1. Tasba na dukyara Gâd dia lukisa ki?

TASBA na dukyara Gâd lukanka ba pranakira sa. Jehova want sa tasba na upla siknis apu, bara lilia ni bangki kabia. Baibil bila “Gâd [Eden] gadinka kum mangkan” bara “ba wina yan dus nani [...,] bara ma nani ba sin kaiki aihni pin wan dauki satka ba [...] pawan”. Baha ningkara wan damika nani, Adam Iv wal ra paski gadinka ra mangkisi naku win: “Man nani luhpa ailal, ailal sahwi, bara tasba ba bangki dauks [...] bara daiwan nani sut [...] karnikam munuhtara taibi bri kama” (Blasi sturka 1:28; 2:8, 9, 15). Baku bara, Gâd lukanka kan upla ba luhpa sahwi, tasba aiskara gadin kum dauki daiwan nani main kaiki bangwbia.

2. a) Dia muni tasba na dukyara Gâd dia luki ba, rait takaia sa ki? b)Baibil wi ba baku, dia sat uplika tasba na ra ban kaiara iwbia?

² Upla ba tasba na ra paradais kum ra iwbia Gâd luki ba, rait takbia lukisma? Jehova pali nan wisa: “Yang daukaia luki kaikri ba baku sin daukamni” (Aiseya 46:9-11; 55:11). Au, wan Papaskra dia pramis muni ba, daukbia sika! Witin mita tasba na “diara apu kaia dukyara paskras kan, sakuna upla nani iwi” kabia dukyara lika (Aiseya 45:18). Gâd ba tasba na ra dia sat uplika  iwbia want kan ki? Bara pyu an iwbia want kan? Baibil ansika bila: “Kasakkira nani ba lika tasbaia ba brih iwbia, ban kaiara sin baha tasbaia ra iwi kabia” (Lawana 37:29; Param marikan [Reveleshan] 21:3, 4).

3. Dia sat trabilka nani tasba ra takan kaikisa, bara dia makabi walaia aitani sa?

³ Baha pramiska kau aimakras ba latan sa. Kan tasba uplika ba siknis taki pruisa; bara aiklabi pana pana prui tiwi bangwisa. Naha na pramis munan ba wal takras! Kan tasba ra diara saura kaiki ba, Jehova kupia laka apia sa. Baku bamna, dia takan ki? Dia muni Gâd luki ba kat takras? Upla mita luan sturka bukka nani ulbi saki ba wina, ansika ba sip maikras, kan trabilka ba heven ra ta krikan.

4, 5. a) Ya mita pyuta kum bakku Iv ra aisan? b)Nahki upla kum pain si aîmplikra takaia sip sa ki?

⁴ Baibil taura ra, Gâd waihlka kum Eden gadinka ra takan ba dukyara wan aisisa. “Pyuta” makisa, sakuna dis daiwan lupia kum apia sa. Baibil tnata ra, witin ra param “Debil bara Setan maki[sa], witinka mita sika tasba aiskara kunin [munisa]”. Bara “pyuta almuk ba” nina sin makisa (Blasi sturka 3:1; Param marikan 12:9). Baku sa! Waihlka na insal karnakira kum sa. Spirit kum yawan sip kaikras ba. Witinka pyuta kum yus muni Iv ra kunin munan, bara pyutka ba aisi kan baku daukan. Gâd ba upla ba dukyara tasba na paski ridi daukan pyua ra, insalka na bara kan kaia sa (Job 38:4, 7).

⁵ Yawan pain nu sa Jehova diara dauki ba sut saurka luha sa. Baku bamna, ya bui baha “Setan” “Debil” maki ba ra paskan ki? Tanka prahni ra naku sa: Gâd insalka karnakira kum ba selp Debil takan. Sakuna, nahki muni baku takan ki? Sim upla kum naiwa pain si yauhka pat  aîmplikra taki ba baku sa. Sakuna, nahki muni takisa? Ban kra uplika ba ai kupia ra brinka saura kum lukbia yaban. Baha ra ban lukisa kaka, brinka saura na kau karna takisa. Bara sans kum bribia taim, ai kupia brinka saura ban luki kan ba tawan, saurka ra kauhwi daukbia kaia sa (Jems 1:13-15).

