LÂ DAUKAIA yua ba nahki kabia lukisma? Upla ailal lukisa baha yua ra solka milian milian Gâd iwaika mawanra buisi kumi kumira ai lâka daukan kabia. Baku sin lukisa, solka kum kum heven ra lilia iwaia mana bribia, sakuna wala nani hel pauta ra wabia. Sakuna, Baibil ba lika, sat wala smalkisa. Baibil bila Lâ Daukaia Yua ba, bila kaikanka briaia, bara diara sut kli wapni ra paskaia pyua kum kabia.

Param marikan [Reveleshan] 20:11, 12 ra, apastil Jan bila Lâ Daukaia Yua ba naku kabia wisa: “Yang king iwaika pihni kum kaikri, baha purara iwi kan ba sin. Ai mawan wina tasba bara kasbrika pura ba aiska lap tiwan, bara baha nani pliska kumi sin sip kaikras kan. Bara pruan nani ba kaikri, tara nani bara sirpi nani, Gâd mawanra ai mina ra bui kan. Wauhkataya nani ba kwakan kan, bara wauhkataya wala sin kum, baha sika raya kaia wauhkataya ba. Pruan nani ba dia dauki kan ba kat lâka daukan kata, dia baha wauhkataya nani ra ulban ba kat”. King iwaika purara iwi ba ya sa ki?

Jehova Gâd ba, tasba uplika Lâ Dadaukra Tara sika. Sakuna, lâ daukaia warkka ba upla wala mihta ra mangkan sa.  Wark nani 17:31 ra, apastil Pâl bila “Gâd yu kumi mangkan sa, naha tasba aiska na lâka wapni kat daukaia, waitna kumi witin bak sakan ba mita”. Baha Lâ Dadaukra ba, prura wina bukan Jisas Kraist ba sika (Jan 5:22). Baku bara, Lâ Daukaia Yua ba ahkia ta krikbia ki, bara nahki wihka ra wabia?

Param marikan ulbanka bila, Harmagedon warka ba dan takisi Lâ Daukaia Yua ba ta krikbia wisa. Baha warka ra Setan uplika tasba ra ba sauhki tikan kabia (Param marikan 16:14, 16; 19:19–20:3). * Bara Harmagedon ningkara, Setan ai lasika nani wal tihu tara kum ra lulki mani 1.000 priski bri kabia. Baha pyua bilkara, 144.000 Jisas wal heven ra kabia nani ba, upla ra lâ dauki “Kraist wal mani 1.000 king aimak[bia]” (Param marikan 14:1-3; 20:1-4; Rom 8:17). Kaiki ba baku, Lâ Daukaia Yua ba sika, pyu kunhku kum 24 awar prais tanka apia sa. Mani 1.000 prais lika tanka sa.

Baha mani 1.000 bilkara, Jisas mita “pruan nani bara raya nani lâka dauk[bia]” (2 Timoti 4:1). “Raya nani” tanka ba sika, baha “kwara tara” Harmagedon warka wina raya lubia nani ba tanka sa (Param marikan 7:9-17, Lâ Raya Wauhkataya, 1986). Apastil Jan ba mita sin “pruan nani [...] Gâd mawanra ai mina ra bui kan” kaikan. Bamna Jisas pramis munan ba baku “pruan nani sut [Kraist] bila baikra wali, raiti wina buan kabia”(Jan 5:28, 29; Wark nani 24:15). Sakuna, naha uplika sut dia daukan ba tawan lâ ra dingkbia ki?

Wel, Jan yaprisauhkanku kaikan ba kat, “wauhkataya nani ba kwakan kan” bara “pruan nani ba, dia dauki kan ba kat lâka daukan kata, dia baha wauhkataya nani ra ulban ba kat” wisa. Upla ba, pyu luan ra dia daukan ba wauhkataya nani na ra ulban sa ki? Apia pali! Pruras kainara dia daukan ba tawan lâ sip daukras. Yawan nahki nu sa ki? Kan Baibil bila “ya pat pruan sa kaka, witin lika saurka laka ba wina pri sa” (Rom 6:7). Buan kabia nani ba mapara, tras bri kan ba wina ai kainara yabal param kabia. Baku kaka, baha wauhkataya nani kwakbia ba, Gâd bui lâ raya nani yabia ba tanka kaia sa. Ban kaiara iwbia sa kaka, buan kabia nani ba, wihki Harmagedon raya lubia nani ba sin, Gâd lâka nani bila walaia sa. Naha lâka nani tilara, Jehova bui  ani lâka raya nani mani 1.000 bilara param saki marikbia ba sin bara kabia. Baku bamna, upla bani ba, Lâ Daukaia Yua bilkara dia daukbia ba tawan, lâ ra dingkan kabia.

Lâ Daukaia Yua ra, upla milian milian Gâd kupia laka ba lan takaia, bara daukaia ba dukyara sin ai sanska pas bribia. Baha taka mita, smalki lan daukaia warkka tara kum bara kabia. Au sika! “[Gâd] bui tasba lâka dauk[bia] taim, upla ba lan takbia kasakka laka ba dia sa.” (Aiseya 26:9, Miskitu Testament Almuk, 1990.) Sakuna, upla sut Gâd kupia laka daukaia wilin kabia apia. Aiseya 26:10 bila: “Watauikira nani ra, kupiam pihni laka ba marikisma, sakuna kasakka laka ba sip lan takbia apia; wapni iwi nani tasbaia ra saurka laka daukisa, bara Dawan prana ba kat kaikbia apia”. Upla saura na, Lâ Daukaia Yua bilkara ban kaiara ban kaiara sauhki tikan kabia (Aiseya 65:20).

Lâ Daukaia Yua ba tnata aimakbia taim, upla kau raya kabia nani ba, rait ‘raya takbia’. Kan las kat saurka luha uplika kabia (Param marikan 20:5). Baku bamna, Lâ Daukaia Yua bilkara tasba uplika ba, blasi saurka luha rayaka ba kli bribia (1 Korint 15:24-28). Bara lika, las traika kaikanka kum buan kabia. Baha ba dukyara, Setan ra pri saki, aima las upla ra kunin munaia trai kaikbia swibia (Param marikan 20:3, 7-10). Setan mapara bapi bui kabia uplika ba lika, pramiska na witin nani rayaka ra kasak aimakaisa: “Kasakkira nani ba lika tasbaia ba brih iwbia, ban kaiara sin baha tasbaia ra iwi kabia” (Lawana 37:29). Kasak sika! Upla wapni ba dukyara, Lâ Daukaia Yua ba, yamni lilia kabia.