Wan Papaskra ba kau sinskira sa yawan ba wal. Witin Aisa latwankira kum sa, bara yawan dukiara lukisa. Baha mita, Witin want apia sa yawan silp wan rayaka ba tâ bribia (Jirimaya 10:23). Tuktan sirpi nani ba nit sa ai aisa yapti ba witin nani ra tâ bribia. Sim baku yawan nit sa Gâd wan tâ bribia (Aiseya 48:17, 18). Baibil smalkanka nani ba wan tâ brisa. Naha ba Gâd prisantka kum sa. 2 Timoti 3:16 aisi kaiks.

Jehova lâka nani bara ai smalkanka nani ba wan wisa nahki wan rayaka ba kau pain iwaia. Baku sin, wan marikisa nahki muni raya ban kaia lâka ba briaia. Gâd wan paskan bara wan tâ bri ba mita wan tingkika lâka Witin ra yabaia sa. Lawana 19:7, 11 bara Param Marikanka 4:11 aisi kaiks.

Baibil smalkanka nani ba tânka kasak sa. Sakuna, Baibil lâka nani ba, piu kum kum ra baman yus munisa (Kli Smalkanka 22:8). Yawan luki kaikaia nit sa ahkia piua ra Baibil smalkanka nani alki daukaia sa (Sins Lâka 2:10-12). Sampla baku, Baibil ba smalkisa wan rayaka ba Gâd prisantka kum sa. Naha ba wan tâ brisa, wan watla ra, wark pliska ra bara yawan impakisa piua ra sin. Baku sin naha hilp wan munisa aksidint nani wina wan kan kahbaia. Apastil Nani Sturka 17:28 aisi kaiks.

Jisas win smalkanka wâl kau tara bâra sa. Pas ba, wan marikisa Gâd upla nani dukiara dîa luki ba.  Witin ra kau pain kakaira takaia dukiara hilp wan munisa, bara nahki Witin ra kasak kaia ba sin. Naha smalkanka ba wan rayaka sut ra alki daukaia sa (Sins Lâka 3:6). Ya naha smalkanka ai rayaka ra alki dauki ba, Gâd pânika takaia sip sa. Baku sin raya ban kaia lâka bara lilia lâka bribia. Matiu 22:36-38 aisi kaiks.

Smalkanka wala ba hilp wan munisa upla wala nani wal asla lâka ra iwaia (1 Korint 13:4-7). Naha smalkanka wala alki daukaia ba tânka sa Gâd upla nani ra nahki kaiki baku yawan sin kaikaia. Matiu 7:12 bara 22:39, 40 aisi kaiks.

Baibil smalkanka nani ba pamali nani ra hilp munisa latwan lâka ra asla iwaia dukiara (Kolosi 3:12-14). Baibil ba sin pamali nani ra kaina kahbisa, kan witin nani ra smalkisa marit lâka ba ban kaia ra iwbia. Blasi Sturka 2:24 aisi kaiks.

Baibil smalkanka nani ba hilp wan munisa wan lalahka apahkaia bara wan lukanka pain kum briaia. Sampla baku, kampani dawanka nani ba upla nani ai rayaka ra Baibil smalkanka alki dauki baman wark yabisa. Kan witin nani ba implikras bara wark pain daukisa (Sins Lâka 10:4, 26; Hibru Nani 13:18). Baibil ba sin wan smalkisa dîa bri ba wal lilia iwaia bara Gâd wal pânika lâka bri ba kau tara kulkaia yuyaka nani ba wal. Matiu 6:24, 25, 33 bara 1 Timoti 6:8-10.

Baibil smalkanka nani ba wan wîna tara yamnika pain kum briaia hilp wan munisa (Sins Lâka 14:30; 22:24, 25). Sampla baku, laya tahpla uba diaia apia ba hilp wan munisa kau wahma tiara piua ba ra pruaia apia dukiara. Baku sin aksidint takaia apia dukiara wan kan kahbisa (Sins Lâka 23:20). Jehova swisa yawan laya tahpla dibia, sakuna pitka kat daukaia sa (Lawana 104:15; 1 Korint 6:10). Baibil smalkanka ba wan marikisa daukanka nani pain briaia. Sakuna wan lukanka nani sin laki kaikaia sa (Lawana 119:97-100). Kristian rait aihwa nani ba Gâd lâka nani alki daukras ai rayaka ra yamnika manis briaia dukiara baman. Witin nani alki daukisa, kan baku natka ra Jehova ra kulkanka tara yabisa. Matiu 5:14-16 aisi kaiks.