1. Pamali ba dia daukbia kaka lika liliaka laka sakaia sip sa ki?

JEHOVA GÂD mita, pamali nani sut lilia kabia want sa. Baha mita Baibil ra, pamali bilara kumi bani ba dukyara smalkanka yamni, bara dia daukbia want ba sin wan wisa. Witin dia wi ba kat alki brih daukisa taim, yamni man takisa. Jisas win ba baku: “Yamni pali sa baha uplika nani Gâd bila wali, ba kat dauki nani ba!” (Luk 11:28).

2. Pamali lilia kum yawan briaia sa kaka, dia dukyara wan tanka pain briaia sa ki?

² Pamali lilia kum yawan briaia sa kaka, diara kum wan tanka pain briaia sa: Jehova mita pamali nani sut ba paskan. Jisas mita sin, witin ra “Yawan Aisa” makan (Matyu 6:9). Baku sika! Wan Aisa painkira tingki, tasba pamalika nani sut ba bal takan sa. Bara baha mita pamali kum, nahki lilia kaia ba, Gâd lika pain nu sa (Epesus 3:14, 15). Bahamna, Baibil wi ba kat, Gâd dia want sa ki pamali bilara kumi bani ba daukbia?

3. Pamali ba nahki bal takan ba dukyara Baibil ra dia wisa ki, bara baha ba rait sa sapa yawan nahki nu takaia sip sa?

³ Jehova mita pas waitna bara pas mairin —Adam Iv wal—, paski marit sin sakan. Bara witin nani iwbia dukyara  paradais pranakira kum —Eden gadinka ba— yaban. Bara luhpa sin bribia win. Gâd bila: “Man nani luhpa ailal ailal sahwi, bara tasba ba bangki dauks” (Blasi sturka 1:26-28; 2:18, 21-24). Sturka na kisi kum lika apia sa. Jisas mita Blasi sturka ulbanka ra dia wi ba, rait takan sturka kum baku smalkan (Matyu 19:4, 5). Ban sakuna, naiwa pyua ra yawan trabil ailal wauhwisa, bara Gâd mita dia want kan ba kat lika apia sa. Sakuna baku kabia sin, kaisa pamali liliaka laka ba nahki sakaia sip sa sapa kaikaia.

4. a) Wan pamalika lilia kabia dukyara, yawan kumi bani nahki wira wira trai munaia sip sa? b)Pamali nani ba lilia kaia kaka, dia muni Jisas rayaka ba aman laki kaikaia sa ki?

⁴ Wan pamalika lilia kabia dukyara, yawan sut wira wira trai munaia sa. Bara Gâd latwan laka mariki ba baku yawan sin marikaia sa (Epesus 5:1, 2). Sakuna Gâd ra sip kaikras kaka, nahki muni witin baku daukbia ki? Yawan witin ra kaikras pali kabia sin, ai Luhpia tawahkia tasba ra blikan bak, Gâd tanka ba lan takaia sip sa (Jan 1:14, 18). Naha Luhpia, —Jisas Kraist ba—, ai Aisa daukan ba kat, sim baku daukan. Baha mita, Jisas ra kaiki walaia ba, Jehova ra kaiki walaia baku sa (Jan 14:9). Au, yawan kumi bani Jisas latwan laka marikan ba kaiki, sim baku daukbia sa kaka, wan pamalika lilia kabia dukyara wira ta baikaia sip sa.

5, 6. a) Jisas kangrigisan ra nahki kaikan ba mita, maîa waitna nani ra dia marikan? b)Gâd wan saurka ban swih tikbia dukyara, yawan dia daukaia sa ki?

⁵ Baibil bila Jisas ai disaipelka nani ra kaikan ba baku, waitna ba ai mairka ra kaikaia sa wisa. Baibil lâka na kais: “Maîa waitna nani, maîam mairin ra latwan kaiki kaia sma, sin Kraist mita serts ra latwan kaiki baha pura mata ai rayaka pât mihta ra mangkan ba baku [...]. Bamna maîa waitna ai maîa mairin ra baku latwan kaikaia sa, sin ai wîna latwan kaiki ba baku. Ya ai maîa mairin ra latwan kaikisa kaka, witin ai wîna latwan kaikisa. Bamna upla kumi sin apu sa witin ai wîna ra misbara kaiki ba, sakuna witin plun dakakisa bara  main sin kaikisa; [...] Kraist mita serts ra dauki baku” (Epesus 5:23, 25-29).

