LISIN 7
¿Gâd Kingka lâka ba dîa sa ki? ¿Gâd Kingka lâka ba dîa sa ki?
1. ¿Gâd Kingka lâka ba dîa sa ki?
¿Dîa muni Jisas ba King pain kum sa? (MARK 1:40-42.)
Gâd Kingka lâka ba gabamint kum sa heven ra. Naha ba gabamint wala nani ra âpu daukbia bara Gâd kupia lâka daukbia heven ra bara naha tasba ra sin. Gâd Kingka lâka sturka ba yamni pali sa. Tisku Gâd Kingka lâka ba upla nani ra gabamint pain kum yabia. Baku sin, naha ba daukbia upla nani ba asla lâka ra iwbia naha tasba ra. Daniel 2:44 bara Matiu 6:9, 10; 24:14 aisi kaiks.
King lâka bani ba ai kingka kum brisa. Jehova ai Kingka lâka ba Jisas mihta ra mangkan sa. Param Marikanka 11:15 aisi kaiks.
2. ¿Dîa muni Jisas ba King pain kum sa?
Jisas ba King pain kum sa, kan witin kupia pihnikira sa. Baku sin, diara pain nani daukisa (Matiu 11:28-30). Bara ai karnika brisa upla nani ra hilp munaia dukiara. Jisas heven wina naha tasba purara king aimakbia. Witin pruan wina buan ningkara, heven ra wan bara Jehova mihta aihkika ra wih iwan (Hibru Nani 10:12, 13). Las ba ra, Jehova Jisas ra karnika yaban king aimakbia dukiara. Daniel 7:13, 14 aisi kaiks.
3. ¿Ya nani Jisas wal king aimakbia?
Upla kum kum ra “Gâd Laih Purara iwi ba uplika nani [“upla holi nani ba”, Traducción del Nuevo Mundo de las Santas Escrituras (con referencias)]” mâkisa. Witin nani Jisas wal king aimakbia heven ra (Daniel 7:27). Holi uplika pas nani ba Jisas apastilka nani kan. Jehova ban naiwa piua kat upla kasakkira nani ra wahbi sakan. Bara holikira baku kulkisa. Witin nani Jisas baku heven ra spirit uplika baku bukbia. Jan 14:1-3 bara 1 Korint 15:42-44 aisi kaiks.
¿Upla an heven ra wabia ki? Jisas witin nani ra ‘dakni sirpi’ mâkan (Luk 12:32). Witin nani ba upla 144.000 banhwisa. Jisas wal king aimakbia naha tasba purara. Param Marikanka 14:1 aisi kaiks.
4. Jisas king aimakaia tâ krikan taim, ¿dîa takan?
Gâd Kingka lâka ba 1914 manka ra tâ krikan. * Jisas pas daukan ba sika Sitan bara ai lasika nani wal naha tasba ra lulkan. Sitan ai kupia baikan bara naha tasba ra trabil ailal bukan (Param Marikanka 12:7-10, 12). Baha piua wina, upla trabilka nani ba kau ailal takan sa. Sampla baku, war, plun wahwan, siknis saura nani bara tasba nikbanka ba “sainka” tilara sa bara wan marikisa King lâka ba tisku pali upla trabilka nani âpu daukbia. Luk 21:7, 10, 11, 31 aisi kaiks.
5. ¿Gâd Kingka lâka ba dîa daukbia?
Tasba aiska ra Gâd Kingka lâka sturka nani smalki ba mita upla ailal nisan sât sât wina asla lâka ra iwisa. Upla bawikira milian milian ba Jisas nina blablikra takisa. Gâd Kingka lâka ba witin nani ra main kaikbia upla saura nani sauhki tikan kabia piua ra. Baha mita, ya Gâd Kingka lâka mununhtara iwaia want ba Jisas bîla walaia sa. Param Marikanka 7:9, 14, 16, 17 aisi kaiks.
Mani 1.000 bilara, Gâd Kingka lâka ba Jehova kupia lâka daukbia naha tasba ra. Tasba aiska ba paradais kum kabia. Baha wina, Jisas ai Aisa ra ai Kingka lâka ba kli yabia (1 Korint 15:24-26). ¿Upla kum Gâd Kingka lâka dukiara lan takaia want ba kakaira sma ki? Lawana 37:10, 11, 29 aisi kaiks.
^ baiki.s 6 Mani 1914 ra Baibil dahra aisanka nahki tnata aimakan ba kau nu takaia want sma kaka, Rait pali Baibil ba Dia Smalkisa ki? bukka, wahia 215 wina 218 ba kat laki kaiks.