6. Gâd insalka karnakira kum ba nahki muni Setan Debil takan?

⁶ Setan ra sin baku takan. Jehova mita Adam Iv wal ra luhpa ailal sahwi tasba na bangkbia win taim, Setan wali kan kaia sa (Blasi sturka 1:27, 28). Ban kra witin nan lukan: “Naha uplika sut na, Gâd ra mayunaia watlika ra yang ra ai mayunaia sip sa!”. Bara Setan ai kupia ra baha brinka saura ra ban luki, brinka ba karna taki, las kat Gâd dahra aisi Iv ra kunin munan (Blasi sturka 3:1-5). Baku tnatka ra, witin “Debil” takan, baha tanka ba sika “Nina Aisasara”. Baku sin witin “Setan” takan, baha ba “Mapara Babura” tanka sa.

7. a) Adam Iv wal, dia muni pruan? b)Dia muni yawan Adam kyamka ba almuk taki prui bangwisna ki?

⁷ Setan mita kunin muni warbanka dauki Adam Iv wal ra yaban Gâd bila lulkan (Blasi sturka 2:17; 3:6). Bara Gâd win ba kat, wal sut las kat pruan (Blasi sturka 3:17-19). Bara Adam ba saurka alkan bamna, ai kyamka sut ba saurka sin alkan (Rom 5:12). Naha ba sartin kum lapatwan kaka wal tanka prakaia sip sa. Baha sartinka lapatwan ba ra brit angkbia kaka, britka kumi bani ba nahki takbia ki? Saura, lapatwan sin takbia. Sim baku, tasba ra upla kumi bani ba, baha “lapatwanka” —wibia sa kaka, Adam saurka ba— alkan sa. Baha taka mita yawan almuk taki pruisa (Rom 3:23).

8, 9. a) Yawan kaikan baku, Setan bui nahki Gâd ra latuban? b)Dia muni kyamapara nani ra Gâd mita minitka ra ikras kan?

⁸ Setan Adam Iv wal ra Gâd bila lulkbia tatuskan taim, mapara buanka kum daukaia lalka takan. Kan  Jehova nahki king aimaki ba tnatka ba latuban. Naku pitka ra aisan: “Gâd ba king kum saura sa, bara diara pain nani ai uplika mihta dakbisa. Tasba uplika ba  Gâd lâka mina munuhtara kaia nit apia sa, kan witin nani selp dia yamni dia saura tanka ba luki sakaia sip sa. Bara yang bili walbia kaka, kau pain iwi bangwi kabia”. Naha sat maisakapanka mapara, Gâd dia daukaia kan ki? Upla kum kum bila, Gâd bui kyamapara nani ra ikaia kan wisa. Sakuna, Gâd baku dauki, witin king kum pain aimaki ba, bara Setan ba kuninkira sa marikaia kan ki?

⁹ Jehova diara sut ba kasak kat dauki ba mita, kyamapara nani ra minitka ra ikras kan. Kau ni, latuban ba param ra takbia, bara Setan ba warbanka dadaukra tara kum sa marikaia dukyara sin pyu lubia yaban. Baha mita, witin upla ra swin pyu wihka ra, Setan karnika munuhta ra ai gabamintka nani mangki brih iwi kabia. Gâd ba dia muni baku daukaia aitani lukan sapa, bara dia muni naiwa pyua wihka kat wapnika mangkras sapa sin, saptika 11 ra smalkisa. Sakuna naha ra sin luki kais: Setan mita Adam Iv ra luki, diara kumi sin yabras kan kaka, diakan witin nani Setan ra kasak lukan? Bara Jehova Adam Iv ra yamni sut muni si, pana Gâd ra kupia siksa kuninkira kulkaia aitani kan ki? Man kaka, dia daukaia kapram?

10. Nahki Jehova tanira taui, Setan latuban ba kunin sa marikaia sip sma ki?

¹⁰ Naha ra aman luki kaikaia nit sa, kan wan rayaka ra yawan kumi bani dia daukbia lukanka ba briaia sa. Au sika! Man Jehova tanira taui Kingkam baku kulki, Setan latuban ba kunin sa marikaia sip sma (Lawana 73:28; Sins laka 27:11). Sari sa, kan tasba ra upla milian milian iwi ba tila wina, kulki man Jehova tanira tauisa. Naha ra luki, makabi walanka tara kum takisa: Setan tasba na wihtka sa sapa tanka ba, rait pali Baibil ra smalkisa ki?

