia wi ba kat yang Gâd ra mayunisna ki?”. Yawan yu bani au kum wiaia sip sa kaka, yabal pain ku auya si. Jehova ra wan yukuwaika baku kulkaia sip sa. Naha tasba daukanka saura tnata yua nani ra witin ai uplika kaina kahbia. Baha purkara sin, tasba raya pranakira kum pat baila ba wankaisa. Nahki painkira kabia! Bara las yua nani na ra yawan diara wapni daukaia lukanka brin ba mita nahki lilia kabia! Man nawas diara wapni daukaia lukanka brisma ba dutki alki dauks. Baku daukma kaka, Jehova Gâd blasi pyua wina yawan dukyara dia want kan ba brima. Au sika! “Raya kaia kasak ba” ban kaiara brima.