1, 2. Dia muni wan pura sunaia ba diara kum painkira sa ki, bara dia muni wan pura sunaia dukyara Baibil tanka ba misar lan takaia sa?

HEVEN yahpika tarkatara ba wal praki, tasba ba sirpi lupia sa. Jehova, ‘heven bara tasba Papaskra ba’ mapara, nisan nani ba li ma kum bukit kum bilara baku sa (Lawana 115:15; Aiseya 40:15). Ban sakuna, Baibil bila: “Dawan baha nani sut lamara sa, [...] baha nani sut kasak tanka ra witin ra wini ba, witin ra luki bangwi ba brinka kat, witin daukbia, witin nani wini yaba sin walbia” (Lawana 145:18, 19). Tikska na dia tanka bri ba ra luki kais. “Kasak tanka ra witin ra win[bia]” kaka, Karnika sut bri Papaskra pali ba, wan lamara si, wan walbia. Witin ra wan pura sunaia sip kaia ba, nahki painkira sa!

² Ban sakuna, Jehova wan pura sunra walbia yawan want sa kaka, witin yamni kaiki ba kat brih wapaia sa. Sakuna, Baibil tanka ba nu apu sa kaka, nahki yamni kat wan pura sunbia ki? Baibil tanka ba misar lan takaia sa, kan wan pura suni Gâd wal kau lamara sa.

3. Ani tanka kum ba mita wan pura sunaia sa ki?

³ Jehova ra wan pura sunaia sa, kan witin bui baku daukaia wan paiwisa. Baibil bila: “Man nani diara kumi dukyara sin sari takpara, sakuna dia dia luha sma ba sut, Gâd ra puram sunra nani ra wis; makabi bas bara tingki sin wis. Bara Gâd ai kupia kumi laka, bara upla tanka briaia praiska sut pura lui ba, witin maikbia; bara [...] man kupiam [...] lukanka nani sin maikan kabia, Kraist Jisas wal asla” (Pilipai 4:6, 7). Rait apia, Wihta Kau Tara paiwanka dauki na briaia aitani sa?

4. Wan pura pat pat suni taim, dia muni Jehova wal kau pana takisa ki?

⁴ Wan pura sin sunaia sa, kan pat pat wan pura suni taim, Jehova wal kau pana takisa. Panika pain nani tilara, pana pana ai panika ra lukisa. Diara kum nit sa taim baman wal aisaras, kuna ini minit ra daukisa. Bara wal sut pana pana ai kupia lukanka, warika apia kaka dara walanka nani sin param aisi, pana laka kau pain kum pakisa. Jehova panika kaia ba, sat kum ra, sim baku takisa.  Naha bukka helpka ba tingki, Jehova dia sat uplika sa sapa, bara ani ai lukanka sa sapa sin, man Baibil ba wina kasak lan takram sa. Nanara, Gâd ba upla kum rait bara ba baku tanka lika kaikisma. Bara puram sunra bak heven ra Aisikam ba ra, kupiam munuhta wina lukankam ba wiaia sip sma. Baku dauki muni, kau witin lamara damra walma (Jems 4:8).

5. Gâd ba pura sunra nani sut walisa ki?

⁵ Gâd ba pura sunra nani sut walisa ki? Prapit Aiseya pyua ra, Israel uplika kyamapara nani ra, Gâd naku win: “Man nani puram sunra ailal aisama sin, yang mai walamna apia. Man nani mihtam nani ba tala baman alkan sa” (Aiseya 1:15). Bahamna, Gâd saura kaiki dukya kum yawan daukbia kaka, witin wan pura sunra walbia apia. Baku bara, wan pura sunra witin walbia dukyara, makabi yaba alki brih daukaia sa.

6. Gâd wan pura sunra walbia dukyara, yawan dia bri kaia sa, bara brisa sapa nahki marikisa ki?

⁶ Diara kum makabi ba sika, kasak lukan laka bri kaia (Mark 11:24). Apastil Pâl mita win: “Upla kum kasak lukan laka apu kaka, witin ra Gâd mita sip pain kulkbia apia. Kan ani uplika Gâd lamara waia kaka, kasak lukaia sa Gâd ba bara sa, bara witin ra pliki uplika nani ra sin mana yabisa” (Hibru nani 11:6). Ban sakuna, kasak lukan laka rait ba, wan daukanka ni marikisa. Wan pura sunra wali ansika yabi Gâdka kum bara ba nu takaia baman aitani apia sa. Yawan kasak lukan laka bri ba, wan iwanka satka ni latan marikaia sa (Jems 2:26).