⁶ Jisas mita ai disaipelka nani ra latwan laka marikan ba, maîa waitna nani mapara tanka painkira kum sa. Disaipelka nani ba mistik daukan sakuna, Jisas ai rayaka yabi witin nani ra “ban latwan kaikan” (Jan 13:1; 15:13). Baha mita, marit waitna nani ra nan makabisa: “Maîam mairin ra latwan kaiki bas, bara witin nani mapara lâ karna mangkpara” (Kolosi 3:19). Sakuna maîa mairin ba aitani kat daukras kaka, maîa waitna ba naha alki brih daukaia wisi, dia mita help munaia sip sa ki? Witin sin mistik taki ba ai auya tikaia apia sa. Bara Gâd witin ra padin munbia dukyara diara kum lika pas daukaia sa. Dia dukya? Witin mapara saura dauki uplika nani ra ban swih tikaia sa. Bara baha nani tilara ai maîa mairin ba sin diman sa. Bara maîa mairin ba sim baku daukaia sa ki? Misar! (Matyu 6:12, 14, 15.) Baha mita sturi kum bila, marit laka lilia kum ba, padin muni lan uplika wal ni paskan sa wisa.

7. Jisas diaura aman lukan, bara maîa waitna nani ra baha ba dia marikisa ki?

⁷ Jisas ai disaipelka nani mapara kupia karna apia kan ba, maîa waitna nani ba aman luki kaikaia sa. Ai disaipelka nani swapnika, bara wîna tara nitka nani ra sin lukan. Yu kum, witin nani dan dring swapan kan taim, Jisas mita win: “Kaisa yawan plis kum tnayara taki wiria wînka puhbaia” (Mark 6:30-32). Maîa mairin ra, sim baku main kaikaia sa. Baibil bila mairin ba “kau swapni” sa, bara maîa waitna mita “kulkanka” yabaia sa wisa. Dia muni? Kan wal sut ra “pramis daukan rayaka yabaia” (1 Pita 3:7). Maîa waitna nani ba diara kum ai auya tikaia apia sa. Dia dukya? Yawan waitna mairin sapa, Gâd ai kupia lukras. Upla wapni bangwisna kaka lika lukisa (Lawana 101:6).

8. a) Dia muni waitna kum “ai maîa mairin ra latwan kaikisa kaka, witin ai wîna [ra sin] latwan kaikisa”? b)Maîa waitna maîa mairin wal “ai wîna kumi takan” ba dia tanka sa ki?

⁸ Baibil bila ani waitnika “ai maîa mairin ra latwan  kaikisa kaka, witin ai wîna latwan kaikisa”. Kan Jisas win ba kat, “yakan apia sa, sakuna wal ai wîna kumi takan sa” (Matyu 19:6). Baha mita, maîra nani ba, ai maîa wal baman prawaia sa (Sins laka 5:15-21; Hibru nani 13:4). Bara baha ba dukyara, kumi bani ba ai maîa nitka nani ra kau lukaia sa ai nitka nani ba wal (1 Korint 7:3-5). Ulbanka na sin aihka painkira sa: “Upla kumi sin apu sa witin ai wîna ra misbara kaiki ba, sakuna [...] plun dakakisa bara main sin kaikisa”. Maîa waitna ba ai wîna ra latwan kaiki ba baku, ai maîa mairin ra sin latwan kaikaia sa. Bara ai lalka, —Jisas ba— mawanra, ai tanka saki aisabia ba ai auya sin tikaia apia sa (Epesus 5:29; 1 Korint 11:3).

9. Pilipai 1:8 ra ani Jisas ai daukanka painkira marikisa ki, bara dia muni maîa waitna nani sin dauki marikaia sa?

⁹ Apastil Pâl ba “Jisas Kraist latwanka laka swapnikira” dukyara aisan (Pilipai 1:8). Jisas latwanka ba mita upla ba pain ai dara walan. Ai disaipelka mairin nani mapara Jisas ai daukanka ba uba yamni kan (Jan 20:1, 11-13, 16). Baku sin, marit mairin ba ai maîa waitna mita latwan laka marikbia nitka brisa.