11, 12. a) Jisas ra traika kum kaikan ba mita, Setan tasba na wihtka sa dukyara dia wan marikisa? b)Dia tanka wala nani marikisa Setan ba tasba na wihtka sa?

¹¹ Jisas ba Setan tasba na wihtka sa rait lukan. Yu kum, Debil mita Jisas ra “tasbaia kuntrika nani sut marikan, ai prana nani sin”, bara pramis muni win: “Lulam kriki [...] yang ra mayunma kaka, naha sut [...] maikamna” (Matyu 4:8, 9; Luk 4:5, 6). Luki kais: Tasbaia kingka laka nani ba Setan dukya apia kan kaka, Jisas ra baha yabaia pramis munan ba, rait traika kaikan kum kaia kan ki? Baha purkara sin, Jisas wiras kan gabamintka nani na Setan dukya apia sa. Bara Setan dukya apia kan kaka, Jisas mita Setan ra baha tanka param wiaia kan.

¹² Wel au, diara sut Papaskra Karnika Sut Bri ba sika Jehova (Param marikan 4:11). Sakuna, Baibil tikska kumi sin Jehova, apia kaka Jisas Kraist ba tasba na wihtka sa wiras. Debil ra lika Jisas mita “naha tasba wihtka tara” makan (Jan 12:31; 14:30; 16:11). Baha purkara, Baibil bila Setan Debil ba “naha tasba gâdka” sa wisa (2 Korint 4:3, 4). Apastil Jan ba mita sin, naha nina aisasara, wibia sa kaka, Debil ba dukyara naku win: “Tasba aiska na lika Setan karnika munuhtara sa” (1 Jan 5:19).

13. Dia muni tasba raya kum mangkbia nit sa?

¹³ Mani bani, tasba na kau saura takisa. Kau war aiklabi bangwisa, pulitik warbanka kau daukisa, serts ta uplika mawan wal bri, wihki lâ krakrikra nani ai kupia lukras upla ra kau rau muni bangwisa. Tasba saura na dan aisawan sa. Bara Baibil bila Gâd mita tisku, tasba saura na Harmagedon warka ra sauhki tiki, tasba raya kum mangkaisa wisa (Param marikan 16:14-16).

14. Gâd yaura wahbi brin ai Kingka laka Kingka kabia, bara baha takbia dukyara kaina manas dia win?

 ¹⁴ Jisas Kraist ra Jehova mita ai Kingka laka Kingka kabia wahbi brin. Baibil ba kaina manas naku win: “Tukta waitna kumi wan dukyara aisubi takan, Dawan yawan ra luhpa waitna kum wankan sa, witin ra King kaia karnika yaban sa. [...] Kupia Kumi Laka Kingka [makan kabia.] Ai kingka laka ba plis bani yaka wabia kupia kumi laka ba ban kabia” (Aiseya 9:6, 7). Kingka laka na dukyara Jisas ai disaipelka nani ra naku ai pura sunbia win: “Man king aimakaia ba yarka balbia. Man kupiam laka tasba ra daukan kabia, kasbrika purara dauki ba baku” (Matyu 6:10). Kainara laki kaikbia baku, Gâd Kingka laka ba tasba kingka laka nani ra sauhki tiki, ai watlika ra aimakan kabia (Danyal 2:44). Bara lika, tasba na paradais kum ra lakbia.

15. “Tasba raya” ba dia sa ki?

¹⁵ Baibil ra “Gâd pramis munan ba kat, [yawan] kasbrika raya bara wan tasba raya ba bila kaikisa, bara baha ra lika diara sut ba kasakkira bara pain baman kabia” (2 Pita 3:13; Aiseya 65:17). Baibil ba “tasba” dukyara aisi pyua ra, sam taim tasba ra iwi uplika nani dukyara aisisa. Baha mita, “tasba raya” ba, Gâd yamni kaiki uplika daknika kum tanka sa.

16. Gâd mita yamni kaiki nani ra dia prisantka painkira yabia ki, bara briaia sa kaka dia daukaia sa?

¹⁶ Jisas bila paradais aula ba ra, Gâd mita “raya ban kaia” prisantka painkira ba, yamni kaiki uplika ra yabia (Mark 10:30). Pliskam pali, Jan 3:16 bara 17:3 ba sin Baibilkam ra pliks. Baha ra raya ban kaia laka nahki briaia tanka Jisas smalki kan ba kais. Sakuna, Paradais tasbaia ra dia sat rayaka bribia ki? Kaisa kaikaia.

