1. Ya bui rayaka bri nani sut ra paskan?

“[JEHOVA] sika Gâd pali ba, Gâd ai rayaka bri ba —Jirimaia bui win—.” (Jirimaia 10:10.) Bara witin sika ani ani rayaka bri ba Papaskra sa. Naha dahra heven ra rayaka bri kum kum ba, au takisi win: “Man sika diara sut paskram ba, bara man kupiam laka mita sika baha nani ba ban sa, bara paskan kata” (Param marikan [Reveleshan] 4:11). Bara mayunra lawana painkira kum ra, king Debit ba Jehova ra win: “Raya kaia karma ba man ra bara sa” (Lawana 36:9). Baku bamna, raya kaia ba Gâd prisantka kum sa.

2. Yawan ban raya kaia mata, Gâd dia daukisa ki?

² Bara yawan ban raya kaia, Jehova bui daukisa (Wark nani 17:28). Yawan plun pi ba, li di ba, pasa aubi ba bara wan tasbaia sin witin wankisa (Wark nani 14:15-17). Bara naha sut ba, wan kupia pah daukisa. Sakuna, wan rayaka ra pura luan pah laka briaia sa kaka, Gâd lâka ba lan taki bila walaia sa (Aiseya 48:17, 18).

3. Ebel ra ikan ba, Gâd nahki lukan?

³ Gâd brinka sa, wan rayaka ba, bara upla wala rayaka ba sin yawan kulkbia. Naha tanka ra, yu kum, Adam Iv luhpia almuk Kên ba mita, ai muihka sirpi Ebel ba mapara ai kupia baikan. Jehova Kên ra win ai kupia baikan ba tawan saurka kum yarka takaia sip sa. Sakuna bila walras “ai  muihni ba ikan” (Blasi sturka 4:3-8). Bara sturka ba bila, Kên ai muihka ra ikan tawan Jehova bui klala yaban (Blasi sturka 4:9-11).

4. Rayaka ba kulkaia sa, Gâd bui Moses Lâka ra nahki marikan?

⁴ Bara mani 2.400 prais luan ningkara, witin want kan ba kat Israel uplika ba mayunbia dukyara, Jehova ai lâka nani yaban. Prapit Moses bak yaban ba mita, lâka nani ba ra Moses Lâka makisa. Bara tila wina lâka kum win: “Upla ikpara” (Kli smalkan 5:17). Israel uplika ba lâka na mita lan takan Gâd ba upla rayaka ba tara kulkisa, bara upla sut ai walka rayaka ba kulkaia sa.

5. Luhpa iki sakaia ba nahki kaikaia sa ki?

⁵ Bara yapti byara ra, bibi swap lupia kau aisubi takras ba dukyara, Gâd dia lukisa ki? Moses Lâka bila, kau aisubi takras bibi sirpi lupia kum iki sakaia apia kan. Au sika! Jehova ba, baha rayaka ba sin tara kulkisa (Lawana 139:13-16; 127:3). Baha taka, luhpa iki sakaia ba saura pali sa.

6. Dia muni upla wala ra misbara kaikaia apia sa?

⁶ Rayaka ba kulkaia mata, wan walka mapara yamni lukaia sa. Kan Baibil bila: “Ai muihni ra latwan kaikras ba lika upla aîkra sa, bamna man nani pain kaikisma upla aîkra kumi sin ai kupia ra raya ban kaia laka sip briras” (1 Jan 3:15). Raya ban kaiara iwaia want sa kaka, misbara kaikan laka ba wan kupia wina taih dakbi sakaia sa, kan misbara laka ba wina rau munanka ba takisa (1 Jan 3:11, 12). Pana pana latwan kaiki kaia lan takaia ba nit pali sa.