10. Jisas mita maîa mairin nani ra dia tanka pain mangkan sa ki?

¹⁰ Upla nani asla taki taim, ya ta bribia kum nit sa. Bara pamali bilara sim baku takisa. Jisas pali ba kat sin ai lalka kum brisa, bara baha lalka mina munuhtara sa. “Kraist lal[ka] ba Gâd sika”, bara sim baku “mairin lal[ka] ba ai maîa waitna” sa (1 Korint 11:3). Jisas ba ban ai lalka —Gâd ba— mina munuhtara sa. Bara baku lika tanka pain kum wan marikisa, kan yawan sut ba lalka kum brisa, bara mina munuhtara kaia sa.

11. Maîa mairin ba ai maîa waitna ra nahki kulkaia sa ki, bara baku kulki ba wina dia takaia sip sa?

¹¹ Maîa waitna nani ba kasakkira apia ba mita, sam taim mistik taki aitani pitka kat pamali lalka takras sa. Baku taim, maîa mairin ba dia daukaia sa ki? Ai maîa waitna dahra saura aisaia apia, bara pamali lalka takaia trai kaikaia sin apia sa.  Ai auya tikbiara Gâd mita spirit praut apu, sapkira kum ba yamni pali kaikisa (1 Pita 3:4). Baha lukanka bribia sa kaka, pât tilara kabia sin, ai maîa waitna mina munuhtara kaia ba kau isi kabia. Baha purkara sin Baibil bila: “Maîa mairin ba ai maîa waitna ra kulkaia sa” (Epesus 5:33). Sakuna maîa waitna mita Kraist ra ai lalka baku kulkras sa kaka? Baibil ba marit mairin nani ra naku daukbia wisa: “Maîam waitna nani ra baui bas, bara baku mika witin nani tila wina kum kum kra, Gâd bila bara kasak lukras kaka, ai maîa mairin nani tanka pain ba mita, witin nani kupia alkan kabia. Man nani ba bila kum pan aisaia sin apia sma, kan witin nani kaikbia man nani wataukankam ba sunu kulkanka laka ba wal” (1 Pita 3:1, 2).

12. Dia muni, maîa mairin ba kulkanka bri ai lukanka aisabia ba saura apia sa ki?

¹² Sam taim, mairin ba ai maîa waitna lalukra apia, —apia kaka lalukra kabia sin—, lukanka wal kumi apia sa. Sakuna aman luki bauikira aisabia kaka, kulkanka mariki kabia. Ban kra mairka lukanka ba aitani sa, bara waitnika mita bila walbia sa kaka, pamalika ra yamni man takbia. Baibil sturka kum bila, yu kum Sara ai maîa Ebraham ra ai pamalika bilara trabil kum nahki wapnika mangkaia ba win. Ebraham mapara Sara lukanka ba pain apia kan, sakuna Gâd mita ‘Sara dia win ba kat daukbia’ win (Blasi sturka 21:9-12). Ban sakuna, maîa waitna ba dia daukaia luki brin ba Gâd lâka mapara apia sa kaka, maîa mairin ba bauikira wali, waitnika dia daukaia luki ba ta baikisa (Wark nani 5:29; Epesus 5:24).

13. a) Taitus 2:4, 5 ra marit mairin nani ra dia daukbia ta baikisa ki? b)Dakwi bara diburs takaia ba dukyara ani ba Baibil lâka sa ki?

¹³ Pamali ba pain kabia dukyara, maîa mairin warkka dauki ba nit pali sa. Naha dukyara Baibil ba mairin nani ra wisa: “Ai maîa nani ra bara ai luhpia nani ra sin latwan kaikaia; ai sinska yamni bri kaia, sunu kaia, ai watla warkka nani pain dauki kaia, yamnikira nani kaia, [bara] ai maîa waitna nani bila wali dauki kaia” (Taitus 2:4, 5). Maîa mairin bara yapti  warkka dauki taim, ai pamalika kupia alkisa, bara kulkanka sin brisa (Sins laka 31:10, 28). Ban sakuna, maritka laka ba upla mistik tatakra ni paskan sa. Baha taka mita, trabil uba aihka saurakira pali bri taim, ban kra dakwi, apia kaka diburs takisa. Trabil kum kum mapara Gâd Bila ba dakwi takaia sip sa wisa. Sakuna pulaia dukya apia sa, kan Baibil bila: “Maîa mairin ba ai maîa waitna swiaia apia sa. [...] Bara baku sin, maîa waitna ba ai maîa mairin ra swiaia apia sa” (1 Korint 7:10, 11). Baibil lâka kat maîa kum ba rug takan kaka baman, wala ba diburs takaia sip sa (Matyu 19:9).

