1. Kaina pyua ra dia takbia ba anira lan takaia sip sa ki?

RADIU RA, apia kaka tilivisan ra tasba sturka nani taki ba walisma taim, rait apia tasba na wal las kat dia takbia sapa lukisma? Kan trabil tara nani isti ban wina takisa, bara yauhka tasba ra dia takbia kra sin upla nu apu sa (Jems 4:14). Sakuna Jehova lika nu sa (Aiseya 46:10). Pat aihwa wina Dawan Bila ba mita, trabil tara nani naiwa taki ba, bara tisku kaina pyua ra blisin nani takbia ba sin aisan.

2, 3. Disaipelka nani ba Jisas ra dia makabi walan, bara Jisas pana dia win?

² Jisas Kraist bui Gâd Kingka laka —baha gabamintka saurka laka ba sauhki tiki, tasba na paradais kum ra lakbia ba— dukyara aisan (Luk 4:43). Jisas ra walan uplika mita, Kingka laka na ahkia balbia sapa nu takaia want kan. Ai disaipelka nani kat sin Jisas ra nan makabi walan: “Man balaia sma ba bara tasba tnata sainka ba sin ani kabia ki?” (Matyu 24:3). Jisas bila tasba na iwanka saura tnata yua ba, Jehova baman nu sa win (Matyu 24:36). Ban sakuna, Gâd Kingka laka mita kupia kumi,  pât apu laka tasba ra bri balras kaina pali ra, dia takbia ba lika Jisas bui win. Bara Jisas aisan ba kat, naiwa takisa.

³ “Tnata yua nani” ra iwi ba dukyara kau laki kaikras ba ra, kaisa war kum upla kumi sin kaikras kan ba tanka wira aisaia. Warka na heven ra takan. Sakuna takan ba mita wan rayaka ra dia kabia ki?

4, 5. a) Jisas heven ra king aimakisi dia takan ki? b)Param marikan 12:12 wi ba kat heven ra war takan ba mita, dia kabia win?

⁴ Saptika luan ba ra kaikan, 1914 manka wina Jisas ba heven ra king aimakan (Danyal 7:13, 14). Bara ai warkka mahka daukan! Baibil bila: “Kasbrika purara war tara kum takan: Maikal [Jisas nina wala kum] ai insalka nani aikuki, dragun [Setan] ba mapara aiklaban. Dragunka ai insalka nani sut kira sin mapara bui aiklaban”. * Bara Debil ai lasika nani aikuki, aiklabi sip pura luras kan, bara mahka tasba ra lulkan kata. Insal wapni nani ba, Setan bara ai lasika nani heven ra dan apu kan ba mita uba lilia takan. Sakuna tasba uplika ba lika sip lilia kapras. Kau ni, Baibil ra naku aisisa: “Tasba ra [...] iwi nani ba mapara lika alai pali kabia, kan Debil ba man nani ra iwan sa, ai kupia sin baikan sa, kan witin kaikisa kau pyua wiria baman brisa bamna” (Param marikan [Reveleshan] 12:7, 9, 12).

⁵ Bika! Heven ra war takan ba mita, Debil ba ai kupia baiki tasba uplika nani ra trabil munai kan. Kaikbia baku yawan nawas baha trabilka nani tilara sa. Sakuna Setan kat sin nu sa naha ba “pyua wiria [kum] baman” kabia. Baibil ra, naha pyua ba “tnata yua nani” makisa (2 Timoti 3:1). Rait apia, Gâd bui Debil ba tasba ra ai karnika mangki bri ba tikai ba dukyara yawan lilia takisa?  Kaisa diara kum kum naiwa taki ba, Baibil ra pat kaina manas win kan ba laki kaikaia. Naha taki ba mita marikisa yawan tnata yua nani ra iwisa, bara aihni pali Gâd Kingka laka ba tingki, Jehova ra latwan kaiki uplika ba dukyara blisin ailal bara kabia. Pas pali, kaisa wan pyua dukyara sainka walhwal Jisas yaban ba tanka laki kaikaia.

6, 7. War nani bara plun tiwan dahra Jisas aisan ba, naiwa pyua ra nahki tnata aimakisa?

⁶ “Kuntri kumi mita wala mapara aiklabia, tasba kum mita wala mapara war aiklabia.” (Matyu 24:7.) Mani andat luan ba bilkara war aiklabanka nani taka upla milian milian prui tiwan. Inglan kuntrika wina sturi aîulbra kum bila: “Mani andat luan ba ra, upla rayaka kau iki tikan kan. [...] Kan baha pyua bilkara takaskraskira war nani aiklabi bangwan, dis pyua kunhku kum kum ra man, war aiklabras kan”. Naha dahra Worldwatch Institutoka bila, “Jisas pyua wina 1899 manka kat, war aiklabanka taka upla an pruan ba kulki praki kaikbia kaka, [mani andat luan na bilkara] war nani taka aima yuhmpa prais kau upla pruan” wisa. 1914 manka wina war aiklabi  ba taka, 100 milian purkara upla pruan sa. Au sika! Upla ailal ba ai uplika ra war ra tikan. Ban kra man sin baha sarka tara briram.

