LISIN 2
¿Gâd ba ya sa ki?
1. ¿Dîa muni Gâd ra mayunaia sa?
Rait aihwa Gâdka ba diara sut paskan. Gâd ba rayaka tâ âpu bara tnata sin âpu (Lawana 90:2). Sturi yamni nani ba Gâd wina balisa (1 Timoti 1:11). Gâd wan rayaka wankan ba mita Witin ra baman mayunaia sa. Param Marikanka 4:11 aisi kaiks.
2. ¿Gâd ba dîa sât uplika sa?
Upla kumi sin Gâd ra sip kaikras, kan Witin ba Spirit kum sa. Naha wiaia want sa Witin rayaka sâtka ba kau tara sa upla nani ba wal (Jan 1:18; 4:24). Sakuna yawan Gâd daukanka nani paskanka bâk kaikaia sip sa. Sampla baku, dus mâ ailal bara tangni nani ba Witin latwanka lâka bara sinska lâka wan marikisa. Heven yahpika ba wan marikisa Witin karnika ba. Roman 1:20 aisi kaiks.
Yawan Gâd daukanka nani kau pain kakaira takaia sip sa Baibil aisi kaiki ba wal. Sampla baku, naha ba wan marikisa Gâd dîa yamni kaiki apia kaka kaikras ba. Upla nani ra nahki yamni munisa bara Witin dîa daukisa upla nani ba diara pain apia kaka saura daukisa piua ra. Lawana 103:7-10 aisi kaiks.
3. ¿Gâd ba ai nina kum brisa ki?
Jisas win: “Yawan Aisa kasbrika purara sma ba, ninam ba holikira kulkan kabia” (Matiu 6:9). Gâd ai nina pali brisa. Bîla aisanka bani ra Gâd nina ba sât wala mâkisa. Miskitu bîla ra “Jehova” mâkisa. Lawana 83:18 SLN aisi kaiks.
Gâd nina ba Baibil ailal wina diki sakan sa, bara naha sirka ra nina wala ulban sa Dawan apia kaka Gâd mâkisa. Sakuna Baibil ulban taim, Gâd nina ba aima 7.000 baku taki kan. Jisas upla ra smalkan Gâd tânka kasak bara ai nina ba sin. Jan 17:26, LRW aisi kaiks.
4. ¿Jehova yawan dukiara lukisa?
Naha aisa latwankira baku, Gâd wan yamnika ra lukisa
¿Naha tasba ra uba trabil ailal bâra ba mita Gâd yawan dukiara lukras wan marikisa? Upla kum kum wisa Gâd ba diara saura wal wan traika kaikisa, sakuna baha ba kunin sa. Jems 1:13, LRW aisi kaiks.
Gâd mita upla ra pri lâka yaban sa dîa daukaia want ba silp laki kaikbia dukiara. Baha prika lâka yus munaia sa Witin kupia lâka daukaia (Jasua 24:15). Sakuna upla ailal ba ai prika lâka yus munisa upla wala ra saura munaia dukiara, baha mita upla ailal pât wahwisa. Baha mita, Jehova sari ai dara walisa. Blasi Sturka 6:5, 6, ALM aisi kaiks.
Jehova yawan dukiara lukisa. Witin want sa yawan lilia kabia. Tisku pali pât wahwanka ba âpu kabia bara upla saurakira nani ba sin. Gâd ai raitka brisa dîa muni pât wahwanka ba takbia ba swiaia. Lisin 8 ra kau baha dukiara lan takbia. 2 Pita 2:9 bara 3:7, 13 aisi kaiks.
5. ¿Nahki kau Gâd lamara waia sip sa?
Jehova mai paiwisa pura sunra bâk Witin lamara wama. Gâd yawan kumi bani ra lukisa (Lawana 65:2; 145:18). Witin wilin sa wan saurka nani ban swih tikaia. Piua kum kum ra saura daukbia sin, Jehova pain ai tânka brisa yawan Witin dukiara dauki ba. Baha mita upla mistikkira kabia sin Witin wal pâna lâka pain kum briaia sip sa. Lawana 103:12-14 bara Jems 4:8 aisi kaiks.
Jehova wan rayaka ba wankan ba mita, Witin ra kau latwan kaikaia sa upla wala ba wal (Mark 12:30). Jehova wina kau lan takisa ba ra, baku sin dîa makabi ba daukisa kaka, kau Witin lamara wabia. 1 Timoti 2:4 bara 1 Jan 5:3 aisi kaiks.
