PLIS AILAL ra liliaka yua nani gabamint ba mita, apia kaka rilidian uplika ba mita dauki ba, Baibil ba wina bal takras. Baku bara, ani wina bal takan sa ki? Bibliuteka kum ra buk sat sat bara ba aman laki kaikma kaka, liliaka yua nani man iwisma tanira kulki ba dukyara diara nu apu kapram ba sakma. Buk nani ra liliaka kum kum dahra aisi ba kaisa kaikaia.

Gud Praidi. Jisas pruan bara kli buan ba kupia kraukaia wisi, idan daukanka ailal Gud Praidi ra yus munisa. Tila wina kum ba sika, aidul nani ra upla ba ai pahpaya purara buki twilki tauki ba. Naha tanka ra, Las Grandes Religiones Ilustradas bukka bila, Kraist kau balras kanra, Babilun uplika ba mita “ai aidulka  hulikira kulkan nani ra uba snihki kan [...]. Aidulka nani wîna daukra paskan ra, prak painkira ni pura prakan, bara aidulka nani nana ra mihta ra sin lilura bara matadinka ni skahkan. Krikri painkira paski aidulka nani baha ra sunisi, krikrika ai pahpaya purara buki twilki tauki kan”.

Mani Raya Yua. Mani Raya Yua ba kulkaia wisi kuntri banira diara sat sat daukisa. Mani Raya Yua kulkaia ba, ani wina bal takan ki? Buk kum bila: “Wihta Julio César ba mita, Siakwa [enero] katka yua 1 ba, Mani Raya Yua ba baku kulkbia ba bapi mangkan. Baha ba, Kraist tasba ra kau balras mani 46 kanra lamara daukan. Baha Mani Raya Yua ba, Rom uplika ba mita ai gâdka Jano maki kan ba mayunaia dukyara yaban. Idan gâdka Jano ba, dur nani bara diara ta krikaia gâdka kan, bara mawan wal bri yaba —mawan kum taura kaiki, bara wala ba nina ra kaiki— ni paskan. Siakwa [enero, latín bila ra Januarius] katka nina maki ba, baha gâdka Jano ba mita brin” (The World Book Encyclopedia). Baku bamna, Mani Raya Yua kulki yaba, idan liliaka kum daukan ba wina bal takan sa.

Pruan nani Yua. “Baha yua ra diara kum kum upla dauki ba, kristian nani kau bal takras kaina wina pat dauki kan. Naha yua kulki ba, patitara Druidas [blasi Celtas idan prîstka nani] ba wina bal takan. Blasi Celtas uplika ai gâdka nani ba tila wina, gâd wal ra —gâd Lapta ba, bara Pruan nani gâdka ba— mayunaia dukyara liliaka nani kau pali dauki kan [...]. Pruan nani gâdka ba dukyara liliaka ba lika, Yahbra [noviembre] katka yua 1 ra daukan. Bara baha yua ra, Celta uplika ba tilara Mani Raya ba ta krikan. Bara tawa tawa, prahki nani tnata mana liliaka kulkan ba, kristian liliaka nani ra aiblakwi dimi wan.” (The Encyclopedia Americana.)

Liliaka Yua Wala nani. Tasba aiskara liliaka yua nani sut kulki ba dahra sip aisaras. Ban sakuna, ani liliaka yua upla kum ra, apia kaka asla takanka kum ra kulkaia wisi dauki ba, Jehova mapara saura sa (Jirimaia 17:5-7; Wark nani 10:25, 26). Jehova mapara liliaka yua kum ba pain, apia kaka saura sapa nu takaia sa kaka, liliaka yua ba ani wina bal takan ba aman pali laki kaikaia sa (Aiseya 52:11; Param marikan [Reveleshan] 18:4). Naha bukka saptika 16 ra Baibil lâka kum kum tanka mariki ba mita, liliaka yua sat wala kulkaia ba Jehova nahki kaiki ba nu takaia dukyara tam baikaisa.