7. Ani taskika nani dauki ba mita, wan rayaka kulkras sa marikisa?

⁷ Bara selp wan rayaka kulkaia ba dahra dia wiaia sip sa ki? Wel au, upla ba pruaia want apia sa, kuna upla ailal mahka lilia kaia wisi ai rayaka pât ra dingkisa. Naha tanka ra, upla kum kum twaku sami, sigarit dih, bara druga sin yus munisa. Dukya nani na wan rayaka sauhkisa, bara wan ikaia sip sa. Daukanka nani na Gâd mapara taski pali sa. Bahamna ya ya naha taskika nani dauki ba, rayaka ba  hulikira kulkras sa marikisa (Rom 6:19; 12:1; 2 Korint 7:1). Jehova want ba kat mayunaia sa kaka, taskika nani na lulki swiaia sa. Swiaia ba karna kabia kaia sa, sakuna Jehova wan ta baikbia. Wan rayaka —Gâd prisantka ba—, kulkaia dukyara ani trai munanka yawan dauki ba, Gâd ba painkira kaikisa.

8. Dia muni aksidint kum takbia apia dukyara ban luki kaia sa ki?

⁸ Rayaka ba kulkisa kaka, aksidint kum takbia apia dukyara luki kabia. Upla kupia lukras baku kabia apia. Bara lilia kaia wisi bahki ra diara latwan wankaia sip ba lika daukras kabia. Diara waki taim, krisi baku wakaia apia, bara ani pulanka wan rayaka pât ra dingkaia sip ba sin pulras (Lawana 11:5). Gâd bui patitara Israel uplika ra lâ kum yaban ba naku wi kan: “Utla raya kum paskaisa kaka, barandika mawan ba kutbi lakbia, baku lika sip sa tamya ba pâtkas kaia upla kum baha [wina] kauhwi prubia kaka” (Kli smalkan 22:8). Lâka na tanka wan mariki ba, man alki briaia sma. Wamtla ba teps brisa kaka, baha wina upla kum kauhwi latwan saura bribia apia dukyara, pain paski bri kaia sma. Truk, duri, apia kaka baik kum brisma kaka, pain paski bri bas. Wamtla, trukkam, duarkam, bara baikkam ba sin yarka rayakam, bara upla wala rayaka ba pât ra dingkbiara.

9. Rayaka ba kulkisa kaka, daiwan nani ra nahki munbia ki?

⁹ Bara daiwan nani rayaka ba nahki sa? Baha sin Papaskra ba huli kulkisa. Piaia, kwala dimaia, siknis takaia apia, bara wan kaina kahbaia dukyara lika, daiwan ikaia sip sa (Blasi sturka 3:21; 9:3; Impakan sturka 21:28). Sakuna, ya ya pulaia, apia kaka lilia takaia wisi daiwan nani ra saura muni iki ba sika, rayaka ba huli kulkras sa (Sins laka 12:10).

10. Rayaka ba wihki tala ba wal tanka kumi bri ba, Gâd nahki marikan?

¹⁰ Kên Ebel ra ikan taim, Jehova mita Kên ra win:  “Tasba wina man muihkam talya [...] ba, yang ra ai winisa!” (Blasi sturka 4:10). Gâd mita Ebel talya ba dahra aisan taim, Ebel rayaka ba dahra aisi kan. Kên ba, ai muihka rayaka tikan ba mita klala briaia kan. Ebel talya ba —wibia sa kaka, ai rayaka ba sika—, Jehova bui lâka daukbia dukyara wini baku pitka kan. Noa pyua Lisamrika Tara ningkara sin, rayaka ba wihki tala ba wal tanka kumi bri ba dukyara param takan. Lisamra Tara kanra uplika ba, dus ma, inma kura bara ma lawan nani baman pi kan. Sakuna ningkara, Jehova ba Noa bara ai luhpia nani ra win: “Diara nani sut ai rayaka bri aiawi tauki ba, man nani pi raya kama dukyara paskri sa; dus ma nani satka bani ba, inma kura nani ba sut sin yang man nani ra maikri sa”. Kuna naha lâka sin yaban: “Wîna tala bri nani ba, man nani pima apia, kan tala ba sika upla rayaka sa bamna” (Blasi sturka 1:29; 9:3, 4). Latan sa! Jehova mapara sika rayaka ba wihki tala ba wal tanka kumi brisa.