14. Jisas ba tuktan nani ra nahki kaikan ki, bara aisa-yapti ba mihta wina tuktan nani ba dia nit sa?

¹⁴ Aisa-yapti bui ai luhpia nani ra nahki kaikaia ba dukyara, Jisas tanka painkira kum yaban. Upla wala nani mita, tuktan nani Jisas lamara wabia swiras kan taim, Jisas mita win: “Swis tuktan nani ba yang ra balbia, witin nani [ra] takaspara”. Bara ningkara Baibil bila, witin “tuktan nani ba ai klahkla ra buki, ai mihta nani purara kahbi, yamni munan” wisa (Mark 10:13-16). Jisas ba tuktan nani wal kaia dukyara taim sakan kaka, rait apia man sin luhpiam nani wal kaia  dukyara taim sakaia sma? Witin nani wal taim aihwa luma nit sa, minit kum baman lika apia. Man taim saki iwi smalki pakma ba nit pali sa, kan Jehova mita baku adar munisa (Kli smalkan 6:4-9).

15. Aisa-yapti ba, ai luhpia nani kaina kahbaia wisi dia daukaia sa ki?

¹⁵ Yawan tasba kum kau saura taki ba ra iwisa. Baha taka mita, aisa-yapti bui ai luhpia nani kaina kahbaia sa. Naiwa, tuktan nani ra alki rug muni uplika nani bara sa. Jisas ai disaipelka nani kaina kahban, bara “luhpi lupia nani” sin makan. Jisas ra alki priski ikras kan kainara, ai disaipelka nani swakwi takbia tnatka kum plikan (Jan 13:33; 18:7-9). Aisa-yapti sma kaka, Setan mita luhpiam nani ra saura munaia trai kaiki ba mapara aihwaki bas. Baha purkara sin,  dia witin nani ra pât ra dingkaia sip ba dukyara param aisas (1 Pita 5:8). * Kaina pyua ba wal praki, naiwa pyua ba tanka sut ra wan luhpia nani mapara kau saura pali sa.

16. Jisas mita ai disaipelka nani mistikka mapara nahki takan ba wina, aisa-yapti ba dia lan takaia sip sa ki?

¹⁶ Tihmia Jisas pruras kainara, ai disaipelka nani tilara ya ba kau tara sapa blahwi kan. Jisas ba ai kupia baikaia watlika ra, kupia latwankira ni, bara dia aisi daukan bakku sin, pâli laui wapnika mangkan (Luk 22:24-27; Jan 13:3-8). Man luhpa brisma kaka, Jisas daukan ba baku man sin wapnika mangkisma ki? Au, man klala yama nit sa, sakuna aitani pitka kat, kupiam baikan laka ra lika apia. Sturi aisama ba pain luki kais, bara baku lika luhpiam kupia ra “ispara [...] sabi ba baku” insauhkma apia (Jirimaia 30:11; Sins laka 12:18). Luhpiam ai tanka briaia sa, pâli wapnika mangkisma tnatka ba ai yamnika dukyara sa (Epesus 6:4; Hibru nani 12:9-11).

17. Dia muni Jisas mita luhpa nani ra tanka pain kum marikan?

¹⁷ Jisas tanka ba wina luhpa nani diara lan takaia sip sa ki? Misar! Luhpia nani ai aisa-yapti bila walaia tanka ba marikan. Jisas win: “Aisa [...] smalkanka ba baman lika aisisni [...], kan witin kupia laka ba kat daukisna” (Jan 8:28, 29). Jisas ai Aisa painkira bila walan ba baku, luhpa nani ai aisa-yapti bila walaia sa. Kan Baibil ra baku adar munisa (Epesus 6:1-3). Jisas ba tuktan kum saurka luha kan, bara tasba ra ai aisa-yapti bri kan ba —Josep Meri wal ba— saurka luha apia kan, sakuna Jisas ban bila wali kan. Baha ba, pamali liliaka ra ta baikan (Luk 2:4, 5, 51, 52).

