1, 2. a) Diaura kaiki prisantka kum man tara kulkisma? b)Dia muni pri sakaia pura mana ba, Gâd prisantka kau tara sa ki?

DIA PRISANTKA kau painkira maikan sa ki? Ban kra prisant sipar kum sa, sakuna mampara kulkanka tara brisa. Kan praiska mana sipar kabia sin, prisantka ba nit sma, apia kaka lilia mai sakisa kaka, man prisant tara kum baku kulkma.

² Prisantka nani maikan ba sut tila wina, kum ba sika kau tara sa. Gâd mita tasba uplika nani ra yaban prisantka kum sa. Wel au, Jehova prisant ailal wankan sa, sakuna ai prisantka kau tara ba sika, pri wan sakaia pura mana ba, wibia sa kaka, ai Luhpia Jisas Kraist sakripaiska ba (Matyu 20:28). Saptika na ra kaikbia baku, pri sakaia pura mana ba, Gâd prisantka kau tara sika, kan yawan pura luan lilia kaia, bara dia nit ba sin briaia sip wan munisa. Kasak sika! Prisantka na bak Jehova latwan tara wan kaiki ba latan takisa.

3. Pri sakaia pura mana ba dia sa ki, bara baha prisantka tara tanka briaia sa kaka, dia ba pas aman laki kaikaia sa ki?

³ Prahni ra wibia sa kaka, pri sakaia pura mana ba bak,  Jehova mita saurka bara prura wina swaki wan sakisa (Epesus 1:7). Smalkanka na tanka briaia sa kaka, Eden gadinka ra dia takan ba laki kaikaia nit sa. Kan Adam saurka dauki dia lus tiwan ba wan tanka pain bribia sa kaka, pri sakaia pura mana tanka ba sin pain bribia.

4. Adam ba saurka luha rayaka bri kan ba nahki kan?

⁴ Jehova Adam ra paskan taim, diara manakira kum —saurka luha rayaka kum— yaban. Adam rayaka satka brin ba ra luki kais. Ai sinska bara ai wîna tara saurka luhakira, siknis almuk taki pruaia sin apia kan. Bara Jehova wal asla pali ai dara wali kan. Baibil bila “Adam ba Gâd luhpia” kan wisa (Luk 3:38). Bamna aisa latwankira kum ai luhpia wal asla pali ba baku, Adam Gâd wal asla pali ai dara wali kan. Au, Jehova Adam wal aisi, wark painkira nani daukbia yabi, witin mita dia bila kaiki kan ba sin wi kan (Blasi sturka 1:28-30; 2:16, 17).

5. Adam ra “Gâd [...] lilka talia ba kat paskan” Baibil ra wi taim, dia tanka sa ki?

⁵ Adam ra “Gâd [...] lilka talia ba kat paskan” (Blasi sturka 1:27). Naha ba, Gâd wîna daukra bri ba talia ra paskan tanka lika apia sa. Kan saptika 1 ra lan takan baku, Jehova ba spirit kum wan nakra ni sip kaikras sa (Jan 4:24). Baha mita, wîna bara dusa sin apu sa. Adam ra Gâd lilka talia kat paskan ba mita, latwan laka, sins laka, kasak laka bara karnika laka, Gâd daukanka nani ba marikan. Bara, ai Aisika wal tanka wala ra sin ai talia kan: Adam ba Kupia Laka Pri bri kan, wibia sa kaka, witin dia daukaia luki kan ba kat daukaia sip kan. Masin kum dia daukaia dukyara paski sakan ba kat dauki ba baku lika apia kan. Kau ni, witin selp dia pain dia saura ba kaiki, daukaia, apia kaka daukaia apia lukaia sip kan. Witin Gâd bila walaia lukanka brin kata, paradais tasbaia ra ban kaiara iwaia kan.

6. Adam Gâd bila lulkan taim dia lus tiwan, bara baha taka mita ai kyamka ra dia takan?

 ⁶ Latan sa! Adam Gâd bila lulkan ba tawan, mana tara kum aibapan, kan prura ra kahban. Bara saurka daukan ba mita, ai rayaka saurka luha bri kan ba yamnika sut lus tiwan (Blasi sturka 3:17-19). Sakuna kau sari pali ba naha: Witin dukyara, bara ai kyamka dukyara sin saurka luha rayaka ba lus tiwan. Dawan Bila ba naku wisa: “Saurka ba upla kumi [wibia sa kaka, Adam] taka ba mita upla sut ra luan, bamna saurka ba mita prura balan, bara prura ba upla sut ra alkan sa, kan upla sut saura daukan bamna” (Rom 5:12). Au sika! Adam saurka ba yawan sut ra wan alkan sa. Bara Baibil bila, Adam bui saurka bara prura albika laka ra bakahnu wan “atkan sa” wisa (Rom 7:14). Adam Iv wal mapara bila kaikanka kumi sin apu kan, kan witin nani selp ai kupia laka daukaia wisi, nu si Gâd bila lulkan. Sakuna, Adam kyamka ra, yawan baha tilara bangwi nani ba wal dia takaia kan ki?