17, 18. Tasba aiskara pât apu kupia kumi laka bara kabia ba, dia muni kasak lukaia sa ki?

 ¹⁷ Saurka, war, lâ krikanka, bara rau munan laka ba sin dan apu kabia. “Wataui ba apu kabia [...]. Sakuna praut apu nani ba lika tasba na [...] brih iwi kabia.” (Lawana 37:10, 11.) Kupia kumi man kabia, kan Gâd mita “war nani apu dauk[bia] tasba aiskara” (Lawana 46:9; Aiseya 2:4). Baha pyua aimakbia taim “kupia kumi bara wapni kaia laka [...,] kati ba kasbrika purara apu takbia ba kat”, wibia sa kaka, ban kaiara kat bara kabia (Lawana 72:7).

¹⁸ Gâd uplika ba pât apu auyapahkira iwi bangwbia. Patitara Israel uplika ba Gâd bila walan taim, ai kupia pah laka kat iwi kan (Libait laka 25:18, 19). Paradais ra baha sat pahka laka briaia ba nahki painkira kabia! (Aiseya 32:18; Maika 4:4.)

19. Paradais ra plun ailal bara kabia ba nahki nu sa ki?

¹⁹ Plun wauhwanka dan apu kabia. Lawana aîulbra kum aiwani naku win: “Plauar ma ailal bara kabia, il bahna nani ba sut plun pali man kabia! ” (Lawana 72:16). “Tasba ba ai ma saki”, Jehova Gâd wapni nani ra yamni munbia (Lawana 67:6).

20. Tasba aiska paradais kum takbia ba, dia muni kasak lukaia sa ki?

²⁰ Tasba aiska ba paradais kum takbia. Naiwa, tasba ba aisawi auya sa, sakuna baha pyua ra, kau ni lata pranakira nani ra tangni mangki utla painkira nani makan kabia (Aiseya 65:21-24; Param marikan 11:18). Pyu lui wabia bara, tawa tawa tasba aiska ba painkira dauki, las kat Eden gadinka ba baku, tasba na plun ma ailal daki kabia. Ban kaiara Gâd bui ai ‘mihta ilingki rayakira nani sut ra auyapah daukbia’ (Lawana 145:16).

21. Upla wihki daiwan nani kupia kumi iwbia ba nahki nu sa ki?

²¹ Upla wihki daiwan nani ba kupia kumi iwi kabia. Daiwan wail bara daiwan tîm nani ba asla aikuki pibia.  Naiwa daiwan saura nani bara sa, sakuna baha pyua ra tuktan lupia kum ra kabia sin, saura munras kabia (Aiseya 11:6-9; 65:25).

22. Siknis nani ba ra dia takbia ki?

²² Siknis nani dan apu kabia. Gâd Kingka laka Kingka baku, Jisas ba kaina pyua ra sain kau tara nani daukbia, kanra tasba ra sain nani daukan ba wal (Matyu 9:35; Mark 1:40-42; Jan 5:5-9). Bara upla kumi sin “yang siknis sna” wibia apia (Aiseya 33:24; 35:5, 6).

23. Buan laka ba dia muni lilia kabia ki?

²³ Wan uplika nani pruan ba kli raya takbia, bara ban kaiara iwaia sanska bribia. Ya ya prura ra yapi Gâd sinska ra si, kli bukan kabia. Au sika! “Pruan nani [ba] raiti wina buan kabia.” (Wark nani 24:15; Jan 5:28, 29.)

24. Paradais tasbaia kum ra iwaia ba nahki lukisma ki?

²⁴ Ya ya wan Papaskra Tara, Jehova Gâd tanka lan takbia ba, kaina pyua aihka painkira rayaka kum bribia. Naha kaina pyua Paradaiska tanka aisi, Jisas ai tnayara saura dadaukra kum pruan ba ra, naku pramis munan: “Yang wal Paradais ra kama” (Luk 23:43). Pramiska nani sut na Jisas Kraist bak daukai ba mita, yawan mahka witin tanka kau lan takaia sa.