7. a) Dia muni rispik laka kat Gâd wal aisaia sa ki? b)Wan pura suni, nahki wan kupia kwaki bauan laka marikisa ki?

⁷ Diara wala makabi ba sika, kupia kwakikira bauan laka ni wan pura sunra daukaia. Bara rait apia, yawan Gâd wal aisi, bauan laka misar marikaia sa? Upla ra  prisidint kum wal aisaia sanska yabi taim, rispik wal aisisa, kan kulkanka tara bri ba pain nu sa. Jehova ra sika kulkanka kau tara ni aisaia sa! (Lawana 138:6.) Kan witin sika “Dawan Karnika Sut Bri[sa]” (Blasi sturka 17:1). Yawan, witin wal kau mayara pali ba nu si, nahki muni bauan laka marikisa ki? Wan pura sunra ra nahki aisi ba wina marikaia sip sa. Bauan laka na mita, yawan kli kli sim dukya wiras, wan kupia munuhta wina aisabia (Matyu 6:7, 8).

8. Nahki wan pura suni ba kat daukaia sip sa ki?

⁸ Diara wala yawan daukaia ba sika, dia pura suni makabi ba kat daukaia. Wibia sa kaka, puram suni “yua pata ba” Gâd ra makabisma kaka, wilin kaia sma ani warkka daukaia sip sma ba ra, karna wark takaia (Matyu 6:11; 2 Tesalonaika 3:10). Baku sin, wan swapnika kum pura luaia helpka makabisa kaka, traika kaikanka kum ra wan brihwaia sip dukya nani wina laiura kaia sa (Kolosi 3:5). Sakuna, Gâd dia makabi yaba nu takaia purkara, pura sunra dahra makabi walanka wala kum kum ba laki kaikaia nit sa.

9. Yaura baman, bara ya bak wan pura sunaia sa ki?

⁹ Yaura wan pura sunaia sa ki? Jisas ai disaipelka nani ra, naku ai pura sunbia win: “Yawan Aisa kasbrika purara sma ba” (Matyu 6:9). Au sika, Jehova Gâd ra baman wan pura sunaia sa. Ban sakuna, Gâd want sa ai Luhpia unsak, —Jisas Kraist— kulkanka bri ba dukyara wan tanka bribia. Saptika 5 ra kaikan baku, saurka bara prura wina swaki wan sakaia dukyara, Gâd mita Jisas ra tasba ra blikan (Jan 3:16; Rom 5:12). Baha purkara, Prîst Tara bara Wihta baku sin Jisas ra mangkan (Jan 5:22; Hibru nani 6:20). Baha taka mita, Baibil bila Jisas bakku  wan pura sunaia sa wisa. Jisas bui win: “Yang sika yabal ba, kasak tanka ba bara rayaka ba sin. Yang bak baman sip sa Aisa ra waia” (Jan 14:6). Wan pura sunra walbia dukyara, Jehova ra baman, ai Luhpia bak wan pura sunaia sa.

10. Pura suni taim, dia muni wan wîna tara ba sat kum ra mangki bri kaia nit apia sa ki?

¹⁰ Pura suni taim, wan wîna tara ba sat kum ra mangki bri kaia sa ki? Apia! Gâd makabras wan mihta, apia kaka wan wîna tara ba sat kum ra bri kabia. Baibil bila wan wîna tara sat sat mangkisi wan pura sunaia sip sa wisa. Iwi, baui, wan lula kriki, apia kaka bui kaia sip sa (Nihimaya 8:6; Danyal 6:10; Luk 18:13). Wan wîna tara nahki sat ra mangki bri kabia ba, upla wan kaikbia dukyara daukras, sakuna bauan laka ni wan pura suni ba marikaia dukyara lika daukisa. Ani pliska bara ani pyua ra kabia sin, sap wan kupia munuhta wina kabia sin, wan pura sunaia sip sa. Man puram sunisma upla kumi sin ai dara walras kabia kra sin, Jehova lika walisa (Nihimaya 2:1-6).