7, 8. Pri sakaia pura mana ba, dia tanka wal brisa?

⁷ Jehova aitani lukan pri sakaia pura mana ba bak swaki wan sakaia. Sakuna, pri sakaia pura mana ba dia tanka sa ki? Tanka wal brisa. Pas ba sika, diara kum tiwan kaka kli briaia, apia kaka upla kum ra silak watla wina kra pri sakaia mana aibapi ba baku tanka sa. Walka ba sika, diara kum ai praiska bri ba kat mana aibapi ba, sim upla kum ra insauhkan mana aibapi ba baku tanka sa. Naha tanka ra, patitara pyua ra upla kum aksidint kum takbia daukan kaka, dia sauhkan ba mana kat aibapaia kan.

⁸ Kaiki ba baku, Adam mita daukan yawan diara tara kum lus tiwan. Sakuna, nahki muni baha tara lus tiwan mana ba aibapisi, saurka bara prura albika laka ba wina pri wan sakaia sip kan ki? Jehova mita pri wan sakaia pura mana ba nahki ridi daukan sapa, bara baha wina dia yamnika sakaia sip sma ba sin kaisa kaikaia.

9. Dia sat pri sakaia pura mana aibapaia nit kan ki?

⁹ Adam diara tara lus tiwan ba sika, saurka luha rayaka kum ba. Bara lus tiwan ba kli briaia dukyara, saurka bri rayaka kum wal sip aibapras kan (Lawana 49:7, 8). Pri sakaia pura mana ba, lus tiwan dukya praiska kat kaia kan. Kan Dawan Bila ra lâka kasak wi ba kat “rayaka ba, rayaka mana” aibapaia kan (Kli smalkan 19:21). Baku bamna, saurka luha rayaka kum Adam lus tiwan ba pura mana, dia ba pana aibapaia sip kan? “Upla sut swaki sakan kaia ba mana aibapaia dukyara”, saurka luha rayaka wala kum nit kan (1 Timoti 2:6).

10. Jehova mita pri wan sakaia pura mana aibapan kabia ba, nahki ridi daukan?

¹⁰ Jehova mita pri wan sakaia pura mana aibapan kabia ba nahki ridi daukan? Spirit saurka luha kum, wibia sa kaka, ai luhpia saurka luha kum tasba ra blikan. Sakuna tila wina, ai luhpia inipis ra lika blikras kan, kau ni ai Luhpia kumi baman kau latwankira kan ba blikan (1 Jan 4:9, 10). Luhpia na ai kupia wilinkira ni, heven ra iwi kan ba swisisi balan (Pilipai 2:7). Saptika luan ra yawan kaikata baku, Jehova sain tara kum dauki, ai Luhpia rayaka ba laki, Meri plauya ra mangkan. Gâd spiritka hulikira tingki, Jisas ba saurka laka pâtka ba wina luha aisubi takan (Luk 1:35).

11. Nahki muni waitna kumi man, upla milian milian pri sakaia pura mana ba aibapaia sip kan?

¹¹ Kuna nahki muni waitna kumi man, upla milian milian pri sakaia pura mana ba aibapaia sip kan ki? Wel luki kais: Nahki muni tasba uplika sut ba saurka alki bangwan ki? Amya tikpara, Adam ba saurka daukisi, ai rayaka saurka luha bri kan ba lus tiwan. Bara ai kyamka ra baha rayaka saurka luha ba dan sip laki yabras kan. Saurka bara prura ba lika laki yaban. Sakuna Jisas —Baibil ra “Adam wala  ba” maki ba lika—, saurka luha rayaka kum bri kan, bara saurka kumi sin daukras kan (1 Korint 15:45). Tanka kum ra, Jisas swaki wan sakaia wisi Adam pliska ba brin. Kan ai Aisa bila sitnika kat walan, bara ai rayaka saurka luha ba sakripais dauki yaban. Baku dauki muni, Adam saurka mana ba aibapan, bara yawan Adam kyamka bangwi nani ra, bila kaikanka kum wankan (Rom 5:19; 1 Korint 15:21, 22).