11. Noa pyua wina Gâd mita tala ba wal dia daukaia apia win?

¹¹ Yawan tala piras kaka, tala ba kulkisa. Jehova Israel uplika ra lâ yaban ba ra win: “Man nani [...] daiwan wail kum apia kaka tnawira kum, piaia ikma kaka, piaia sip sma; sakuna tala sut wîna ra ba, sakaia bara tasba ra bikaia sma. Kan [...] yang mai wisna man nani tala pipara [...]” (Libait laka 17:13, 14). Bika! Mani 800 kanra, daiwan talya piaia apia Noa ra lâka yaban ba dukyara, Gâd bui lâka ba ban mangki bri kan. Jehova lukanka ba param kan: Ai uplika ba daiwan wîna piaia sip kan, talya ba lika apia. Talya ba tasba ra laikaia kan, baku daukisi daiwan rayaka ba kli Gâd ra laki yabi kan.

12. Apastil nani pyua ra spirit hulikira bak, ani lâka tala ba dukyara yaban ba naiwa pyua kat sin bila walaia sa ki?

¹² Yawan kristian nani ra, sim laka ra wan aisisa. Patitara pyua ra, apastil nani ba wihki waitna wala nani Jisas nina blablikra nani ra ta bri kan ba asla takan. Bara  kristian nani ba dia lâka nani alki bri daukaia kan sapa luki saki marikan. Las kat naku luki win: “Spirit hulikira witin yamni kaikan, yang nani sin baku, man nani puramra diara wihra nani mangkaia apia, sakuna naha diara aitani nani yakan man mika: Man nani diara nani aidul ra sakripais dauki yan ba wal prawaia apia, tala wal sin apia, diara nani katwi ikan [kau talya sakras] ba sin apia, rug laka wal sin prawma apia: Man nani baha nani alkras ban swima kaka, man nani aitani daukma” (Wark nani 15:28, 29; 21:25, Lâ Raya Wauhkataya [LRW], 1986). Baku bamna, ‘yawan tala ba alkras ban swiaia sa’ wisa. Gâd mapara tala yus munras kaia ba, aidul bara rug laka ra dimras kaia baku diara kum tara sa.

13. Dia prakanka wan marikisa, wan wîna ra tala dingkaia apia ba tala yus munaia apia lâka ba tilara sa?

¹³ Bara wan wîna ra tala dingkaia ba, baha lâka tilara sa ki? Au, tilara sa. Luki kais: Daktar kum mita man rum dan dima apia mai wibia kaka, kuna man diras sma wisi, wamkia bilakku sabi dingkma kaka, pain kabia ki? Apia pali! Sim baku, tala yus munaia apia ba sika, anikku kabia sin wan wîna ra dingkaia apia tanka sa. Yawan baha lâka bila walaia dukyara, yarka wan wîna ra tala dingkbiara.

14, 15. Daktar nani mita kristian kum ai wîna ra tala dingkaia nit sa wibia kaka, kristianka ba dia daukaia sa ki, bara dia muni?

¹⁴ Sakuna kristian kum insauhkan sa, apia kaka aparit tara munbia nit sa kaka? Bara daktar nani bila, wîna ra tala dingkras kaka prubia? Wel au, kristianka ba pruaia want apia sa. Witin ai rayaka, —Gâd prisantka painkira ba—, tikaia want apia ba mita, tala apu saîka wala nani yus munaia wilin kabia. Bara baha mita, tala watlika ra saîka sat sat bara ba bribia.

¹⁵ Kristian kum kau wira wihka pan iwaia wisi, Gâd lâka ba krikbia ki? Jisas win: “Ya ya ai rayaka swaki sakaia lukbia ba, witin lika baha ba tikbia; sakuna ya yang  taiwan ai rayaka tikbia kaka, baha ba kli bribia” (Matyu 16:25). Yawan kumi sin pruaia want apia sa. Sakuna, nawas wan rayaka swaki sakaia wisi Gâd lâka ba krikisa kaka, raya ban kaia laka ba lus tiwaia sip sa. Yawan upla sinskira sa kaka, Gâd lâka mita yamni wan muni ba dukyara kasak lukbia. Bara yawan prubia kaka, wan rayaka Yayabra ba ai kupia krauki, prura wina wan bukbia (Jan 5:28, 29; Hibru nani 11:6).

