Naha wauhkataya ra dîa lan takram ba hilp mai munan sa Jehova ra kau latwan kaikaia. Sakuna, baha latwanka lâka ba kau tara daukaia sa (1 Pita 2:2). Raya ban kaia lâka briaia dukiara Jehova lamara kaia sa bara Baibil stadi takaia sa. Jan 17:3 bara Judas 21 aisi kaiks.

Gâd dukiara lan taki wama taim, man kasakkam lukan lâka ba kau karna takbia. Kasak lukan lâka ba Gâd ba pain kaikisa (Hibru Nani 11:1, 6). Naha ba hilp mai munbia rayakam ba chens munaia dukiara. Apastil Nani Sturka 3:19.

Ban kra want kama upla wala nani ra wiaia dîa lan takisma ba, kan upla sut want sa sturi pain nani aisaia. Baibil stadi taki wama taim, man lan takma nahki Baibil ba yus munaia upla wala nani ra Jehova dukiara smalkaia. Roman 10:13-15, TNM aisi kaiks.

Upla manis ai pamalika ra bara ai pânika nani ra smalkisa. Man baku daukma taim rispik lâka bara tânkira lâka wal dauks. Witin nani dîa luki ba kunin sa wiaia watlika ra, kau pain sa Gâd pramiska nani dukiara aisaia. Amya tiwbiara daukankam pain nani brisma kaka, kau pain kabia sturi aisi smalkaia ba wal. 2 Timoti 2:24, 25 aisi kaiks.

Baibil stadi takaia ba hilp wan munisa, spirit lâka ra, pâwaia dukiara. Baku sin, Jehova wal pânika lâka kum briaia sip sa. Man Jehova pamalika tilara uplika kum kaia sip sma. 2 Korint 6:18 aisi kaiks.

Baibil ba ban stadi taki bas (Hibru Nani 5:13, 14). Jehova Witniska kum ra makas Baibil stadika kum maikbia. Witin nani Rait pali Baibil ba Dia Smalkisa ki? bukka ba yus munbia stadika maikaia dukiara. Kau lan taki wama taim, rayakam ra kau lilia kama. Lawana 1:1-3 bara 73:27, 28 aisi kaiks.

Kupiam krauks sturi yamni nani ba Jehova wina balisa, kan Witin ba liliakira Gâdka kum sa. Witin lamara ban kaia dukiara ai uplika aikuki ban asla takaia sa (Hibru Nani 10:24, 25). Jehova kupia lâka ban daukisma kaka, raya ban kaia lâka ba brima. Baha mita, Gâd lamara kaia ba diara kau tara sa. 1 Timoti 1:11 bara 6:19 aisi kaiks.