12. Jisas panis wauhwan ba tawan dia marikan?

¹² Jisas pruras kainara panis wauhwan sturka ba, Baibil ra sitnika kat aisisa. Saura yaba laka ra, Jisas ra klala ni wipan, bara silak ni dus kum ra sabi, aihka saura tnatka kum ra ikan (Matyu 27:30, 33; Mark 15:15; Jan 19:1, 30; Ulbanka Taka wahya 204-206 kat laki kais). Jisas baha pitka kat panis wauhbia ba nit pali kan ki? Saptika kum aula ba ra kaikbia baku, Setan bila upla ra trabil ra dingki traika kaikbia sa kaka, kumi sin Jehova ra kasak kabia apia wisa. Sakuna Jisas ba panis wauhwi ban bapi bui kan ba ra, Setan latubi aisan ba mapara ansika kum kau pain ba yaban. Kan marikan saurka luha tasba uplika kum ai kupia laka pri, bara Setan ani paniska daukbia mapara sin, Jehova ra ban kasak kaia sip sa. Gâd mita ai Luhpia ban kasak kan ba kaiki nahki lilia takan lukisma! (Sins laka 27:11.)

13. Pri sakaia pura mana ba nahki aibapan ki?

¹³ Sakuna pri sakaia pura mana ba nahki aibapan ki? 33 yawan pyua manka ra, Ju katka Nisan maki ba yua 14 ba ra, Gâd swin ai luhpia saurka luha ba upla mita ikbia. Baku tnatka ra, Jisas ai rayaka saurka luha ba “ban kaiara” sakripais dauki yaban (Hibru nani 10:10). Witin pruan wina yu yuhmpa ra, Jehova mita kli prura wina spirit uplika rayakira baku bukan. Bara heven ra wan taim, Jisas ai Aisa mawanra, Adam kyamka ra pri sakaia pura mana baku, ai rayaka saurka luha aibapan ba kahban (Hibru nani 9:24). Jehova mita Jisas sakripaiska ba aitani  yamni kulkan, bara baha sakripaiskakku tasba uplika ba, saurka bara prura albika laka ra kan ba wina, pri sakaia pura mana ba aibapan (Rom 3:23, 24).

14, 15. “Wan saurka nani [...] swih tikan” kabia dukyara dia daukaia sa ki?

¹⁴ Yawan ba saurka luha apia sa, sakuna pri sakaia pura mana aibapan ba tingki, yamnika ailal briaia sip sa. Gâd prisantka kau tara na mita, nawas bara naika pyua ra ani yamnika kum kum briaia sip ba kaisa kaikaia.

¹⁵ Saurka nani swih tikanka. Wan wîna ra saurka bara ba mita, wapni kat wapaia ba dukyara aiklabaia sa. Yawan sut wan twisa ni, bara wan daukanka nani ni saurka ra kauhwisa. Bara Jisas sakripaiska ba tingki “wan saurka nani [...] swih tikan” kaia sip sa (Kolosi 1:13, 14). Sakuna taura wan kupia lakaia sa. Bara Jisas sakripaiska ra kasak luki, wan kupia bauikira ni Jehova ra padin wan munbia bik taki makabaia sa (1 Jan 1:8, 9).

16. Dia mita kupia klin wan dara wali Gâd ra mayunaia sip sa, bara wan kupia baku briaia ba nahki yamni wan munisa?

¹⁶ Gâd mawanra kupia klin wan dara walaia. Wan kupia pâtkira wan dara walisa taim, yawan upla kum bila kaikanka luha, bara bahki baku wan sakisa. Sakuna pri wan sakaia pura mana ba pat aibapan ba tingki, Jehova mita ai kupia painkira ni wan saurka swih tiki, kupia klin wan dara wali ai mayunra yabia wankisa (Hibru nani 9:13, 14). Baku bamna yawan witin wal wan kupia latan aisaia, wibia sa kaka, wan pura sunaia sip sa (Hibru nani 4:14-16). Bara kupia klin wan dara wali taim, wan sinska ra turbanka luha, selp wan kupia buki wan auyapah kat iwisa.

17. Jisas yawan tnata mana pruan ba mita, yawan dia yamnika briaia sip sa?

¹⁷ Paradais tasbaia ra ban kaiara iwaia bila kaikanka. Rom 6:23 bila: “Saurka ba mita mana baku wanki ba  lika prura”. Bara sim burska naku wisa: “Sakuna Gâd [...] prisantka ba lika, raya ban kaia laka Kraist Jisas wan Dawan wal asla”. Yawan saptika 3 ra, Paradais tasbaia yamnika nani brih aula ba laki kaikan (Param marikan [Reveleshan] 21:3, 4). Naha yamnika nani, bara ban kaiara wan wîna tara yamni kat iwaia ba sin, Jisas yawan tnata mana pruan ba mita briaia sip sa. Sakuna yamnika sut na briaia dukyara wan tingkika laka misar marikaia sa.