16. Tala ba dukyara Gâd uplika ba diaura kasak lukisa?

¹⁶ Kristian nani ba, tala ba dukyara Gâd lâka ba bila walaia lukisa. Baha taka mita, tala ba piras, bara sîka baku sin yus munras. Tala Papaskra ba mita ai uplika mapara dia kau pain sa sapa nu sa. Bara ai uplika ba witin ra kasak lukisa. Man sin kasak lukisma ki?

17. Patitara Israelka ra, Gâd mita dia tnatka ra baman tala yus munaia sip kan win?

¹⁷ Moses Lâka ba mita tala yus munaia tnatka kumi man pain ba marikan. Jehova bui Israel uplika ba nahki ai mayunra yabia lan daukisi win: “Ai rayaka bri nani ba sut, tala bri ba mita raya sa. Baha mita yang man nani ra mai wiri, tala [...] ni baman altarki purara laiki upla saurka nani dauki ba pura mana aibapaia, kan tala ba sika upla rayaka mana aibapi ba” (Libait laka 17:11). Israel uplika nani saurka dauki kan ba swih tikbia  dukyara, daiwan kum sakripais baku yabi, talya wira kum altar ra brihwi kan. Altarka na pas pali tent watla ra kan, kuna ningkara, Gâd tempelka ra kan. Naku tnatka ra baman tala ba yus muni kan.

18. Jisas ai talya laikan ba tingki, yawan dia yamnika briaia sip sa?

¹⁸ Rait aihwa kristianka nani ba Moses lâka bila walaia apia sa, bara baha mita daiwan sakripaiska yabras, bara daiwan talya altar kumira sin brihwaras (Hibru nani 10:1). Sakuna, patitara Israelka ra tala ba nahki yus munan ba mita, kaina pyua ra sakripaiska kum daukai kan ba tanka marikan, wibia sa kaka, Gâd luhpia Jisas Kraist sakripaiska ba tanka sa. Saptika 5 ra lan takan baku, yawan pura mana Jisas ai talya laiki, ai rayaka upla baku bri kan ba sakripais dauki yaban. Bara ningkara, witin heven ra wih ai talya laikan mana ba aima kumi ban kaiara  Gâd ra aibapi yaban (Hibru nani 9:11, 12). Baku lika, wan saurka nani swih tikaia, bara raya ban kaia laka briaia ba sin sip munan (Matyu 20:28; Jan 3:16). Au sika! Tala ba baku ra yus munan ba diara kum tara sa (1 Pita 1:18, 19). Jisas talya laikan ba ra, yawan kasak lukisa kaka lika swakwi takbia.

19. “Upla nani sut talya mapara” kristian nani ba klin kaia sa kaka, dia daukaia sa ki?

¹⁹ Gâd bui raya kaia prisantka wanki ba mita, tingkikira luki bangwisna! Baha tingkika mita wan tukbaia sa upla wala ra wih Jisas sakripaiska dahra smalkaia. Bara wiaia, baha sakripaiska ra kasak lukbia kaka, raya ban kaiara iwaia sip sa. Bara Gâd kulki ba baku, yawan sin wan walka rayaka ba tara kulki ba mita, kupia liliakira ni baha wih daukbia (Isikiel 3:17-21). Wapni pitka kat baha warkka daukbia kaka, apastil Pâl win ba baku yawan sin nan wibia: “Upla nani sut talya mapara yang kli[n] sni. [Kan] Gâd ai kupia ra win yaba sut man nani ra mai wi[ri]” (Wark nani 20:26, 27, [LRW], 1986). Kasak sika! Yawan Gâd tanka dahra upla ra smalki, rayaka ba, bara tala ba sin tara kulki yaba marikisa.