11. Dia ba dukyara wan pura sunaia sip sa ki?

¹¹ Dia ba dukyara wan pura sunaia sip sa ki? Baibil bila: “[Gâd] kupia laka kat [yawan] dia dia makabuya ba wan walisa” (1 Jan 5:14). Baku bamna, ani dukya ai kupia laka kat kaka, yawan wiaia sip sa. Naha tanka ra, witin wan kupia turbanka nani walaia brinka sa ki? Misar! Jehova ra wan pura sunaia ba, panika latwankira kum wal aisaia baku sa. Wan ‘kupia aiska’ ni, witin ra wan pura sunaia sip sa (Lawana 62:8). Baku sin, wapni kaia dukyara ai spiritka hulikira wankbia makabaia ba aitani sa (Luk 11:13). Baha purkara, diara kum daukaia luki taim, sins laka wankbia bara traika kaikanka nani pura luaia karnika sin wankbia makabaia sa (Jems 1:5). Saurka kum daukan kaka, Jisas Kraist sakripaiska ra kasak  luki, Jehova ra padin wan munbia bik takaia sa (Epesus 1:3, 7). Sakuna wan wîna ra baman lukaia apia sa, upla wala dukyara sin, wan taya bara wan muihni-lakri nani tawan wan pura sunaia sa (Wark nani 12:5; Kolosi 4:12).

12. Nahki muni Jehova ra pas luki wan pura sunbia ki?

¹² Wan pura sunra nani ra, Jehova Gâd mayunra ba kulkanka kau tara bri kaia sa. Gâd kupia pihnika ba tawan, tingki wiaia bara witin ra mayunaia ba aitani pali sa (1 Kronikas 29:10-13). Jisas ba, Matyu 6:9-13 kat, nahki wan pura sunaia ba lan daukan. Baha ra, Gâd nina ba hulikira kulkan kabia makabaia yawan lan takisa. Ningkara, Gâd King aimaki ba yarka balbia, bara ai kupia laka ba kasbrika purara dauki ba baku tasba ra sin daukbia makabisa. Jisas ba, Gâd mayunra dukyara pas makaban, bara ningkara lika nitka wala nani dukyara aisan. Yawan sin Jehova ra pas luki wan pura suni taim, wan wîna ra baman lukras ba marikisa.

13. Wan pura sunra yarka praiska dukyara, Baibil ra dia wisa ki?

¹³ Wan pura sunra ba yari aisaia sa ki? Yawan selp, apia kaka upla mawanra wan pura suni kabia sin, Baibil ba, yarka praiska lika wiras. Plun piras kainara kunhku daukaia, apia kaka, yawan saitra selp wan kupia kwaki, kau wira yari wan pura sunra daukaia sip sa (1 Samyuil 1:12, 15). Ban sakuna, Jisas mita sunu papulra nani pura sunra yari, upla kaikbia dukyara dauki kan ba mapara laui aisan (Luk 20:46, 47). Baha sat pura sunra nani ba, Jehova mapara yus apu sa. Kupia munuhta wina wan pura sunaia lika diara kum tara sa. Baku bamna, yawan dia nit ba mita, bara ani pliska ra bangwi ba mita sin, wan pura sunra ba yari, apia kaka kunhku daukisa.

14. “Puram suni bas” sturka ba dia tanka sa sapa, bara yawan dia yamnika brisa sapa sin aisas.

¹⁴ An taim wan pura sunaia sa ki? Baibil bila: “Puram suni bas”, “pyu bani puram sunaia laka ba swipara”,  bara “pyu bani puram suni bangwi bas” (Matyu 26:41; Rom 12:12; 1 Tesalonaika 5:17). Sakuna, yawan 24 awar wan pura suni kaia tanka lika apia sa. Tanka ba sika, yu bani karnika wankbia, wan ta bribia, wan maisanihkbia makabaia, bara yawan tingki wiaia dukyara sin, Jehova ra wan pura sunaia sa. Nahki yamni pali sa! Ini minit Jehova ra wan pura sunaia sip sa. Pura sunra ba yawan tara kulkisa kaka, pat pat wan Aisa painkira ra wan pura sunbia.

