BAIBIL BA pas bila nani ra ulbi sakan taim, Hibru bila Sheʼohlʹ, bara Grîk bila Haiʹdes ba, aima 70 pura takisa. Wal sut ba prura tanka dukyara aisisa. Baibil kum kum nani ra lika “raiti”, “hel pauta”, bara “unta salhkan” baku ulbi lakan sa. Ban sakuna, bila aisanka aihkika ra, Hibru bara Grîk bila nani ba tanka kat lika bila kum ulbi laki sip sakras. Sheʼohlʹ[Siul]bara Haiʹdes [Hadis] bila nani ba, Miskitu Baibilka ra saura ulbi laki “raiti”, bara “pruan nani tasbaia” lakan sa. Ban sakuna, naha Hibru bara Grîk bila nani na, dia tanka sa ki? Kaisa Baibil tikska kum kum ra dia smalki ba kaikaia.

Smasmalkra 9:10 bila: “Raiti ra wama lika baha ra diara kumi sip daukras, baha ra diara kumi sin man lukras, diara tanka briaia apu bara sins laka sin apu”. Baku kaka, Siul ba [Miskitu Baibilka ra, saura ulbi laki “raiti” wi ba], upla pruan bikaia wisi raiti ra untika kumi bani salhki ba tanka sa ki? Apia! Kan Baibil ra unta kum salhki upla biki ba dahra aisi taim, Sheʼohlʹ [Siul] bara Haiʹdes [Hadis] bila nani yus munras, sakuna, Hibru bara Grîk bila wala nani lika yus munisa. Baibil ra, Siul maki ba, unta kum salhki baha ra upla ailal bikaia tanka apia sa, baku sin tasba piska kum kutbi, sim pliska ra pamalika sut biki ba tanka apia sa.

Bahamna, Siul bila ba, dia wan wiaia want sa ki? Gâd Bila ba marikisa, Siul bara Hadis ba, upla ailal sim unta bila yahpa kum ra bikaia dukyara aisaras. Diara kum kau yahpa tarkatara dukyara aisisa. Naha tanka dukyara, Aiseya 5:14 bila, Siul ba [Miskitu Baibilka ra, saura ulbi laki “raiti” wi ba], “ai bila ba kwakbia, sip bila bangwbia apia” wisa. Wibia sa kaka, Siul ba upla pruan pura luan ailal langki pisa, bara ban kau langkaia want sa wisa (Sins laka 30:15, 16). Raiti nani ra upla biki biki auya taim yu kum bangki takisa, sakuna Siul ba “ban pali auyapah takras sa”, wibia sa kaka, bangki takras (Sins laka 27:20). Au sika! Siul ba bara Hadis ba tnata apu bangki sin takras. Baku bamna, Siul bara Hadis ba, tanka kum saki mariki ba bila nani sa, sakuna plis kum rait bara ba lika apia sa. Tanka wan mariki ba sika, baha pliska laka upla prahki aihkika ba prura yapanka yapi ba.

 Yawan Baibil wina buan laka smalkanka ba lan taki taim, Siul bara Hadis ba dia sa sapa kau pain wan tanka brisa. Baibil ba marikisa pruan nani Siul bara Hadis ra bara ba, kli buaia sip sa (Job 14:13; Wark nani 2:31; Param marikan [Reveleshan] 20:13). * Baku sin marikisa Siul bara Hadis ra, Jehova dukya daukan, bara Jehova dukya daukras kan nani bara sa (Blasi sturka 37:35; Lawana 55:15). Baha mita, Baibil bila “pruan nani ba kli buaia sa, upla pain nani, upla saura nani sin” (Wark nani 24:15).