⁷ “Plun tiwan sin bara [...] kabia.” (Matyu 24:7.) Diara tanka pliki kakaira nani bila, mani 30 bisi luan ba bilkara, tasba aiskara kau plun kriki sakan sa. Sakuna plun wauhwan ban bara sa, kan upla ailal ba plun atkaia lalah apu, bara mangkaia nasla sin apu sa. Bara kuntri kau umpira nani ra upla 1.000 milian purkara lalah wiria ni —dis dalas kum, apia kaka, kau wiria ni— yu bani iwisa. Bara aihkika na plun bla pruisa. Organización Mundial de la Salud bila, mani bani tuktan 5 milian purkara plun sanglan pâtka ba mita pruisa wisa.

8, 9. Siknis bara tasba nikbanka nani dahra Jisas aisan ba, tnata aimaki ba nahki nu sa ki?

⁸ “Tasba nikban tara nani kabia.” (Luk 21:11.) Miriki Geological Survey asla takanka bila, mani bani ­tasba nikbanka 19 prais baku takisa, bara tara nikban ba mita, utla sauhkaia bara tasba baikaia sip kan wisa. Bara mani bani prais baku, tasba nikbanka tarkatara pali kum ­takisa wisa. Tanka laki kaikan nani ba marikisa tasba nikbanka nani mi­ta 2 milian pura upla rayaka iki tikan sa mani 1900 wina. Ulbanka wala sin naku wisa:  “Tasba sinska pawanka ba mita upla pruras kabia uya ta baikras”.

⁹ “Siknis sat sat [bara] kabia.” (Luk 21:11.) Sîka paskaia wisi karna wark takisa, sakuna patitara sikniska, bara siknis raya nani sin upla ra ban alkisa. Naha dahra ulbanka kum sakan ba bila, bisi mani luan nani ba ra, patitara sikniska 20 baku kli bal takan sa, bara sîka ni rakaia kau karna munisa. Naha nani tilara pusa sikniska, rihka sikniska bara kolera sikniska ba sin bara sa. Baha purkara sin, siknis raya 30 baku bal takan sa. Kum kum ba wan ikaia sip sa, sakuna rakaia saîka kau sakras sa wisa.

10. Ani daukanka nani 2 Timoti 3:1-5 kat ulban baku naiwa pyua uplika ra kaikisa ki?

¹⁰ Baibil ba mita tnata yua nani ra dia takbia ba win, sakuna upla daukanka ba dia sat kabia ba sin kaina manas win. Upla aihkika ba nahki kabia dahra, Apastil Pâl mita 2 Timoti 3:1-5 kat naku ulban: “Tnata yua nani ra pyua karna nani balbia”. Bara upla daukanka nani ba naku kabia win:

• klauna ai wîna ra baman lukbia

• lalah ra latwan kaikbia

•   ai aisa ai yapti bila walras kabia

• tingkikas kabia

• ai uplika ra latwan kaikbia apia

• ai wîna brinka alki takaskras kabia

• prautkira nani kabia

• Gâd ra plikaia watlika ra, ai wîna brinka pliki kabia

• Gâd ra lukisa talia kabia, sakuna ai daukanka ni kristian laka kasak kat daukbia apia

11. Lawana 92:7 ra mariki ba baku, upla watauikira nani ra dia takbia ki?

¹¹ Taunkam uplika ba baku sa ki? Au kaia sa. Kan ani pliska ra wabia sin baha sat uplika kaikisa. Naha wan marikisa Gâd ba aihni pali wapnika mangkbia, kan Baibil bila: “Upla watauikira bara saura dadaukra nani ba, intawahya baku pawisa, bara sin uya sahwi kaka baha nani sut ba sauhki tikan kabia ban kaiara” (Lawana 92:7).

12, 13. Dia wan marikisa Gâd tanka “sinska” laka ba naha “las pyua” ra kau pawisa?

¹² Latan sa! Tnata yua nani na ra, Baibil aisan baku pât ailal bara sa. Ban sakuna, Jehova uplika ba tilara diara yamni nani takisa.

 ¹³ “Sinska [...] kau pakaia” dukyara Danyal ba kaina manas ulban. Ahkia kat baha sinska laka ba pakan kabia ki? “Las pyua ba balbia kat.” (Danyal 12:4, Miskitu Testament Almuk, 1991.) Kau pali 1914 manka wina, Jehova bui ai uplika ra, Baibil dia wi ba diara kum kum tanka kau pain bribia dukyara ta baikisa. Naha tanka ra, Gâd ai nina, bara ai lukanka ba, Jisas Kraist sakripaiska ba, upla pruan nahki bangwi ba, bara prura wina buaia laka tanka ba sin brisa. Baku sin, Jehova uplika kum baku, rayaka wapni kum brih, yamnika saki, Gâd dukya daukaia sin lan takan sa. Gâd Kingka laka ba dia sa sapa, bara tasba pâtka nani wapnika mangkbia ba dahra ai tanka sin brisa. Sakuna baha sinska laka brin ba wal, dia dauki bangwisa ki? Naha ra luki, kaisa diara wala tnata yua nani na ra aimaki ba kaikaia.

