LISIN 8
¿Dîa muni Gâd swin saurka lâka bara pât wahwanka bâra kabia?
1. ¿Saurka lâka ba nahki tâ krikan?
Jehova swin sa gabamint nani ba king aimakbia, baku kaikan sa upla trabilka nani sip wapnika mangkras
Sitan pas kunin aisan taim saurka lâka ba tâ krikan. Witin ba insal pain kum kan, sakuna “kasakka lâka ra aibapi buras” kan (Jan 8:44). Witin ai kupia ra lukan upla nani ba witin ra mayunbia. Sakuna Gâd ra baman mayunaia sa. Sitan ba Iv ra kunin munan, bara yaban witin bîla walbia Gâd bîla walaia sirka ra. Adam Iv wal Gâd bîla lulkan. Baha daukan ba mita pât wahwanka bara prura ba balan. Blasi Sturka 3:1-6, 19 aisi kaiks.
Sitan mita Iv ra Gâd bîla lulkbia win taim, Gâd mapara buan. Gâd baman ai raitka brisa king aimakaia lâka ba. Upla aihkika ba Sitan wal Gâd mapara buisa. Baha mita, Sitan ba ‘naha tasba wihta sa’. Jan 14:30 bara 1 Jan 5:19 aisi kaiks.
2. ¿Gâd diara paskan ba tâ wina pat saura kan ki?
Gâd warkka nani sut ba kasak pali sa. Upla nani bara insal nani ba Gâd mita paskan ba sip kan Witin bîla walaia (Kli Smalkanka 32:4, 5). Gâd upla nani ra pri lâka kum yaban. Baha mita, witin nani laki kaikaia sip kan diara pain apia kaka diara saura ba. Baha prika lâka ba sanska wankisa wan latwanka lâka Gâd ra marikaia. Jems 1:13-15, LRW bara 1 Jan 5:3.
3. ¿Dîa muni Gâd swin pât wahwanka ba naiwa piua kat ban takisa?
Piua kum kum ra, Jehova swin sa upla nani ba Witin mapara bubia. ¿Dîa muni? Baku upla nani ba ai tânka bribia Gâd hilpka ba wal baman sip sa king aimakaia (Smasmalkra 7:29; 8:9). Mani 6.000 ningkara, upla nani naha ba param kaikan sa. Waitna gabamintka nani ba war nani, rau munan lâka, diara yamni apia ba, baku sin siknis nani ba sip âpu daukras. Jirimaya 10:23 bara Impakan Sturka 9:16 aisi kaiks.
Gâd ba tasba gabamintka nani baku apia sa. Witin upla nani ra yamni munisa (Aiseya 48:17, 18). Tisku pali, Jehova gabamint nani sut âpu daukbia. Ya Gâd Kingka lâka tâ baiki ba baman naha tasba ra iwbia (Aiseya 11:9). Daniel 2:44 aisi kaiks.
4. Gâd wihka bîla kaikanka lâka ba, ¿nahki hilp wan munisa?
Sitan win upla nani ba Gâd kupia lâka daukisa Witin blisin muni ba mita, latwan kaiki ba lika apia. ¡Baha ba kunin kum sa marikaia sip sma! Gâd wihka bîla kaikanka lâka ba sanska wankisa marikaia Gâd yawan ra wan tâ brisa apia kaka tasba gabamintka nani ba. Wan daukanka nani wal baha marikaia sip sa. Job 1:8-12 bara Sins Lâka 27:11 aisi kaiks.
5. ¿Nahki Gâd ba wan Kingka baku briaia sip sa?
Yawan dîa dauki ba wal marikisa Gâd wan Kingka sa sapa
Gâd wan Kingka baku briaia sip sa Witin ra mayunisa bara Baibil dîa wi ba kat daukisa kaka (Jan 4:23). Sitan wina plapaia sip sa pulitik dukia nani bara war wina sait ra kaia sa, Jisas daukan baku. Jan 17:14 aisi kaiks.
Sitan ai karnika ba yus munisa rug lâka bara daukanka saura nani tâ baikaia dukiara. Yawan naha wina sait ra sa taim, ban kra wan pânika apia kaka wan pamalika ba wan lawaska kikbia bara wan mapara bubia (1 Pita 4:3, 4). Baku sa kaka, ¿yawan dîa daukbia? ¿Gâd uplika nani lamara kabia? Jehova sinskira bara latwankira sa. Baha mita, ¿ai lâka nani wanki ba alki daukbia? Baha daukbia kaka, marikbia Sitan ba kuninkira sa. Kan witin win upla kum traika kaikanka tilara kaka, Gâd ra kasak kaia sip apia. 1 Korint 6:9, 10 bara 15:33 aisi kaiks.
Gâd ba upla nani ra latwan kaiki ba mita, yawan kasak lukisa saurka bara pât wahwanka ba âpu kabia. Ya nahara kasak luki ba naha tasba ra ban kaia ra iwbia. Jan 3:16 aisi kaiks.