18. Dia muni Jisas ai Aisa heven ra ba bila walan sapa, bara luhpa bila wali nani ba ya kupia lilia daukisa sapa sin tanka mariks.

¹⁸ Nahki muni luhpa nani ba Jisas baku taki, ai aisa-yapti  kupia lilia daukaia sip sa ki? Tnatka kum ba sika ai bila wali kaia. Karna kabia kra sin, baha ba Gâd kupia laka sa (Sins laka 1:8; 6:20). Pyua karna nani ra kat sin, Jisas ba ban ai Aisa bila wali kan. Gâd mita diara karna kum daukbia adar munan taim, Jisas win: “Aisa, [...] swaki ai saks”. Wibia kaka, baha diara karna daukaia ba wina swaki sakbia win. Ban sakuna, ai Aisa ba tanka kau pain bri ba nu kan ba mita, Jisas ba Gâd kupia laka kat daukan (Luk 22:42). Bila wali luhpia nani ba, ai aisa-yapti, bara Jehova, —ai Aisa heven ra ba— sin kupia lilia daukisa (Sins laka 23:22-25). *

19. a) Setan mita wahma-tyara nani ra nahki traika kaikisa ki? b)Luhpa daukanka saura nani ba mita, aisa-yapti nani ba nahki ai dara walisa ki?

¹⁹ Setan ba Jisas traika kaikan, bara wahma-tyara nani ra sin diara saura daukbia dukyara traika kaikbia (Matyu 4:1-10). Wan panika nani mapara kaia ba, isi apia sa. Ban kra, Setan daukbia wan panika nani mita saura ra wan tukbia. Baha mita, panika saura nani wina laiura kaia aitani sa (1 Korint 15:33). Dina, —Jekob luhpia mairin— sturka ba yawan kakaira sa. Witin upla idan wal tauki kan, bara las kat trabil man brin (Blasi sturka 34:1, 2). Dupali wahma-tyara nani! Pamali tila wina kum ba, saurka ra, ban kra rug laka ra kauhwi taim, nahki sari pali ba luki kais! (Sins laka 17:21, 25.)

20. Pamali ba lilia kabia dukyara, kumi bani ba dia daukaia sa ki?

²⁰ Baibil dia wi ba kat daukbia sa kaka, pamali trabilka nani wapnika mangkaia ba kau isi kabia. Kaikan baku, Baibil ra dia wi ba kat daukbia kaka, pamali liliaka laka sakaia sip sa. Baku bamna, Jisas mita kangrigisan ra kaikan ba baku, maîa waitna nani maîam mairin ra sin latwan kais. Maîa mairin nani maîam waitna mina munuhtara bas, bara Sins laka 31:10-31 kat, maîa mairin dukyara aisi ba baku man sin dauks. Aisa-yapti nani luhpiam nani ra smalki paks (Sins laka 22:6). Aisa nani “wa[m]tla uplika ba pain ta bri[s]” (1 Timoti 3:4, 5; 5:8). Bara luhpa nani, man nani sin aisikam-yaptikam bila wali bangws (Kolosi 3:20). Pamali bilara kumi bani mistik luha apia sa; baha mita bauikira kap, bara padin makabaia lan takpi.

21. Dia bila kaikanka painkira bara sa, bara nawas pali pamali liliaka laka ba nahki sakaia sip sa ki?

²¹ Pamali liliaka laka ba dukyara, Baibil ba rait pali smalkanka yamni ailal brisa. Baha purkara sin, tasba raya Paradais kum Jehova uplika lilia ni bangki kabia ba dukyara aisisa (Param marikan [Reveleshan] 21:3, 4). Nahki painkira bila kaikanka bara sa! Sakuna nawas pali, Gâd Baibil ra dia smalki ba kat yawan alki brih daukbia kaka, wan pamali liliaka laka ba sakaia sip sa.