18. Pri sakaia pura mana ba mita, dia muni Jehova ra tingkika yabaia sa ki?

¹⁸ Pri sakaia pura mana ba mita, dia muni Jehova ra tingkika tara yabaia sa ki? Wel luki kais: Upla kum, ai taimka, ai karnika, bara ai lalahka sin tiki, prisantka kum maikisa kaka, rait apia prisantka ba tara kulkisma? Bara kupiam sin alkisa, kan latwan mai kaiki ba tawan daukisa. Baku kaka, pri wan sakaia pura mana Jisas aibapan ba, prisantka kum kau tara sa. Kan Gâd ba diara tara kum sakripais dauki yaban. Jan 3:16 bila: “Gâd tasba ra uya latwan kaikan, bara witin mita ai Luhpia kumi baman bri kan ba yan”. Jehova latwan wan kaiki tanka kau tara mariki ba sika, pri wan sakaia pura mana ba. Bara Jisas latwan  tara wan kaiki ba sin marikisa, kan yawan tnata mana ai rayaka yabaia wilin kan (Jan 15:13). Au sika! Pri wan sakaia pura mana ba tawan, Jehova ai Luhpia wal nahki latwan tara wan kaiki ba yarka kasak lukaia sa (Galesha 2:20).

19, 20. Pri sakaia pura mana tingkika ba, dia dauki marikma ki?

¹⁹ Baku bamna, baha tingkika ba, dia dauki marikma ki? Pas pali, baha prisantka yaban uplika ba wal, wibia sa kaka, Jehova Gâd wal kakaira taks (Jan 17:3). Bukka na helpka wal, Baibil stadi taki daukaia sip sma. Jehova wal kau kakaira taki, witin ra kau latwan sin kaikma. Bara witin ra kau latwan kaiki auma bara, ai kupia laka daukaia sin kau want kama (1 Jan 5:3).

²⁰ Jisas pri sakaia pura mana aibapan ba ra kasak lukisma ba mariks. Jisas bui naku win: “Ya Gâd Luhpia ra kasak luki ba, raya ban kaia laka ba brisa” (Jan 3:36). Sakuna Jisas ra kasak luki ba nahki marikisa ki? Wan twisa ni baman apia. Kan Jems 2:26 ra wi ba baku: “Kasak lukan laka [ba] daukanka yamni [...] marikras kaka [...] pruan sa”. Au sika! Rait kasakka lukan laka ba, warkka dauki ni marikisa. Bara Jisas ra kasak luki ba marikaia tnatka kum ba sika, Jisas dia aisan bara daukan ba kat yawan sin daukaia (Jan 13:15).

21, 22. a) Dia muni Kraist Pruan Kupia Kraukanka mani bani kulki ba ra asla takaia sa ki? b)Saptika 6, bara 7 aula ba ra dia kaikbia ki?

²¹ Kraist Pruan Kupia Kraukanka mani bani kulki ba ra asla taks. 33 yawan pyua manka ra, Nisan katka yua 14 ba ra, Jisas mita yua kum kulkaia bapi mangkan, Baibil ra naha daukanka nina “Dawan Pata” makisa (1 Korint 11:20; Matyu 26:26-28). Baku sin, Kraist Pruan Kupia Kraukanka nina sin makisa. Jisas mita naha dauki mangkan, ai apastilka bara rait aihwa kristianka nani sut diara tara kum ai kupia kraukbia dukyara, wibia sa kaka, pri wan sakaia pura mana witin ai rayaka saurka luha aibapanka  ba. Kupia kraukanka na kulkaia dukyara, Jisas naha lâka yan: “Naha na yang ra luki, dauki bas” (Luk 22:19). Pri wan sakaia pura mana kum aibapan kabia daukan wina, Jehova ai Luhpia wal latwan tara wan kaiki ba marikisa. Kraist Pruan Kupia Kraukanka ba, baha latwanka ba sin wan kupia kraukisa. Yawan mani bani kupia kraukanka na kulki asla aidrubi bangwbia kaka, pri sakaia pura mana aibapan tingkika ba sin marikisa. *

²² Pri wan sakaia pura mana ba sika, Jehova prisantka pura luan kau tara sa (2 Korint 9:14, 15). Bara prisantka na tingki pruan nani ra kat sin yamni munaia sip sa. Nahki muni? Saptika 6, bara 7 aula ba ra kaikbia.