15. Saitra selp, apia kaka upla mawanra kabia sin, dia muni pura sunra ba “amen” aisi prakaia sa ki?

¹⁵ Dia muni wan pura sunra ba “amen” aisi prakaia sa ki? “Amen” tanka ba sika “baku kabia”. Baibil bila yawan selp, apia kaka upla mawanra wan pura sunbia taim, “amen” aisi prakaia sa wisa (1 Kronikas 16:36; Lawana 41:13). Saitra selp wan pura suni “amen” aisi prakisa taim, kupia munuhta wina yawan aisan ba tanka sa. Wan kupia munuhta wina, apia kaka wan karma tara wal aisi kabia sin, upla mawanra pura sunan ba, “amen” aisi prakisa taim, yawan au takan ba marikisa (1 Korint 14:16).

16. Wan pura suni taim, diaura kasak lukaia sa ki?

¹⁶ Gâd mita wan pura sunra ansika rait wankisa ki? Misar wankisa! Upla milian milian ai pura sunisa, bara Gâd bui baha pura sunra ansika yabi ba yawan kasak lukaia sip sa (Lawana 65:2). Bara tnatka sat sat ra ansika sin wankisa.

17. Dia muni wan pura sunra ansika wankaia wisi, Gâd ai insalka nani, bara tasba ra ai napakanka nani sin yus munisa wiaia sip sa ki?

¹⁷ Naha tanka ra, Gâd ba wan pura sunra ansika wankaia wisi, ai insalka nani, bara tasba ra ai uplika nani sin yus munisa (Hibru nani 1:13, 14). Upla ailal ba, ai pura  suni Baibil tanka briaia helpka makabisi, minitka ra Jehova napakanka kum ban wina witin ra bal kaikan wisa. Baku taki ba mita, insal nani smalki warkka ta bri ba tanka marikisa (Param marikan [Reveleshan] 14:6). Baku sin, pât wauhwi taim, wan pura sunra ansika wankaia dukyara, Jehova mita ai napakanka kum wan ta baikbia daukaia sip sa (Sins laka 12:25; Jems 2:16).

18. Jehova wan pura sunra ansika wankaia wisi, ai spiritka hulikira ba, bara Baibil ba sin nahki yus munisa ki?

¹⁸ Jehova mita ai spiritka hulikira, bara Baibil bakku  sin, wan pura sunra ansika wankisa. Yawan trabil kum pura luaia helpka makabisa taim, ai spiritka hulikira ni tapahki wan ta briaia sip sa (2 Korint 4:7). Bara wan rayaka ra dia daukaia luki wan pura suni taim, sam taim Baibil smalkanka nani ni ansika wankisa. Ban kra, yawan selp Baibil laki kaiki taim, apia kaka naha sat bukka ulbi sakanka nani aisi kaiki taim, help wan munbia tikska painkira nani sakisa. Baha purkara sin, asla aidrubanka ra sapa, apia kaka kangrigisan almukka kum wan yamnika ra luki ba mita sapa, ani Baibil lâka wan rayaka ra alki briaia nit ba wan wibia (Galesha 6:1).

19. Gâd wan pura sunra ansika ba wankras baku wan dara walbia kaka, diaura lukaia sa ki?

¹⁹ Gâd wan pura sunra ansika wankaia uba takaskisa baku wan dara walisa kaka, witin ba ansika kum sip wankras sa lukbiara. Diara kum lika wan auya tikbiara: Witin wan pura sunra ansika wankbia ba, ai kupia laka kat daukbia. Yawan dia nit ba, witin kau pain nu si, aitani pitka kat wankisa. Baha taka mita, sam taim yawan kau “makabi”, kau “pliki”, bara “dur ra [kau] kingbi” kabia isa (Luk 11:5-10). Yawan baku takaskras dauki kabia  kaka, wan kasakka lukan laka tara, bara wan pura sunra walbia brinka karna bri ba sin marikbia. Bara yawan sip kaikras tnatka kum ra kra ansika wankbia. Naha tanka ra, yawan trabil kum bri ba tawan makabisa kaka, ban kra wan trabilka tikaia watlika ra, ban bapi bui kaia karnika ni wankbia (Pilipai 4:13).

20. Dia muni wan pura sunaia sanska wanki ba briaia sa ki?

²⁰ Yawan mita heven yahpika tarkatara Papaskra ra tingkika tara yabisa! Kan ya ya witin kupia laka kat ai pura suni ba ai lamara sa (Lawana 145:18). Wan pura sunaia sanska wanki ba mita yamnika bri bangws. Yawan daukbia kaka lika, Jehova Gâd, wan pura sunra Wawalra ba lamara kaia liliaka bribia.