14. Gâd Kingka laka sturka yamni ba naiwa pyua ra dia pitka kat smalkisa, bara ya nani mita daukisa ki?

¹⁴ “King[ka] laka sturka yamni na tasba aiskara smalkan kabia.” Jisas naha win taim, tasba iwanka saura tnata sainka dahra aisi kan (Matyu 24:3, 14). Tasba aiskara naha Kingka laka sturka yamni ba smalkisa. Wibia sa kaka, Kingka laka ba dia sa, dia daukbia ba, bara nahki blisin wan munaia sip ba sin smalkisa. Sturka yamni nani na kuntri 230 pura, bara bila aisanka 400 pura kat sin smalkisa. ‘Nisan sat sat, tayka sat sat, bara bila aisi sat sat’ Jehova Witniska milian milian ba mita, takaskraskira King laka sturka yamni ba smalkisa (Param marikan 7:9). Bara upla milian milian wala nani ra, rait pali Baibil ba dia smalkisa tanka dukyara stadika prisant yabisa. Naha tnata aimaki ba, diara kum tara sa, kan Jisas bila rait aihwa kristianka nani ra “tasba aiska na misbara [...] kaikbia” win (Luk 12:17).

15. a) Yawan tnata yua nani ra sa lukisma ki, bara dia muni baku lukisma? b)Jehova mapara bubia nani ba, bara ai gabamintka mina munuhtara kabia nani ba mapara, “tnata ba” dia kabia ki?

¹⁵ Naha sut Baibil ra kaina manas win ba, tnata aimaki ba kaiki, rait apia yawan tnata yua nani ra iwi ba latan sa? Gâd Kingka laka sturka yamni ba, Jehova mita aitani wibia kat smalkaisa, “bara lika tnata ba aimakbia” (Matyu 24:14). “Tnata ba” sika, Gâd bui tasba na wina watauan laka sut diki sakbia pyua tanka sa. Jisas bara insal karnakira nani bak, Jehova mita ya ya witin mapara bubia ba sauhki tikan kabia (2 Tesalonaika 1:6-9). Setan ai lasika nani wal dan upla ra mawahkras kabia. Baha ningkara, Gâd Kingka laka bui ya ya ai gabamintka mina munuhtara kabia ba ra blisin munbia (Param marikan 20:1-3; 21:3-5).

16. Man dia daukma lika sinska brisa?

¹⁶ Setan tasba iwanka saura na tnata aimakaia pat baila ba mita, yawan kumi bani selp aman lukaia sa: “Yang dia daukaia sna ki?”. Kau sinska bri ba sika, Jehova tanka dahra, bara witin dia wan makabi ba dahra sin kau pliki kaia (Jan 17:3). Kupia wilinkira ni aman pali Baibil stadi taki bas. Jehova uplika wal asla aidrubisma ba dakpara (Hibru nani 10:24, 25). Gâd mita sins laka wanki ba brih, bara rayakam ba wapni ra laks (Jems 4:8).

17. Dia muni upla saura sauhki tikanka ba, upla aihkika ba ai dara walras kaprika takbia ki?

¹⁷ Jisas bila upla aihkika ba, tnata yua sainka nani ba kaiki, ai kupia lukras kabia win. Upla saura sauhki tikanka ba, ai dara walras kaprika, aîmplikra kum tihmia ra tauki ba baku ban wina isti bal takbia (1 Tesalonaika 5:2). Jisas wan maisapahki win: “Noa yua nani ra pât takan ba baku takbia, upla Luhpia waitna kli balbia bara. Baha yua nani ra, lisamra tara ba kainara, upla nani ba plun baman pi kan, diara di kan, marit taki kan, ai  luhpia mairin nani marit saki kan, Noa ark ra diman yua ba kat; bara witin nani ai dara walras kan, lisamra tara ba bal sut brih wan ba kat. Upla Luhpia waitna balbia pyua sin baku kabia” (Matyu 24:37-39).

18. Ani Jisas maisapahkanka ba pulraskira alki briaia sa ki?

¹⁸ Bahamna Jisas win: “Aman kaiki bas, tasba brinka nani ba mita, bla laka nani mita bara naha tasba trabilka nani mita sin yarka kupiam nani ba karna takbiara, baha yua kra damra walras kaprika mai alkbiara sia. Mina alkaia kumi ai bila prakuya ba baku kabia, naha tasba ra iwi uplika sut ra. Bamna man nani ridi bas, bara pyu bani sin puram suni bas, bara baku mika sip kama naha diara nani takaia ba wina swakwaia, ban sin upla Luhpika waitna mawanra [yamni] kaia” (Luk 21:34-36). Jisas naha aisan ba yawan pulraskira alki briaia sa. Dia muni? Kan tasba iwanka saura Setan ta bri na apu takbia taim, Jehova Gâd wihki “upla Luhpika waitna” —Jisas Kraist ba— mawanra ya ya yamni kabia ba lika swakwi taki, tasba raya pranakira kum ra ban kaiara iwbia (Jan 3:16; 2 Pita 3:13).